Dirava Lalokau Henia Ena Anina be Dahaka?

LAGANI 6,000 gunanai bamona, beibi ginigunana ia vara. Ia vara murinai, iena sinana, Heva, ia gwau: “Lohiabada ena durua dekenai mero ta lau abia vadaeni.” (Genese 4:⁠1) Iena hereva ia hahedinaraia, ena be edia gwau-edeede dainai Dirava be edia mase davana ia gwauraia, to Heva bona ena adavana, Adamu, ese Iehova ena dagi badana idia do laloa noho. Gabeai mero iharuana idia havaraia. Unai memero edia ladadia be Kaino bona Abela.

Edia memero idia tubu daekau neganai, toana be Iehova ena lalokau idia dibaia iena havaraia gaudia amo. Idia itaia mauri gaudia edia kala mai hairaidia bona animal bona tubutubu gaudia idauidau edia momo idia moalelaia. Dirava ese idia dekenai mauri ia henia sibona lasi to edia mauri moalelaia dibana ia henia danu.

Idia diba Iehova ese edia tama sina ia havaraia neganai idia goeva, bona iena ura ginigunana be taunimanima do idia mauri ela bona hanaihanai. Adamu bona Heva ese guna idia noholaia uma mai hairaina, Eden, be idia dekenai idia herevalaia, bona paradaiso amo Dirava ese idia ia lulua ena badina idia gwauraia hedinarai toho. Reana Kaino bona Abela be Dirava ena peroveta herevana, Genese 3:​15 ai, idia diba vadaeni. Unai peroveta herevana amo Iehova ese ena ura, gau ibounai hanamoa urana, ia idia lalokau henia bona ia idia badinaia taudia totona ia hahedinaraia.

Kaino bona Abela ese Iehova bona ena kara dekenai diba idia abia neganai, unai diba be idia ia ha-uraia Dirava ena lalo-namo idia tahua totona. Unai dainai Iehova kahirakahira dekenai idia lao edia boubou karadia amo. Baibel sivaraina ia gwau: “Dina ta Kaino ese uma ena anina haida ia mailaia, Lohiabada dekenai ia henia, boubou gauna totona. Inai murinai Abela danu ese iena mamoe, vara guna gaudia, digara gaudia ia mailaidia.”​—⁠Genese 4:​3, 4.

Unai Dirava ena lalo-namo idia tahua urana ese ia idia tura henia ena badina ia haginia. Gabeai, Kaino ese Dirava ia gwau-edeede henia, to Abela ese Dirava ia do lalokau henia noho. Abela be Dirava ida unai bamona turana karaia do ia karaia lasi bema Iehova ena kara bona ena ura ia dibaia guna lasi.

Oi danu ese Iehova oi dibaia diba. Hegeregere, Baibel amo do oi dibaia Dirava be momokani, ia be gau ia havaraidia kava mauri lasi siahuna ta lasi. (Ioane 7:​28; Heberu 9:​24; Apokalupo 4:​11 itaia.) Baibel ese ia hahedibalaia gauna ma ta be inai: Iehova be ‘bogahisihisi bona hariharibada Diravana. Ia be badu dekenai ia haraga lasi, to bogahisihisi bona lalokau dekenai ia be haraga.’​—⁠Esodo 34:⁠6.

“Kamonai Henia Kara, ese Boubou Karadia Ia Hereaia”

Kaino bona Abela edia sivarai ese ia hahedinaraia, Dirava oi diba bona oi ura ia oi tura henia sibona be hegeregere lasi. Momokani, unai memero ruaosi be mai edia boubou gaudia ida Dirava dekenai idia lao. To, “Lohiabada ese Abela ena harihari gauna dekenai ia moale, to Kaino, mai ena boubou gauna ia abia dae lasi. Kaino be ia badu maragi lasi, bona badu dainai iena vairana ia metau.”​—⁠Genese 4:​3-5.

Dahaka dainai Iehova ese Kaino ena boubou gauna ia dadaraia? Iena boubou gauna be namona ta lasi dainai, a? Iehova ia badu badina Kaino ese “uma ena anina” ia henia bona animal boubouna ia henia lasi dainai, a? Reana lasi. Gabeai, mai moale ida Dirava be ia idia tomadiho henia taudia momo amo uiti bona uma ena anina ma haida ia abia dae. (Levitiko 2:​1-​16) Unai dainai, toana be Kaino ena lalona ai gau ta ia dika. Iehova ese Kaino ena lalona ia duahia bona ia sisiba henia, ia gwau: “Badina be dahaka oi badu noho? Badina dahaka oiemu vairana ia metau noho? Bema kara namo oi karaia vadaeni, be oiemu boubou do lau abia dae. To dika oi karaia vadaeni dainai, kara dika be oiemu iduara dekenai ia naria noho, oi do ia hadikaia totona.”​—⁠Genese 4:​6, 7.

Dirava lalokau henia momokani ena anina be boubou do ita henia sibona lasi. Unai dainai Iehova ese Kaino ia hagoadaia, ia gwau, “kara namo oi karaia.” Dirava be kamonai karana ia ura. Unai bamona Dirava kamonai henia karana ese Kaino do ia durua ena Havaraia Tauna dekenai badina namona ia haginia idia hetura heheni totona. Baibel be kamonai karana ena namo ia hahedinaraia inai hereva amo: “Edena kara be Lohiabada ia ura henia bada, a? Idia gabua boubou, bona boubou idauidau ia ura henia, a? Lasi, Lohiabada ena hereva idia kamonai henia taudia, be ia ura henia, ani? Oi laloa namonamo: Lohiabada kamonai henia kara, ese boubou karadia ia hereaia, bona Lohiabada ena hereva badinaia kara, ese mamoe namodia edia digara ia hereaia.”​—⁠1 Samuela 15:⁠22.

Gabeai unai lalohadai idia hamomokania herevadia be 1 Ioane 5:3 ai, ia gwau: “Badina be Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.” Iseda lalokau Iehova dekenai ita hahedinaraia dalana hereadaena be iena lohia siahuna henunai ita sibona ita atoa. Ena anina be Baibel ena kara maoromaoro taravatudia ita badinaia. (1 Korinto 6:​9, 10) Ena anina be kara namo do ita lalokau henia bona kara dika do ita inai henia.​—⁠Salamo 97:10; 101:3; Aonega Herevadia 8:​13.

Dirava lalokau henia karana hahedinaraia dalana badana ta be iseda dekena tauna ita lalokau henia. Baibel ese ita ia hamaoroa, ia gwau: “Tau ta bema ia gwau, ‘Lau ese Dirava lau lalokau henia,’ to ia ese iena tadikakana ia badu henia, unai tau be koikoi tauna. Badina be iena tadikakana, ia itaia diba tauna, bema ia ura henia lasi, edena bamona ia itaia diba lasi Diravana do ia ura henia diba?”​—⁠1 Ioane 4:​20.

Dirava ida Hetura Heheni Dalana Ia Noho

Reana haida do idia gwau, ‘Iehova lau tomadiho henia. Iena taravatu lau badinaia. Mai ena maoro ida egu dekena tauna lau kara henia. Unai gaudia ibounai lau karaia vadaeni. To, egu hemami be Dirava kahirakahira lau noho lasi. Egu lalokau mamina ia dekenai be goada lasi dainai, egu lalona ia hisihisi.’ Reana haida idia laloa idia hegeregere lasi Iehova tura henia totona.

Lagani 37 lalonai Iehova ena hesiai gaukara ia karaia Keristani tauna ta ia torea, ia gwau: “Nega haida lau laloa egu hesiai gaukara Iehova dekenai be lau karaia sibona, to mai egu kudouna ibounai ida lau karaia lasi. To lau diba Iehova hesiai gaukara lau karaia be maoro dainai, lau hadokoa lasi. To, bema ma ta ena sivarai lau duahia bona ia gwau, ‘egu kudouna be Iehova lalokau henia karana amo ia honu,’ lau laloa, ‘Unai bamona hemami lau do abia lasi dainai, egu kerere be dahaka?’ ” Dirava ena hetura be edena bamona ita davaria?

Bema oi ese tau ta oi lalokau henia momokani, nega momo ia do oi lalohadailaia. Oi ura dikadika ia kahirakahira dekenai oi noho badina be ia oi ura henia. Bema nega momo ia oi itaia, ia oi hereva henia, bona ia oi lalohadailaia, unai murinai emu lalokau ia dekenai do ia bada ia lao. Emu lalokau Dirava dekenai oi habadaia totona, unai hereva be mai anina bada.

Salamo 77:​12 ai, lauma ena siahu amo ia torea tauna ia gwau: “Oiemu gaukara ibounai do lau laloa noho, bona oiemu siahu karadia danu do lau laloa.” Laloa namonamo karana be gau badana, iseda lalokau Dirava dekenai ita habadaia totona. Unai be momokani, badina be Dirava ita itaia diba lasi. To bema ia oi laloa momo, do ia momokani oi dekenai. Unai neganai sibona emu kudou lalonai Dirava tura henia karana do oi mamia​—⁠badina oi diba Dirava be momokani ia noho.

Iehova ena dala bona ena kara be nega momo do oi ura oi laloa namonamo bema hanaihanai ia oi kamonai henia. Iena Hereva, Baibel, oi duahia bona stadilaia loulou karana amo ia oi kamonai henia. Salamo torea tauna ese moale tauna ia gwauraia, ia be ‘Lohiabada ena Taravatu dekenai ia moale, bona Lohiabada ena Taravatu ia laloa, dina bona hanuaboi ibounai lalonai.’​—⁠Salamo 1:​1, 2.

Ma gau badana ta be guriguri. Unai dainai Baibel ese ita ia hagania loulou namona be ita guriguri​—⁠“nega ibounai,” ‘nega umui atoa guriguri goadalaia totona,’ ‘guriguri do umui goadalaia noho,’ bona ‘nega ibounai do umui guriguri.’ (Efeso 6:​18; 1 Korinto 7:5; Roma 12:12; 1 Tesalonika 5:​17) Iehova ita guriguri henia hanaihanai dainai, Ia ese ita do ia ura henia, bona ita diba do ia kamonai dainai ia kahirakahira dekenai do ita lao. Salamo torea tauna ese unai ia hamomokania, ia gwau: “Lohiabada ese egu guriguri bona egu noinoi ia kamonai noho, unai dainai ia dekenai lau lalokau henia. Lau be Lohiabada dekenai lau boiboi negadia ibounai, ia ese lau dekenai ia kamonai.”​—⁠Salamo 116:​1, 2.

Lalokau Diravana Tohotohoa

Iehova ese ita ia kara namo henia. Ia be tanobada bona guba edia Havaraia Tauna dainai, unai gaudia idauidau momo ia laloa bona ia naria noho. To, Baibel ese ita ia hamaoroa, ena be iena siahu be bada herea, iena havaraia taudia, taunimanima, ia naria noho. Ita ia lalokau henia. (1 Petero 5:​6, 7) Salamo torea tauna ese unai ia hamomokania iena hereva amo: “Lohiabada e, aiemai Lohiabada, tanobada ena kahana ibounai lalonai, oiemu ladana be namo herea. Oiemu hairaina, be guba dekenai oi atoa vadaeni. Oiemu guba lau itaia, oi ese oiemu imana dekenai oi karaia. Hua bona hisiu danu be oi ese oi atoa. Taunimanima be dahaka, oi ese idia oi laloa noho? Taunimanima be maragi herea, dahaka dainai oi ese oi naridia noho?”​—⁠Salamo 8:​1, 3, 4.

Edena dala ai Iehova ese taunimanima ia laloa noho? Baibel ia haere, ia gwau: “Dirava ese iena lalokau ita dekenai, be inai bamona ia hedinaraia: Ia ese iena Natuna tamona tanobada dekenai ia siaia, ia dekena amo mauri do ita abia totona. Lalokau ena anina be inai: Ita ese Dirava ita lalokau henia lasi, to Dirava ese ita ia lalokau henia. Bona ia ese iena Natuna ia siaia, ia sibona be iseda dika gwauatao dalana totona.”​—⁠1 Ioane 4:​9, 10.

Dahaka dainai unai dika gwauatao dalana be Dirava ena lalokau hamomokania dalana hereadaena? Namona be Eden umana ai ia vara gauna ita laloa. Adamu bona Heva be edia lalona idia hadaia be namo; Iehova ena taravatu do idia badinaia bena mauri goevadaena hanaihanai do idia abia, eiava Iehova do idia gwau-edeede henia bena do idia mase. Idia be gwau-edeede karana idia abia hidi. (Genese 3:​1-6) Edia kara dainai tanobada taudia ibounai dekenai mase idia mailaia. (Roma 5:​12) Mai edia hekokoroku ida iseda abia hidi dalana idia henaoa bamona. Ita ta lasi ese unai ita koua diba.

To, Iehova be mai ena lalokau ida tanobada taudia ia laloa noho, edia hekwakwanai ia diba. Iena Natuna, Iesu Keriso, ena boubou amo Iehova ese dala ta ia kehoa ena taravatu hegeregerena, ita ta ta sibona be mauri eiava mase, kamonai eiava gwau-edeede ita abia hidi totona. (Ioane 3:​16) Ia be hegeregere Iehova be ita dekenai nega ia henia iena kota dekenai​—⁠Eden lalonai ita noho bamona, bona iseda lalona ita hadaia diba. Unai be lalokau hahedinaraia karana hereadaena.

Iehova ena lalohisihisi, iena vara guna natuna idia samania kava, idia hahisia, bona satauro dekenai idia hamasea raskol dikana bamona neganai, be mani oi laloa. Dirava ese unai gaudia ia haheaukalaia ita dainai. Iehova ese ita ia lalokau henia guna be ita laloa neganai, namona be unai diba ese ita ia ha-uraia ia ita lalokau henia bona ia ita tahua totona. (Iamesi 1:​17; 1 Ioane 4:​19) Baibel ese ita ia boiria “durua totona Lohiabada dekenai ita lao be namo, bona Lohiabada kahirakahira do ita noho nega ibounai be namo. . . . Dirava ese ia karaia kara badadia do umui laloa, bona tau dikadia edia kerere davana be Dirava ese ia henia, be unai danu do umui laloa.”​—⁠Salamo 105:​4, 5.

Dirava kahirakahira dekenai ita lao bona mai eda lalokau ida ia ita tura henia be nihi ta bamona lasi. Ia vara diba. Momokani, iseda lalokau Dirava dekenai be iseda lalokau taunimanima dekenai hegeregerena lasi. Iseda adavana, tama sina, natudia totona, eiava iseda turadia ita henidia lalokau be idau bona iseda lalokau Dirava dekenai be idau. (Mataio 10:37; 19:29) Iehova ita lalokau henia ena anina be ia ita badinaia, bona tomadiho henia, bona iseda mauri be ia dekenai do ita gwauhamatalaia. (Deuteronomi 4:​24) Ma ta dekenai unai bamona hetura karana do ita karaia lasi. To, hemami dobudia bona goadadia ita havaraia diba Dirava dekenai, mai eda hemataurai bona mai eda gari ida.​—⁠Salamo 89:⁠7.

Ena be oi be goevadae tauna lasi, to Kaino bona Abela bamona emu Havaraia Tauna oi lalokau henia diba. Kaino ese ena lalona ia hadaia, Satani ena kahana ia abia dae, bena ia be ala-ala tauna ginigunana ai ia lao. (1 Ioane 3:​12) To Abela be idau, Iehova ese unai abidadama bona kara maoromaoro tauna do ia laloatao bona Paradaiso ai do ia hamauria lou.​—⁠Heberu 11:⁠4.

Oi danu emu lalona oi hadaia diba. Dirava ena lauma bona ena Hereva edia heduru amo, Dirava do oi lalokau henia diba, “mai oiemu kudouna ibounai, mai oiemu lauma ibounai, bona mai oiemu goada ibounai danu.” (Deuteronomi 6:⁠5) Bena, Iehova ese oi do ia lalokau henia noho, badina be “Dirava idia tahua taudia ibounai, be davana namona Dirava ese do ia henidia.”​—⁠Heberu 11:⁠6.

[Picture on page 7]

Dirava ese Abela ena boubou gauna ia abia dae