Iehova Ena Hereva be Ia Mauri Noho
Esekiela Bukana Ena Hereva Badadia—II
LAGANI 609 B.C.E. December ai, Babulonia ena king ese Ierusalema ia koua hagegea matamaia. Esekiela ese Babulonia ai idia noho igui hesiai taudia dekenai inai hereva ia gwauraia: Ierusalema hanuana do ia dika bona do ia moru. Bena gabeai, Esekiela ese ena peroveta herevana ia haidaua, ia gwau Dirava ena taunimanima idia kirikirilaia besedia be dika do idia davaria. Hua 18 murinai Ierusalema ia moru neganai, Esekiela ese ia gwauraia sivaraina be inai: Tomadiho momokani do idia haginia lou.
Esekiela 25:1–48:35 be Israela ena badinai idia noho besedia bona Dirava ena taunimanima hamauria karana ia perovetalaia.a Bona Esekiela ese unai ia torea dalana be unai gaudia idia vara edia nega edia nega hegeregerena ia torea. To Esekiela 29:17-20 be unai bamona ia torea lasi, unai siri be Aigupito ese do ia davaria dika ia perovetalaia. Esekiela bukana be Baibel ena kahana ta dainai, ena hereva be “ia mauri noho, bona ia be mai ena siahu.”—Heberu 4:12.
‘UNAI TANO BE EDEN ENA UMA GABUNA BAMONA’
Iehova ia itaia Ierusalema ia moru neganai, Amono, Moaba, Edoma, Pilistia, Turo, bona Sidono taudia be unai idia kirikirilaia, unai dainai Esekiela ia gaukaralaia unai hanua idauidau dekenai ia peroveta totona. Aigupito hanua do ia dika. “Farao, Aigupito ena king, mai ena taunimanima ibounai” be sida auna bamona, “Babulonia ena king ena tuari kaia” amo do ia utua.—Esekiela 31:2, 3, 12; 32:11, 12.
Lagani 607 B.C.E. ai, Ierusalema idia hadikaia bena hua 6 murinai, heau mauri tauna ta ia mai bona Esekiela ia hamaoroa: “Hanua be ia moru vadaeni, idia halusia vadaeni.” Bena Esekiela ena gadona ia namo bona ia hereva lou diba. (Esekiela 33:21, 22) Esekiela ese Ierusalema hanamoa lou ena peroveta herevana do ia gwauraia hedinarai. Iehova ese ‘mamoe naria tauna tamona, ena hesiai tauna Davida bamona, idia dekenai do ia henia.’ (Esekiela 34:23) Edoma be do idia hadikaia, to Iuda tanona be “Eden ena Uma Gabuna bamona” do ia lao. (Esekiela 36:35) Iehova ia gwauhamata ena taunimanima be “Goga” amo do ia gimadia.—Esekiela 38:2.
Baibel Henanadaidia Edia Haere:
29:8-12—Edena negai, Aigupito be lagani 40 ia noho kava? Lagani 607 B.C.E. ai Ierusalema idia hadikaia murinai, Iuda taudia oredia be Aigupito dekenai idia heau mauri, ena be Ieremia ena peroveta herevana ia gwau unai hanua be do ia dika. (Ieremia 24:1, 8-10; 42:7-22) Idia be gabu kererena dekenai idia heau lao, badina Nebukanesa be Aigupito ia tuari henia bona ia hadikaia. Unai nega murinai, Aigupito be lagani 40 lalonai ia noho kava. Ena be histori haida ese Aigupito hadikaia sivaraina idia hamomokania lasi, to ita diba unai be ia vara momokani, badina Iehova be peroveta herevadia ia Hagugurua Tauna.—Isaia 55:11.
29:18—Edena dala ai “tuari taudia edia kwaradia idia kebere lao, bona edia pagadia idia toto dikadika”? Nebukanesa ena tuari taudia ese Turo hanua idia koua hegege totona idia hekwarahi bada dainai, edia kwara gaudia ese edia kwarana idia dahua bena edia kwaradia idia kebere, bona magu haginia totona idia huaia kohudia dainai edia pagana idia toto.—Esekiela 26:7-12.
Ita Dibaia Gaudia:
29:19, 20. Turo taudia be motumotu dekenai idia heau mauri mai edia kohu ida, unai dainai King Nebukanesa ese unai hanua ia hadikaia neganai, kohu momo ia abia lasi. Ena be Nebukanesa be dirava koikoi ia tomadiho henia bona hekokoroku lohia tauna, to ena ‘hekwarahi ena davana’ dainai Iehova ese Aigupito ia henia. Tanobada ena gavamani be ita totona idia karaia gaukaradia dainai, takisi moni ita henia karana amo Dirava ita tohotohoa, a? Ena be gavamani ese takisi moni idia gaukaralaia kerere, to namona be Baibel ena taravatu ita badinaia bona takisi moni ita henia.—Roma 13:4-7.
33:7-9. Hari inai negai gima tauna oreana—horoa orena taudia unai—bona edia bamodia be Basileia sivarai namona idia harorolaia goadagoada bona ia mai noho “hisihisi bada herea” be taunimanima dekenai idia gwauraia hedinarai.—Mataio 24:21.
33:10-20. Kara dika ita rakatania bona Dirava ena ura daladia ita badinaia neganai, mauri do ita davaria. Oibe, Iehova ena dala “be maoro.”
36:20, 21. Bese idauidau idia diba Israela taudia be ‘Iehova ena orea taudia,’ to unai bese idauidau huanai idia be Dirava ena ladana idia hadikaia. Namo lasi iseda uduna sibona amo ita gwau ita be Iehova ena Witnes taudia, to iseda kara amo ita hahedinaraia lasi.
36:25, 37, 38. Ita be Iehova idia lalokau henia taudia bona mai goeva ida Ia idia tomadiho henia taudia huanai ita noho. Unai dainai namona be ita hekwarahi ita goeva noho totona.
38:1-23. Ita moale badina ita diba Iehova ese ena taunimanima do ia hamauria, Goga, Magoga tano tauna amo! “Inai tanobada ena lohia,” Satani Diabolo, ese inai ladana Goga ia abia, guba amo idia negea diho murinai. Bona Magoga tano tauna anina be inai tanobada, Satani bona ena demoni idia noho gabuna.—Ioane 12:31; Apokalupo 12:7-12.
“OI KAMONAI GAUDIA DO OI KAMONAI HENIDIA BONA LALODIA NAMONAMO”
Ierusalema idia hadikaia murinai, lagani 14 idia ore vadaeni. (Esekiela 40:1) Lagani 56 idia do noho, Iuda taudia be igui hesiai taudia bamona do idia noho. (Ieremia 29:10) Esekiela ena mauri lagani be kahirakahira 50 ia abia. Matahanai lalonai, ia be Israela tano dekenai ia noho. Aneru ese ia hamaoroa: “Tanobada tauna e, lau ese oi dekenai lau hedinaraia gaudia ibounai be oiemu matana do idia itaia namonamo, bona oi kamonai gaudia do oi kamonai henidia bona lalodia namonamo.” (Esekiela 40:2-4) Esekiela ia moale bada, badina unai matahanai lalona ia ese dubu matamatana ia itaia!
Esekiela ese ia itaia dubu mai hairaina lalonai, iduara be 6, ena daiutu be 30, Helaga gabuna, Helaga Herea gabuna, pata helagana (au gauna), bona boubou gaudia idia gabua patana. Dubu amo ia heau lao ranuna be “ia heau daekau” sinavai ena abata bamona. (Esekiela 47:1) Danu matahanai lalonai, Esekiela ese tano idia haria karana ia itaia—unai be ist kahana amo ia heau lao west kahana, Iuda besena bona Beniamina besena edia kahana maragina amo. “Lohiabada ena Dubu Helaga” bona “hanua badana” ladana Iehova-Shammah be inai kahana maragina dekenai ia noho.—Esekiela 48:9, 10, 15, 35.
Baibel Henanadaidia Edia Haere:
40:3–47:12—Matahanai lalonai Esekiela ese ia itaia dubuna ese dahaka ia laulaulaia? Unai dubu badana be dubu korikorina ia gwauraia lasi. To ia be Dirava ena lauma dubuna—hari inai negai tomadiho momokani totona idia karaia karadia ia laulaulaia. (Esekiela 40:2; Mika 4:1; Heberu 8:2; 9:23, 24) Bona unai matahanai be “nega ena dokona dekenai” ia guguru, unai nega ai hahelaga taudia edia gaukara be ia goeva. (2 Timoteo 3:1; Esekiela 44:10-16; Malaki 3:1-3) To, ena guguru negana ginigabena be Paradaiso ai do ia vara. Matahanai lalonai ia itaia dubuna ese ia hahedinaraia, igui hesiai Iuda taudia be tomadiho momokani do idia haginia lou bona Iuda bese taudia be unai tano ena kahana ta ta do idia abia.
40:3–43:17—Dubu ena hahetohoa karana ese dahaka ia hahedinaraia? Unai hahetohoa karana ese ia hahedinaraia, Iehova ena ura tomadiho momokani totona be do ia guguru.
43:2-4, 7, 9—Dubu helaga amo “king taudia edia mase tauanidia” idia kokia ena anina be dahaka? King edia mase tauanidia be kaivakuku ia herevalaia. Ierusalema ena lohia taudia bona ena taunimanima ese edia kaivakuku amo Dirava ena dubu idia hamiroa, bona unai gaudia be king bamona ai idia halaoa.
43:13-20—Esekiela ese matahanai lalonai ia itaia boubou patana be dahaka ia laulaulaia? Unai boubou patana be Dirava ena ura Iesu Keriso ena boubou gauna dekenai ia laulaulaia. Iesu ena boubou gauna dainai, horoa taudia ia gwauraia kara maoromaoro taudia bona “hutuma bada herea” taudia be Dirava ena vairanai idia goeva. (Apokalupo 7:9-14, NW; Roma 5:1, 2) Reana Solomona ena dubu ai ia noho tanika kuboruna—hahelaga taudia idia digu totona ranu be unuseniai idia abia—be Esekiela ese matahanai lalonai ia itaia dubuna dekenai ia noho lasi.—1 King Taudia 7:23-26.
44:10-16—Hahelaga taudia oreana ese daidia ia laulaulaia? Unai hahelaga taudia be hari inai negai horoa Keristani taudia idia laulaulaia. Lagani 1918 ai, Iehova be ena lauma dubuna dekenai ia helai neganai, Ia ese idia ia “hamanadaia bona hagoevaia.” (Malaki 3:1-5) Idia goeva eiava idia helalo-kerehai horoa taudia be edia hesiai gaukara idia karaia noho. Bona danu, idia hekwarahi bada ‘tanobada ena kara mirodia dekena amo idia raka siri,’ bona hahelaga lasi iduhu taudia—“hutuma bada herea”—dekenai haheitalai namona idia hahedinaraia.—Iamesi 1:27; Apokalupo 7:9, 10, NW.
45:1; 47:13–48:29—“Tano” bona tano idia haria karana ese dahaka ia laulaulaia? Unai tano be Dirava ena taunimanima ese idia karaia gaukara idauidau ia laulaulaia. Ena be Iehova ia tomadiho henia tauna be edeseniai ia noho, to bema tomadiho momokani ia abia isi, anina be ia be unai tano dekenai ia noho. Esekiela ese ia itaia tanona idia haria gaukarana be nega vairai dala badana ai do ia guguru, unai negai abidadama taudia ta ta be mai edia gabu tanobada matamatana dekenai.—Isaia 65:17, 21.
45:7, 16—Taunimanima ese hahelaga bona king taudia totona idia henia harihari gaudia ese dahaka ia hahedinaraia? Ia hahedinaraia tomadiho momokani do ita durua, gaukara idia gunalaia tadikaka do ita durua bona idia ida ita gaukara hebou.
47:1-5—Esekiela ese matahanai lalonai ia itaia sinavaina be dahaka ia laulaulaia? Iehova ese ia henia harihari gaudia, hegeregere Iesu Keriso ena mauri davalaia boubouna bona Baibel amo ita abia dibana ia laulaulaia. (Ieremia 2:13; Ioane 4:7-26; Efeso 5:25-27) Sinavai ia bada daekau, unai amo tomadiho momokani lalonai kamonai matamata taudia momo idia vareai diba. (Isaia 60:22) Keriso ena Lagani 1,000 Lohia Negana lalonai, unai sinavai be mauri ranuna amo do ia honu, “buka” do idia kehoa bona diba matamatadia do ita abia.—Apokalupo 20:12; 22:1, 2.
47:12—Huahua idia havaraia audia ese dahaka idia laulaulaia? Unai au be Dirava ese ia henia gaudia ia laulaulaia, unai gaudia ese taunimanima ia durua idia goevadae totona.
48:15-19, 30-35,—Esekiela ena matahanai lalonai ia itaia hanuana be dahaka ia laulaulaia? Unai hanua dekenai, “Iehova-Shammah” be “helaga lasi” tanona ai ia noho dainai, unai ese ia hahedinaraia ia be tanobada gauna ta ia laulaulaia. Toana be unai hanua be tanobada dekenai idia karaia gaukara haheaua karana ia laulaulaia, bona kara maoromaoro “tanobada matamata” ai do idia noho taudia dekenai namo do ia havaraia. (2 Petero 3:13) Kahana ibounai dekenai iduara idia noho dainai, ia hahedinaraia unai hanua dekenai vareai totona be ia auka lasi. Dirava ena taunimanima huanai idia noho maduna huaia taudia oi hereva henia diba.
Ita Dibaia Gaudia:
40:14, 16, 22, 26. Dubu ena raka vareai gabudiai, haba dekenai pama au rauraudia edia laulau idia noho, unai ese ia hahedinaraia kara maoromaoro taudia sibona be unai dubu lalonai idia vareai diba. (Salamo 92:12) Unai amo ita diba, bema mai kara maoromaoro ida Iehova ita tomadiho henia, Ia ese iseda tomadiho karana do ia abia dae.
44:23. Hari inai negai horoa oreana taudia ese idia karaia gaukara helagana dainai ita moale! “Hesiai tauna mai ena kamonai, bona mai ena kara maoromaoro” ese lauma aniani be nega korikori ai idia halasia, unai amo ita idia durua Iehova ena vairanai dahaka be namo bona dahaka be dika ita diba totona.—Mataio 24:45.
47:9, 11. Diba—ranu ese ia laulaulaia gauna ena kahana badana ma ta—ese hari iseda negai taunimanima momo dekenai namo ia mailaia. Nega bona gabu idauidau ai, unai diba ese taunimanima dekenai namo bada ia havaraia. (Ioane 17:3) To, mauri ranuna idia abia dae lasi taudia be ‘damena ia noho’ ranuna do idia abia—anina be dika do idia davaria. Unai dainai, gau badana be ‘do ita gaukara goada, hereva momokani do ita hadibaia maoromaoro’ totona!—2 Timoteo 2:15.
“Lau ese Bese Idauidau Dekenai Egu Ladana Ena Helaga Do Lau Hedinaraia”
Dirava momokanina ese Davida ena bese lalonai ia lohia king ginigabena ia kokia murinai, nega bada ia henia ela bona “Biaguna korikori be do ia mai” bona king dagina do ia abia. To, Dirava ese Davida ida ia karaia gwauhamatana ia laloaboio lasi. (Esekiela 21:27; 2 Samuela 7:11-16) Esekiela ena peroveta herevana lalonai be “hesiai tauna Davida” ia herevalaia, ia be “king” ai do ia lao. (Esekiela 34:23, 24; 37:22, 24, 25) Ia be Basileia ena lohia siahuna do ia abia, unai be Iesu Keriso. (Apokalupo 11:15) Iehova ese Mesia Basileiana amo ‘ena ladana ena helaga do ia hedinaraia.’—Esekiela 36:23.
Kahirakahira, Dirava ena ladana helagana idia hadikaia taudia be dika do idia davaria. To Iehova ena ladana idia hahelagaia bona edia mauri lalonai, dala maorona ai Iehova idia tomadiho henia taudia be mauri hanaihanai do idia abia. Unai dainai, hari ia aru badabada noho mauri ranuna amo idia mai gaudia ita gaukaralaia namonamo bona iseda mauri lalonai tomadiho momokanina ita atoa guna be gau badana.
[Footnote]
a Esekiela 1:1–24:27 ena hereva haida dibaia totona, July 1, 2007, ena Gima Kohorona lalonai “Esekiela Bukana Ena Hereva Badadia—I” itaia.
[Picture on page 19]
Matahanai lalonai, Esekiela ese dubu mai hairaina ta ia itaia
[Picture on page 20]
Matahanai lalonai, Esekiela ese ia itaia mauri sinavaina be dahaka ia laulaulaia?
[Credit Line]
Pictorial Archive (Near Eastern History) Est.