Peroveta Koikoi Taudia

Anina: Hereva idia harorolaia taudia bona oreadia haida idia gwau unai hereva be Dirava ena amo idia abia, gau tamona unai hereva be Dirava korikori ena amo idia abia lasi bona idia be ia gwauraia vadaeni palanina hegeregerena lasi.

Peroveta momokani taudia bona peroveta koikoi taudia be edena bamona ita dibadia diba?

Peroveta momokani taudia idia hereva hedinarai, idia gwau Iesu idia abidadama henia, to ena be haida idia gwau iena ladana ai idia haroro, unai sibona dainai peroveta momokani taudia ita gwauraidia be hegeregere lasi

1 Ioane 4:​1-3: “Peroveta koikoi taudia momo be tanobada kahana ibounai dekenai idia lao noho. Unai dainai, bema taunimanima idia gwau, ‘Lau be Lauma Helaga lau abia vadaeni,’ do umui naria namonamo. Idia ibounai do umui hamomokania lasi. To do umui dibaia guna, do umui davaria, Dirava ena Lauma idia abia momokani, o lasi. Inai toana dekena amo Dirava ena Lauma do umui diba: Tau ta bema inai bamona ia hereva, ia gwau, ‘Iesu Keriso be taunimanima ena tauanina dekena amo ia mai,’ vadaeni unai tau ese Dirava ena Lauma ia abia vadaeni. To tau ta bema ia gwau Iesu be tauanina dekenai ia mai lasi neganai, unai tau ese Dirava ena Lauma ia abia lasi. Lasi momokani.”

Mat. 7:​21-23: “Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana guba dekenai ia noho ena ura idia karaia taudia, idia sibona do idia vareai. Unai dina ia ginidae neganai taunimanima momo do idia hereva lau dekenai, do idia gwau, ‘Lohiabada e, Lohiabada e, oiemu ladana dekenai guna ai haroro, ani? . . . ’ Vadaeni lau ese do lau haere idia dekenai, do lau gwau, ‘Umui be lau diba lasi momokani. Idau gabuna dekenai umui lao, umui dika karaia taudia.’ ”

Peroveta momokani taudia be Dirava ena ladana ai idia hereva, to idia gwau Dirava ena ladana ai idia hereva taudia iboudiai be peroveta momokani taudia ita gwauraidia be hegeregere lasi

Deut. 18:​18-20: “Lau na edia bese bogaragina amo peroveta tauna ta baina abia hidi, oi heḡereḡeremu [Mose heḡereḡerena]; lauegu hereva na ia uduna amo baina gwaurai, bena lau ese baina haḡanilaia herevadia na ia ese baine gwaurai henidia. Bena daika ese lauegu hereva, ia ese lau ladagu ai baine gwaurai, na basine abi dae, lau ese davana baina henia. A peroveta tauna ta ese lau asina haḡanilaia herevana ta lau ladagu ai baine gwauraia, eiava dirava idaudia ladadia ai baine hereva, una peroveta tauna na baine mase.” (Ieremia 14⁠:14; 28⁠:​11, 15 itaia danu.)

Iesu ia gwau: “Kara ta danu lau sibona lau karaia lasi, to Tamana ese lau dekenai ia hadibaia hegeregerena lau hereva.” (Ioane 8⁠:28) Ma ia gwau: “Lau be lauegu Tamana ena ladana dekenai lau mai inai.” (Ioane 5⁠:43) Iesu be ma ia gwau: “Sibona ena ura herevadia ia gwauraia tauna be sibona dekenai hanamoa dala ia tahua.”​—⁠Ioane 7⁠:18.

Bema taunimanima haida eiava orea haida idia gwau Dirava ena ladana ai idia hereva eiava idia gaukara, to Dirava ena ladana korikorina idia hatoa lasi bona idia gwauraia hedinarai lasi, bona bema sibodia edia lalohadai gau idauidau dekenai idia gwauraia momo, edia kara be peroveta momokani tauna ena kara korikori hegeregerena lasi, ani?

Ena be ta ese ‘toa badadia’ o ‘hoa karadia’ ia karaia diba, to unai sibona ese ia hamomokania lasi ia be peroveta momokani tauna

Mat. 24:24: “Keriso koikoi taudia bona peroveta koikoi taudia do idia toreisi, toa bona hoa gaudia do idia hedinaraia. Inai bamona do idia karaia, Dirava ia abia hidi taudia do idia hakaua kerere totona, bema mai dalana.”

2 Tes. 2:​9, 10: “Satani ena siahu dekena amo unai Tau Dikana be do ia mai, vadaeni hoa bona toa karadia idauidau momo dekena amo ia ese taunimanima momo do ia hakaua kerere. Ia ese kara kerere bada dekena amo mase dalana dekenai idia raka noho taudia do ia koidia. Inai taudia bema hereva momokani idia abia dae bona lalokau henia neganai, Dirava do ia hamauridia, to idia ura lasi.”

To Mose be idau; Iehova ena oda herevadia dainai hoa karadia ia karaia. (Eso. 4⁠:​1-9) Iehova ese danu siahu Iesu ia henia hoa karadia ia karaia totona. (Kara 2⁠:22) Idia ruaosi idia karaia hoa karadia sibodia lasi, to gau ma ta danu ese ia hahedinaraia Dirava ese ia siaidia.

Peroveta momokani taudia ese idia perovetalaia gaudia be gabeai idia vara, to idia perovetalaidia neganai reana idia diba lasi edena negai eiava edena bamona do idia vara

Dan. 12:9: “Daniel e, emu dala ai a raka lao; badina be hereva vada hehehuni, vada e hekou kunuka-kunuka, ela bona dokona negana.”

1 Pet. 1:​11: “Keriso ena Lauma be unai peroveta taudia edia lalona dekenai ia noho. Ia ese idia ia hadibaia Keriso ese hisihisi do ia abia, gabeai hairai bada do ia abia. Bona idia ese inai henanadai idia nanadailaia, idia gwau, ‘Keriso edena negai do ia mai?’ Ma idia henanadai, idia gwau, ‘Keriso ena mai neganai dahaka do ia vara?’ ”

1 Kor. 13:​9, 10: “Unai peroveta bona aonega dalana be kahana sibona ita diba. To gabeai diba goeva momokani ia mai neganai, unai kahana sibona ita diba gaudia be do idia ore.”

Her. 4:18: “Kara maoromaoro taudia edia dala na daba matana na heto; diarina na e bada e laomu ela bona dina e taramu.”

Aposetolo bona Keristen hahediba taudia ginigunadia ma haida be mai edia helaro kereredia haida, to Baibel ia gwau lasi idia be “peroveta koikoi taudia.”​—⁠Luka 19:11; Ioane 21:​22, 23; Kara 1:​6, 7 itaia danu.

Peroveta tauna Natan ese David ena lalona ia hagoadaia, iena lalona ena ura hegeregerena Iehova ena dubu helaga do ia haginia totona, to gabeai Iehova ese Natan ia oda henia David do ia hamaoroa unai dubu do ia haginia tauna be ia lasi. Ena be guna Natan ese hereva kererena David ia hamaoroa, to Iehova ese Natan ia dadaraia lasi, badina Iehova ese hereva maorona ia hadibaia neganai, sibona ena kerere ia hamaoromaoroa mai ena lalo-manau ida.​—⁠1 Sis. 17⁠:​1-4, 15.

Peroveta momokani tauna ena hereva ese tomadiho momokani ia durua, bona ia be Dirava ena ura, ia gwauraia hedinarai vadaeni urana, hegeregerena

Deut. 13:​1-4: “Bogaragimui ai peroveta tauna eiava nihi tauna ta bema tore isi, toa ta eiava hoa karana ta bema gwauraia guna, gabeamo ia ese e gwauraia guna toana eiava hoa karana bema vara, bena ia bema toma ‘Dirava idaudia, umui do asi dibamui diravadia, baita tahudia bona isiaidia baita lao heni’, una peroveta tauna eiava nihi tauna ena hereva basio abia dae. Badina be Iehova, emui Dirava, ese e tohomuimu, baine diba, Iehova emui Dirava o lalokau heniamu mai lalomui idoidiai bona mai laumamui idoidiai ida eiava lasi. Iehova, emui Dirava, murina amo ba raka, ia garina ba gari, iena haheḡani ba badinadia, ia gadona ba kamonai, ia isiaina ba lao henia, bona ienai ba tao.”

Baibel ia gwau, ia ura ‘tanobada danu ia turana karaia’ tauna be Dirava ena inai tauna ai ia lao; vadaeni, bema tomadiho gunalaia taudia ese edia orea taudia idia doridia tanobada ena politikol karadia idia karaia totona, tomadiho momokani idia durua lasi, ani? (Iak. 4⁠:4; 1 Ioane 2⁠:​15-17) Dirava korikori ia gwau bese iboudiai ‘do idia diba lau na Iehova,’ bona Baibel ia gwau Dirava ese bese iboudiai amo “bese ta ia abia hidi, iena ladana idia abia” totona, to Dirava ena ladana korikorina gwauraia karana idia laloa maragi tomadiho oreadia be Dirava ena ura hegeregerena idia karaia lasi, ani? (Esek. 38⁠:23; Kara 15⁠:14) Iesu ese ena orea taudia ia hamaorodia Dirava ena Basileia do idia gurigurilaia, bona Baibel ia gwau taunimanima abidadama henidia be kerere; vadaeni, bema tomadiho gunalaia taudia eiava politikol oreadia ese taunimanima idia doridia taunimanima edia gavamani idia abidadama henidia totona, idia be peroveta momokani taudia lasi, ani?​—⁠Mat. 6:​9, 10; Sal. 146:​3-6; ma danu Apokalupo 16:​13, 14 itaia.

Sibodia edia kara bona edia orea taudia edia kara amo ta ia diba daidia be peroveta momokani taudia bona daidia be peroveta koikoi taudia

Mat. 7:​15-20: “Umui naria namonamo, peroveta koikoi taudia garina. Idia mai noho, edia toana be mamoe bamona, to edia lalona be uda sisia dagedage bamona. Edia kara toana dekena amo do umui diba. . . . Au namona ena huahua be ia namo, to au dikana ena huahua be ia dika. . . . Unai dainai peroveta koikoi taudia edia kara dekena amo do umui diba.”

Edia mauri dalana be edena bamona? “Tauanina ena kara . . . be inai: Heudahanai, kara mirodia, matabodaga, kaivakuku tomadiho henia kara, meamea, heai, heatu, mama, badu, sibona ena ura tahua kara, hepapahuahu, orea hapararaia kara, laloa dikadia, kekero, lebulebu, bona unai bamona kara ibounai. . . . Unai bamona idia karaia taudia ese Dirava ena Basileia do idia abia lasi. To [Dirava ena] Lauma Helaga ese inai bamona karadia ia havaraia: Lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana.”​—⁠Gal. 5:​19-23; ma danu 2 Petero 2:​1-3 itaia.

Iehova ena Witness taudia ese hereva kereredia haida idia halasia vadaeni, ani?

Iehova ena Witness taudia idia gwau lasi Dirava ese ena lauma amo siahu ia henidia idia peroveta totona. Idia ese hereva kereredia haida idia gwauraia vadaeni. Iesu Keriso ena aposetolo hegeregeredia, nega haida idia be mai edia helaro kereredia.​—⁠Luka 19⁠:11; Kara 1⁠:⁠6.

Baibel ese nega bona lagani ia gwauraia, idia be mai anina Keriso ena lou mai negana herevana dekenai. Iehova ena Witness taudia ese unai gau idia tahua mai edia ura bada ida. (Luka 21⁠:24; Dan. 4⁠:​10-17) Iesu ese danu toa ta mai ena kahana idauidau ia gwauraia; Baibel ese ia gwauraia laganidia do idia ore negana lalonai unai toa do ia hedinarai neganai, unai ese do ia hahedinaraia unai uru taudia edia nega lalonai Satana ena tanobada oromana dikana ena dokona do ia ginidae. (Luka 21⁠:​7-36) Iehova ena Witness taudia ese unai toa ena anina idia hagugurua gaudia idia gwauraia hedinarai vadaeni. Momokani, Witness taudia be nega haida idia hereva kerere, idia gwau gau ta be nega ta ai do ia vara, to ia vara lasi; to inai gau dekenai idia kerere lasi: Edia abidadama idia haboioa lasi, bona Iehova ena palani do ia guguru dalana idia naria noho. Iesu ena sisiba idia laloa noho; ia gwau: “Do umui naria, badina be umui emui Lohiabada do ia mai negana be umui diba lasi.”​—⁠Mat. 24⁠:42.

Baibel ena hereva idia tahua lou neganai edia lalohadai gau haida dekenai idia hamaoromaoroa. Unai kerere ena anina be maragi, Baibel ena hereva momokani badadia, idia lalo-pararalaia bona idia halasidia herevadia unai, edia anina be bada. Unai hereva badadia haida be inai: Iehova sibona be Dirava korikori. Iesu Keriso be Toi Tamona Diravana ena kahana ta lasi, to ia be Dirava sibona ese ia havaraia Natuna tamona. Dirava ese taunimanima edia dika amo ia hamauridia dalana tamona be, Keriso ena boubou gauna idia abidadama henia dainai. Lauma helaga be Dirava ena kahana ta lasi, to ia be Iehova ena gaukara siahuna, bona ena huahua be tomadiho momokani taudia edia mauri lalonai idia hedinarai be gau badana. Taunimanima ta ia mase neganai, laulau ta be iena lalona amo ia roho mauri lasi etene taudia edia lalohadai hegeregerena. Taunimanima idia mase neganai idia mase momokani; mauri gabena abia dalana tamona be toreisi-lou amo sibona. Dirava ese kara dika ia koua haraga lasi, badina Satana ese ena lohia dalana ia hepapahuahulaia dainai, bona Ia ura ia hahedinaraia Satana ena lohia dalana ese dika sibona ia havaraia. Dirava ena Basileia sibona ese nega namona taunimanima ediai ia havaraia diba. Lagani 1914 amo ema bona hari, ita be inai tanobada oromana dikana ena dina gabedia ai ita noho. Taunimanima 144,000 sibodia be hahelaga taudia ai do idia lao bona guba lalonai Keriso ida do idia lohia hebou. Kara maoromaoro taudia oredia ese mauri hanaihanai tanobada paradaisona ai do idia abia.

Iehova ena Witness taudia edia hahediba herevadia oi laloa neganai, mani inai danu oi laloa: Edia hahediba herevadia ese taunimanima idia durudia idia kara maoromaoro totona, eiava? Unai hahediba herevadia idia badinaia taudia be mai edia ladana namona edia hanua dekenai badina be idia koikoi lasi dainai, a? Unai hahediba herevadia badinaia karana amo edia ruma taudia edia noho idia hanamoa, a? Iesu ia gwau taunimanima do idia diba daidia be iena hahediba taudia, idia lalokau heheni dainai. (Ioane 13⁠:35) Vadaeni, Iehova ena Witness taudia edia lalokau heheni karana be bada, eiava? Oi itaia karadia oi laloa bena sibomu emu lalona oi hadaia.

Bema Ta Ia Gwau​—⁠

‘Lauegu pasto ia gwau Iehova ena Witness taudia be peroveta koikoi taudia’

Reana inai bamona oi haere henia diba: ‘Mani lau oi hamaoroa, aiemai hahediba herevana ta o aiemai kara ta, Baibel ese ia gwauraia peroveta koikoi taudia edia, be Baibel lalonai ia hahedinaraia oi dekenai, a? . . . Mani lau ese Baibel ena hereva peroveta koikoi taudia edia kara dekenai lau hahedinaraia oi dekenai. (Rau 329-33 dekenai idia noho herevadia ta eiava haida oi herevalaia.)’

Eiava inai bamona oi hereva diba: ‘Aiemai hereva ta ia gwauraia iena samani herevana hamomokania totona, a? (Bema ruma tauna ese guna ita lalohadailaia kerere gauna ta ia gwauraia, rau 331 dekenai idia noho herevadia bona rau 332 ena henu kahana amo ia lao rau 334 ena atai kahana dekenai idia noho herevadia haida oi hamaorolaia.)’

Ma haere ta: ‘Lau laloa, bema ta ese oi unai bamona ia samania, oi ura oiemu kara ena badina eiava oiemu lalohadai oi gwauraia hedinarai, ani? . . . Unai hegeregerena, lau ura Baibel amo unai samani herevana lau haerelaia . . . Mani inai siri oi itaia . . . ’