Iehova Ena Hahemauri Imana Oi Abidadama Henia

“Iehova e, . . . daba daba iboudiai aiemai imana ai oi lao, oibe, bona dika negadia lalonai emai hahemauri ai oi lao.”​—ISAIA 33:2.

1. Iehova be edena dala ai ia be mai ena imana goadana?

IEHOVA be mai ena imana goadana. Momokani, “Dirava be Lauma,” unai dainai iena imana be hidio imana lasi. (Ioane 4:24) Bible lalonai, bema imana ia gwauraia to imana korikorina ia herevalaia lasi, imana ese siahu hahedinaraia karana ia laulaulaia. Unai dainai, Dirava be iena imana amo iena taunimanima ia hamauridia. Momokani, ‘mamoe naria tauna bamona, Dirava ese iena seri ia regua. Iena imana amo mamoe natudia ia haboudia; bona ena kemena dekenai ia rosidia.’ (Isaia 40:11; Salamo 23:​1-4) Iehova ena lalokau imadia lalonai iena orea taudia idia noho namonamo bona idia gari lasi!​—Deuteronomi 3:24 itaia danu.

2. Dahaka henanadai ita laloa be namo?

² Nega gunanai bona hari inai negai danu, Iehova ena imana be edena dala ai iena taunimanima ia hamauridia? Kongregesen lalonai idia noho neganai, Dirava ese dahaka heduru ia henidia? Bona edia hekwakwanai nega iboudiai lalonai, dahaka dainai iena orea taudia be iena hahemauri imana ai idia abidadama diba?

Dirava ese Ena Hahemauri Imana Ia Gaukaralaia

3. Buka Helaga lalonai ia gwau Israel besena be Aigupito amo ia roho mauri ena badina be dahaka?

³ Lagani 3,500 gunanai, Dirava ese Israel besena taudia be Aigupito amo ia do hamauridia lasi neganai, iena peroveta tauna Mose ia hamaoroa, ia gwau: “Israel taudia dekenai oi hamaoroa, Lau inai Iehova, Aigupito taudia ese umui emui latana dekenai gaukara metau idia atoa, dohore lau kokia. Idia guia umui, to lau ese umui do lau ruhaia, lauegu imana ena goada dekena amo bona hoa karadia badadia dekena amo dohore lau hamauria umui.” (Esodo 6:6) Aposetolo Paulo ena hereva hegeregerena, Dirava ese Israel taudia be Aigupito amo ia hakaudia lao neganai “iena imana ia abia isi mai siahu danu.” (Kara 13:17) Kora besena taudia idia gwau Dirava ena siahu dainai Gwauhamata Tanona ia lusi; idia gwau: “Idia be sibona edia tuari kaia amo tano idia halusia lasi, bona sibona edia imana ese hahemauri idia dekenai ia mailaia lasi. Badina oiemu imana idibana bona oiemu imana bona oiemu vairana ena diari ese, badina idia dekenai oi moale dainai.”​—Salamo 44:3.

4. Asuria ia dagedage negana lalonai, Iehova ena hahemauri imana dekenai abidadama henia karana be edena bamona ia be mai ena davana namona?

⁴ Asuria besena ia dagedage negana lalonai danu, Iehova ena imana ese iena orea taudia ia durudia. Unai negai, peroveta tauna Isaia ia guriguri, ia gwau: “Iehova e, ai oi bogaia hisi. Oi ai naria. Daba daba iboudiai aiemai imana ai oi lao, oibe, bona dika negadia lalonai emai hahemauri ai oi lao.” (Isaia 33:2) Dirava ese unai guriguri ia kamonai bona ia haerelaia; iena aneru ese Asuria tauri taudia 185,000 ia hamasedia, bona King Senakerib ese ia tuari henia gauna, Ierusalem hanuana, ia rakatania “mai hemarai bada danu.” (2 Sisiga 32:21; Isaia 37:​33-37) Nega ibounai, Iehova ena hahemauri imana abidadama henia karana be mai ena davana namona.

5. Tanobada Ibounai Tuarina Ginigunana ena dokonai, Dirava ena imana goadana ese dagedage idia davaria Keristen taudia edena bamona ia durudia?

⁵ Tanobada Ibounai Tuarina Ginigunana ena dokonai, Dirava ena imana goadana ese horoa Keristen taudia ia hamauridia. Lagani 1918 ai, Hakaua Oreana ena inai taudia be iena hedikwota dekenai idia mai, bona mai ladana bada tadikakadia be dibura rumana ai idia negea. Horoa taudia ese tanobada ena siahu taudia garina idia gari dainai, edia witness gaukara kahirakahira ibounai idia hadokoa. To guriguri amo idia noinoi unai gaukara do idia hamatamaia lou bona edia kara dika ena miro amo do idia goeva totona, badina hesiai gaukara idia karaia lasi dainai idia kara dika bona taunimanima garina idia gari dainai idia miro. Dirava ese edia guriguri ia haerelaia totona, dala ia karaia kota ese tadikaka be dibura rumana amo idia ruhaia totona; unai nega sisina murinai, kota ia gwau idia kerere lasi. Lagani 1919 ai, horoa taudia edia hebouhebou lalonai hereva momokanidia idia gwauraia bona Dirava ese iena lauma helaga ia bubua diho; unai lauma ese horoa taudia ia hagoadadia gaukara do idia karaia totona. Unai dainai, horoa taudia idia goada lou mai gari lasi dekenai Iehova ena hesiai gaukara idia karaia totona. Unai negai, idia ese Ioel 2:​28-32 ena peroveta hereva idia hagugurua, ena hagugurua negana dokona unai.​—Apokalupo 11:​7-12.

Kongregesen Lalonai Ia Durua

6. Edena bamona ita diba hetoho be kongregesen lalonai ia vara neganai, ita haheauka diba?

⁶ Dirava ese iena orea ia durua hegeregerena, iena imana ese unai orea lalonai idia noho taudia ia durua danu. Momokani, kongregesen ibounai lalonai hekwakwanai idia vara badina be taunimanima iboudiai idia goevadae lasi. (Roma 5:12) Unai dainai, reana nega haida Iehova ena hesiai taudia haida ese hekwakwanai badana do idia davaria kongregesen lalonai. Haheitalai ta be inai: Ena be Gaio ese “gaukara namo herea” ia karaia badina tadikaka idia vadivadi neganai ia abidia dae namonamo, to Diotrefe ese unai tadikaka ia abidia dae lasi, bona dala ia tahua vadivadi tadikakadia idia abidia dae taudia be kongregesen amo ia negea totona. (3 Ioane 5, 9, 10) To, Iehova ese Gaio bona ma tadikaka haida ia durudia taunimanima idia abidia dae noho bona unai amo Basileia harorolaia gaukarana idia durua noho totona. Bema Dirava ita guriguri henia bona ita abidadama henia, unai ese ita do ia durua, Dirava ese iseda abidadama ia tohoa karana ta do ia hamaoromaoroa negana ita naria neganai, gaukara namodia do ita karaia noho totona.

7. Dahaka kara be Korinto kongregesen lalonai idia vara, to ena be unai bamona ia vara, unuseniai idia noho abidadama Keristen taudia ese edia gwauhamata Dirava dekenai edena bamona idia hagugurua?

⁷ Namona be oi laloa oi be idau negai Korinto kongregesen dekenai oi noho. Nega ta ai, tadikaka be orea idauidau dekenai idia parara bona unai ese edia lalo-tamona ia hadikaia. Sihari kava taudia idia kokia lasi dainai, kongregesen ena kara namona idia hadikaia gwauraia. (1 Korinto 1:​10, 11; 5:​1-5) Kongregesen taudia haida ese idia samania heheni tanobada ena kota taudia vairanai, bona idia ma haida be gau haida dainai idia hepapahuahu heheni. (1 Korinto 6:​1-8; 8:​1-13) Heai, mama, badu, bona heiriheiri ese hekwakwanai idia havaraia. Idia haida ese Paulo ena siahu idia dadaraia, bona idia gwau ia haroro namonamo lasi. (2 Korinto 10:10) To, unai hekwakwanai negana lalonai, abidadama taudia unai kongregesen lalonai ese edia gwauhamata Dirava dekenai idia hagugurua.

8, 9. Bema kongregesen lalonai hekwakwanai ta ese ita ia tohoa, dahaka ita karaia be namo?

⁸ Bema hekwakwanai ta ia vara bona ita ia tohoa, namona be Dirava ena orea taudia ita badinaia noho. (Ioane 6:​66-69 itaia danu.) Namona be ita ibounai ita haheauka heheni, bona ita lalo-parara, taunimanima haida ese “mauri matamata” idia atoa haraga diba, to ma taunimanima haida be unai bamona lasi, bona hebogahisi, taunimanima durua karana, manau, manada, bona haheauka be dabua bamona idia atoa haraga diba lasi. Danu, Dirava ena hesiai taudia edia mauri daladia idia idauidau, unai dainai ita ibounai ese lalokau ita hahedinaraia bona kerere ita gwauatao be gau badana.​—Kolose 3:​10-14.

⁹ Lagani momo lalonai, Iehova ena hesiai gaukara ia karaia murinai, tadikaka ta ia gwau: “Lau dekenai gau bada hereana ta be inai: Iehova ena tanobada oreana lau bamoa noho. Nega gunanai lau davaria gaudia dainai lau diba bema taunimanima edia lalohadai lau tabekau henia, lauma dalanai dika lau davaria diba. Unai lalohadai lau abia dae murinai, egu lalona lau hadaia kamonai oreana dekenai do lau noho. Iehova ena lalo-namo bona hahenamo abia dalana idauna ta be lasi, ani?” Unai tadikaka hegeregerena, oi moale badina oi be Iehova ena moale orea taudia danu iena hesiai gaukara oi karaia diba dainai, a? (Salamo 100:2) Bema oibe, gau ta lasi ese oi be Dirava ena orea amo do ia veria diba, bona gau ta lasi ese oiemu hetura karana Dirava danu do ia hadikaia diba; iena imana ese ia idia lalokau henia taudia iboudiai ia hamauria.

Hedibagani Ita Davaria Neganai Ia Heduru

10. (a) Guriguri ese Dirava ena orea taudia edena bamona ia durudia idia ese hedibagani idia hanaia diba totona? (b) Korinto Ginigunana 10:13 ai, Paulo ese dahaka hagoadaia herevana ia gwauraia?

¹⁰ Ita be kamonai taudia bona Dirava ena orea danu ita raka hebou dainai, hetoho ita davaria neganai ita ia durua. Hegeregere, hedibagani idia vara neganai, ita ia durua iseda abidadama ia dekenai do ia goada noho totona. Momokani, namona be Iesu ena hereva hegeregerena ita guriguri, ita gwau: “Dibagania dika gabuna dekenai ai do oi hakaua vareai lasi, to Satani ena imana dekena amo do oi hamauria ai.” (Mataio 6:​9-13) Anina be, Dirava ita noia ita do ia durua hedibagani dainai iena taravatu do ita utua garina. Danu, hetoho do ita hanaia totona aonega ita noinoilaia neganai, iseda guriguri ia haerelaia. (Iakobo 1:​5-8) Bona Iehova ena hesiai taudia idia diba momokani do ia durudia, badina Paulo ia gwau: “Umui idia pidia hedibagani ibounai ese taunimanima ibounai danu idia pidia noho. To Dirava be ia momokani. Ia ese umui do ia naria, emui goada ia hanaia hedibagani ese umui do ia pidia garina. Bona hedibagani neganai emui dala ta do ia kehoa. Vadaeni inai dala dekena amo unai hedibagani dekenai do umui kwalimu diba.” (1 Korinto 10:13) Unai hedibagani be edena gabu amo ia mai, bona Dirava be edena bamona dala ia kehoa unai hedibagani do ita hanaia totona?

11, 12. Israel besena taudia be dahaka hedibagani dainai idia moru, bona edia sivarai ese ita edena bamona idia durua diba?

¹¹ Bema dala be ita dekenai ia noho, Dirava ita gwau-edeede henia diba totona, hedibagani ita davaria. Paulo ia gwau: “Unai kara ia vara be ita dekenai toa ta bamona, gau dikadia do ita ura henia lasi, idia ese idia ura henia bamona. Kaivakuku danu do umui tomadiho henia lasi, idia haida idia karaia bamona. Buka Helaga lalonai ia torea bamona, ia gwau, ‘Taunimanima idia helai diho, idia aniani, muramura kekero idia inua, vadaeni idia toreisi, idia gadara kava bona sihari kava.’ Sihari kava bona heudahanai karadia do ita karaia lasi, idia haida idia karaia bamona. Unai dina tamona lalonai ibounai 23,000 idia mase ore. Lohiabada ena bogahisihisi do ita gadaralaia lasi, haida ese idia karaia bamona. Vadaeni gaigai ese unai taudia idia koria mase. Bona Dirava dekenai do ita maumau lasi, idia haida idia karaia bamona. Vadaeni Alaia Aneruna ese idia ia alaia mase.”​—1 Korinto 10:​6-10.

¹² Hoa dalana ai, Dirava ese kibi (quail manudia) be Israel taudia ia henidia bona idia gogoa bona idia ania neganai, Israel taudia be mataganigani ena hedibagani dainai idia moru. (Numera 11:​19, 20, 31-35) Unai nega ia do mai lasi neganai, nega ta ai, dirava koikoi idia tomadiho henia badina Mose ia noho lasi dainai, hedibagani dainai idia moru bona boromakau natuna kaivakukuna idia tomadiho henia. (Esodo 32:​1-6) Idia tausen tausen idia mase, badina hedibagani dainai idia moru bona Moab hahinedia danu idia sihari kava. (Numera 25:​1-9) Dirava ese gwau-edeede taudia Kora, Datan, Abiram, bona edia bamodia ia hamasedia murinai, Israel taudia be hedibagani dainai idia moru bona iena kara idia maumauraia; unai negai, Dirava ese daihanai gorerena badana ia siaia bena idia 14,700 ia hamasedia. (Numera 16:​41-49) Israel taudia ese unai hedibagani iboudiai idia hanaia diba; unai hedibagani amo ta lasi ita gwauraia diba hegeregere ia bada herea dainai Israel taudia ese idia hanaia diba lasi bamona. Bema unai dekenai ita lalo-parara, unai sivarai ese ita idia durua diba. Bema Israel taudia ese abidadama idia hahedinaraia, bema Dirava idia tanikiu henia badina lalokau dalanai idia ia naria dainai, bona bema idia lalo-parara iena Taravatu be maoro, unai hedibagani idia hanaia diba. Unai negai, Iehova ena imana ese idia ia hamauria diba, ita ia hamauria diba hegeregerena.

13, 14. Iehova ena hesiai taudia dekenai hedibagani ia vara neganai, ia be edena bamona edia dala ia kehoa, unai hedibagani do idia hanaia totona?

¹³ Ita Keristen taudia ese hedibagani ita davaria, taunimanima ma iboudiai hegeregeredia. To, bema Dirava ita guriguri henia bona iena heduru ita noia bona bema ita gaukara goadagoada unai hedibagani do ita hanaia totona, vadaeni Dirava do ita badinaia noho diba. Dirava be ia kara maoromaoro, bona ita ia naria iseda goada ia hanaia hedibaganina ese ita do ia pidia garina. Bema Iehova ena hereva ita badinaia, nega ibounai iena ura do ita karaia diba. Iseda dala ia kehoa totona, ita ia hagoadaia hedibagani do ita hanaia diba totona. Haheitalai ta be inai: Taunimanima haida ese ita idia dagedage henia neganai, reana unai ese ita do ia dibagania bena dala maorona do ita rakatania ita do idia hahisia o ita do idia hamasea lasi totona. To bema ita be Iehova ena imana goadana dekenai ita abidadama, ena be hedibagani do ia bada ia lao, to Iehova ese iseda abidadama ia hagoadaia diba bona ita dekenai goada ia henia diba iseda abidadama ia dekenai do ia goada noho totona. Aposetolo Paulo ia gwau: “Kahana ibounai dekena amo hisihisi bona metau ai idia henia noho, to ai idia hadikaia momokani lasi. Nega haida ai laloa daradara, to gaukara dekena amo ai doko lasi. Taunimanima momo ese ai idia dagedage henia, to Dirava ese ai ia rakatania lasi. Ai idia botaia, ai moru, to ai mase lasi.”​—2 Korinto 4:​8, 9.

¹⁴ Danu, Iehova ese iena taunimanima ia durua totona, iena lauma helaga ia gaukaralaia taunimanima ese gau haida do idia laloa lou totona bona gau haida be taunimanima dekenai do ia hadibaia totona. Lauma helaga amo, ita ese Bible ena hereva haida ita laloa lou bona ita ia durua ita lalo-parara ita be edena bamona unai hereva do ita badinaia, hedibagani do ita hanaia totona. (Ioane 14:26) Hedibagani idia davaria neganai, Iehova ena kamonai hesiai taudia idia diba dahaka gau be mai anina unai kara dekenai, bona gau ta lasi ese ia koidia dala kererena do idia badinaia totona. Dirava ese edia dala ia kehoa totona idia ia hagoadaia, do idia haheauka ela bona mase bona hedibagani dekenai do idia moru lasi totona. (Apokalupo 2:10) Iehova ese iena hesiai taudia be iena lauma helaga amo ia durudia; danu, iena aneru ia gaukaralaidia iena orea ia durua totona.​—Heberu 1:14.

Iseda Mauri Lalonai Ia Heduru

15. Solomon ena Ane be reana ita edena bamona ia durua?

¹⁵ Iehova ena orea ida idia raka hebou taudia ese iena heduru idia abia edia mauri lalonai. Haheitalai ta be inai: Reana haida ese Keristen tauna o kekenina ta idia tahua do idia adavaia totona. (1 Korinto 7:39) Bema ta idia davaria lasi, reana Israel king Solomon ena sivarai do idia laloa be namo bona unai ese do ia durudia. Ia ese Sulem kekenina ta ia ura adavaia, to unai kekeni ia ura lasi badina ia ese mamoe naria merona ta ia lalokau henia. King ese unai sivarai ia torea, bona reana iena toretore ena ladana be inai bamona idia hatoa be namo: Solomon be Lalokau Dekenai Ia Kwalimu Lasi Ena Ane. Reana, ita ura henia tauna o kekenina ia ura lasi ita do ia adavaia. To Solomon ia kwalimu lasi neganai ia gini goada noho, bona ita danu be unai bamona ita karaia diba. Dirava ena lauma helaga ese ita ia durua diba, bena ita ese boga-auka bona Dirava ena kara ma haida ita hahedinaraia diba. Ita diba, mero ia ura headava neganai, do ia laloa lasi kekeni iboudiai idia hegeregere ia dekenai, bona kekeni ia ura headava neganai, do ia laloa lasi memero iboudiai idia hegeregere ia dekenai. Dirava ena Hereva ese ita ia durua dainai unai hereva momokanina ita abia dae diba​—to nega momo, ita be mai eda lalohisihisi danu. (Solomon ena Ane 2:7; 3:5) To, Solomon ena Ane ia hahedinaraia, reana Keristen tauna o kekenina ta do ita davaria diba, bona ia ese ita do ia lalokau henia bada. Gau badana be inai: Mamoe Naria Tauna Namona, Iesu Keriso, ese iena “headava matamata kekeni,” ia idia badinaia horoa taudia 144,000 unai, ia lalokau henia bada, bona unai lalokau ese hari “ane hereadaena” ia hagugurua.​—Solomon ena Ane 1:1; Apokalupo 14:​1-4; 21:​2, 9; Ioane 10:14.

16. Headava taudia danu ese “tanobada ena metau bada do idia abia.” Reana unai metau gaudia haida be dahaka?

¹⁶ Ena be Keristen tauna o kekenina ta idia adavaia, to headava taudia danu ese “tanobada ena metau bada do idia abia.” (1 Korinto 7:28) Tau, iena hahine, bona edia natudia dainai, hekwakwanai bona lalo-metau haida do idia vara. (1 Korinto 7:​32-35) Reana, gorere ese metau badadia bona lalo-metau do ia havaraia. Reana, dagedage dainai eiava moni bada lasi dainai, Keristen tamana ta ese iena ruma bese taudia edia mauri durua gaudia ia henidia be auka. Reana, tamana, sinana bona edia natudia do idia hapararadia, badina haida be dibura rumana lalonai idia noho. Reana ruma bese taudia haida do idia hahisia bona do idia hamasea. To unai hekwakwanai negadia iboudiai lalonai, bema Iehova ena hahemauri imana dekenai ita abidadama momokani, iseda abidadama do ita rakatania lasi badina unai hedibagani do ita hanaia diba.​—Salamo 145:14.

17. Dirava ese Isako bona Rebeka ia durudia, edia ruma bese lalonai dahaka hekwakwanai idia haheaukalaia totona?

¹⁷ Reana, hetoho haida be nega daudau lalonai do idia noho bona do ita haheaukalaia. Haheitalai ta be inai: Reana, mero ta be iena Keristen tamana bona sinana edia lalona do ia hametaua bada herea, badina ia ese murimuri kekeni ia adavaia dainai. Isako bona iena hahine Rebeka edia ruma besena lalonai unai hekwakwanai ia vara. Edia natuna Esau ena mauri laganidia be 40 neganai, Hiti hahinedia rua ia adavaia, bona “Isako bona Rebeka edia lalona ia hekwarahi momo idia dainai.” Momokani, “Rebeka ese Isako dekenai ia hereva henia, ia gwau, Lau hesiku vadaeni inai Het hahine taudia totona. Iakobo [edia natuna ma ta] ese inai Het taudia edia natuna inai tano dekenai idia noho ta do ia adavaia, lauegu noho be dohore edana bamona?” (Genese 26:​34, 35; 27:46) Ia hedinarai, Rebeka be kara maoromaoro hahinena dainai, ia lalohisihisi bada herea, badina unai hekwakwanai ia ore haraga lasi. (Petero Iharuana 2:​7, 8 itaia danu.) To, Iehova ena imana ese Isako bona Rebeka ia hagoadaia, bona unai dainai idia ese unai hetoho idia haheaukalaia diba bona Dirava dekenai idia hetura namonamo diba noho.

18. Dirava ena heduru amo C. T. Russell ese dahaka hetoho ena mauri lalonai ia haheaukalaia?

¹⁸ Bapatiso ruma bese tauna ese Dirava ena hesiai gaukara dekenai ia manoka neganai, unai ese lalohisihisi ia havaraia. (Timoteo Iharuana 2:15 itaia danu.) To, haida edia adavana be lauma dalanai idia boio, bona unai dainai idia lalohisihisi bada. Unai be Watch Tower Society ena presiden ginigunana, Charles T. Russell, dekenai ia vara. Lagani 1897 ai, lagani kahirakahira 18 lalonai idia headava murinai, iena hahine ese Society ia dadaraia bona Russell ia rakatania. Kota lalonai gwaumaoro ia tahua edia headava ia hadokoa totona, bona lagani 1908 ai, kota ese gwaumaoro ia henia. Idia parara nega sisina murinai, Russell ese leta ta ia torea ia dekenai; unai leta ese iena dara doko ia hahedinaraia, ia gwau: “Oi dainai lau guriguri goadagoada vadaeni Lohiabada dekenai. . . . Oi do lau hametaua garina, egu lalohisihisi do lau sivarailaia momo lasi. Nega haida, oiemu dabua bona kohu ma haida lau davaria. Lauegu kudouna ena mamina unai nega dekenai do lau gwauraia momo lasi. Unai kohu lau davaria neganai, oiemu kara gunana lau laloa lou​—lalokau bona hebogahisi bona taunimanima durua karana amo oi honu​—Keriso ena kara oi hahedinaraia unai. . . . Hari lau herevalaia gaudia mani oi gurigurilaia bona oi laloa namonamo. Bona mani oi diba, ena be egu mauri orena ibounai lalonai lau be sibona do lau noho dainai do lau lalohisihisi, to egu lalohisihisi ena badina badana be unai gauna dainai lasi, to, lalokau e, oiemu moru dainai lau lalohisihisi; badina lau laloa do oi boio ela bona hanaihanai.” Ena be Russell be ia lalohisihisi bada, to Dirava ese ia hagoadaia ela bona tanobada dekenai ia mase. (Salamo 116:​12-15) Nega ibounai, Iehova ese iena kamonai hesiai taudia ia hagoadaia.

Lalohisihisi Iboudiai amo Ita Ia Hamauria

19. Bema hekwakwanai badadia idia ore haraga lasi, dahaka ita laloatao be namo?

¹⁹ Iehova ena taunimanima idia diba ia be “hahemauri karadia karaia Diravana,” bona ia be “dina iboudiai iseda maduna ia huaia” Tauna. (Salamo 68:​19, 20) Unai dainai, bema hekwakwanai haida idia ore haraga lasi, namona be ita gwauhamata taudia be Iehova ena tanobada oreana lalonai ita lalohisihisi bada lasi. Namona be oi laloatao “Dirava be iseda roho mauri gabuna, bona iseda goada, iena heduru ita davaria haraga, hisihisi negadiai.” (Salamo 46:1) Nega ibounai, iseda abidadama Iehova dekenai be mai ena davana namona. David ia gwau: “Iehova lau nanadaia, bona lau ia haere henia; egu gari iboudiai lalodia amo lau ia hamauria. . . . Inai lalohisihisi tauna ia taitai, bena Iehova ese ia kamonai henia. Bona ena hekwarahi iboudiai lalodia amo Ia hamauria.”​—Salamo 34:​4-6.

20. Dahaka henanadai ia do noho ita kikilaia totona?

²⁰ Oibe, iseda guba Tamana ese iena taunimanima be hisihisi iboudiai amo ia hamauridia. Ia ese iena tanobada oreana ia hagoadaia, bona kongregesen edia gaukara ai bona Keristen tauna ena mauri ai heduru ia henia. Momokani, “Iehova ese ena bese taudia do ia rakatania lasi.” (Salamo 94:14) To namona be Iehova ena dala ma haida ita laloa, unai dala amo ia ese ena orea taudia ta ta iboudiai ia durudia. Iehova be edena bamona iena hesiai taudia ia durudia, idia gorere neganai, idia lalo-metau neganai, edia lalokau tauna ta ia mase dainai idia lalohisihisi neganai, o sibona edia kara dika dainai idia lalohisihisi neganai? Do ita itaia, unai negadia ai danu, Iehova ena imana goadana dekenai ita tabekau be mai badina.

Oiemu Haere be Dahaka?

◻ Nega gunadia ai, Iehova ena imana be hahemauri edena bamona ia mailaia?

◻ Hari inai negai, Iehova be edena bamona iena orea taudia ia durudia kongregesen lalonai?

◻ Taunimanima edia mauri lalonai Dirava ese dahaka heduru ia henia?

◻ Bema hekwakwanai badadia idia ore haraga lasi, dahaka ita karaia be namo?

[Picture on page 8, 9]

Dirava ese Israel taudia be Aigupito amo ia hakaudia lao neganai, “iena imana ia abia isi mai siahu danu”