Gima Kohorona INTANET LAIBRI
Gima Kohorona
INTANET LAIBRI
Hiri Motu
  • BAIBEL
  • PABLIKEISEN
  • HEBOUDIA
  • w98 5/15 rau 21-23
  • Lalona Veria Herevadia amo Edia Kudouna Oi Hamarerea

Oi abia hidi kahana ena vidio ia noho lasi.

Sori, hekwakwanai ia vara vidio ia loud totona.

  • Lalona Veria Herevadia amo Edia Kudouna Oi Hamarerea
  • 1998 Gima Kohorona Iehova Ena Basileia Ia Harorolaia
  • Sinado maragidia
  • Inai Bamona Atikol
  • Haroro Gaukara Lalonai Lalona Veria Herevadia Gaukaralaia
  • Hemami Idauidau Laloa
  • Haida Edia Lalona Veria Dalana
    Iseda Basileia Gaukara—2001
  • Emu “Hadibaia” Karana Oi Naria Namonamo
    2008 Gima Kohorona Iehova Ena Basileia Ia Harorolaia
  • Baibel Stiuden Oi Durua Ia Bapatiso Totona
    Gima Kohorona Iehova Ena Basileia E Herevalaiamu (Stadi)—2021
  • Oiemu Baibel Stadi Tauna Ena Kudouna Oi Hamarerea
    Iseda Basileia Gaukara—1993
Ma Haida Itaia
1998 Gima Kohorona Iehova Ena Basileia Ia Harorolaia
w98 5/15 rau 21-23

Lalona Veria Herevadia amo Edia Kudouna Oi Hamarerea

TAUNIMANIMA momo ese inai hereva “lalona veria” idia ura henia lasi. Reana ta ese unai hereva ia kamonai neganai, mai ena doria karana ida gau ta ia hoihoilaia tauna ta eiava gau ta hoihoilaia totona idia hahedinaraia laulau mai edia koikoi bona doria herevadia ia laloa. Baibel lalonai danu, nega haida lalona veria be lalohadai mai ena mamina dikana ia hahedinaraia, ta ese hadikaia karadia eiava kara kereredia dekenai ta ia hakaua lao. Hegeregere, Keristani aposetolo Paulo ese Galatia taudia ia tore henia, ia gwau: “Guna be Keriso ena dala dekenai umui raka namo herea. Daika ese emui dala ia hadikaia, vadaeni hereva momokani umui badinaia lasi, a? Edena bamona umui emui lalona ia [veria]? Dirava ese inai bamona ia karaia lasi, badina be ia ese umui ia boiria vadaeni.” (Galatia 5:7, 8) Paulo ese Kolose taudia ia sisiba henia danu, do idia naria ta ese lalona veria herevadia amo idia do ia koia garina. (Kolose 2:4, NW) Unai bamona lalona veria herevadia be badina kererena dekenai idia haginia aonega herevadia.

To, Timoteo dekenai revareva iharuana ia torea neganai, aposetolo Paulo ese lalona veria lalohadaina be dala idauna ai ia gaukaralaia. Ia gwau: “Oi ese oi dibaia bona emu lalona idia veria bona oi abia dae vadaeni gaudia oi badinaia noho, badina oi idia hadibaia taudia oi diba.” (2 Timoteo 3:14, NW) Timoteo ese ena sinana bona ena tubuna amo Baibel ena hereva momokani ia dibaia, to ena “lalona idia veria” neganai, idia ese ia idia doria lasi.​—2 Timoteo 1:5.a

Roma dekenai, ruma ta ai Paulo idia koua neganai, ia ese taunimanima momo dekenai daba ia lao hanuaboi Mose ena taravatu bona peroveta taudia edia buka dekena amo ia ese Iesu ia gwauraia hedinarai neganai, lalona veria herevadia ia gaukaralaia. (Kara 28:​23, NW) Paulo ese ena hereva idia kamonaia taudia ia hakaua kerere, a? Lasi vaitani! Vadaeni ia hedinarai goevagoeva, lalona veria karana be nega ibounai ia dika lasi.

Lalohadai namona ta hahedinaraia totona idia gaukaralaia neganai, Greek herevana idia hahanaia “lalona veria” ena anina be hadibaia namonamo karana, hereva maorodia amo ta ena lalona haidaua karana. Unai dainai hadibaia tauna ese Baibel ena badina herevadia ia hahedinaraia diba, ia ese lalona veria herevadia ia gaukaralaia ma haida ese Baibel ena hereva momokani do idia abia dae momokani totona. (2 Timoteo 2:​15) Momokani, unai kara be Paulo ena hesiai gaukarana lalonai ia hedinarai. Siliva gaudia ia karaia tauna Demetrio, ia laloa Keristani hahediba herevadia be koikoi, to ia danu ia gwau: “Paulo ese taunimanima momo herea edia lalona ia [veria], bona ia ese idia ia hakaua siri, Efeso hanua dekenai sibona lasi, to Asia tano ibounai dekenai danu. Ia gwau taunimanima edia imana dekenai idia karaia dirava be dirava korikori lasi.”​—Kara 19:26.

Haroro Gaukara Lalonai Lalona Veria Herevadia Gaukaralaia

Iesu Keriso ese ena murinai idia raka taudia ia hadibaia, ia gwau: “Do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia. Bona do umui kamonai bona laloa noho, lau be hanaihanai umui danu ita noho ela bona tanobada dokona.” (Mataio 28:19, 20) Tano 230 bona ma haida ai, Iehova ena Witness taudia ese unai hahegani idia badinaia. Edia hesiai laganina 1997 lalonai, hua ta ta iboudiai tanobada hegegemadai idia karaia Baibel stadi edia averes be 4,552,589.

Bema oi be Baibel stadi ta oi karaia, reana oi diba hekwakwanai haida dainai, lalona veria herevadia do oi gaukaralaia be namo. Hegeregere, reana vaira stadi lalonai, Toi Tamona herevana dekenai henanadai ta ia vara. Edena bamona bema oi diba oiemu stiuden ese unai hahediba herevana ia abia dae? Ia dekenai Toi Tamona ia herevalaia buka o magasin ta oi henia diba. Ia duahia murinai, reana do oi davaria unai ese ena lalona ia veria vadaeni bona hari ia abia dae Dirava bona Iesu be tamona lasi. To bema ia be mai ena henanadai ma haida, dahaka do oi karaia diba?

Kamonai namonamo. Unai ese oi ia durua umui herevalaia gauna dekenai emu stiuden ena lalohadai oi diba totona. Hegeregere, bema oiemu stiuden ia gwau, “Lau ese Toi Tamona herevana lau abia dae,” reana karaharaga Baibel amo siri haida oi gwauraia unai hahediba herevana oi gorea totona. To Toi Tamona dekenai taunimanima edia lalohadai be idauidau. Reana oiemu stiuden ena lalohadai be idau bona Toi Tamona hahediba herevana oi laloa dalana be idau. Reana unai be momokani ma hahediba herevadia haida dekenai danu, hegeregere mauri loulou, soul ia mase diba lasi, bona hahemauri herevadia. Unai dainai oi do hereva lasi neganai, oi kamonai namonamo be namo. Karaharaga oi laloa lasi stiuden tauna ena lalohadai oi diba vadaeni.​—Aonega Herevadia 18:13.

Henanadai henia. Reana inai bamona henanadai: ‘Oi maragi negana amo Toi Tamona herevana oi abidadama henia, a? Baibel ena lalohadai unai hereva dekenai oi tahua namonamo vadaeni, a? Bema Dirava be toi tamona ena kahana ta, ena Hereva, Baibel, ese ita dekenai unai do ia hahedinaraia goevagoeva, ani?’ Stiuden tauna oi hadibaia neganai, nega ta ta inai bamona henanadai oi henia: ‘Ita herevalaia vadaeni gaudia ibounai edia anina oi lalo-pararalaia, a?’ ‘Inai hereva oi abia dae, a?’ Henanadai oi gaukaralaia namonamo neganai, oi ese hadibaia gaukarana lalonai stiuden tauna ena lalona oi veria. Namo lasi oi ese gau ta oi herevalaia bona ia kamonai sibona.

Lalohadai maorodia gaukaralaia. Hegeregere, Toi Tamona hahediba herevana oi herevalaia neganai, emu stiuden dekenai oi gwau diba: ‘Iesu be bapatiso ia abia neganai, guba amo gado ta ia gwau: “Oi be lauegu Natuna, lauegu lalokau, lau be lau moale oi dekenai.” Bema Dirava be tanobada dekenai bapatiso ia abia noho, ia ese ena gado regena do ia siaia, guba dekenai ia lao bona ia giroa, tanobada dekenai taunimanima ese idia kamonai totona, a? Unai ese taunimanima ia hakaua kerere, ani? Ia “koikoi diba lasi” Diravana ese unai bamona koikoi karana ia karaia diba, a?’​—Luka 3:​21, 22; Tito 1:​1, 2.

Nega momo, lalohadai maorodia be mai emu aonega ida oi hahedinaraia ese anina namona ia havaraia. Hahine ta, do ita gwauraia Barbara, mani oi laloa. Ena mauri ibounai lalonai ia abia dae Iesu be Dirava bona toi tamona ena kahana ta, ena kahana ma ta be lauma helaga. To gabeai Iehova ena Witness tauna ta ese ia hamaoroa Dirava bona Iesu be tamona lasi to rua, bona ia ese siri haida ia hahedinaraia unai hereva ia hamomokania totona.b Barbara ese Baibel ena hereva ia gorea diba lasi. To ia lalohisihisi danu. Ia lalohisihisi badina Toi Tamona hahediba herevana ia ura henia bada.

Unai Witness tauna ese mai ena haheauka ida Barbara danu unai gauna ia herevalaia. Ia henanadai: “Bema oi ura lau oi hadibaia taunimanima rua idia hegeregere, edena ruma bese taudia rua amo unai do oi haheitalaia?” Nega sisina ia laloa bena ia haere: “Reana tadikaka rua amo.” Witness tauna ia gwau: “Momokani. Reana idia hegeregere momokani hekapa taudia amo. To Iesu ese ita ia hadibaia Dirava ita laloa Tamana bamona bona ia ita laloa Natuna bamona neganai, edena lalohadai ia hahedinaraia ita dekenai?” Barbara ena matana idia bada idia lao bona ia haere: “Lau lalo-parara. Ia hahedinaraia ta be ia bada bona iena siahu ese ma ta ena siahu ia hanaia.”

Witness tauna ia haere: “Oibe, bona Iesu ena hereva idia kamonaia Iuda taudia be bese kwaradia edia siahu henunai idia noho bona unai do idia lalo-pararalaia haraga.” Ena hereva ia gwauraia hedinarai namonamo totona, Witness tauna be dokonai ia gwau: “Bema ita ese unai bamona haheitalai namona​—tadikaka eiava idia hegeregere momokani hekapa taudia​—ita gaukaralaia tatau rua idia hegeregere ita hadibaia totona, momokani Iesu, Hadibaia Tauna Badana, ese ia karaia diba danu. To, ia ese unai hereva ‘tamana’ bona ‘natuna’ ia gaukaralaia, ia sibona bona Dirava edia noho ia herevalaia totona.”

Vadaeni, Barbara ese unai hereva ia lalo-pararalaia, bona ia abia dae. Lalona veria herevadia ese ena kudouna idia hamarerea.

Hemami Idauidau Laloa

Nega momo ta be tomadiho hahediba herevadia ia abia dae momokani dainai, unai hereva dekenai ena hemami ia goada danu. Edna, Katolik hahine goadana, mani oi laloa. Ena tubuna memerodia ese Baibel amo idia hahedinaraia goevagoeva Dirava bona Iesu be anina tamona lasi. Edna ese ia kamonaia herevadia ia lalo-pararalaia. To, hemataurai dalana ai mai ena lalo-goada ida ia gwau: “Lau ese Toi Tamona helagana lau abia dae.”

Reana oi dekenai be unai bamona ia vara danu. Momo ese edia dubu ena hahediba herevadia idia abia dae edia mauri ena anina korikorina ena kahana ta bamona. Unai bamona Baibel stiuden edia lalona veria totona, ena lalohadai idia hakoikoia aonega herevadia eiava siri momo oi gwauraia sibona be hegeregere lasi. Unai neganai namona be lalona veria herevadia be mai hebogahisi ida oi gaukaralaia. (Roma 12:15; Kolose 3:​12 itaia.) Momokani, hadibaia tauna namona ese ia hadibaia herevadia ia diba momokani be gau badana. Hegeregere, Paulo ese inai hereva “lau diba momokani” ia gaukaralaia. (Roma 8:​38; 14:14) To, ita diba momokani gaudia ita hahedinaraia neganai, namona be hereva aukadia, sibona eda maoro heagilaia daladia, edia lalohadai kirikirilaia daladia, eiava kamonai taudia hahemaraia daladia ita gaukaralaia lasi, Baibel ena hereva momokani ita hadibaia totona. Ita ura lasi stiuden tauna ita habadua eiava hahemaraia.​—Aonega Herevadia 12:18.

Namona be stiuden tauna ena lalohadai ita matauraia bona ita lalo-parara ia be mai ena maoro unai lalohadai ia dogoatao totona. Manau be gau badana. Hadibaia tauna mai ena manau ia laloa lasi ia ese ena stiuden ia hereaia. (Luka 18:​9-​14; Filipi 2:​3, 4) Dirava ia henia lalona veria herevadia dekenai lalo-manau ia noho, ia be hegeregere ta ia gwau: ‘Iehova ese mai ena hebogahisi ida lau ia durua inai hereva lau lalo-pararalaia totona. Mani, oi dekenai lau hahedinaraia.’

Paulo ese ena Keristani tadikaka Korinto dekenai ia tore henidia, ia gwau: “Aiemai tuari gaudia be tanobada ena tuari gaudia bamona lasi. Lasi, to Dirava dekena amo ia mai siahuna ai ese ai gaukaralaia, ia ese tanobada ena siahu ia haorea diba. Hepapahuahu hereva koikoi ai koua noho. Bona Dirava ena diari idia tahua taudia edia dala koua gwauraia taudia danu ai koua noho. Ma inai danu, ai ese taunimanima edia laloa ai guia noho, Keriso do idia kamonai henia totona.” (2 Korinto 10:4, 5) Hari inai negai, Iehova ena Witness taudia ese Dirava ena Hereva idia gaukaralaia, hahediba koikoi herevadia, kara kereredia, bona Dirava ia ura henia lasi gaudia ibounai idia koua totona. (1 Korinto 6:​9-​11) Unai idia karaia neganai, Witness taudia idia laloaboio lasi Iehova ese mai lalokau ida ia hebogahisi henidia. Idia moale bada badina ena Hereva, Baibel, idia abia bona unai tulu mai ena siahu idia gaukaralaia hahediba koikoi herevadia idia koua totona bona lalona veria herevadia amo kudouna idia hamareredia totona!

[Footnotes]

a Inai Gima Kohorona ena rau 7-9 ai, hereva “Eunike Bona Loi​—Hadibaia Taudia Namodia” itaia.

b Ioane 14:28; Filipi 2:​5, 6, NW; Kolose 1:​13-​15 itaia. Hereva ma haida totona, Watchtower Bible and Tract Society of New York, Inc. ia halasia buklet Toi Tamona Oi Abia Dae be Namo, Eiava? itaia.

[Box on page 23]

Oiemu Stiuden Ena Kudouna Hamarerea

◻ Iehova ena heduru oi gurigurilaia, Baibel stiuden tauna ena kudouna oi hamarerea totona.​—Nehemia 2:​4, 5; Isaia 50:4.

◻ Stiuden tauna ia abia dae gaudia bona dahaka dainai hahediba koikoi herevadia ia ura henia oi lalo-pararalaia toho.​—Kara 17:22, 23.

◻ Hebogahisi bona haheauka dalana ai, umui laloa tamona gauna oi herevalaia bona ia abia dae haraga diba Baibel siridia oi hahedinaraia.​—Kara 17:24-​34.

◻ Bema ia hegeregere, haheitalai namodia amo Baibel ena hereva momokanidia oi haginia auka.​—Mareko 4:​33, 34.

◻ Stiuden tauna dekenai Baibel ena hereva momokani ia abia dae ena namo idauidau oi hahedinaraia.​—1 Timoteo 2:​3, 4; 2 Timoteo 3:​14, 15.

    Hiri Motu Pablikeisen (1987-2025)
    Log aut
    Login
    • Hiri Motu
    • Ta dekenai siaia
    • Preferens
    • Copyright © 2025 Watch Tower Bible and Tract Society of Pennsylvania
    • Gaukaralaia Taravatudia
    • Privacy Policy
    • Privacy Settings
    • JW.ORG
    • Login
    Ta dekenai siaia