Iehova ese ena Tuari Kaia Ia Veria Lasi!

“Taunimanima iboudiai do idia diba, lau Iehova ese egu tuari kaia be udaia gauna amo lau veria lasi vadaeni.”​—ESEKIEL 21:5.

1. Iuda bona Israel lalonai Iehova ese ena tuari kaia amo daidia ia hamasedia?

IEHOVA ena tuari kaia ese ena inai taudia ia hagaridia dikadika. To, kara dika dekenai, Iuda bona Israel basileiadia lalodiai ia gaukaralaia neganai, unai idia diba, a? Oibe, ia vara karana amo idia diba, Iehova ese ena haheitalai tuari kaiana be ena udaia gauna amo ia veria lasi vadaeni.​—Esera 9:​6-9; Nehemia 1:8; 9:​26-30.

2. Iehova ese ena “tuari kaia” edena bamona ia gwauraia, unai dainai dahaka henanadai ita laloa?

² Ena gima tauna, bona peroveta tauna Esekiel ena amo, Dirava ia gwau: “Taunimanima iboudiai do idia diba, lau Iehova ese egu tuari kaia be ena udaia gauna amo lau veria lasi vadaeni.” (Esekiel 21:5) Unai hereva be mai ena anina idau negai taudia dekenai sibona a? Eiava idia be mai anina ita dekenai danu?

Ierusalem ena Hahemaoro Gwauraia Guna Herevadia

3. Babulonia ai idia abia lao Iuda taudia dekenai Esekiel ese dahaka ia hadibadia, bona hari unai ese dahaka ia laulaulaia?

³ Matahanai dekenai Iehova ena kariota ia heau ma gabu ta dekenai, bona Esekiel danu be ma gabu ta dekenai ia lao. Ia be hegeregere Dirava ena kariota bamona guba oreana, be Olive Ororona ataiai ia lao bamona, gabu ia itaia namonamo totona. Unai ororo dekena amo Iesu ese Ierusalem do ia dika ia perovetalaia, bona lagani 70 C.E. ai, unai hereva ia guguru, bona ia davaria gau dikana ese Kerisendom dekenai do ia vara gauna ia laulaulaia. (Mareko 13:​1-20) Matahanai amo, Esekiel be Kebara sinavaina amo idia abia lao, to hari Dirava ena lauma siahuna ese ia hakaua lou Babulono dekenai, ia noholaia rumana dekenai. Unuseniai, abidia mauri taudia dekenai ‘Iehova ese ia dekenai ia haheitalaia gaudia iboudiai ia hamaorodia.’ Unai hegeregerena, hari inai nega lalonai Dirava ena horoa “gima tauna” bona idia bamoa witness taudia, ese unai guba kariotana ai ia Gui Kau Tauna ia haheitalaia gaudia iboudiai idia gwauraidia hedinarai.​—Esekiel 11:​22-25.

4. Iuda amo idia abidia mauri taudia ese Esekiel ia haheitalaia karadia be edena bamona idia lalodia?

⁴ Haheitalai karadia amo, Babulono ai idia lao abidia mauri Iuda taudia dekenai, Esekiel ese Iuda besena dekenai kahirakahira do ia vara gau dikana ia hahedinaraia. (Esekiel 12:​1-7 duahia.) Peroveta tauna ese abidia mauri “laolao kohuna” ia huaia, unai be abidia mauri taudia ese edia pagana dekenai do idia huaia diba gaudia ia haheitalaia. Kahirakahira Ierusalem do idia koua hegege bona gau dikana mai garina bada herea ta do ia vara. Ena be momo ese unai sisiba herevana idia hamomokania lasi, to Esekiel ese taunimanima dekenai do ia gwau: “Gau iboudiai do idia leiti lasi.” Hari inai nega lalonai danu, taunimanima momo ese Dirava ena sisiba bona peroveta herevadia idia dadaraidia, to hereva momokani idia tahua taudia ita durudia diba, bena do idia diba unai peroveta herevadia do idia guguru.​—Esekiel 12:​8-28.

5. “Iehova ena dina” ia kahirakahira dainai, daidia ia gwauraidia dika be maoro?

⁵ Namona be Iehova ena gima tauna ena hereva idia hakala henia lasi taudia idia diba Dirava ena “tuari kaia” mamina do idia abia. Unai dainai, idia gwau Ierusalem bona Iuda basileiadia ese dika do idia davaria lasi taudia, idia gwauraidia dika. Peroveta taudia koikoidia ia gwauraidia uda sisiadia bamona, bona ia hahedinaraia koikoi taudia edia ura karadia idia karaia, unai taudia edia moru gwauraia habadia ahu amo idia penidia bamona. Peroveta hahinedia koikoidia ia gwauraidia dika danu. “Iehova ena dina” be ia kahirakahira vadaeni, bona iena vairana ia ha-aukaia vadaeni ‘ia dekena amo idia raka oho’ taudia dekenai, anina be ‘idia gwauhamata Dirava do idia badinaia lasi’ taudia dekenai unai. Bema Iehova dekenai ita gwauhamata vadaeni, do ita ura lasi momokani ena gaukara helagana do ita rakatania.​—Esekiel 13:​1–14:11.

6. Taunimanima ta ese kamonai lasi Iuda taudia ia hamauridia diba a, bona unai ese ita dahaka ia hadibaia?

⁶ Daika ese raka kerere Iuda taudia ia hamauridia diba? Guna, Dirava ese tano ia hahemaoro henia neganai kara maoromaoro taudia Noa, Daniel, bona Iobu ese taunimanima idia hamauridia diba lasi. Hahemauri ita abia totona gau badana be Dirava vairanai iseda maduna ita huaia, bona ena ura ita karaia.​—Esekiel 14:​12-23; Roma 14:12.

7. Iuda ia gwauraia dahaka bamona, to mai edia abidadama taudia dekenai Dirava ese dahaka do ia karaia?

⁷ Iuda besena taudia be abidadama lasi taudia dainai, ia gwauraidia uda vain auna bamona, huahua namona lasi, bona lahi ese do ia araia ore gauna. (Esekiel 15:​1-8) Danu ia gwauraidia sinana bona tamana lasi bamona, Dirava ese Aigupito amo ia hamauria bona ia ubua ela bona haneulato ai ia lao beibina unai. Iehova ese ia gwauraia ena adavana bamona, to ia ese dirava koikoidia ia tomadiho henidia, bona lauma dalanai ia heudahanai dainai do ia mase ore. To, mai edia abidadama taudia dekenai Dirava ese ‘noho hanaihanai taravatuna ta do ia karaia’​—unai be lauma Israel dekenai do ia karaia taravatu matamatana.​—Esekiel 16:​1-63; Ieremia 31:​31-34; Galatia 6:16.

8. (a) Babulono bona Aigupito ia gwauraidia dahaka bamona? (b) Sedekia ese ena gwauhamata ia hamakohia; unai ena anina ita dekenai be dahaka?

⁸ Murinai, Babulono bona Aigupito ia gwauraidia ugava badadia bamona. Unai ugava ta ese sida auna ta dorina ia makohia. Unai ia vara King Iehoiakini idia hamorua bona Sedekia be ena gabu ai idia atoa neganai. Ena be Sedekia ese ia gwauhamata Nebukadnesara dekenai, to Aigupito ena lohia tauna dekenai ia lao neganai, tuari dekenai heduru ia abia totona, unai gwauhamata ia hamakohia unai. Bema Sedekia ese Iehova ena ladana dekenai unai gwauhamata ia karaia, ia hamakohia neganai Iehova ena ladana ia hadikaia unai. Ita ura lasi momokani Dirava ena ladana ita hadikaia, unai dainai namona be nega ibounai iseda hereva hegeregerena do ita karaia. Ita dekenai Dirava ena ladana ia noho, ita be Iehova ena Witness taudia, unai be hahenamo gauna badana!​—Esekiel 17:​1-21.

9, 10. (a) Esekiel 17:​22-24 ai dahaka peroveta herevana ia torea, bona ia guguru neganai namo do ita davaria totona dahaka do ia vara guna? (b) Daika ena kara dainai iseda kara ena davana ita abia?

⁹ Unai hereva murinai, moale herevana, Mesia perovetalaia herevana ia gwauraia. (Esekiel 17:​22-24 duahia.) Ia gwauraia “manokamanokana ta” be King Mesia, Iesu Keriso. Iehova ese guba Siona Ororona ai do ia hadoa, bena “sida auna hereadaena” ai do ia lao, tanobada do ia lohiaia neganai, ia ena amo noho namo bona hahenamo do idia vara. (Apokalupo 14:1) Unai ese ita do ia hamoalea momokani.

¹⁰ Bema ita ura namo do ita davaria Mesia perovetalaia herevana ia guguru neganai, gau badana be Iehova danu ita turana henia noho. Esekiel danu idia noho abidia mauri Iuda taudia idia laloa Dirava idia turana henia vadaeni, bona idia gwau tubudia tamadia edia kerere dainai dika idia davaria. To peroveta tauna ia hamaorodia taunimanima iboudiai be sibodia edia kara dainai dika eiava namo idia davaria. (Esekiel 18:​1-29; Ieremia 31:​28-30 itaia danu.) Unai murinai, noinoi herevana ia gwauraia. (Esekiel 18:​30-32 duahia.) Oibe, Iehova ese helalo-kerehai taudia ia hebogahisi henidia bona ia moale lasi tau ta ia mase neganai. Unai dainai, Dirava ia gwau: “Umui taunimanima, umui giroa bona do umui mauri noho.”​—2 Petero 3:9 itaia danu.

11. Iuda ena lohia taudia ia gwauraidia dahaka bamona, bona Iehova ena “tuari kaia” amo ia botaia neganai dahaka ia vara ia dekenai?

¹¹ Iuda ena moru be mai edia taitai ida idia anelaia neganai, idia gwau ia be laion natudia bamona. King Iehoahasa be idia abia mauri tanona, Aigupito ai ia mase, Nebukadnesara ese Iehoiakim ia abia mauri, bona Iehoiakini idia siaia Babulono dekenai. Bena Nebukadnesara ese Sedekia ia atoa Iuda ena terona latanai, to ia gwau-edeede. Murinai, maua dekenai laion idia koua bamona, Sedekia idia abia mauri Babulono dekenai. Unai peroveta taitai anena ena hereva hegeregerena, lagani 607 B.C.E. ai, Iuda be vain dikana bamona ai ia lao, “ia lalonai badina aukana ta be lasi, pavapava ena dagi auna ta be lasi.” Iehova ena “tuari kaia” ese ia botaia unai!​—Esekiel 19:​1-14; Ieremia 39:​1-7.

12. (a) Edia tubudia tamadia hegeregeredia, Esekiel ena negai idia noho taudia ese dahaka kerere idia karaia? (b) Dahaka dainai taunimanima idia gwau Esekiel ese sivarai hegeregeredia sibona ia gwauraia, bona unai be dahaka sisiba ita totona?

¹² “Israel ena tau badadia haida” idia mai neganai, Esekiel ese Dirava ena hereva idia dekenai ia gwauraia. Ia hamaorodia ena be Iehova ese Aigupito amo Israel besena ia hamauridia bona ena Taravatu ia henidia, to idia dadaraia bona kaivakuku idia tomadiho henidia. Esekiel ena negai idia noho taudia danu ese unai bamona kara idia karaia, unai dainai Dirava ia gwau do ia hahemaoro henidia. Esekiel ena hereva idia lalo-pararalaia, to idia laloa do ia vara lasi; idia gwau: “Ia be sivarai hegeregeredia gwauraia tauna ta ani?” Kahirakahira do idia diba peroveta ena hereva be sivarai hegeregeredia sibona lasi. Namona be inai ita laloatao, Bible ia gwauraia guna herevadia be do idia guguru; namo lasi ita daradaralaidia.​—Esekiel 20:​1-49.

Tuari Tauna Iehova

13. Dirava ena “tuari kaia” ese dahaka ia laulaulaia, bona “taunimanima iboudiai” ese dahaka do idia diba ia gaukaralaia neganai?

¹³ Lagani 7 idia abidia mauri murinai, (lagani Ab 10, 611 B.C.E. ai), bona “Iehova ena tuari dinana” Iuda bona Ierusalem dekenai ia hamatamaia negana be do lagani rua mai kahana idia noho idia vairadiai. (Esekiel 13:5; 20:1) Mani, Tuari Tauna Iehova ena hereva Esekiel dekenai oi laloa. (Esekiel 21:​1-5 duahia.) Dirava ena “tuari kaia” ese do ia gaukaralaia tanobada oreana ia laulaulaia, to ena guba kariota bamona oreana ia laulaulaia danu. Iuda bona Israel besedia lalonai idia noho “kara maoromaoro” bona “kara dika” taudia, bona Dirava ena taunimanima idia lalo-dika henia bese idaudia danu be Dirava ena “tuari kaia” amo do idia mase. Momokani, “taunimanima iboudiai” do idia diba Iehova ese ia tuari henidia.

14. (a) Esekiel bamona, Iehova ena horoa witness taudia ese taunimanima dahaka idia hadibadia? (b) Dahaka ese ia hahedinaraia Kerisendom ena lohia taudia ese do idia roho mauri diba lasi Dirava ena “tuari kaia” ia gaukaralaia neganai?

¹⁴ Esekiel bamona, hari inai nega lalonai Iehova ena horoa witness taudia ese taunimanima idia hadibadia Dirava ese ena “tuari kaia” do ia gaukaralaia Kerisendom idia bamoa taudia iboudiai dekediai, “Israel tanona” ese ia laulaulaia gauna unai. Kahirakahira, “taunimanima iboudiai, diho kahana amo ela bona mirigini kahana” dekenai, tomadiho koikoi taudia iboudiai ese unai “tuari kaia” ena mamina do idia abia. Esekiel ena nega taudia idia hekokoroku, idia laloa Iehova ena “tuari kaia” amo do idia mase diba lasi. Unai “tuari kaia” ese Iuda basileiana ena lohia auna ia dadaraia, “au” idaudia iboudiai, eiava lohia auna iboudiai ia dadaraidia hegeregerena. Vadaeni, unai anina be Dirava ia gaukaralaia tuari oreana ese Kerisendom ena lohia taudia iboudiai danu do ia hamasedia.​—Esekiel 21:​6-17.

15. Nebukadnesara dekenai ia vara gauna ese edena bamona ia hahedinaraia taunimanima eiava demoni ese Iehova ena “tuari kaia” idia koua diba lasi?

¹⁵ Esekiel ena peroveta herevana ia hahedinaraia taunimanima eiava demoni ese Iehova ena “tuari kaia” idia koua diba lasi. (Esekiel 21:​18-22 duahia.) Ena be King Nebukadnesara ese demoni ena babalau karadia do ia gaukaralaia, diba ia tahua edeseniai do ia lao tuari totona, to Iehova ese dala do ia karaia Amono taudia edia siti Raba dekenai do ia lao lasi, to do ia lao Ierusalem dekenai ia tuari henia totona. Nebukadnesara ese udaia gauna ta amo diba ta do ia abia hidi, unai diba dekenai Ierusalem ena ladana idia torea. Danu ia ese teraphim (reana idia be kaivakuku maragidia, taunimanima edia toana bamona) do ia henanadai henidia, bona idia hamasea animal ena ase dekenai toa do ia tahudia. Ena be babalau karadia ia karaia, to Iuda ena dala ia abia hidi bona ena siti badana ia koua hegege, ia hadikaia totona. Momokani, Nebukadnesara ese gwauhamata ta ia karaia King Sedekia dekenai, to idia ese unai gwauhamata idia hamakohia dainai, Sedekia bona ma Iuda taudia haida ‘edia imadia do idia dogoatao’ bona igui hesiai taudia bamona do idia abidia lao idau tanona, Babulono dekenai.​—Esekiel 21:​23, 24.

16. (a) Dahaka ia vara Esekiel 21:​25-27 ena hereva hagugurua totona? (b) Idau bese edia nega be edena negai idia matamaia, bona dahaka ia vara idia doko neganai?

¹⁶ Ia gwau-edeede dainai, Sedekia ese sibona ia hamasea bamona. (Esekiel 21:​25-27 duahia.) Iuda ena king idia hamorua neganai, pavapava ena kwarana dabuana bona ena korona idia kokidia. (2 Pavapavadia 25:​1-7) Iuda ena basileia be lagani 607 B.C.E. ai idia hadikaia neganai, “atai” gabuna amo idia kokia bona “henu” gabuna ai idia atoa. Unai neganai “henu” idau besedia be “atai gabuna dekenai” idia atodia, bona tanobada idia lohiaia, bona Dirava ena tanobada basileiana ta ia noho lasi idia ia koudia totona. (Deuteronomi 28:​13, 15, 36, 43, 44) Unai neganai “idau bese edia nega” ia matamaia, bona unai nega idia ore lagani 1914 C.E. lalonai. Unai lagani ai Dirava ese Iesu Keriso dekenai gwaumaoro ia henia ia pavapava hamatamaia totona, ‘ia be unai dagi biaguna korikorina.’ (Luka 21:​20-24; Salamo 110:​1, 2; Daniel 4:​15-28; 7:​13, 14) Iesu be guba terona latanai ia helai dainai, idau bese taudia ese Ierusalem gunana ia laulaulaia gauna, David ena natuna korikorina ena Basileia unai, idia moia diba lasi.​—Heberu 12:22.

17. Amono peroveta taudia ese dahaka “koikoi” idia gwauraia?

¹⁷ Amono peroveta taudia idia gwau Nebukadnesara ena tuari kaia amo Amono ena siti badana Raba do idia hadikaia lasi. To unai be “koikoi” herevana, badina Amono ena tano ibounai do idia hadikaia. Hari inai nega lalonai, Dirava ia gwauhamata vadaeni, ia gwau Kerisendom do ia moru, bona murinai inai tanobada besedia do idia ore. Guna Ierusalem idia hadikaia murinai Raba idia hadikaia bamona.​—Esekiel 21:​28-32; Apokalupo 16:​14-16.

Ierusalem Ia Kota Henia

18. Dahaka kara dika dainai Esekiel ese Ierusalem ia gwauraia dika, bona ita ese unai kara edena bamona ita laloa be namo?

¹⁸ Esekiel ese Iehova ena hereva ma ia gwauraia neganai, ia ese Ierusalem ia gwauraia dika ena kara dika dainai, badina idia ese ala-ala, kaivakuku tomadiho henia, sihari kava, bona koikoi karadia idia karaia dainai, bona Dirava idia laloaboio dainai. Ierusalem ena lohia taudia ese edia siahu idia gaukaralaia kerere taunimanima hamasedia totona, bona hahebade koikoi taudia ese edia inai taudia edia ladana idia hadikaia koikoi karana amo idia hamasedia. Unai bamona kara dikana idia karaia dainai, Ierusalem ena taunimanima do idia hakarohodia. Unai sivarai ita diba dainai namona be iseda lalona ita hadaia, siahu do ita gaukaralaia kerere lasi, do ita sihari kava lasi, do ita koikoi lasi, bona kara dika badadia ma haida do ita karaia lasi totona.​—Esekiel 22:​1-16.

19. Dirava ese edena dala amo Iuda taudia do ia havevedia, bona dahaka dainai idia mase be maoro?

¹⁹ Iehova ese Iuda taudia be lahi lalonai do ia havevedia. Unai be hagoevadia totona do ia karaia lasi, to ena badu siahuna amo do ia havevedia totona. (Esekiel 22:​17-22) Gau dikana idia heboulaia peroveta taudia, taravatu utua hahelaga taudia, mataganigani lohia taudia, bona kara maoromaoro lasi taudia ese unai hahemaoro idia abia be maoro. Dirava ese iboudiai ia gwauraidia dika. Idia iboudiai be kara maoromaoro abia isi lasi taudia dainai, Dirava ese ena badu lahina amo do ia hamasedia.​—Esekiel 22:​23-31.

Hahemaoro Idia Abia be Maoro

20. Dirava ena badu be edena haheitalai hahinedia dekenai do ia bubua? Idia laulaulaidia gaudia mani oi gwauraidia.

²⁰ Murinai, lauma dalanai idia heudahanai haheitalai hahinedia rua ia hahemaoro henidia neganai Dirava ese ena badu ia hahedinaraia. Ta ena ladana be Ohola, ia be Israel ena iduhu ten basileiana mai ena siti badana Samaria ia laulaulaia. Ia be “hahine gunana,” badina Israel besena kahana badana be ia lalonai, Iakobo ena vara guna memero Ruben bona Simeon amo idia vara besedia danu. Ena tadina ladana be Oholiba, ia be Iuda ena iduhu rua mai ena siti badana Ierusalem ia laulaulaia. Ohola ena anina be “Ena Kalaga,” Oholiba ena anina be “Egu Kalaga be Ia Lalonai”; unai be namo badina Dirava ena kalaga, eiava dubu be Iuda dekenai ia noho.​—Esekiel 23:​1-4.

21. Ohola be edeseniai ia lao noho namo ia tahua totona, bona unai ese ita edena bamona ia sisiba henia?

²¹ Lagani 740 B.C.E. ai, Asuria taudia ese Ohola (Israel unai) idia hadikaia ore. Dahaka dainai unai dika ia davaria? (Esekiel 23:​5-7 duahia.) Abidadama lasi hahinena Ohola, ese noho namona ia abia totona, tanobada basileia idaudia ia turana henidia, to unai basileia edia tomadiho koikoi ia abia dae danu, unai dainai ia ese ‘sibona ia hamiroa edia miro kaivakuku gaudia amo.’ Namona be ita naria namonamo, Ohola bamona lauma dalanai ita heudahanai garina, bona tanobada turana henia karana amo iseda abidadama ita hadikaia.​—Iakobo 4:4; 1 Ioane 2:​15-17.

22. Ohola bona Oholiba hegeregeredia, Kerisendom ese dahaka ia karaia, to dahaka do ia vara ia dekenai?

²² Oholiba (Iuda unai), ese ena kakana ena dika ia hereaia, unai dainai lagani 607 B.C.E. ai, Babulono taudia ese idia hadikaia ore. Ena natudia be tuari kaia amo idia mase, eiava idia abidia mauri idau tano dekenai, bona tanobada besedia vairanai ia hemarai bada. Ena be Kerisendom ia gwau Dirava ia tomadiho henia, to Ohola bona Oholiba hegeregeredia, ia ese lauma dalanai ia heudahanai, unai be kara dikana Dirava vairanai. Protestant ena tomadiho idauidau ese sibodia idia hadikaia bamona badina tanobada ena bisinesi bona politikol oreadia danu idia gaukara hebou. Ena kakana, Roman Katolik tomadiho oreana unai, ena dika ia hereaia. Unai dainai Iehova ese dala do ia karaia Kerisendom ibounai do ia hadikaia ore totona. Unai neganai taunimanima iboudiai ese Siahu Ibounai Lohiabadana, Iehova, do idia diba. Tanobada do ita tura henia lasi bona ita haheauka noho diba bema inai ita laloatao: kahirakahira Kerisendom idia bamoa taudia ese ia do idia inai henia, bona idia dekena amo Dirava ena hahemaoro do idia davaria, ia be Babulono Badana, tanobada ibounai tomadiho koikoi oreana ena kahana badana dainai.​—Esekiel 23:​8-49; Apokalupo 17:​1-6, 15-18.

Koikoi Taudia Do Idia Hoa

23. December dokonai, lagani 609 B.C.E. ai, Esekiel dekenai Dirava ese Ierusalem ia gwauraia dahaka bamona, bona dahaka do ia vara ia dekenai?

²³ December dokonai (Tebeth 10, 609 B.C.E.) Nebukadnesara ese Ierusalem ia tuari henia hamatamaia, bona hua 18 lalodiai hanua ia koua hegege, unai dina maoromaorona ai, matahanai amo Dirava ese Esekiel dekenai ma sivarai ta ia henia. Ierusalem ia gwauraia uro ta bamona, bona ia gwau unai siti ena taunimanima ese unai uro lalonai do idia ‘nadudia.’ Kara bodaga karadia dainai unai haheitalai urona lalonai “rasta” ia noho. Kara dika taudia be “sisina sisina” Ierusalem lalona amo do idia veridia lasi, bona do ia hisihisi noho ela bona hanua do idia hadikaia ore. Iehova ese Ierusalem ia hahemaoro henia vadaeni ena kara dikadia hegeregeredia, ena mauri dalana ta be lasi to do ia haorea sibona, hegeregerena Kerisendom danu do ia haorea bamona.​—Esekiel 24:​1-14.

24. (a) Ena adavana ia mase neganai, dahaka dainai Esekiel ese ia taitailaia lasi? (b) Kerisendom ese dahaka do ia karaia Dirava ena “tuari kaia” ia dekenai ia gaukaralaia neganai, bona dahaka do ia diba?

²⁴ Unai murinai, Esekiel ese hahegani ia abia kara idauna ta do ia karaia totona. (Esekiel 24:​15-18 duahia.) Dahaka dainai peroveta tauna ena adavana do ia mase neganai do ia taitailaia lasi? Iuda taudia edia kara ia haheitalaia totona, Ierusalem, ena taunimanima, bona dubu do idia hadikaia neganai do idia hoa bona idia daradara bada herea ia haheitalaia unai. Esekiel ese idia dekenai Dirava ena hereva ia hadibadia loulou, bona idia dekenai ma hereva ta do ia gwauraia lou lasi ela bona Ierusalem ia moru sivaraina idia mailaia ia dekenai. Unai hegeregerena, Kerisendom mai ena tomadiho koikoi taudia do idia hoa kahirakahira idia mase neganai. “Hisihisi badana” do ia matamaia murinai, unai horoa gima oreana idia gwauraia guna herevadia, mase do ia davaria herevana unai, be idia hegeregere vadaeni. (Mataio 24:21) To Dirava ena “tuari kaia” Kerisendom dekenai do ia gaukaralaia neganai, unai idia hoalaia tomadiho orea taudia bona ma haida danu ‘do idia diba ia be Iehova.’​—Esekiel 24:​19-27.

Edena Bamona Do Oi Haere?

◻ Dahaka ia vara Iehova ese Iuda dekenai ena “tuari kaia” ia gaukaralaia neganai?

◻ Sedekia ese ena gwauhamata Nebukadnesara dekenai ia hamakohia karana ena anina ita dekenai be dahaka?

◻ Dirava ena “tuari kaia” ese dahaka ia laulaulaia?

◻ Dahaka ia vara Nebukadnesara dekenai, unai amo ita diba taunimanima eiava demoni ese Iehova ena “tuari kaia” idia koua diba lasi?

◻ Dahaka ia vara Esekiel 21:​25-27 ena hereva hagugurua totona?

◻ Ena adavana ia mase neganai Esekiel ia taitai lasi; unai ese dahaka ia laulaulaia?

[Picture on page 14]

King Sedekia ese ena gwauhamata Nebukadnesara dekenai ia hamakohia bona idau tano dekenai idia abia lao neganai, edena peroveta herevana ia guguru hamatamaia?