Banaba—“Hahegoada Ena Natuna”

EDENA negai, emu turana ta ese oi ia hagoadaia? Oi ese vanegai ma ta oi hagoadaia negana oi laloatao, a? Nega ta ta ai, ita ibounai ita ura ta ese ita ia hagoadaia, bona mai lalokau ida unai idia karaia taudia ita laloa bada! Hahegoada henia ena anina be nega do ita atoa ita kamonai, ita lalo-parara bona heduru ita henia. Oi hegeregere unai oi karaia totona, a?

Unai bamona ura karana ia haheitalaia tauna ta be Banaba, ia “be tau namona, Lauma Helaga bona abidadama dekenai ia honu.” (Kara 11:24) Dahaka dainai Banaba be unai bamona idia herevalaia diba? Dahaka ia karaia dainai unai bamona idia gwauraia?

Harihari Bada Heduru Ia Henia Tauna

Iena ladana korikorina be Iosepa, to aposetolo taudia ese iena kara hegeregerena ai ladana ma ta idia henia​—⁠Banaba, anina be “Hahegoada Ena Natuna.”a (Kara 4:​36, NW) Keristani kongregesen be vanegai sibona idia haginia. Haida idia laloa Banaba be guna Iesu ena hahediba tauna ta. (Luka 10:​1, 2) Herevana unai be momokani eiava lasi, unai tauna ese kara namo ia hahedinaraia.

Pentekoste 33 C.E. murinai, Banaba, ia be Levi iduhu tauna Kupro amo, be sibona ena ura dainai ena tano ia hoihoilaia bona davana be aposetolo taudia dekenai ia henia. Dahaka dainai unai ia karaia? Kara bukana ena sivarai ese ita ia hamaoroa unai neganai Keristani taudia Ierusalema dekenai “ese ta ta dekenai idia henidia, edia ogogami hegeregerena.” Banaba ia itaia tadikaka idia dabu bona mai hebogahisi ida gau ta ia karaia. (Kara 4:​34-37) Reana ia be taga tauna, to Basileia ena gaukara durua totona ia daradara lasi, maoromaoro sibona ia henia bona iena kohu ia gaukaralaia.b Diba bada tauna F. F. Bruce ia gwau: “Banaba be edeseniai hahegoada idia abia be namo taudia ia davaridia eiava hekwakwanai ta ia vara neganai, ia henia diba hahegoada ia henia.” Gabeai ia vara gauna ese unai kara ia hahedinaraia.

Lagani 36 C.E. bamona ai, Taso tauna Saulo (gabeai aposetolo Paulo), hari ia be Keristani tauna ta, be Ierusalema dekenai ia noho kongregesen taudia ia bamoa toho, “to ibounai be ia dekenai idia gari, badina be idia hamomokania lasi ia be diba tahua tauna ta.” Edena bamona kongregesen taudia dekenai ia hahedinaraia diba iena mauri ia haidaua momokani bona ia koidia bona ia hadikaia totona ia mai lasi? “Banaba ese Saulo ia durua, aposetolo dekenai ia hakaua lao.”​—⁠Kara 9:​26, 27; Galatia 1:​13, 18, 19.

Dahaka dainai Banaba ese Saulo ia abidadama henia be idia gwauraia lasi. To, ena ladana hegeregerena, “Hahegoada Ena Natuna” ese Saulo ia kamonai henia bona ena hekwakwanai badana amo ia durua. Ena be Saulo be ena hanua Taso dekenai ia giroa lou, unai tatau rua huanai turana karana idia havaraia vadaeni. Gabeai lagani lalodiai, unai be mai anina bada.​—⁠Kara 9:⁠30.

Antioka Dekenai

Lagani 45 C.E. bamona ai, Ierusalema dekenai idia noho taudia idia kamonai Suria ena siti Antioka dekenai kara idauna ta ia vara noho​—⁠unai siti dekenai idia noho Greek gado idia veria taudia momo be Keristani taudia ai idia lao noho. Kongregesen ese Banaba idia siaia unai gauna do ia tahua, bona unuseniai gaukara ia naria totona. Idia ese abia hidi maorona idia karaia. Luka ia gwau: “Banaba ia ginidae neganai, Dirava ena hariharibada ia itaia, bona ia moale bada, bona ibounai dekenai ia hereva goada, idia ese mai edia kudouna ibounai Lohiabada do idia badinaia. Badina Banaba be tau namona, Lauma Helaga bona abidadama dekenai ia honu. Unai neganai taunimanima momo be Lohiabada ena orea dekenai idia vareai.”​—⁠Kara 11:​22-24.

Unai sibona ia karaia lasi. Diba bada tauna Giuseppe Ricciotti ia gwau, ‘Banaba be gaukara tauna, bona ia lalo-parara haraga do ia gaukara be namo unai kamonai taudia be hahediba taudia ai do idia lao totona. Unai dainai, mai anina bada gauna be anina gogoa taudia do idia abia.’ Banaba be Kupro tauna dainai, reana ia ese Idau Bese taudia kara henia dalana ia diba. Reana ia laloa ia hegeregere momokani Dirava diba lasi taudia ia haroro henia totona. To ia ura ma haida be unai moale bada bona hahegoada gaukara lalonai do idia vareai.

Banaba ese Saulo ia laloa. Saulo ena mauri ia haidaua neganai, Anania ese ia abia peroveta herevana be reana Banaba ese ia diba. Unai hereva ia gwau guna ia dagedage tauna be Dirava ese ia ‘abia hidi vadaeni, be idau bese taudia vairanai Iesu ena ladana do ia gwauraia’ totona. (Kara 9:15) Vadaeni Banaba be Taso dekenai ia lao​—⁠kilomita 200 ia lao​—⁠Saulo ia tahua totona. Lagani tamona lalonai idia ruaosi idia gaukara hebou, bona unai nega be “nega ginigunana” “Iesu diba tahua taudia be edia ladana idia atoa ‘Keristani.’ ”​—⁠Kara 11:​25, 26.

Klaudio ia lohia negana lalonai, Roma Basileiana ena kahana haida dekenai doe badana ia vara. Histori ena sivarai ia torea Iuda tauna Josephus ia gwau, Ierusalema dekenai “taunimanima momo herea idia mase badina idia dabu momokani bona aniani idia abia diba lasi.” Unai dainai, hahediba taudia Antioka dekenai ese “ta ta edia kohu edia kohu ia hegeregere dekenai, edia harihari gauna do idia siaia lao. Inai bamona idia karaia, bona Banaba bona Saulo dekena amo moni idia siaia lao, ekalesia orea ena kwarana taudia Iudea dekenai idia henia.” Unai gaukara idia haorea murinai, idia ruaosi be Mareko ida Antioka dekenai idia giroa lou, bona idia be unai gabu ena kongregesen lalonai peroveta bona hahediba taudia idia gwauraidia.​—⁠Kara 11:​29, 30; 12:25; 13:⁠1.

Misinari Gaukara Idauna

Bena hoa gauna ta ia vara. “Idia ese Lohiabada dekenai idia toma diho bona aniani idia taravatua neganai, Lauma Helaga ese idia ia hamaoroa, ia gwau, ‘Banaba bona Saulo ruaosi umui abia siri, badina be gaukara ta lau abia hidi, idia karaia totona.’ ” Mani unai oi laloa! Iehova ena lauma helaga ese idia ruaosi dekenai mai anina bada gaukara ia henia. “Lauma Helaga ese idia ruaosi ia siaia lao, vadaeni idia diho lao Seleukia kone dekenai. Unuseni dekena amo idia hanaia Kupro motumotu dekenai.” Banaba ita gwauraia diba aposetolo ta, eiava ta ese ia siaia tauna.​—⁠Kara 13:​2, 4; 14:⁠14.

Kupro dekenai idia lao bona unai motumotu ena Roma provinsi gavana tauna, Seregio Paulo be Keristani tauna ai idia halaoa murinai, idia lao Perega dekenai, ia be Asia Minor ena saut kone kahana dekenai, unuseniai Ioane Mareko ese idia ia rakatania bona Ierusalema dekenai ia giroa lou. (Kara 13:13) Toana be ema bona unai negai Banaba ese edia gaukara ia gunalaia, reana unai gaukara ia manadalaia dainai. Unai nega amo, Saulo (hari idia boiria Paulo) ese gaukara ia gunalaia. (Kara 13:​7, 13, 16; 15:⁠2 itaia.) Banaba be unai ia vara dainai ia lalohisihisi, a? Lasi, ia be lo Keristani tauna bona mai manau ida ia itaia Iehova ese anina bada ia havaraia dalana ai iena turana ia gaukaralaia danu. Iehova ia ura taunimanima ma teritori haida dekenai be idia ruaosi amo sivarai namona do idia kamonai.

Oibe, Pisidia ena siti Antioka amo idia ruaosi idia do luludia lasi neganai, unai gabu ibounai dekenai idia noho taudia ese Dirava ena hereva be Paulo bona Banaba amo idia kamonai, bona momo ese unai sivarai idia abia dae. (Kara 13:​43, 48-52) Ikonio ai, ‘Iuda taudia bona Helene taudia momo herea be abidadama taudia ai idia lao.’ Unai dainai Paulo bona Banaba be nega daudau unuseni idia noho, ‘idia hereva goada Iehova ena siahu dekenai, bona Iehova ese ena Sivarai Namona ia hamomokania hoa bona toa kara dekenai. Inai kara be edia imana dekenai ia karaia.’ Idia kamonai haida ese nadi amo do idia hododia mase ena palani idia karaia neganai, mai aonega danu ruaosi idia heau mauri bona Lukaonia, Lusitera, bona Derebe dekenai edia gaukara idia karaia noho. Ena be Lusitera dekenai kahirakahira idia mase, to Banaba bona Paulo ruaosi ese “diba tahua taudia edia kudouna idia hagoadaia. Idia hereva goada, idia gwau, ‘Abidadama umui dogoatao noho.’ Bona idia gwau, ‘Hisihisi momo lalonai Dirava ena Basileia do ita raka vareai.’ ”​—⁠Kara 14:​1-7, 19-22.

Unai haroro taudia goadadia rua be gau ta ese do ia koudia diba lasi. To idau, dagedage idia davaria gabudia dekenai idia giroa lou Keristani taudia matamatadia idia hagoadaia totona, reana idia hegeregere tatau idia durudia kongregesen matamatadia lalonai gunalaia gaukara idia karaia totona.

Kopina Utua Karana Ena Hepapahuahu

Pentekoste 33 C.E. negana bena lagani 16 murinai, Banaba be mai anina bada kopina utua karana ena hepapahuahu lalonai ia vareai. “Tau haida Iudea dekena amo idia diho mai [Antioka, Suria dekenai], varavara idia hadibaia, idia hereva, ‘Bema kopina utua taravatu umui naria lasi, Mose ena kara hegeregere, mauri dohore umui abia diba lasi.’ ” Banaba bona Paulo ese idia itaia gaudia dainai idia diba unai be maoro lasi, bona unai hereva idia hepapahuahulaia. Idia ese edia siahu idia gaukaralaia lasi, to idia itaia tadikaka ibounai edia namo totona, unai henanadai idia haerelaia namonamo be gau badana. Unai dainai hakaua oreana dekenai, Ierusalema ai, unai henanadai idia abia lao, unuseniai edia ripoti ese heduru idia henia unai hepapahuahu idia hamaoromaoroa totona. Unai murinai, Paulo bona Banaba, idia gwauraidia “aiemai lalokau taudia . . . edia mauri idia negea vadaeni, iseda Lohiabada Iesu Keriso ena ladana dainai,” be Antioka tadikaka dekenai hakaua oreana ese ia gwauraia herevana do idia abia lao totona idia abia hidi taudia edia huanai. Hakaua oreana ese ia torea revarevana idia duahia bona hereva idia henia murinai, kongregesen be “inai goada henia hereva namona dekenai idia moale bada” bona idia ia “hagoadaia.”​—⁠Kara 15:​1, 2, 4, 25-32.

“Idia Hepapahuahu”

Banaba ena kara namodia momo ita duahia murinai, reana ita laloa iena haheitalai hegeregerena do ita kara diba lasi. To, “Hahegoada Ena Natuna” be ita bamona, ia goevadae lasi. Ia bona Paulo be unai kongregesen idia vadivadi henidia lou misinari laolao iharuana idia palanilaia noho lalonai, hepapahuahu ta ia vara. Banaba ia ura dikadika, iena kasin, Ioane Mareko be idia danu do ia lao, to Paulo ia laloa unai be maoro lasi, badina Ioane Mareko ese edia misinari laolao ginigunana ai ia rakatanidia. “Idia hepapahuahu bona idia parara. Banaba ese Mareko ia abia, lagatoi dekenai idia guia, Kupro dekenai idia heau lao,” bona “Paulo ese Sila ia abia hidi” bona gabu ma ta dekenai idia lao.​—⁠Kara 15:36-​40.

Madi! To ena be unai ia vara, unai hekwakwanai ese Banaba ena kara ena toana ma ta ia hahedinaraia. Diba bada tauna ta ia gwau: “Unai kara ese Banaba ena ladana ia hanamoa badina ena be ia diba lasi dahaka do ia vara, to nega iharuana ena abidadama ia atoa Mareko dekenai.” Unai tauna ia gwau, reana “Banaba ese ia abidadama henia dainai, unai ese ia durua ia goada lou totona, bena unai ese ia hagoadaia ena gaukara ia laloa bada lou totona.” Gabeai idia vara gaudia ese unai abidadama karana idia hamomokania, badina Paulo danu ia gwau Mareko ese Keristani gaukara ia durua bada.​—⁠2 Timoteo 4:11; ma danu Kolose 4:10 itaia.

Banaba ena haheitalai ese ita ia durua diba, idia lalohisihisi taudia ita kamonai henia, ita lalo-parara, bona ita hagoadadia bona heduru ita henia edia dabu gaudia dekenai. Mai manau bona gari lasi ida ia ura ena tadikaka ia durudia, bona unai kara ese ia havaraia namo bada edia sivarai be hagoadaia gauna. Hari inai negai, iseda kongregesen lalonai Banaba bamona taudia idia noho be hahenamo ta!

[Footnotes]

[Picture on page 23]

Banaba “be tau namona, Lauma Helaga bona abidadama dekenai ia honu”