Lalokau Dekenai do Umui Noho Hebou

“Lalokau dekenai do umui noho hebou.”​—KOLOSE 2:2.

1, 2. Hari inai negai daidia ese taunimanima idia hapararadia toho?

KAMONAI! Gado badana guba ai ia boiboi, ia gwau: “Tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” (Apokalupo 12:12) Lagani ta ta amo unai hereva ena anina dikana ia bada ia lao tanobada taudia dekediai.

² Hari inai negai, Iehova ena inai tauna badana Satana, iena ladana ia hadikaia tauna Diabolo unai, be badu diravana ai ia lao! Badina be lagani 1914 ai tuari be guba ai ia matamaia neganai, Mikael mai ena aneru ida ese guba amo idia negea diho dainai. (Apokalupo 12:​7-9) Diabolo ia diba iena heagi herevana, taunimanima iboudiai be Dirava tomadiho henia dalana amo do ia veridia diba herevana, do ia hamomokania negana be kwadogi. (Iobu 1:11; 2:​4, 5) Ia bona ena demoni be mai edia roho-mauri dalana lasi dainai, nanigo momo hegeregeredia idia ese tanobada besedia idia hahisidia mai edia badu ida.​—Isaia 57:20.

3. Iesu ese Satana guba amo ia negea diho vadaeni dainai, dahaka ia vara?

³ Unai kara, taunimanima ese idia itadia diba lasi karadia, dainai, idia momo idia kara maoromaoro lasi, bona idia parara besedia hatamonadia dalana idia davaria lasi. Bese idauidau taudia idia heatu heheni bona kopi idauidau taudia idia heatu heheni, unai dainai taunimanima milion momo ese edia tano idia heautania bena idia be ruma lasi. Kara dikadia be gabu idauidau ai idia vara momo be ita hoalaia lasi! Iesu ia peroveta hegeregerena, ‘taunimanima momo edia lalokau be ia keru.’ Hari inai negai gabu iboudiai heiriheiri bona lalokau lasi karadia ita itadia.​—Mataio 24:12.

4. Dahaka dainai Dirava ena orea taudia idia naria namonamo be namo?

⁴ Tanobada ena dika dainai, Iesu ena guriguri ena orea taudia dainai be mai anina bada. Ia gwau: “Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria. Idia be tanobada ena lasi, lau hegeregerena, lau be tanobada ena lasi.” (Ioane 17:​15, 16) Hari inai negai, “Tau Dikana” ese ‘Dirava ena taravatu idia badinaia bona Iesu ena hereva momokani idia gwauraia hedinarai’ taudia ia badu henidia dikadika. (Apokalupo 12:17) Bema Iehova ese ia naridia lasi, haida ese do idia hamasedia ore. Do ita mauri noho dalana be, lauma dalanai do ita goada totona Dirava ese ita ia durulaia gaudia be do ita gaukaralaidia. Anina be, Dirava ena siahu be Keriso ena amo ia gaukara hegeregerena do ita goada toho, aposetolo be Kolose 1:29 ai ia hereva hegeregerena.

5, 6. Paulo ese Kolose ena Keristen taudia edena bamona ia lalodia, bona dahaka dainai lagani 1995 ena siri badana be mai anina bada?

⁵ Ena be Paulo be ena tadikaka Kolose ai ia itadia lasi reana, to ia lalokau henidia. Ia hamaorodia, ia gwau: “Lau ura umui diba, lau hekwarahi bada herea umui dainai.” (Kolose 2:1) Iesu ena orea taudia be tanobada ena lasi dainai, “Tau Dikana” ese edia lalo-tamona ia hadikaia toho loulou, tanobada ena lalohadai idia bogaragidiai havaraia karana amo. Epafra be Kolose amo ia mailaia sivaraina ese ia hahedinaraia unai ia vara vadaeni.

⁶ Paulo be ena Keristen tadikaka ia lalodia bada dainai ia ura bada ‘lalokau dekenai do idia noho hebou.’ Ena hereva be mai anina bada hari inai negai, badina be tanobada be heiriheiri bona lalokau lasi karadia ai ia honu. Paulo ena sisiba bema ita badinaia, Iehova ese ita do ia naria, bona ena lauma ena siahu ese ita do ia durua, tanobada ena hedibagani do ita dadaraidia totona. Aonega sisibana be unai! Unai dainai, Kolose 2:2 be iseda siri badana lagani 1995 lalonai.

7. Keristen korikori taudia be edena bamona idia lalo-tamona be namo?

⁷ Guna, Korinto taudia ia tore henidia neganai, aposetolo ia gwau, namona be Dirava ese ia horodia Keristen taudia edia orea “do ia parara lasi,” to tauanina ta hegeregerena ena “kahana ibounai ese ta ta ibounai do idia naria” be namo. (1 Korinto 12:​12, 24, 25) Haheitalai namona, ani? Ta ena tauanina ena kahana idauidau be idia heduru heheni hegeregerena, tanobada hegegemadai iseda orea lalonai iseda tadikaka ida ita heduru heheni. Orea lalonai be Dirava ese ia horodia taudia bona taunimanima milion haida danu, edia helaro be tanobada paradaisona ai do idia noho. Namona be iseda Keristen tadikaka edia orea do ita rakatania lasi, ita ta ta sibona sibona do ita noho totona! Idia ida ita hebou negadiai, Dirava ena lauma be Keriso Iesu ena amo ia aru badabada mai ita dekenai.

Diba Hegeregerena Lalo-Tamona

⁸ Paulo ena hereva badana ta be, Keristen taudia edia noho hebou karana dekenai Keriso idia diba be mai anina bada. Ia gwau namona be ‘lalokau dekenai do idia noho hebou bona diari momokani bona aonega do idia davaria, vadaeni edia abidadama do ia goada. Bona inai dekena amo Dirava ena hunia hereva ena anina do idia diba. Keriso sibona be inai hunia hereva ena anina.’ (Kolose 2:2) Dirava ena Hereva ita tahua matama negana amo diba ita abia. Ita dibaia gaudia edia anina Dirava ena palani lalonai be ita lalo-pararalaia neganai, Iesu ena dagi ena anina badana ita lalo-pararalaia. “Ia lalonai aonega bona diba edia kohu namodia iboudiai idia hehuni vadaeni.”​—Kolose 2:​3, NW.

8, 9. (a) Dahaka amo kongregesen ena lalo-tamona ita durua? (b) Keriso be edena bamona oi dibaia?

⁹ Oi ese Iesu ena gaukara Dirava ena palani lalonai unai bamona oi laloa, a? Kerisendom taudia momo ese Iesu idia herevalaia momo, idia gwau ia idia abia dae dainai hahemauri idia abia vadaeni. To ia idia diba momokani, a? Lasi, idia momo ese Toi Tamona Diravana herevana koikoina idia abia dae. Iesu ena dagi korikorina be oi diba, bona reana iena hereva momo bona ena kara momo danu. Tau Hereadaena bukana stadilaia karana ese taunimanima milion momo ia durudia dainai, unai idia diba. To namona be iseda diba Iesu bona ena kara dekediai be do ita hadobua noho.

10. Diba hehunina be edena bamona ita davaria diba?

¹⁰ Ena be Paulo ia gwau Keriso “lalonai aonega bona diba edia kohu namodia iboudiai idia hehuni vadaeni,” to unai hereva dainai ita gwau lasi unai diba ita davaria dalana be lasi. Lasi, ia be maini ta bamona, tano kopina idia kokia vadaeni gabuna. Tano ena kahana badana ai tano geia gabuna namona ita tahua lasi, badina be unai gabu ita diba vadaeni​—diba korikori ena matamana be Iesu Keriso sivaraina Baibel lalonai. Iesu ena gaukara Iehova ena palani hagugurua karana ai be ita lalo-pararalaia bada neganai, aonega korikori bona diba maoromaoro kohudia namodia ita abidia. Unai dainai, namona be ita geigei vadaeni gabuna ai ma do ita geigei dobu noho, inai gau namodia ma haida abidia totona.​—Hereva Lada-isidia 2:​1-5.

11. Iesu laloa namonamo karana amo, eda diba bona eda aonega be edena bamona ita habadadia diba? (Ena aposetolo edia aedia ia huridia sivaraina eiava ma sivarai ta amo unai oi hahedinaraia.)

¹¹ Hegeregere, reana ita diba vadaeni Iesu ese ena aposetolo edia aedia ia huridia. (Ioane 13:​1-20) To unai amo ia hadibadia gauna bona ena lalohadai bema ita lalodia namonamo, reana aonega do ita davaria, bena ita do ia durua​—oibe, do ia doria​—ita ese iseda tadikaka ta o taihu ta, ena kara be nega daudau ita badulaia tauna, be dala idauna ai do ita kara henia totona. Eiava, Ioane 13:​14, 15 ena anina bada do ita lalo-pararalaia murinai, ita ura henia lasi gaukarana bema ita idia henia, reana do ita dadaraia lasi, guna ita kara bamona. Diba bona aonega ese unai dala ai ita idia durua. Keriso do ita diba momo bona unai eda diba hegeregerena ena kara do ita tohotohoa namonamo neganai, unai ena anina be dahaka? Reana unai dainai orea taudia be ‘lalokau dekenai idia noho hebou’ karana do idia habadaia.a

Lalo-Rua ese Lalo-Tamona Ia Hadikaia Diba

¹² Diba maoromaoro ese ita ia durua ‘lalokau dekenai do ita noho hebou totona,’ to “aonega koikoi” ese dahaka ia havaradia? Gaudia be, hepapahuahu, heiriheiri, bona abidadama rakatania karana. Unai dainai, Paulo ese Timoteo ia sisiba henia hegeregerena, namona be aonega koikoi do ita dadaraia. (1 Timoteo 6:​20, 21) Paulo be ma ia gwau: “Inai bamona lau hereva, haida ese hadibaia hereva kerere dekena amo umui do idia koia garina. Umui naria namonamo, tau ta ese taunimanima edia aonega hereva kava dekena amo umui ia koia garina. Inai bamona hereva be sene taudia edia kara, bona tanobada idia gunalaia lauma dikadia dekena amo idia mai, Keriso dekena amo lasi.”​—Kolose 2:​4, 8.

13, 14. (a) Dahaka aonega dainai Kolose tadikaka idia naria namonamo be namo? (b) Hari inai negai, reana haida be dahaka dainai idia laloa unai aonega ese ia hadikadia diba lasi?

¹³ Kolose ai aonega koikoi ese Keristen taudia ia gegedia ahu. Unuseniai taunimanima momo ese Greek aonega taudia idia lalodia bada. Bona Iuda taudia tohotohodia taudia idia ura Keristen taudia ese Mose ena Taravatu, aria dinadia bona aniani taravatudia, do idia badinadia. (Kolose 2:​11, 16, 17) Paulo ese ena tadikaka ia koudia lasi, diba korikori do idia abia lasi totona, to ia hamaorodia, namona be do idia naria namonamo, tau ta ese lalo-ani herevadia amo do ia koidia, bena taunimanima edia lalohadai mauri bona kara dekediai do idia abia dae garina. Oi diba, bema kongregesen taudia haida ese unai bamona lalohadaidia kereredia idia abidia dae, unai ese kongregesen taudia edia lalo-tamona bona edia lalokau ia hadikadia diba.

¹⁴ Reana oi laloa, ‘Oibe, lau diba unai ese Kolose taudia ia hakereredia diba, to Greek lalohadaidia, hegeregere mase diba lasi laumana eiava toi tamona diravana herevadia, amo lau idia hakererea diba lasi; bona tomadiho koikoi ena dina helagadia ese egu lalona idia veria diba lasi.’ Unai be namo. Dirava ese Iesu ena amo Buka Helaga lalonai ia hahedinaraia herevadia momokanidia be ita lalodia bada be namo. To, reana aonega herevadia haida eiava taunimanima edia lalohadai haida, hari inai negai idia goadalaidia gaudia, ese ita idia hakererea diba, a?

15, 16. Dahaka lalohadai ese Keristen tauna ia hakererea diba reana?

¹⁵ Unai bamona lalohadaina ta be inai: “Iesu ia gwauhamata, do ia giroa mai, a? Edeseni ia noho? Do ia mai lasi. Badina be iseda tubuna idia mase vadaeni, to tanobada ia karaia negana ia mai bona harihari gau ta be idau lasi.” (2 Petero 3:4) Reana tau ta ia gwau, ‘Lagani momo gunanai, hereva momokani lau dibaia matama neganai, idia gwau dokona be “kahirakahira momokani.” To ia do mai lasi, bona do ia mai negana be daika ia diba?’ Momokani, taunimanima ta ia diba lasi edena negai dokona do ia mai. To mani oi laloa, Iesu ia gwau: “Umui naria namonamo, umui noga noho, badina be inai gaudia idia mai nega umui diba lasi.”​—Mareko 13:​32, 33.

¹⁶ Dokona do ia mai negana be ita diba lasi dainai, bema ita laloa ita be taunimanima oredia hegeregeredia do ita noho be namo, unai ese ita ia hakererea bada diba! Unai lalohadai dainai reana ta do ia gwau, ‘Namona be dala do lau tahua, lau (eiava egu natuna) ese moni gaukarana namona, moni momo do lau abia bona egu noho do lau hanamolaia gaukarana, do lau abia. Keristen heboudia do lau lao henidia bona haroro gaukarana sisina do lau karaia, to do lau hekwarahi bada eiava egu ura gaudia momo do lau dadaraidia be badina lasi.’​—Mataio 24:​38-42.

17, 18. Iesu bona aposetolo idia gwau dahaka lalohadai do ita abia dae be namo?

¹⁷ To ita gorea diba lasi herevana be inai: Iesu bona ena aposetolo idia gwau namona be sivarai namona harorolaia guguru dalana do ita tahua goada bona eda lalona do idia hegeregere eda ura gaudia do ita dadaraidia. Paulo ia gwau: “Nega be kwadogi. Unai dainai inai nega kwadogina ia noho lalonai, . . . hoihoi taudia be kohu lasi taudia bamona do idia noho. Bona tanobada ena gau namodia idia abia noho taudia be do idia noho, inai gaudia be anina lasi bamona. Badina be inai tanobada, hari ia noho toana bamona, be kahirakahira do ia ore.”​—1 Korinto 7:​29-31; Luka 13:​23, 24; Filipi 3:​13-15; Kolose 1:29; 1 Timoteo 4:10; 2 Timoteo 2:4; Apokalupo 22:20.

¹⁸ Paulo ia gwau lasi noho namona do ita tahua goada be namo, to ia gwau: “Gau ta tanobada dekenai ita abia mai lasi, bona gau ta danu do ita abia lao lasi. Unai dainai bema ita be mai iseda aniani bona dabua neganai, moni dekenai ita laloa momo lasi be namo. . . . Vadaeni, mai oiemu goada ibounai abidadama ena heau helulu do oi heaulaia, bona kwalimu ahuna, mauri hanaihanai do oi davaria. Badina be inai bamona mauri totona Dirava ese oi ia boiria. Bona inai boiboi oi hamomokania vadaeni, taunimanima momo vairanai oiemu abidadama oi gwauraia hedinarai neganai.”​—1 Timoteo 6:​7-12.

19. Kongregesen taudia ese Iesu ia gwauraia namo lalohadaina bema idia abia dae, kongregesen lalonai dahaka do ia vara?

¹⁹ Bema kongregesen taudia be ‘taunimanima vairadiai edia abidadama idia gwauraia hedinarai’ goada, do idia lalo-tamona. Ta be sibona ena lalona ai do ia gwau lasi, ‘Lauegu kohu be momo herea, lagani momo ena hegeregerena. Do lau laga-ani, do lau aniani, do lau inuinu, do lau moale.’ (Luka 12:19) Lasi, to iboudiai be mai edia lalo-tamona ida do idia hekwarahi, bona edia lalodia do idia hegeregere, edia ura do idia dadaraia, hari gaukara do idia karaia badabada totona.​—Filipi 1:​27, 28 itaia.

Naria Namonamo, Lalo-Ani Herevadia Dainai

²⁰ To, momokani, dala idaudia ma haida ai, ‘hadibaia hereva kerere’ eiava lalohadai koikoidia amo Keristen taudia idia koidia diba, bena ‘lalokau dekenai idia noho hebou’ be auka. Watch Tower Society ena opesi Germany ai be ia gwau: “Gorere hanamodia daladia haida be tadikaka ta ese ia gaukaralaidia dainai, pablisa bona elda taudia danu ese idia hepapahuahulaia.” Ma ia gwau: “Gorere hanamodia daladia be idauidau momo dainai, bona unai heduru idia tahua taudia be momo dainai, hepapahuahu idia vara diba, bona, bema idia gaukaralaidia daladia be babalau karadia bamona, kerere do idia vara diba.”​—Efeso 6:12.

21. Bema Keristen tauna ese dahaka do ia laloa bada neganai, reana Keriso do ia laloa maragi?

²¹ Ita ura do ita mauri noho bona do ita gorere lasi, Dirava do ita tomadiho henia diba totona. To, ita goevadae lasi dainai, ita buruka ita lao bona ita gorere. Gorere hanamodia daladia idauidau do ita lalodia bada be namo lasi, to namona be gorere iboudiai haoredia vaitani dalana do ita laloa bada. (1 Timoteo 4:16) Dalana be Keriso, Paulo ese Kolose taudia ia herevalai henidia momo tauna, ena amo. To mani inai oi laloa, Paulo ia hahedinaraia, reana haida be edia “hadibaia hereva kerere” amo iseda lalona do idia anidia, bena Keriso do ita laloa lasi, to gorere edia toadia tahudia karadia, o hanamodia karadia, o aniani maorodia do ita lalodia momo reana.​—Kolose 2:​2-4.

22. Gorere hanamodia daladia sivaraidia idauidau ita kamonai negadiai, edena bamona ita lalodia be namo?

²² Gorere hanamodia muramuradia bona daladia be tanobada hegegemadai idia heagilaidia momo. Idia haida be taunimanima momo ese idia gaukaralaidia bona idia abidia dae; haida be momo ese idia gwauraidia dika eiava idia daradaralaidia. Taunimanima ta ta ese edia mauri naridia daladia do idia lalohadailaidia be namo. Edia gorere hanamodia daladia idia tahudia goada taudia, Basileia helarona idia abia dae lasi taudia unai, be lalo-ani herevadia eiava lalohadai koikoidia ese idia hakaudia kerere diba, to Paulo ena sisiba Kolose 2:​4, 8 ai idia badinaia taudia be unai gau ese do idia koidia diba lasi. Ena be Keristen tauna ta ia laloa muramura ta o kara ta ese ia durua bada, to namo lasi ena Keristen tadikaka edia lalodia do ia anidia goada, unai gau do idia abia dae totona, badina be unai kara amo herevahereva momo bona hepapahuahu idia vara diba. Namona be do ia hahedinaraia ia ese kongregesen taudia edia lalo-tamona ia laloa bada.

23. Dahaka dainai ita moale diba?

²³ Paulo ia gwau Keristen taudia edia lalo-tamona be moale korikori ena badina. Ena be iena negai kongregesen be momo lasi, to ia ese Kolose taudia ia hamaorodia, ia gwau: “Lauegu tauanina be umui dekenai ia noho lasi, to lauegu laumana be umui danu ia noho. Bona lau moale danu, badina be emui gaukara be maoromaoro, bona Keriso umui abidadama henia mai goada, bona mai laloa tamona danu.” (Kolose 2:5; Kolose 3:14 itaia danu.) Iseda moale ena badina ese unai ia hereaia! Iseda kongregesen taudia ita itadia, idia be mai edia lalo-tamona ida idia gaukara maoromaoro bona abidadama ai idia gini auka, Dirava ena orea taudia be tanobada hegegemadai idia kara hegeregerena. Vadaeni, namona be iseda lalona do ita hadaidia auka, hari inai nega orena kwadogina lalonai, ‘lalokau dekenai do ita noho hebou.’

[Footnotes]

Inai Oi Dibaia A?

◻ Iehova ena Witness taudia edia siri badana lagani 1995 ena be dahaka?

◻ Dahaka dainai Keristen taudia Kolose ai be lalokau bona lalo-tamona ai idia noho hebou be namo, bona dahaka dainai ita danu be unai bamona ita noho be namo?

◻ Hari inai negai, dahaka lalohadai kererena dainai ita naria namonamo be namo?

◻ Dahaka dainai Keristen taudia do idia gima be namo, haida ese gorere hanamodia daladia herevadia amo do idia hakaudia kerere garina?

12. Dahaka aonega dainai ita naria namonamo be namo?

20. Dahaka danu ese Keristen taudia ia hakereredia diba?

[Picture on page 17]

Nega vaira totona oi hegaegae neganai, Iesu oi laloa, a?