Karoa 17
Lalohadai Idauna ta Kamonai Dekenai
LAGANI momo lalodiai Iehova ese Iuda taudia ia hadibadia, edia kara dika dainai Ierusalem be Babulono taudia ese do idia hadikaia ore. To Dirava idia kamonai henia lasi; sibodia edia lalohadai dikadia lalodiai idia raka noho.—Ieremia 25:8, 9; 7:24-28.
2 Iehova ese ta ia doria lasi ena hesiai gaukara ia karaia totona, to ia ura iena lalo-namo bona hahenamo idia tahua taudia ese ia do idia kamonai henia. Israel be Egypt amo ia hamauridia murinai, ia hamaorodia, ia gwau: “Bema lauegu hereva do umui kamonai henia, bona egu taravatu do umui badinaia neganai, umui be lauegu bese korikori do umui lao. . . . Lauegu helaga taudia do lau halaoa umui, bese helagana do umui lao.” (Esodo 19:5, 6) Dirava ese iena taravatu idia totona ia gwauraia bona Mose ese “taravatu bukana” idia vairadiai ia duahia hedinarai, bena sibodia edia ura hegeregerena idia gwau Iehova ena hereva iboudiai do idia kamonai henidia bona ena taravatu do idia badinaia.—Esodo 24:7.
3 To, nega daudau lasi murinai Israel taudia ese Iehova idia gwau-edeede henia. Ia idia dadaraia vaitani lasi, to idia momo be Egypt taudia edia tomadiho karadia amo Iehova idia tomadiho henia toho. (Esodo 32:1-8) Gabeai idia haida ese Iehova ena abia hidi taudia idia maumauraidia. (Numera 12:1-10; 16:1-3, 31-35) Israel besena ese Dirava ena hereva idia badinaia lasi, badina be ia idia abidadama henia momokani lasi, to taunimanima dekenai idia gari. (Numera 13:2, 31-33; 14:1-4; Heberu 3:17-19) Bema idia hekwakwanai murinai edia kerere amo idia helalo-kerehai mai edia lalo-manau danu, ia ese edia dika ia gwauatao. To nega daudau herea lalonai unai bese ese Dirava ena taravatu momo idia utua. Edia kara bona unai kara ena davana danu edia sivarai be Bible lalonai idia torea, ita idia sisiba henia totona.—2 Sisiga 36:15-17; 1 Korinto 10:6-11.
4 Ieremia ena nega lalonai Iehova ese Iuda taudia ia hamaorodia loulou, edia kara dainai dika bada herea do idia davaria; unai murinai Rekab taudia edia kara ia gwauraia idia dekenai. Rekab taudia be Israel lasi taudia; idia be Iehonadab ena bese taudia, gunaguna unai tau ese Iehu ia bamoa, Iehova idia dadaraia taudia ia hamasedia ore neganai. Rekab besena edia kwarana Iehonadab ese ia oda henidia, uaina do idia inua lasi ela bona hanaihanai, ruma do idia noholaia lasi bona tano do idia biru henia lasi, to palai rumadia lalodiai do idia noho. Unai dala amo, idia be Israel taudia bogaragidiai do idia noho namonamo bona idia ida Iehova do idia tomadiho henia, to taoni taudia edia lebulebu karadia bona kara dikadia do idia karaia lasi.
5 Iuda taudia ese Lohia Badana Iehova idia kamonai henia lasi negana lalonai, Rekab taudia ese edia sene tauna ena hereva idia badinaia, a? Oibe, idia badinaia namonamo. Ena be Rekab taudia be Ierusalem lalonai idia heau vareai, Babulono taudia bona Suria taudia ese Iuda idia tuari henia neganai, to palai rumadia idia do noholaia. Vadaeni, ena be uaina be taravatu lasi Iuda taudia dekenai, to Rekab taudia ese do idia dadaraia noho a? Iehova ena oda hegeregerena, Ieremia ese Rekab taudia dubu ena aniani daiutuna ta lalonai ia hakaudia vareai bena uaina be idia vairadiai ia atoa, ia hamaorodia do idia inua. To idia dadaraia. Dahaka dainai? Badina be idia diba edia sene tauna ese Iehova ia badinaia bona idia edia namo ia tahua, unai dainai iena oda idia badinaia. Iehova ese edia kamonai karana ia moalelaia, badina be edia kara be idau vaitani, Iuda taudia edia gwau-edeede karadia hegeregeredia lasi.—Ieremia 35:1-11.
6 Hari inai nega lalonai taunimanima haida be Rekab taudia hegeregeredia, Lohiabada ena “mamoe idaudia” unai. Uaina idia inua eiava lasi be herevana. (1 Timoteo 5:23 itaia.) Gau tamona, idia inuinu momo lasi bona idia inuinu kekero lasi be namo. (Hereva Lada-isidia 23:20; 1 Korinto 6:9, 10) To Dirava idia kamonai henia be gau badana. Kerisendom be kamonai lasi Israel hegeregerena, to Rekab besena bamona taudia hari inai negai be idau vaitani; edia kara amo idia hahedinaraia idia diba Dirava idia kamonai henia be mai anina bada. Vadaeni, inai kara amo dahaka anina namona idia abia?
7 Edia kamonai karana dainai Iehova ese Rekab taudia ia gwauhamata henidia, bona unai gwauhamata be mai anina bada hari inai negai; ia gwau: “Badina be emui sene tauna Ionadab ena oda umui badinaia, bona ena hahediba herevadia iboudiai umui badinaia, unai dainai Iehova . . . be inai bamona ia hereva: ‘Ionadab Rekab ena bese be nega ta ai lau vairanai gini taudia ta ai do ia dabu lasi.’ ” (Ieremia 35:18, 19) Ierusalem amo idia roho mauri, lagani 607 B.C.E. lalonai. Bona idia laulaulaidia taudia do idia roho mauri, Kerisendom bona tanobada ena kamonai lasi taudia oredia danu be Iehova ese do ia hamasedia ore neganai.
KAMONAI BE MAI ENA HEKWARAHI
8 Taunimanima momo be kamonai karana idia manadalaia haraga diba lasi, badina be sibodia edia ura idia tahua taudia edia huanai idia tubu daekau dainai. Reana Dirava ena Basileia ena sivarai namona idia moalelaia. To, bema idia hekokoroku dainai idia laloa kerere, reana Dirava ena taravatu haida idia abia dae lasi, o unai taravatu ia henidia dalana idia maumauraia. (Hereva Lada-isidia 8:13; 16:18) Naaman, Suria ena tuari biaguna peroveta tauna Elisaia ena negai, be unai bamona ia hekwakwanai.
9 Naaman be lepra tauna. To Israel kekenina ta, tuari lalonai idia abia mauri kekenina, be ia gwau, bema ia be Iehova ena peroveta tauna Elisaia dekenai ia lao, ena lepra do ia hanamoa. Unai dainai Naaman be mai ena hosi bona mai ena kariota danu ia heau lao Israel dekenai, Elisaia ena ruma dekenai ia ginidae. Naaman be tau badana, unai dainai ia laloa Elisaia be ia dekenai do ia raka lasi, Iehova do ia boiboi henia, bona ena imana amo hisihisi gabuna do ia daroa ela bona ia namo lou. To Elisaia ese ena hesiai tauna ia siaia sibona, ia hamaoroa do ia lao, Ioridane Sinavaina dekenai do ia digu nega 7.—2 Hanua Pavapavadia 5:1-12.
10 Naaman ia hekokoroku dainai ia raka oho mai ena badu danu. To ena hesiai taudia ese idia sisiba henia murinai, sibona ia hamanaua mai ena abidadama danu. “Ia diho lao, nega 7 Ioridane Sinavaina lalonai ia digu, Dirava momokanina ena tau ena hereva hegeregerena; bena ena kopina be mero maragina ena hegeregerena ai ia lao lou, bena ia goeva.” Naaman ia diba momokani Iehova be Dirava momokanina tamona, ma ia diba, ena be guna ia badu to Elisaia ese ia gwauraia herevadia be Dirava ena amo.—2 Hanua Pavapavadia 5:13-15.
11 Emu kara haida be Naaman ena hegeregeredia, a? Israel lasi taudia ma haida bamona, Naaman be mai ena abidadama, unai dainai ia ese danu “mamoe idaudia” ia laulaulaidia. Inai taudia iboudiai be kara dika lalonai idia vara dainai, guna idia be lauma dalanai idia gorere. Namona be idia iboudiai ese Iehova ena horoa hesiai taudia edia heduru idia tahua, bena inai “hesiai tauna” ese Dirava ena Hereva amo ia hadibadia gaudia idia karaia be namo. (Mataio 24:45) Guna idia haida ese Bible ena sisiba idia laloa bada lasi—kongregesen heboudia lao henidia loulou herevana, o tanobada amo gini siri herevana o Keristen bapatiso herevana, be guna idia abia dae lasi. Reana idia ura lasi idia bapatiso, badina be idia ura lasi ‘sibodia do idia dadaraia’ Keriso murinai idia raka totona. Idia haida be kongregesen ena elda taudia ese idia sisiba henidia dalana idia maumauraia. To gabeai, Lohiabada ena “mamoe idaudia” ai idia lao gwauraia taudia iboudiai idia diba, manau bona kamonai mai lalokau danu be gau badadia.—Iakobo 4:6; Mataio 16:24.
IENA ODA ESE ITA IDIA HANAMOA
12 Dirava bona ena dala ita diba neganai, ita diba iena hereva, iena idau negai hesiai taudia ia hamaorodia herevana, be momokani: “Lau inai Iehova, emu Dirava; oi be sibomu do oi hanamoa dalana be oi lau hadibaia, emu raka dalana namona dekenai oi lau hakaua. Egu oda bema oi kamonai henidia bema namo!” (Isaia 48:17, 18) Iehova ia ura bada iena orea taudia be dika amo do idia siri bona mauri do idia moalelaia, iena oda idia kamonai henidia dainai. Ita ia karaia dalana be ia diba, bona ita ia hamoalea momokani gauna danu. Ita ia sisiba henia, ita idia hamiroa o iseda hebamo idia hadikaia karadia ita karaia lasi totona.
13 Idia sihari kava o idia heudahanai taudia ese lalohisihisi bona gorere idia davaria bona natudia idia havaradia kava, to Dirava ena sisiba idia kamonai henia taudia ese unai dika idia davaria lasi. (1 Korinto 6:18; Heberu 13:4) Iena sisiba 2 Korinto 7:1 dekenai idia badinaia dainai, kuku bona drag idaudia idia ania lasi, unai gaudia ese taunimanima idia hagoreredia bona idia hamasedia. Iena hahegani ‘rara umui abia lasi’ ese ena hesiai taudia edia lalona ia hagoadaia, bena Ia idia abidadama henia, mauri gabena do ia henidia idia gwau. Danu, unai hahegani ese ia naridia, bena rara abia hanai karana amo gorere metaudia idia abia lasi.—Kara 15:28, 29.
14 Tanobada dekenai ita do noho lalonai, ita gaukaralaia sisina be kerere lasi. To Iehova ese ita ia sisiba henia, tanobada do ita abidadama henia lasi, bona ita be tanobada ena lasi be namo. Ia diba inai tanobada ena oromana do ia haorea. Dirava ese ia haorea gwauraia gauna haginia totona ita hekwarahi be kavakava! To gau dika hereana be inai: Tanobada idia durua taudia be tanobada danu do idia ore hebou. Unai dainai Dirava ena Natuna ena sisiba be namo herea: Dirava ena Basileia oi tahua guna!—1 Ioane 2:17; Mataio 6:33.
15 Iehova ia diba momokani dahaka ita abia be namo, bona iena diba hegeregerena iena orea taudia ia hahegaegaedia noho, iena kara maoromaoro negana idia noholaia totona. Adam ia kamonai lasi dainai, mauri hanaihanai ia haboioa, bona Dirava ese Paradaiso amo ia lulua. Adam ia haboioa gaudia ita abia lou totona, namona be Dirava ena hereva ita kamonai henia. Lagani 1,000 lalodiai, taunimanima do ia hagoevadia lou lalonai, iena Basileia amo ita do ia hereva henia. Unai gavamani ena hesiai taudia be tanobada dekenai do idia noho. “Tanobada ibounai lalonai lohia taudia” be King ese do ia haginidia. (Salamo 45:16; Isaia 32:1, 2 itaia.) Taunimanima ese hari lohia taudia do idia kamonai henidia neganai, unai amo do idia hahedinaraia edia guba Pavapavana danu idia kamonai henia.
16 Unai nega ita noholaia totona Iehova ese ita ia hegaegaelaia; unai totona iena orea amo ita ia hadibaia. Kongregesen lalodiai elda taudia, lauma ai idia goada taudia, ia haginidia. Idia ese kongregesen heboudia idia gunalaia, bona Basileia harorolaia gaukarana danu. Iehova ena hesiai gaukara karaia bona Bible ena taravatu badinaia urana idia ura taudia be elda taudia ese idia durudia, bona idia sisiba henidia danu, Dirava habadua karadia do idia karaia lasi totona. Tanobada ibounai lalonai Iehova ena Witness taudia idia davaria vadaeni, hisihisi badadia o tuari idia vara negadiai, elda taudia idia kamonai henidia dainai idia roho mauri. Kongregesen be elda taudia edia gau lasi, ia be Dirava ena. Elda taudia idia gwau lasi edia hereva be maoro sibona. To Dirava ese idia edia amo iena orea taudia ia hakaudia, bona idia kamonai henidia neganai idia hahedinaraia Iehova ena dala idia matauraia; inai dala amo ia hahegaegaedia, iena Nega Matamatana idia noholaia totona.—Kara 20:28; Heberu 13:17.
17 To, bema unai bamona ita kamonai ena badina tamona be ita ura hisihisi badana amo do ita roho mauri, unai be hegeregere lasi. Kamonai ena badina badana bona maorona be inai: Mauri, bona Dirava ese mauri ia durulaia gaudia iboudiai danu, ita laloa bada. Gaudia be: Siahu ita ia henia, mai edia hairai gaudia bona lauma gaudia ita laloa namonamo totona, bona Ia ita diba bona ita tomadiho henia totona. Danu, Dirava ena lalokau bada ita laloa namonamo diba, unai lalokau dainai sibona ena Natuna ia henia, ena mauri do ia bouboulaia, mauri hanaihanai do ita abia diba totona.
18 Dirava idia diba momokani taudia ese ia idia kamonai henia mai edia moale bada danu. Iena palani bona taravatu idia diba goevagoeva, bona unai gaudia badinaia karana ena hahenamo idia mamia vadaeni dainai, idia diba momokani Dirava ena dala badinaia karana sibona mo be maoromaoro bona mai ena aonega. Ma idia diba unai kara ese ia naridia, bona unai dala amo edia lalokau Dirava dekenai idia hahedinaraia diba.—1 Ioane 5:3; Salamo 119:129.
[Study Questions]
1. Dahaka dainai Iehova ese Ierusalem ia hamauria lasi?
2. (a) Dirava kamonai henia karana ena davana namona be dahaka? (b) Edena dala amo Israel be Iehova danu idia gwauhamata heheni?
3. (a) Unai murinai Israel ese Iehova edena bamona ia gwau-edeede henia? (b) Dahaka dainai unai gau edia sivarai be Bible lalonai idia torea?
4. (a) Rekab taudia be daidia? (b) Iehonadab ese dahaka taravatu ia henidia?
5. Dahaka dainai Rekab taudia edia kamonai be haheitalai namona?
6. (a) Hari daidia be Rekab taudia hegeregeredia? (b) Daidia be kamonai lasi Israel hegeregerena?
7. (a) Iehova ese dahaka gwauhamata namona ia henia Rekab taudia dekenai? (b) Unai gwauhamata ena anina be dahaka, Rekab besena bamona taudia dekenai?
8. Dahaka dainai taunimanima momo idia kamonai diba lasi?
9. (a) Dahaka dainai Naaman ese Elisaia ia vadivadi henia? (b) Ia be dahaka ia laloa, to dahaka ia vara?
10. (a) Naaman be dahaka ia karaia? (b) Bena dahaka dainai unai hereva ia kamonai henia? (c) Bena dahaka ia vara?
11. (a) Edena dala amo Naaman ese “mamoe idaudia” ia laulaulaidia? (b) Ita ibounai be dahaka ita diba be gau badana?
12, 13. (a) Badina be dahaka Iehova ena hahegani badinaia karana ese ita ia hanamoa? (b) Haheitalai haida be dahaka?
14. Bema tanobada ita gaukaralaia momo lasi to Basileia ita tahua guna, unai ese ita edena bamona ia hanamoa?
15. (a) Adam ese ia haboioa gaudia ita abia lou totona, dahaka ita karaia be namo? (b) Lagani 1,000 lalodiai Iehova ese ita edena bamona do ia hereva henia?
16. Elda taudia kamonai henidia karana ese ita edena bamona ia naria, bona ita edena bamona ia hahegaegaea?
17. Kamonai ena badina maorona be dahaka?
18. Dirava ita diba momokani neganai, iseda lalohadai be dahaka, ia bona ena orea kamonai henidia karana dekenai?
[Picture on page 135]
Haida ese edia hekokoroku idia negea be namo, lepra tauna Naaman ia karaia hegeregerena