Abidadama Dainai Ia Kara

IEHOVA ese Mose ia hamaoroa Israela besena be Aigupito amo do ia hakaudia mauri neganai, Mose ese Iehova ia noia unai gaukara do ia henia lasi. Ia gwau: “Lauegu Lohiabada e, lau be hereva dekenai egu malana be ia haraga lasi, guna ia mai bona harihari lau dekenai oi hereva neganai danu. Badina lau be hereva goada lasi tauna, egu malana danu ia haraga lasi, hereva dekenai danu lau daradara.” (Esodo 4:10) Oibe, Mose ia laloa ia be hegeregere lasi unai gaukara badana do ia karaia.

Unai hegeregerena hari inai nega danu, Iehova ena hesiai taudia momo idia laloa idia hegeregere lasi ia henia gaukaradia do idia karaia. Haheitalai ta be, gunalaia gaukarana ia karaia Keristani tauna ta ladana Theodore, ia gwau: “Iehova ese lau ia noia do lau karaia gaukaradia iboudiai amo, haroro gaukarana be auka herea. Lau be mero neganai, karaharaga iduara ta dekenai lau raka lao, gaba maragina lau botaia koikoi bena regerege lasi ida lau raka oho, lau ura lasi ta ese lau ia kamonai o lau ia itaia. Lau bada lau lao neganai, unai kara lau hadokoa, to ruma-ta-ruma-ta haroro gaukarana lau laloa neganai, unai ese lau ia hagorerea. Hari inai negai danu, haroro gaukara totona do lau lao gwauraia neganai egu bogana ena mamina ia dika, to lau lao sibona.”

Dahaka ese Mose bona inai nega ena Witness taudia hegeregere Theodore, ia durudia idia garilaia gaudia idia haheaukalaia totona? Baibel ia haere, ia gwau: “Mose ese Dirava ia abidadama henia. Unai dainai ia toreisi, Aigupito ia rakatania . . . Mose ena laloa ia goada noho, ita itaia diba lasi Diravana, be Mose ese matana dekenai ia itaia bamona.”​—⁠Heberu 11:⁠27.

Momokani, Mose ese Iehova ia abidadama henia dainai, ia laloa ia be hegeregere lasi lalohadaina ia hadarerea diba, bona Dirava ese ia henia gaukaradia ia karaia. Iena gaukara be inai: Hahemaoro tauna, peroveta tauna, bese lohiaia tauna, Taravatu kontrakana abia bona henia tauna, bese gunalaia tauna, histori torea tauna, bona Baibel torea tauna.

Unai hegeregerena, bema iseda abidadama be Mose ena bamona, do ita raka, ‘ita itaia diba lasi Diravana be eda matana dekenai ita itaia bamona’. Unai bamona abidadamana ese ita ia hagoadaia bona ita ia durua, iseda Keristani madunadia do ita huaia totona​—⁠ita laloa ita be hegeregere lasi neganai danu.