Ruma Bese Durua Gauna Korikorina
“Ita gwau diba, America dekenai ruma bese lalonai hekwakwanai badadia idia vara noho. Unai bamona ita hereva badina headava hadokoa karadia, headava lasi to natuna abia kava karadia, bona natu bona adavana dagedage henia karadia ita itaia momo dainai.”
UNAI be United States ena televisen dekenai ia hereva tauna, Tom Brokaw, ese ia gwauraia bona idia be tano momo dekenai idia momokani danu. Unai hekwakwanai badadia edia anina be dahaka?
Ruma bese be tanobada besedia edia badina badana dala momo ai. Bema ruma bese be mai edia hekwakwanai, tanobada besedia be mai edia hekwakwanai danu. Ma danu, ruma bese ese natudia dekenai lalokau idia hahedinaraia bona moni dalanai idia durudia. Idia ese mauri lalonai idia vara mai anina bada gaudia ginigunadia be ruma bese amo idia dibaia. Bema ruma bese be mai ena hekwakwanai, natudia be dahaka gaudia idia dibaia noho? Idia noho namo, a? Idia bada neganai edena bamona taudia ai do idia lao?
Inai hekwakwanai bada negana lalonai ruma bese totona heduru ia noho, a? Oibe. Ruma bese be Dirava sibona ese ia haginia oreana. (Genese 1:27, 28) Bona iena Hereva, Baibel, lalonai ruma bese ia durua bada sisiba ia torea. (Kolose 3:18-21) Momokani, ita be tanobada besedia ita haidaua diba lasi, to ita ese iseda ruma bese lalonai Baibel ena sisiba ita badinaia diba. Ai ura umui dekenai unai bamona idia karaia bona namo idia davaria taudia haida edia sivarai ai gwauraia.
Headava Hadokoa Karana Ia Koua
Tano haida dekenai headava ibounai amo 50 pesen be edia headava idia hadokoa. Taunimanima edia noho hebou karana dekenai unai be dika bada herea! Momokani, unai kara dainai tama sibona eiava sina sibona ese natudia idia naria bona idia be mai boga-auka ida gaukara namona idia karaia. To momo do idia gwau dala namona be tau bona hahine ese edia hekwakwanai idia hanamoa bona idia noho hebou.
Solomon Islands dekenai tau ta bona hahine ta edia headava be ia dika ia lao. Tau be lohia tauna ena natuna bona ia be dagedage tauna mai ena kara dikadia momo danu. Iena adavana ena mauri be ia auka momokani dainai ia sibona ia hamasea toho. Bena, tau be Iehova ena Witness taudia ida Baibel ia stadilaia matamaia. Ia dibaia Dirava idia ura idia hamoalea taudia ese dahaka be dika do idia diba sibona lasi, to ‘dika idia inai henia’ danu. (Salamo 97:10, NW) Anina be koikoi, henaohenao, dagedage bona inuinu kekero do idia inai henia. Unai sisiba ia badinaia bona daudau lasi murinai iena kara dikadia bona ena badu haraga karana ia hadokoa. Ena kara ia haidaua dainai ena adavana ia hoa, bona Dirava ena Hereva ena heduru dainai edia headava maurina ia namo ia lao.
South Africa ai, Iehova ena Witness hahine ta ia kamonai iena gaukara biaguna bona ena tau be edia headava do idia hadokoa idia lalohadailaia noho. Witness hahine ese iena biaguna dekenai Dirava ena lalohadai headava dekenai ia herevalaia bona buka ladana The Secret of Family Happiness ia hahedinaraia. Iehova ena Witness taudia ese unai buka idia halasia, bona ia ese Baibel ena hakaua herevadia headava totona ia herevalaia, bona Baibel ese headava taudia edia hekwakwanai idia hamaoromaoroa dalana ia hahedinaraia badabada. Unai hahine bona ena adavana ese unai buka idia duahia bona idia hekwarahi Baibel ese ia henia sisiba idia badinaia totona. Unai dainai, edia lalona idia hadaia edia headava do idia hadokoa lasi—unai be Baibel ena hakaua herevadia badinaia karana ese ia hanamoa headavana ma ta.
Tomadiho Idauidau
To edena bamona bema headava lalonai tau bona hahine edia tomadiho be idauidau? Baibel ese Keristani taudia dekenai sisiba maorona ia henia ‘Keristani tauna sibona do idia adavaia.’ (1 Korinto 7:39) To, nega haida tau eiava hahine ese iena tomadiho ia haidaua. Unai ese headava ia hadokoa, a? Lasi, ia hadokoa lasi.
Botswana dekenai Iehova ena Witness ta ai ia lao hahinena ta idia nanadaia ena tomadiho matamatana ese edena bamona iena kara ia haidaua. Ena adavana ia nanadaia ia totona do ia haere, bona ena tau be inai bamona ia hereva: “Egu adavana be Iehova ena Witness ta ai ia lao neganai, lau itaia ia ese kara namodia momo ia karaia. Hari ia be mai ena aonega goadana, guna unai ia hahedinaraia lasi. Mai ena goada bona ura ida kuku ania karana ia hadokoa, to lau be unai dika gauna lau do rakatania lasi. Egu adavana be emai natudia bona lau bona ma haida dekenai lalokau bona hebogahisi ia hahedinaraia. Nega momo ia haheauka bona natudia dekenai unai kara ia hahedinaraia momo. Lau itaia haroro gaukara lalonai nega ia henia ma haida ia durua edia mauri idia hanamoa totona. Lau sibona dekenai lau itaia danu, lau be kara namodia haida lau karaia. Lau diba unai ia vara ena badina tamona be iena haheitalai namona dainai.” Baibel ena hakaua herevadia ese unai headava idia hanamoa! Witness lasi adavadia momo ese edia Witness adavadia be unai bamona idia gwauraidia danu.
Tama ese Iena Maduna Ia Dadaraia Neganai
Tama bona natu huanai hetura namonamo karana be ruma bese goadadia haginia karana edia badina. Aposetolo Paulo be sisiba ia henia, ia gwau: “Bona umui, tama e, emui natudia do umui habadua kava lasi, to Iehova ena matahakani bona lalona biagua karana ai do umui naridia.” (Efeso 6:4, NW) Unai dainai, The Wilson Quarterly magasin ena hereva ta lalonai ia gwau bese lalonai idia vara hekwakwanai momo be edia maduna idia huaia lasi tamadia edia kerere. Ia gwau: “Lagani 1960 bona 1990 huanai, edia tamadia korikoridia ida idia noho lasi natudia edia namba be nega rua amo ia bada daekau . . . Tama ese edia maduna idia dadaraia karana be America besena lalonai idia vara hekwakwanai badadia momo edia badina.”
Unai ena anina be edia tamana ese idia naria lasi natudia be dika sibona do idia davaria, a? Lasi. Idaunegai Salamo bukana ia torea tauna ia gwau: “Egu tamana bona sinana, ese lau idia rakatania, to Lohiabada ese lau do ia abia dae.” (Salamo 27:10) Thailand dekenai ena mauri lagani be 9 merona ia davaria unai be momokani. Ia be beibi neganai iena sinana ia mase, bona iena tamana ese ia ura henia lasi dainai, ena tubuna hahine ida ia rakatania. Ia mamia haida ese idia ura henia lasi bona idia lalokau henia lasi dainai, ia gwau-edeede bona momo idia gwau ia be dagedage merona. Iena tubuna hahinena dekenai hagaria herevadia ia gwauraia danu. Iehova ena Witness ful-taim hesiai gaukara idia karaia taudia rua ese idia itaia nega momo unai gabu ena Kingdom Hall murimurinai ia gini, bona dina ta edia ruma dekenai idia boiria.
Idia ese ia dekenai Dirava idia herevalaia—idia gwau Ia be tama ta bamona iena natudia ia lalokau henia. Idia ese abidadama taudia dekenai Dirava ese ia gwauhamatalaia tanobada Paradaisona idia kikilaia danu. (Apokalupo 21:3, 4) Mero ese unai hereva ibounai ia ura henia dikadika, bona dina ibounai ia giroa lao hereva ma haida ia dibaia totona. Witness taudia ese idia hamaoroa ia ese dagedage karana do ia rakatania bema ia ura momokani Dirava be iena Tamana ai do ia lao. Unai be Paulo ese Roma taudia dekenai ia gwauraia hegeregerena: “Maino karaia daladia umui tahua dala idauidau ibounai dekenai, taunimanima danu mai maino danu do umui noho totona.” (Roma 12:18) Iena tubuna hahine be mai hebogahisi ida do ia kara henia danu. (1 Timoteo 5:1, 2) Daudau lasi murinai, ia ese Baibel ena hakaua hereva ia badinaia—ita diba unai ese iena ruma bese maurina iena tubuna hahinena ida ia hanamoa bada. (Galatia 5:22, 23) Dekena taudia be iena kara matamata idia itaia bona idia hoa momokani dainai idia ura edia natudia be Iehova ena Witness taudia ida Baibel idia stadilaia!
Maino Karana
Aposetolo Paulo ese Kolose taudia ia tore henidia, ia gwau: “Do umui lalokau henia, vadaeni do umui noho hebou namo herea, mai laloa tamona danu. Keriso ena maino nega ibounai do umui abia noho emui kudouna lalonai.” (Kolose 3:14, 15) Maino karana bona lalokau korikorina be ruma bese do idia hatamonaia momokani. Idia ese nega daudau lalonai idia noho ruma bese hapararaia karadia idia hanamoa diba. Albania dekenai ia noho hahine ta, Rukia, be ruma bese ena hepapahuahu ta dainai lagani 17 lalonai iena taihuna ia hereva henia lasi. Iehova ena Witness taudia ida Baibel ia stadilaia neganai, ia dibaia Dirava ena hesiai taudia be do idia gaukara goada ma haida ida maino idia karaia totona. “Maino do ia tahua, bona maino ena dala do ia badinaia noho.”—1 Petero 3:11.
Rukia ia lalo-parara ia ese ena taihuna ida maino do ia karaia be namo. Hanuaboi ibounai ia guriguri, bena daba ai, mai gari bada ida taihuna ena ruma dekenai ia raka lao, ena kudouna ia hetaha bada. Taihuna ena natuna kekeni ese iduara ia kehoa bona mai hoa bada ida ia henanadai: “Dahaka oi karaia noho iniseni?” Mai manau ida Rukia ese ena taihuna totona ia henanadai, ia gwau ia ura taihuna ida maino do ia karaia. Dahaka dainai? Badina hari ia diba unai be Dirava ena ura. Iena taihuna ese ia abia dae, idia maino heheni bona ta ta idia rosia bona idia taitai—Baibel ena hakaua herevadia idia badinaia dainai, maino idia karaia ruma bese ta be unai.
Hebamo Dikadia
Buka ta ladana, The 7 Habits of Highly Effective Families, ia gwau: “Hari inai negai, natu ta ese dina ta lalonai hora 7 lalonai televisen ia itaia. Komiuniti sikuli ia haorea neganai, ia be ala-ala karadia 8,000 mai kahana bona dagedage karadia 100,000 mai kahana ia itaia vadaeni.” Unai bamona kara ia itaia dainai natu dekenai dahaka ia vara? Unai henanadai ena haere dekenai “diba momo taudia” idia lalo-tamona lasi, to Baibel be hebamo dikana dainai sisiba aukana ia henia. Hegeregere, ia gwau: “Kavakava taudia danu oi turana karaia neganai, dika do oi davaria.” (Aonega Herevadia 13:20) Danu ia hereva, ia gwau: “Kara dika taudia danu umui turana karaia neganai, idia ese emui kara namona do idia hadikaia.” (1 Korinto 15:33) Ruma bese maurina ia namo ia lao diba bema unai hakaua hereva be aonega dalanai ita badinaia, herevana unai hebamo dikana be taunimanima ta eiava televisen ena program ta.
Sina ta Luxembourg dekenai be Iehova ena Witness ta ida Baibel ia stadilaia. Dina ta ia ese Witness hahinena ia hamaoroa iena natudia kekeni rua, ta ena mauri lagani be 7 bona ta be 8 be adorahi ai idia hepapahuahu momo bona idia dagedage. Witness hahine ia henanadai kekeni maragidia be adorahi ai dahaka idia karaia. Edia sinana ia gwau ia be kisini ia hagoevaia neganai, idia be televisen idia itaia. Dahaka program? Edia sinana ia gwau: “O, katun laulaudia haida.” Witness hahinena be nega momo unai bamona program ese dagedage idia hahedinaraia ia gwauraia neganai, kekeni maragidia edia sinana ia gwau idia itaia gaudia do ia naria.
Unai dina murinai, edia sinana ia gwau iena natudia kekeni ese idia itaia katun laulau ia itaia neganai ia hoa dikadika. Unai laulau be guba amo idia mai animal dikadia, mai edia dagedage ida edia vairanai idia noho gaudia ibounai idia hadikaia ore gaudia ia hahedinaraia. Iena natudia kekeni ia hamaorodia Iehova be dagedage ia ura henia lasi bona ia moale lasi ita be unai bamona dagedage karadia ita itaia neganai. (Salamo 11:5) Unai kekeni idia ura Iehova idia hamoalea, unai dainai idia gwau televisen do idia itaia lasi to laulau do idia torea bona idia penia. Karaharaga, edia dagedage karana idia hadokoa bona edia ruma bese ena mauri ia namo.
Unai be haheitalai haida sibona, to idia hahedinaraia Baibel ena hakaua herevadia ita badinaia neganai ruma bese ena mauri ia hanamoa. Hekwakwanai ibounai lalonai Baibel ena sisiba ita gaukaralaia diba. Ia be hereva momokanina bona ia be mai ena siahu namo ia havaraia totona. (Heberu 4:12) Taunimanima be Baibel idia stadilaia bona mai momokani ida idia hekwarahi ia herevalaia gaudia be edia mauri lalonai idia badinaia neganai, ruma bese idia goada, taunimanima edia kara idia namo, bona kara kerere idia dadaraia. Ena be ruma bese tauna tamona sibona ese Dirava ena sisiba ia badinaia, to mauri do ia namo ia lao diba. Momokani, iseda mauri daladia ibounai lalonai Dirava ena hereva be Salamo torea tauna ese ia gwauraia hegeregerena ita laloa be namo. Ia gwau: “Oiemu hereva be lamepa bamona, lau ia hakaua noho, vadaeni lau raka maoromaoro diba. Oiemu hereva be diari, ia ese egu dala ia hadiaria noho.”—Salamo 119:105.
[Picture on page 5]
Baibel ena hakaua herevadia idia badinaia dainai, ruma bese ena hekwakwanai idia hamaoromaoroa vadaeni