Iehova ena Witness Taudia
Anina: Iehova bona ena palani taunimanima totona tanobada ibounai dekenai idia harorolaia taudia, Keristen oreana lalonai idia noho. Edia hahediba herevadia be Baibel sibona latanai idia haginia.
Iehova ena Witness taudia be dahaka hahediba herevadia idia abia dae dainai idia be idau, tomadiho oreadia haida hegeregeredia lasi?
(1) Baibel: Iehova ena Witness taudia ese Baibel ibounai idia abia dae Dirava ena Hereva, Iena lauma amo ia havaraia gauna. Edia tubudia tamadia edia hahediba herevadia idia badinaia lasi, to edia hahediba herevadia iboudiai lalodiai Baibel idia badinaia.
(2) Dirava: Idia ese Iehova idia tomadiho henia badina be idia laloa ia sibona be Dirava momokanina. Ia bona ena palani taunimanima totona be taunimanima idauidau idia harorolai henidia, idia gari lasi. Taunimanima momo idia diba Iehova idia harorolaia taudia iboudiai be orea tamona taudia—“Iehova ena Witness taudia” unai.
(3) Iesu Keriso: Idia abia dae herevana be inai: Iesu Keriso be Toi Tamona Diravana ena kahana ta lasi, to Baibel ena hereva hegeregerena, ia be Dirava ena Natuna, Dirava ese ia havaraia tauna ginigunana; guna, taunimanima ta ai ia do lao lasi neganai, ia mauri noho; Dirava ese ena mauri guba amo ia abia diho, haneulato rami-hebou ta ladana Maria ena bogana lalonai ia udaia; iena mauri goevadaena be boubou gauna ta bamona ia atoa diho dainai, ia idia abidadama henia taudia ese hahemauri bona mauri hanaihanai do idia abia diba; lagani 1914 lalonai Dirava ese Iesu siahu ia henia tanobada ibounai do ia lohiaia, bona unai nega amo ema bona hari ia lohia noho.
(4) Dirava ena Basileia: Idia abia dae herevadia be inai: Dirava ena Basileia sibona ese tanobada taudia do ia hamauridia; ia be gavamani korikorina ta; nega daudau lasi murinai unai gavamani ese inai tanobada ena oromana dikana bona taunimanima edia gavamani do ia haoredia, bona oromana matamatana do ia havaraia, ia lalonai taunimanima iboudiai ese kara maoromaoro do idia karaia.
(5) Guba maurina: Idia laloa Keristen taudia 144,000, Dirava ese ena lauma amo ia horodia taudia, be Keriso ida do idia lohia hebou, iena guba Basileiana lalonai. Idia gwau lasi “kara namo” taudia iboudiai be guba dekenai do idia daekau, edia kara namo ena davana abia totona.
(6) Tanobada: Idia laloa Dirava ena palani tanobada totona, matamana neganai ia lalohadailaia gauna, be do ia hagugurua; tanobada be Iehova tomadiho henia taudia amo do ia honu; idia be taunimanima goevadaedia ai do idia lao bona do idia mauri ela bona hanaihanai; mase taudia danu do idia toreisi lou, bena unai hahenamo abidia dalana do idia davaria.
(7) Mase: Idia laloa mase taudia be gau ta idia diba lasi; lauma gabuna ta dekenai idia noho lasi; hisihisi ena mamina idia abia lasi bona moale ena mamina idia abia lasi; idia ore vaitani, gau tamona Dirava ese ia lalodiatao, unai dainai, mauri do idia abia lou dalana tamona be, mase amo do ia hatoredia isi lou.
(8) Dina gabedia: Idia laloa lagani 1914 amo ema bona hari ita be inai nega dikana ena dina gabedia lalodiai ita noho; lagani 1914 lalonai idia vara gaudia idia itaia taudia haida ese inai tanobada ena oromana dikana hadikaia ore negana do idia itaia; kara maoromaoro ura henia taudia do idia roho mauri bena tanobada goevana do idia noholaia.
(9) Tanobada amo idia siri: Idia be tanobada amo idia siri toho mai edia momokani ida, badina be Iesu ia gwau ia murinai idia raka taudia be unai bamona do idia karaia. Keristen momokani taudia hegeregeredia, idia ese edia dekena taudia idia lalokau henidia, to bese ta ena politik o ena tuari idia durua lasi. Edia ruma taudia idia naridia bona idia ubudia, to kohu momo bona moni momo bona ladana bada bona moale karadia momo be idia tahua lasi, tanobada taudia idia karaia bamona.
(10) Baibel ena sisiba idia badinaia: Idia laloa gau badana be Baibel ena sisiba be dina dina iboudiai idia badinaia, ruma ai, sikuli ai, bisinesi ai, bona edia kongregesen lalodiai danu. Herevana ta ena mauri dalana gunana be edena bamona, Baibel ese ia gwauraia dika karadia bema ia rakatania bona ena sisiba ia badinaia, ia be Iehova ena Witness tauna ai ia lao diba. To bema unai murinai matabodaga karadia ia karaia lou, eiava drag ia ania kava, eiava ia inuinu kekero, eiava ia koikoi, eiava ia henaohenao, orea amo do idia atoa siri.
(Iehova ena Witness taudia edia hahediba herevadia badadia haida sibodia be ataiai ai torea; unai hereva bona edia hahediba herevadia ma haida danu be idau, tomadiho oreadia idaudia edia hegeregeredia lasi. Atai herevadia edia badina Baibel lalonai oi tahua totona, inai buka ena Lisi rau 437-45 dekenai oi itaia.)
Iehova ena Witness taudia be America ena tomadiho oreana ta, a?
Idia be Dirava ena Basileia idia harorolaia; inai tanobada gunana ena bese ta ena politikol dalana o ena moni davaria dalana o ena mauri dalana be idia harorolaia lasi.
Momokani Iehova ena Witness taudia edia orea hari inai nega lalonai be United States dekenai idia hamatamaia. Edia hedikwota be unuseniai ia noho dainai, Baibel bukadia idia printaia diba bona tanobada ena kahana momo herea dekenai idia siaia diba. To Iehova ena Witness taudia ese bese ta idia ura henia bada lasi bona ta idia ura henia maragi lasi; idia be bese momo herea lalodiai idia noho, bona idia be mai edia opesi tanobada ena kahana momo dekenai, edia gaukara unai gabu idauidau dekenai naria totona.
Mani inai oi laloa: Iesu be Iuda tauna bona Palestine dekenai ia vara, to Keristen tomadihona be Palestine tomadihona ta lasi, ani? Iesu ena vara gabuna ita laloa momo lasi be maoro. Iesu ena hahediba herevadia be iena Tamana Iehova Dirava ena amo, bese idauidau taudia be dala tamona amo ia kara henidia Diravana unai.—Ioane 14:10; Kara 10:34, 35.
Edena dala amo Iehova ena Witness taudia ese moni idia abia edia gaukara haheaua totona?
Idia ta ta ena ura ena ura ai idia henia, Keristen taudia ginigunadia hegeregeredia. (2 Kor. 8:12; 9:7) Edia hebou dekediai moni idia gogoa lasi; idau taudia idia noidia lasi moni do idia henidia. Kamonai taudia ese idia henidia monina idia gaukaralaia, Baibel hadibaia gaukarana tanobada hegegemadai idia karaia totona.
Witness taudia be pei idia abia lasi, ruma ta ruma ta dekenai idia lao totona, eiava Baibel bukadia bona magasin be dala dekenai idia hariharilaia totona. Dirava bona edia dekena taudia idia lalokau henidia dainai, Dirava ena lalokau karadia idia herevalaia.
Orea ta ladana Watch Tower Bible and Tract Society of Pennsylvania be Commonwealth of Pennsylvania ena Nonprofit Law hegeregerena idia haginia, lagani 1884 lalonai. Unai taravatu hegeregerena, ia be moni haboua bisinesi oreana ta lasi, bisinesi ia karaia diba lasi moni haboua totona, bona haida ese unai orea amo unai bamona idia karaia diba lasi. Society ena gwaumaoro pepana, gavamani ese ia henia, ena hereva ta be inai: “[Society] ese moni haboua dalana ta ia lalohadailaia lasi, ena memba eiava ena dairekta eiava ena dagi taudia ese moni do idia abia totona.”
Iehova ena Witness taudia edia orea be tomadiho oreana gunana ta amo ia parara, a?
Haida ese Iehova ena Witness taudia unai bamona idia gwauraidia dika, idia gwau edia orea be tomadiho oreana gunana ta amo ia parara, idia be tau ta dekenai idia hakapua totona. To Iehova ena Witness taudia edia orea be tomadiho oreana gunana ta amo ia vara lasi. Edia orea taudia be mauri daladia idauidau amo bona tomadiho oreadia idauidau amo. Idia ese taunimanima ta idia gwauraia lasi edia gunalaia tauna, to Iesu Keriso sibona be unai bamona idia gwauraia.
Iehova ena Witness taudia edia tomadiho be edena negai ia matamaia?
Baibel ese ia hahedinaraia Iehova ena witness tauna ginigunana be kamonai tauna Abel. Heberu 11:4–12:1 ia gwau: “Abela ese Dirava ia abidadama henia, bona boubou gauna Dirava dekenai ia henia. . . . Noa ese Dirava ia abidadama henia, vadaeni Dirava ese dohore idia vara gaudia Noa dekenai ia hadibaia guna. Vadaeni Noa ese, Dirava ia kamonai henia . . . Aberahamo ese Dirava ia abidadama henia. Unai dainai Dirava ese Aberahamo ia boiria, vadaeni Aberahamo ese Dirava ena hereva ia kamonai henia. Iena hanua ia rakatania, Dirava ese ia ura do ia henia tanona dekenai do ia lao totona. . . . Mose ese Dirava ia abidadama henia dainai ia bada neganai ia ura lasi ia idia gwauraia Farao natuna hahine ena natuna. Ia laloa Dirava ena bese taudia danu do ia hisihisi hebou be namo. Kara dika ena moale, nega daudau lasi idia noho gaudia be ia ura lasi. . . . Ita be edena bamona? Ita idia itaia noho [witness] taudia hutuma bada ese ita idia hagegea noho. Abidadama dalana ita dekenai idia ese idia hedinaraia vadaeni. Unai dainai namona be ita idia hametaua gaudia ibounai, bona ita idia guia noho kara dikadia do ita negea momokani. Vadaeni iseda vairana dekenai ia noho heau helulu mai haheauka danu do ita heau.”
Iesu Keriso be Baibel ese inai bamona ia gwauraia: “Hereva momokani tauna, bona Dirava ena hereva ia gwauraia maoromaoro [witness] tauna, ia be Dirava ia karaia gaudia ena badina momokani.” Ia be daika ena witness tauna? Ia sibona ia gwau ia ese ena Tamana ena ladana ia gwauraia hedinarai. Ia be Iehova ena witness tauna badana.—Apok. 3:14; Ioane 17:6.
Iuda taudia haida ese Iesu ena kara idia henanadailaia, unai kara be “hadibaia gauna matamata” eiava. (Mar. 1:27) Gabeai Greek taudia haida idia laloa aposetolo Paulo ese “hadibaia hereva matamata” ia harorolaia. (Kara 17:19, 20) Unai hereva idia kamonai taudia idia laloa ia be hereva matamatana, to gau badana be inai, ia be hereva momokani, Dirava ena Hereva hegeregerena.
Iehova ena Witness taudia hari inai negai edia orea be lagani 1870 murinai ia matamaia, Baibel stadi totona orea ta be Allegheny, Pennsylvania, U.S.A. dekenai idia haginia neganai. Matamana neganai edia ladana idia hatoa Bible Student taudia, to lagani 1931 lalonai edia ladana idia hatoa Iehova ena Witness taudia, Baibel ena hereva hegeregerena. (Isa. 43:10-12) Edia hahediba herevadia bona edia kara be matamata lasi, to Keristen tomadihona, aposetolo edia negai gauna, be idia ese idia haginia lou.
Iehova ena Witness taudia idia laloa edia tomadiho sibona be maoro, a?
Hari inai negai haida idia laloa Dirava tomadiho henia daladia maorodia be momo, to Baibel ese unai lalohadai ia hamomokania lasi. Efeso 4:5 ia gwau: “Lohiabada be tamona, abidadama be tamona.” Iesu ia gwau: “Mauri gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi. . . . Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana guba dekenai ia noho ena ura idia karaia taudia, idia sibona do idia vareai.”—Mat. 7:13, 14, 21; ma danu 1 Korinto 1:10 itaia.
Buka Helaga lalonai, Keristen hahediba herevadia momokanidia be “hereva momokani” idia gwauraia, bona Keristen tomadihona be “hereva momokani ena dala” idia gwauraia. (1 Tim. 3:15; 2 Ioane 1; 2 Pet. 2:2) Iehova ena Witness taudia ese edia hahediba herevadia iboudiai, edia taravatu iboudiai, bona edia orea naria daladia iboudiai be Baibel amo idia abia, bona idia laloa Baibel be Dirava ena Hereva, unai dainai idia laloa idia abia herevadia be hereva momokani. Idia hekokoroku lasi, to edia kara ese ia hahedinaraia idia laloa edia tomadiho be Baibel ena hereva ida idia hahegeregerea be maoro. Sibodia edia namo idia tahua lasi, to idia ura bada idia abia dae vadaeni herevadia be taunimanima ma haida do idia hadibalaidia.
Tomadiho oreadia ma haida danu ese Baibel idia badinaia, a?
Idia momo ese idia iusilaia. To ena hereva idia harorolaia momokani bona idia badinaia momokani, a? Mani inai oi laloa: (1) Dirava momokanina ena ladana be nega tausen momo edia Baibel momo amo idia kokia. (2) Toi Tamona herevana, Dirava idia lalohadailaia herevana unai, be etene taudia edia amo idia abia. Baibel torea karana ia ore bena lagani 250 bamona murinai unai hereva idia gwauraia hedinarai matamaia, bena idia habadaia lao. (3) Idia laloa taunimanima be mai edia mase diba lasi laumadia; unai lalohadai be Baibel amo idia abia lasi, ia be Babulono gunana amo. (4) Iesu ese Dirava ena Basileia ia harorolaia, bona ena hahediba taudia ia siaidia ma haida do idia hamaorolaidia; to hari inai negai dubu oreadia ese Basileia idia herevalaia momo lasi, bona edia orea taudia ese “Basileia ena Sivarai Namona” idia harorolaia lasi. (Mat. 24:14) (5) Iesu ia gwau iena hahediba taudia momokanidia be ta ta ena namo ena namo do idia tahua lasi to do idia lalokau heheni, unai dainai taunimanima do idia diba idia be iena hahediba taudia. To bese ta be bese ta ida idia tuari heheni negadiai, Kerisendom ena tomadiho oreadia be unai bamona idia karaia lasi, ani? (6) Baibel ia gwau Keriso ena hahediba taudia be tanobada ena lasi, ma ia gwau tanobada ia tura henia tauna be Dirava ena inai tauna ai ia lao; to Kerisendom ena dubu oreadia bona edia orea taudia ese bese idauidau edia politikol karadia idia durua momo. (Iak. 4:4) Unai bamona idia karaia dainai, ita gwau diba lasi idia be momokani Baibel idia badinaia, ani?
Iehova ena Witness taudia ese Baibel ena anina idia gwauraia dalana be edena bamona idia davaria?
Witness taudia idia abia dae momokani Baibel be Dirava ena Hereva bona ia amo ita ia hadibaia. (2 Tim. 3:16, 17; Roma 15:4; 1 Kor. 10:11) Unai dainai tanobada ena aonega herevadia gagevadia idia gwauraia lasi, Baibel ena hereva hakoikoia totona, eiava ena taravatu idia negea taudia edia mauri dalana gwauraia namo totona.
Baibel ena parabole herevadia edia anina idia gwauraia hedinarai neganai, Baibel ese ia gwauraia herevadia idia gwauraia, sibodia edia lalohadai idia gwauraia lasi. (1 Kor. 2:13) Parabole herevadia momo edia anina be Baibel ena kahana ma haida lalodiai idia davaria. (Hegeregere, “davara,” Apokalupo 21:1 ese ia gwauraia gauna, ena anina be Isaia 57:20 ese ia gwauraia; “Mamoe ena Natuna,” Apokalupo 14:1 ese ia gwauraia tauna, be Ioane 1:29 bona 1 Petero 1:19 ese idia gwauraia.)
Peroveta herevadia edia anina idia vara daladia davaria totona, Iesu ena hereva idia badinaia, ia gwau namona be ena hahediba taudia do idia gima bena ia perovetalaia gaudia do idia vara neganai unai do idia lalo-pararalaia. (Luka 21:29-31; ma danu 2 Petero 1:16-19 itaia.) Unai gau idia vara neganai, idia herevalaidia bona Baibel ena hereva hegeregerena edia anina idia gwauraia hedinarai.
Iesu ia gwau iena “hesiai tauna mai ena kamonai bona mai ena kara maoromaoro,” be tanobada dekenai do ia noho. Iena hahediba taudia, lauma helaga amo ia horodia taudia, edia orea ia gwauraia unai, unai orea amo lauma aniani be abidadama taudia do ia henidia. (Mat. 24:45-47) Iehova ena Witness taudia ese unai dala idia abia dae. Aposetolo edia negai idia noho Keristen taudia hegeregeredia, idia ese unai “hesiai tauna” oreana ena hakaua oreana ena heduru idia tahua, henanadai aukadia do idia haerelaia totona—unai be taunimanima edia aonega amo lasi, to Dirava ena Hereva bona ia ese ena hesiai taudia ia kara henidia daladia danu be idia diba, bona idia be unai edia diba idia gaukaralaia, bona Dirava ena lauma ena heduru idia gurigurilaia mai edia lalona ibounai ida; unai ibounai dainai unai henanadai idia haerelaidia diba.—Kara 15:1-29; 16:4, 5.
Dahaka dainai nega haida Iehova ena Witness taudia ese edia hahediba herevadia idia haidaua?
Baibel ese ia hahedinaraia Iehova ese ena hesiai taudia edia diba iena palani dekenai ia habadaia lao ela bona idia lalo-pararalaia momokani. (Her. 4:18; Ioane 16:12) Unai hegeregerena, peroveta taudia, Dirava ese ena lauma amo ia hasiahudia Baibel ena hereva haida idia torea totona, be unai hereva haida edia anina idia lalo-pararalaia lasi. (Dan. 12:8, 9; 1 Pet. 1:10-12) Iesu Keriso ena aposetolo idia diba idia be gau momo idia do lalo-pararalaia lasi. (Kara 1:6, 7; 1 Kor. 13:9-12) Baibel ese ia hahedinaraia, “dokona negana” lalonai Dirava ena hesiai taudia edia diba hereva momokani dekenai do ia bada. (Dan. 12:4) Ta ena diba ia bada ia lao neganai, ena lalohadai ia haidaua be namo reana. Iehova ena Witness taudia ese edia lalohadai unai bamona idia haidaua mai edia lalo-manau ida.
Dahaka dainai Iehova ena Witness taudia be ruma ta ruma ta dekenai idia haroro loaloa?
Iesu ese iseda nega lalonai do idia karaia gaukarana ia perovetalaia, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” Ia ese danu ena hahediba taudia ia haganidia, ia gwau: “Umui lao, bese ibounai be diba tahua taudia do umui halaoa.”—Mat. 24:14; 28:19.
Iesu ese ena hahediba taudia ia siaidia lao neganai, ia hamaorodia taunimanima edia ruma dekediai do idia lao. (Mat. 10:7, 11-13) Aposetolo Paulo ese sibona ena haroro gaukara ia herevalaia, ia gwau: “Umui dekenai lau haroro bona hadibaia neganai, emui ruma dekenai, bona taunimanima vairanai durua gauna ta lau hunia lasi umui dekenai.”—Kara 20:20, 21; ma danu Kara 5:42 itaia.
Iehova ena Witness taudia ese idia harorolaia herevana be mai anina taunimanima edia mauri dekenai, unai dainai idia naria namonamo, ta do idia reaia garina. (Sef. 2:2, 3) Lalokau dainai taunimanima edia ruma dekediai idia lao—Dirava idia lalokau henia, bona edia dekena taudia danu.
Tomadiho gunalaia taudia Spain dekenai idia hebou neganai idia gwau: “Witness taudia ese idia goadalaia momokani karana be [tomadiho oreadia] ese idia manokalaia momokani reana—taunimanima edia ruma lao henidia karana unai. Aposetolo hegeregeredia, idaunegai ekalesiana taudia ese unai kara idia karaia. Dubu oreadia ese edia dubu idia haginidia, taunimanima veridia totona edia gaba idia botadia, bona edia dubu lalodiai idia haroro, to [Witness taudia be] aposetolo edia kara idia tohotohoa; ruma ta ruma ta dekenai idia lao, bona dala idia davaria negadia ai idia haroro.”—El Catolicismo, Bogotá, Colombia, September 14, 1975, p. 14.
To dahaka dainai Witness taudia be idau tomadiho taudia edia ruma dekediai idia lao loulou?
Idia ese taunimanima idia doridia lasi edia hereva idia abia dae totona. To idia diba nega haida taunimanima be ruma ta idia rakatania bona idau ruma dekenai idia lao idia noholaia totona, bona edia mauri idia senisi danu. Reana hari dina ta ia bisi momokani dainai ia ura lasi ia kamonai, to reana gabeai do ia kamonai mai ena moale ida. Ruma taudia ta be reana ia ura lasi kamonai, to haida idia ura reana. Danu, taunimanima idia idau idia lao; hekwakwanai badadia be edia mauri lalodiai idia vara neganai, reana mamina idia abia lauma dalanai idia dabu.—Isaia 6:8, 11, 12 itaia danu.
Dahaka dainai haida ese Iehova ena Witness taudia idia dagedage henidia bona idia gwauraidia dika?
Iesu ia gwau: “Tanobada taudia ese umui do idia badu henia, to umui diba vadaeni, idia ese lau dekenai idia badu henia guna vadaeni. Bema umui be tanobada ena taudia momokani neganai tanobada taudia ese umui do idia lalokau henia. To umui be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia.” (Ioane 15:18, 19; ma danu 1 Petero 4:3, 4 itaia.) Baibel ese ia hahedinaraia tanobada ibounai be Satana ena siahu henunai ia noho; ia be unai dagedage havaraia tauna badana.—1 Ioane 5:19; Apok. 12:17.
Iesu ese danu ena hahediba taudia ia hamaorodia, ia gwau: “Lauegu ladana dainai taunimanima ibounai do idia badu henia umui dekenai.” (Mar. 13:13) Unai siri lalonai inai hereva “ladana” anina be Iesu ena dagi, Mesia Pavapavana dagina. Haida ese Iehova ena Witness taudia idia dagedage henidia, badina be iena hahegani idia laloa bada, tanobada lohiadia edia hahegani idia laloa maragi.
Bema Ta Ia Gwau—
‘Dahaka dainai umui ese tanobada (o hanua) hanamoa karadia umui durua lasi?’
Reana inai bamona oi hereva: ‘Momokani oi ese inai hanua dekenai idia vara gaudia oi laloa momo, bona lau ese danu. Mani lau oi hamaoroa, Oi laloa dahaka kerere do idia hamaoromaoroa guna be namo?’ Bena reana ma oi gwau: ‘Dahaka dainai oi be unai bamona oi laloa? . . . Momokani, bema kara haraga unai kerere idia hamaoromaoroa, reana unai ese namo do ia havaraia, to ita ibounai ita ura unai namo be nega daudau do ia noho. Ai Iehova ena Witness taudia emai lalohadai be inai bamona. (Iseda heduru karadia oi gwauraia hedinarai, unai kara amo taunimanima ita durudia, Baibel ena hereva be edia mauri lalonai do idia badinaia, unai kerere ena badina be edia mauri amo do idia kokia totona; Dirava ena Basileia ese do ia karaia karadia danu oi kikilaia, unai kara ese tanobada taudia edia hekwakwanai do ia haorea ela bona hanaihanai.)’
Eiava inai bamona oi hereva diba: ‘(Haere ginigunana ena hereva haida oi gwauraia murinai, oi gwau:) Taunimanima edia noho hanamoa totona haida ese moni idia harihari henidia, ma haida be idia gaukara davana lasi dabu taudia durudia totona. Iehova ena Witness taudia ese unai kara ruaosi idia karaia. Mani lau ese lau gwauraia hedinarai.’ Bena reana ma oi gwau: (1) ‘Iehova ena Witness taudia ese edia takisi idia henia mai edia momokani ida; unai moni amo gavamani ese dabu taudia ia durudia diba.’ (2) ‘Unai sibona lasi, to ai be taunimanima edia ruma dekediai ai lao, ai hamaorodia bema idia ura neganai Baibel do ai hadibalaidia davana lasi. Baibel ena hereva idia diba neganai, Baibel ena sisiba badinaia dalana idia diba, bena unai dala amo edia hekwakwanai idia hanaidia diba.’
Ma haere ta: ‘Emu henanadai lau moalelaia. Taunimanima momo idia henanadai vadaeni, Witness taudia be dahaka idia karaia, taunimanima edia noho hanamoa totona. Momokani, heduru daladia be idauidau, tamona sibona lasi.’ Bena reana ma oi hereva: (1) ‘Idia heduru totona, haida ese ruma idauidau idia haginia—hospital, taunimanima burukadia edia noho rumadia, raskol taudia hanamodia lou rumadia, bona unai bamona rumadia ma haida. Haida be taunimanima edia ruma dekediai idia lao bona edia diba hegeregerena idia durudia, davana lasi.’ (2) ‘Baibel ese mauri ena anina korikori bona nega vairai do idia vara gaudia ia hahedinaraia. Ai itaia vadaeni, ta ese unai ia diba neganai, unai diba ese ena lalohadai ibounai ia haidaua diba.’
Ma lalohadai ta: ‘Unai henanadai oi gwauraia dainai lau moale. Ita ura tanobada do ia namo ia lao, ani? Mani lau oi hamaoroa, Iesu Keriso ese ia karaia karadia be edena bamona oi laloa? Oi laloa ia ese taunimanima ia durudia momokani, a? . . . Ai ese iena kara ai tohotohoa.’
‘Namona be Keristen taudia be Iesu ena witness taudia ai idia lao, Iehova ena lasi’
Reana inai bamona oi hereva diba: ‘Momokani, Iesu ena witness taudia ai ita lao be namo. Unai dainai ai ese Iesu ena kara Dirava ena palani lalonai be ai herevalaia momo emai buka lalodiai. (Buka ta o magasin ta amo unai oi hahedinarai henia.) To mani inai oi laloa. (Apok. 1:5) . . . Iesu be daika ena witness tauna? Daika “ena hereva ia gwauraia maoromaoro”? (Ioane 5:43; 17:6) . . . Namona be Iesu ena kara ita tohotohoa, ani? . . . Dahaka dainai Iesu bona iena Tamana danu ita diba be gau badana? (Ioane 17:3)’