Ma Haida Oi Durua Iehova Ena Ura Hegeregerena Do Idia Noho
“Guriguri umui dainai ai ruaosi ese ai hadokoa lasi. Dirava ai noia, . . . ena ura hegeregerena do umui noho, bona nega ibounai umui ese ia do umui hamoalea. Emui mauri ese kara namodia edia anina do idia havaraia.”—KOLOSE 1:9, 10.
1, 2. Dahaka ese moale ia havaraia?
“AI BE biru gabuna ta ai, treila ta dekenai ai noho. Emai mauri lalonai gau idauidau ai tahua lasi dainai, taunimanima dekenai sivarai namona harorolaia totona nega bada ai atoa diba. Aiemai hahenamo badana be taunimanima momo ai durua, Iehova dekenai edia mauri idia gwauhamatalaia totona.”—South Africa dekenai, ful-taim hesiai gaukara idia karaia headava tau bona hahine.
2 Ma haida durua karana ese moale ia havaraia, ani? Haida ese gorere taudia, ogogami taudia, eiava turana lasi taudia be nega ibounai idia durua—bona unai kara amo moale idia davaria. Keristani taudia momokanidia idia diba momokani, ma haida edia diba Iehova Dirava bona Iesu Keriso dekenai idia habadaia be idia henia diba heduru badana. Unai heduru sibona ese ma haida ia durua, Iesu ena boubou gauna idia abia dae, Dirava ida hetura karana namona idia moalelaia, bona mauri hanaihanai dalana dekenai idia raka totona.—Kara 3:19-21; 13:48.
3. Edena bamona durua karana ita laloa be namo?
3 To, Dirava idia hesiai henia bona “Lohiabada ena Dala” idia badinaia vadaeni taudia durua karana be edena bamona? (Kara 19:9) Reana hanaihanai idia oi laloa bada, to oiemu heduru oi habadaia dalana eiava hanaihanai oi henia dalana oi diba lasi. Eiava emu noho dalana dainai oi hegeregere lasi idia oi durua bada, bona unai dainai oi abia moalena ia bada lasi danu. (Kara 20:35) Unai gau rua dekenai, Kolose bukana ese ita ia hadibaia diba.
4. (a) Paulo ese Kolose taudia ia tore henia neganai, iena noho be edena bamona? (b) Epafra be dahaka ia karaia?
4 Aposetolo Paulo be Kolose Keristani taudia ia tore henia neganai, ia be Roma dekenai ruma ta lalonai idia hadiburaia, to vadivadi taudia idia vareai diba. Oi laloa diba, ena be Paulo ena dala be bada lasi to ia gaukaralaia, Dirava ena Basileia ia harorolaia totona. (Kara 28:16-31) Paulo ena Keristani tadikaka ese ia idia vadivadi henia diba, bona idia haida be nega haida ia ida idia hadiburaia. (Kolose 1:7, 8; 4:10) Idia ta be haroro tauna goadana Epafra, Perigia ena hanua ta Kolose amo. Perigia be Asia Minor (hari inai negai Turkey) dekenai, Efeso ena ist kahanai ia noho tano palakana dekenai. Kolose dekenai kongregesen idia haginia lalonai Epafra ia gaukara goada, bona kahirakahira idia noho Laodikea bona Hieropoli kongregesen totona ia hekwarahi danu. (Kolose 4:12, 13) Dahaka dainai Epafra ia lao Roma dekenai Paulo ia itaia totona, bona Paulo ena haere amo dahaka ita dibaia diba?
Heduru Namona Kolose Taudia Totona
5. Dahaka dainai Paulo ese Kolose taudia ia tore henia?
5 Epafra be Paulo ida Kolose kongregesen lalonai idia vara gaudia ia herevalaia totona, loaloa aukana ia karaia ela bona Roma. Ia ese unai Keristani taudia edia abidadama, lalokau, bona edia hekwarahi evanelia gaukarana lalonai ia gwauraia. (Kolose 1:4-8) To, ia laloa momo gaudia, Kolose taudia edia goada lauma dalanai idia hadikaia diba gaudia, ia gwauraia danu. Paulo be lauma helaga ena siahu henunai ia torea revarevana lalonai, hadibaia taudia koikoidia ese idia halasia herevadia ia hamaoromaoroa. Ia ese Iesu Keriso ena gaukara mai anina bada ia herevalaia momo.a Ia henia heduru be Baibel ena hadibaia hereva badadia ia gwauraia sibona, a? Edena dala ma ta ai Kolose taudia ia durua diba, bona ma haida durua karana dekenai dahaka ita dibaia diba?
6. Paulo ese Kolose taudia dekenai ia torea revarevana lalonai dahaka ia herevalaia bada?
6 Revareva ena matamana kahanai, Paulo ese reana ita laloa lasi heduru henia dalana dekenai iseda lalo-parara ia habadaia. Paulo bona Epafra be daudau Kolose amo, bona gabu daudau amo heduru namona henia dalana ia herevalaia. Paulo ia gwau: “Umui dainai ai ruaosi ai guriguri negadia ibounai [“hanaihanai ai guriguri neganai,” NW futnout], Dirava, iseda Lohiabada Iesu Keriso ena Tamana ai tanikiu henia noho.” Oibe, unai guriguri be Kolose Keristani taudia totona. Paulo be ma ia gwau: “Unai dainai emui sivarai ai kamonai dinana ia mai bona harihari, guriguri umui dainai ai ruaosi ese ai hadokoa lasi. Dirava ai noia, ia ese iena ura dalana umui dekenai do ia hadibaia, bona Lauma Helaga ena diba bona diari umui dekenai do ia henia.”—Kolose 1:3, 9.
7, 8. Nega momo sibona eda guriguri bona kongregesen dekenai idia henia guriguridia be edena bamona?
7 Ita diba Iehova be ‘guriguri ia kamonai’ Diravana, bona unai dainai ita diba momokani iena ura hegeregerena ita noinoi neganai, mai ena ura ida ia kamonai. (Salamo 65:2; 86:6; Aonega Herevadia 15:8, 29; 1 Ioane 5:14) To, ma haida totona ita guriguri neganai, iseda guriguri be edena bamona?
8 Reana nega momo ‘iseda Keristani varavara taudia tanobada kahana ibounai dekenai’ ita laloa bona idia totona ita guriguri. (1 Petero 5:9) Eiava reana tano mareremarere, abata, eiava ma dika ta ia vara gabuna dekenai idia noho Keristani taudia bona taunimanima totona Iehova ita noia. Aposetolo edia negai gabu ma haida dekenai idia noho hahediba taudia ese Iudea dekenai ia vara hitolo bada ena sivarai idia kamonai neganai, heduru gaudia idia do siaia lasi neganai, toana be edia tadikaka totona guriguri momo herea idia gwauraia. (Kara 11:27-30) Hari iseda negai, Keristani heboudia dekenai idia gwauraia guriguridia be momo ese idia lalo-pararalaia bona idia murinai “amen” idia gwauraia diba be mai anina bada dainai, nega momo unai guriguri be tadikaka oreana ibounai eiava tadikaka edia grup badana ma ta totona idia gwauraia.—1 Korinto 14:16.
Haida Totona Oi Guriguri
9, 10. (a) Edena guriguri ese idia hahedinaraia haida totona ita guriguri be maoro? (b) Dahaka dainai Paulo totona idia guriguri?
9 To, Baibel ese haida eiava ta totona idia gwauraia guriguri edia haheitalai ia hahedinaraia danu, idia lalonai idia edia ladadia idia gwauraia. Iesu ena hereva Luka 22:31, 32 lalonai mani oi laloa. Kamonai aposetolo taudia 11 be ia kahirakahira idia noho. Vaira negana ai do idia vara dika lalodiai idia ibounai ese Dirava ena heduru idia abia be gau badana, bona Iesu be idia totona ia guriguri. (Ioane 17:9-14) To, Iesu ese Petero ia laloa bada, bona unai hahediba tauna tamona totona noinoi herevana ta ia gwauraia. Haheitalai ma haida be inai: Elisaia ia guriguri Dirava ese tau ta, iena hesiai tauna, do ia durua. (2 King Taudia 6:15-17) Aposetolo Ioane ia guriguri Gaio be tauanina bona lauma dalanai do ia goada noho. (3 Ioane 1, 2) Bona guriguri ma haida be orea ta ta totona idia gwauraia.—Iobu 42:7, 8; Luka 6:28; Kara 7:60; 1 Timoteo 2:1, 2.
10 Paulo ena revareva ese haida eiava ta totona idia gwauraia guriguridia idia hahedinaraia goevagoeva. Ia noinoi ia eiava ia bona ia idia bamoa taudia totona do idia guriguri. Kolose 4:2, 3 ia gwau: “Umui guriguri goada, do umui hesiku lasi. Umui guriguri neganai, umui gwauraia gauna do umui laloa namonamo, bona Dirava do umui tanikiu henia. Unai guriguri neganai, ai dainai danu Dirava do umui noia, ia ese dala do ia kehoa, ai ese iena hunia hereva Keriso totona do ai harorolaia. Inai bamona lau haroro dainai dibura ruma lalonai lau noho.” Inai haheitalai ma haida mani oi laloa danu: Roma 15:30; 1 Tesalonika 5:25; 2 Tesalonika 3:1; Heberu 13:18.
11. Epafra be Roma dekenai ia noho neganai daidia totona ia guriguri?
11 Roma dekenai Paulo ia bamoa tauna be unai bamona ia karaia danu. “Emui orea tauna ta Epafra, . . . ese umui ia hanamoa henia inai. Nega ibounai umui dainai ia guriguri goada.” (Kolose 4:12) Unai siri lalonai idia gaukaralaia hereva “goada” ese “hekwarahi” karana ia hahedinaraia diba, idaunegai spot gadara lalonai gadara tauna ia hekwarahi bamona. Epafra be tanobada ibounai dekenai idia noho abidadama taudia eiava Asia Minor dekenai idia noho tomadiho momokani taudia totona ia guriguri goada, a? Paulo ese ia hahedinaraia Epafra ena guriguri be Kolose taudia totona. Epafra be edia noho dalana ia diba. Idia ibounai edia ladadia ita diba lasi, bona edia hekwakwanai ita diba lasi, to reana idia davaria hekwakwanai haida mani oi laloa. Reana tau matamata Lino be taunimanima edia aonega herevadia dadaraia totona ia hekwarahi, bona reana Rupo ese goada ia abia be namo, badina guna Iuda tomadiho lalonai ia karaia karadia ese ena lalona idia do veria noho. Peresi ena adavana be abidadama tauna lasi dainai, ena natudia be Lohiabada ena dala dekenai ia hadibaia totona haheauka bona aonega ia abia be namo, a? Bona Asunukrito, gorere dikana ia hisihisilaia tauna, ese heduru ia abia be namo, a? Oibe, Epafra be ena kongregesen taudia ia diba, bona mai momokani ida idia totona ia guriguri, badina ia bona Paulo idia ura unai bamona gwauhamata taudia be Iehova ena ura hegeregerena do idia noho.
12. Sibona eda guriguri lalodiai daidia totona ita guriguri diba?
12 Do ita tohotohoa karana—ma haida durua dalana ta—oi itaia, a? Ita itaia vadaeni, Keristani heboudia dekenai helai taudia be idauidau dainai, idia gwauraia guriguri be nega momo haida eiava ta sibona totona lasi. To sibona eda guriguri eiava ruma bese lalonai ita karaia guriguri lalonai ita diba taudia totona ita guriguri diba. Ena be nega haida ita ese Dirava ita noia diba, ia ese loaloa naria taudia eiava lauma mamoe naria taudia ibounai ia hakaua bona hanamoa totona, to nega haida idia ta totona ita guriguri be namo, ani? Hegeregere, oiemu kongregesen ia vadivadi henia sekit naria tauna eiava emu Kongregesen Buka Stadi naria tauna totona oi guriguri bona ena ladana oi gwauraia danu be namo, ani? Filipi 2:25-28 bona 1 Timoteo 5:23 ese idia hahedinaraia Paulo ese Timoteo bona Epafrodito ia laloa, badina idia gorere. Unai hegeregerena ita ese edia ladana ita diba gorere taudia ita laloa diba, a?
13. Sibona eda guriguri lalodiai edena bamona gaudia ita gwauraia be maoro?
13 Momokani, taunimanima edia noho ita kikilaia kava be namo lasi, to iseda guriguri amo ita hahedinaraia ita diba bona lalokau henia taudia ita laloa bada be maoro. (1 Timoteo 5:13; 1 Petero 4:15) Reana tadikaka ta ese ena moni gaukara ia haboioa, bona ita ese ma ta ita henia diba lasi. To, iseda guriguri lalonai iena ladana ita gwauraia bona ena hekwakwanai ita herevalaia diba. (Salamo 37:25; Aonega Herevadia 10:3) Ita diba taihu ta be hari ena lagani ia bada ia lao bona ia be adavana bona natudia lasi, badina ena lalona ia hadaia “Keristani tauna sibona do ia adavaia,” a? (1 Korinto 7:39) Sibona emu guriguri lalonai, Iehova oi noia diba unai taihu do ia hanamoa bona do ia durua mai kamonai ida iena hesiai gaukara ia karaia noho totona, ani? Haheitalai ma ta be, reana elda taudia rua ese ia kerere tadikaka dekenai sisiba idia henia. Idia ese nega haida sibona edia guriguri lalodiai unai tadikaka ena ladana idia gwauraia diba, ani?
14. Haida totona ita gwauraia guriguri edia anina ma haida durua karana dekenai be dahaka?
14 Sibona emu guriguri lalonai oi ese Iehova ena heduru, lalo-namo, aonega, bona lauma helaga, eiava lauma helaga ena huahua idia abia be namo taudia oi gwauraia diba, idia be momo herea. Emu noho gabuna eiava badina ma haida dainai, reana tauanina eiava dala ma idauidau ai oi henia diba heduru be maragi. To namona be oiemu tadikaka bona taihu totona guriguri oi laloaboio lasi. Oi diba idia ura Iehova ena ura hegeregerena idia noho, to unai idia karaia totona heduru idia abia be gau badana. Heduru oi henia dalana ta be oiemu guriguri.—Salamo 18:2; 20:1, 2; 34:15; 46:1; 121:1-3.
Ma Haida Durua Totona Oi Hekwarahi
15. Dahaka dainai Kolose bukana ena dokona kahana ita laloa be namo?
15 To, mai kudouna ibounai ida haida totona oi henia guriguridia be taunimanima, bona oi lalokau henia taudia, oi durua dalana tamona sibona lasi. Kolose bukana ese unai ia hahedinaraia goevagoeva. Diba bada taudia haida idia laloa Paulo ese hadibaia hereva bona sisiba namodia ia henia murinai, haida dekenai ena hanamoa herevadia bona lalokau ia siaia sibona. (Kolose 4:7-18) To, ita itaia vadaeni unai buka ena dokona kahana ese sisiba namona ia henia, bona unai kahana amo ma gau haida ita dibaia diba.
16, 17. Paulo ese Kolose 4:10, 11 ai ia gwauraia tadikaka be edena bamona?
16 Paulo ia gwau: “Arisitako, lau danu dibura ruma lalonai ai noho, ese iena hanamoa hereva ia siaia inai. Banaba ena tadina Mareko danu ese umui ia hanamoa inai. Bema Mareko be umui dekenai ia lao neganai, do umui abia dae. Ia dainai hereva lau siaia guna vadaeni. Bona Iesu, iena ladana ta be Iusto, ia danu ese iena hanamoa ia siaia inai. Inai tau toiosi be Iuda taudia. Iuda taudia edia huanai, inai tau toiosi sibona ese lau danu ai gaukara Dirava ena Basileia totona. Idia ese lau idia durua bada herea.”—Kolose 4:10, 11.
17 Unuseniai Paulo ese ia laloa bada tadikaka haida ia gwauraia. Ia gwau idia be Iuda taudia. Iuda taudia momo be Roma dekenai idia noho, bona idia haida be hari Keristani taudia. To, Paulo ia gwauraia taudia ese ia idia durua. Toana be, Idau Bese Keristani taudia bamoa totona idia gari lasi, bona mai edia moale ida Paulo danu Idau Bese taudia dekenai idia haroro.—Roma 11:13; Galatia 1:16; 2:11-14.
18. Edena dala ai Paulo ese ia ida idia noho taudia haida ia hanamoa?
18 Mani Paulo ena hereva oi itaia, ia gwau: “Idia ese lau idia durua bada herea.” Ia gaukaralaia Greek herevana be Baibel lalonai inai kahana dekenai sibona ia hedinarai. Gado hahanaia taudia momo ese idia hahanaia “goada henia.” To, Greek herevana ma ta (pa·ra·ka·le’o) ia noho bona nega momo unai idia hahanaia “goada henia.” Unai hereva be Paulo ese inai revareva dekenai ia gaukaralaia danu, to Kolose 4:11 dekenai ia gaukaralaia lasi.—Mataio 5:4, NW; Kara 4:36; 9:31; 2 Korinto 1:4, NW; Kolose 2:2; 4:8.
19, 20. (a) Paulo ese ia idia durua taudia ia herevalaia neganai ia gaukaralaia herevana ena anina be dahaka? (b) Reana edena dala idauidau ai unai tadikaka ese Paulo idia durua?
19 Paulo ese edia ladana ia gwauraia taudia be edia hereva sibona amo ia idia durua lasi. Kolose 4:11 dekenai Greek herevana, idia hahanaia “durua bada herea,” be nega haida taunimanima edia toretore lalodiai idia gaukaralaia, hisihisi ia hanamoa muramura idia herevalaia neganai. New Life Version Baibel ia gwau: “Lau dekenai idia be heduru namo hereana!” Today’s English Version Baibel ia gwau: “Lau dekenai idia be heduru bada hereana.” Unai Paulo kahirakahira idia noho Keristani tadikaka be ia totona reana dahaka idia karaia?
20 Paulo dekenai vadivadi taudia idia mai diba, to ia ese gau momo ia karaia diba lasi, hegeregere ena ura gaudia ia hoia diba lasi—aniani bona keru negana ena dabua. Edena dala ai lokua bukadia stadi totona ia abia, eiava toretore gaudia ia hoia? (2 Timoteo 4:13) Oi laloa diba unai tadikaka ese Paulo ena dabu gaudia lalonai ia idia durua, hegeregere ia totona gau haida idia hoia eiava gabu haida dekenai idia lao, ani? Reana ia ura kongregesen ta ena noho ia diba bona ia ura idia ia hagoadaia. To ia idia hadiburaia dainai ia lao diba lasi, unai neganai reana unai tadikaka be Paulo ena gabunai idia lao, hereva idia abia lao, bona edia sivarai idia abia mai. Unai be durua gauna momokani!
21, 22. (a) Dahaka dainai Kolose 4:11 ai ia noho hereva ita laloa be namo? (b) Edena dala haida ai Paulo idia bamoa taudia edia haheitalai ita tohotohoa diba?
21 Paulo ese “durua bada herea” karadia ia herevalaia dainai, ita lalo-parara edena dala ai ita ese ma haida ita durua diba. Reana idia be Iehova ena ura hegeregerena idia raka, iena kara maoromaoro taravatudia idia badinaia, Keristani heboudia dekenai idia lao, bona haroro gaukara idia karaia. Unai dainai iseda hereva amo idia ita hanamoa be namo. To, gau ma haida ita karaia diba, Paulo idia “durua bada herea” taudia bamona, a?
22 Bema oi diba taihu ta be mai ena aonega ida 1 Korinto 7:37 ena hereva ia badinaia, to hari ruma bese be ia kahirakahira lasi, vadaeni oiemu ruma bese ese ia karaia karadia lalonai ia vareai diba, reana aniani totona ia oi boiria diba eiava turadia eiava varavara ida umui karaia pati maragina lalonai ia mai diba, a? Ia oi boiria diba emu ruma bese ida hebouhebou eiava holide dekenai do ia mai, a? Eiava do oi boiria, nega namona ai oi ida aniani umui hoia hebou totona. Unai bamona kara be vabu bona dogae bona reana hari motuka idia taria diba lasi taudia dekenai ita hahedinaraia diba danu. Reana namo do oi davaria bema edia ekspiriens oi kamonai eiava gau idauidau, hegeregere au huahua namona abia hidi eiava natudia edia dabua abia hidi, dekenai idia amo diba oi abia. (Levitiko 19:32; Aonega Herevadia 16:31) Unai bamona kara dainai turadia ai umui lao haraga. Unai dainai, bema muramura hoihoilaia gabuna amo muramura idia abia be namo, eiava unai bamona gauna ma ta ia vara, reana do idia hemarai lasi to oiemu heduru do idia noia. Roma dekenai Paulo danu idia noho tadikaka ese heduru namona idia henia, Paulo idia durua bada herea, bona oi ese unai bamona oi karaia diba danu. Unai negai bona hari iseda negai unai bamona kara ese ia havaraia hahenamo ma ta be ita huanai lalokau ia goada ia lao, bona iseda lalona do ita hadaia goadagoada, Iehova ita badinaia hebou totona.
23. Ita ta ta be dahaka ita karaia be namo?
23 Ita ta ta ese inai hereva lalonai idia hedinarai gaudia ita lalohadailaia diba. Idia be haheitalai sibona, to idia dainai mauri lalonai idia vara gaudia korikoridia, idia dekenai iseda tadikaka bona taihu ita “durua bada herea” diba gaudia, ita laloa diba. Tanobada lalonai taunimanima durua karadia idia karaia taudia bamona ai ita lao be iseda tahua gauna lasi. Unai be Kolose 4:10, 11 lalonai idia gwauraia tadikaka edia tahua gauna lasi. Idia be Paulo ‘danu Dirava ena Basileia totona idia gaukara’ hebou taudia. Unai gauna dainai edia heduru be mai anina bada. Namona be unai be iseda heduru ena badina danu.
24. Ma haida totona ita guriguri bona idia ita hagoadaia toho ena badina badana be dahaka?
24 Sibona eda guriguri lalodiai ma haida edia ladana ita gwauraia bona idia ita durua totona ita hekwarahi ena badina be inai: Ita diba iseda tadikaka bona taihu idia ura ‘Iehova ena ura hegeregerena do idia noho bona do idia hamoalea.’ (Kolose 1:10) Unai lalohadai be mai anina bada Paulo ese ena revareva lalonai ia gwauraia gauna ma ta dekenai danu, ia gwau Epafra be Kolose taudia totona ia guriguri, idia be ‘do idia gini goada bona Dirava ena ura ibounai idia diba namonamo’ totona. (Kolose 4:12) Edena dala ai ita ese unai ita karaia diba? Mani do ita itaia.
[Footnote]
a Watchtower Bible and Tract Society of New York, Inc. ese ia halasia bukadia, Insight on the Scriptures, Volium 1, rau 490-1, bona “All Scripture Is Inspired of God and Beneficial,” rau 226-8 itaia.
Inai Oi Dibaia, A?
• Sibona eda guriguri lalodiai durua karana be edena bamona ita habadaia diba?
• Edena dala ai Keristani taudia haida ese Paulo idia “durua bada herea”?
• Edena dala ai ita ese ma haida ita “durua bada herea” diba?
• Iseda tadikaka bona taihu totona ita guriguri bona idia ita hagoadaia toho neganai eda tahua gauna be dahaka?
[Picture on page 18]
Keristani tauna ta oi boiria diba, emu ruma bese ida ia loaloa totona, a?
[Credit Line]
Courtesy of Green Chimney’s Farm