Iehova be Iseda Siahu Ibounai Diravana!
“Siahu Ibounai Lohiabada [Iehova, NW] e, oi be lauegu magu.”—SAL. 73:28.
1. Korinto Ginigunana 7:31 ai Paulo be dahaka ia herevalaia?
APOSETOLO Paulo ia gwau: “Inai tanobada ena toana be ia idau ia lao noho.” (1 Kor. 7:31, NW ) Paulo ese tanobada be platfom ta ida ia hahegeregerea. Unai platfom dekenai drama ta idia karaia. Drama lalonai haida be taunimanima namodia bona haida be taunimanima dikadia edia kahana idia karaia. Bena idia raka oho murinai, ma haida ese edia gabu idia abia bona platfom ena toana be ia idau.
2, 3. (a) Iehova ena lohia siahuna idia hepapahuahulaia karana be dahaka ida ita hahegeregerea diba? (b) Edena henanadai edia haere do ita tahua?
2 Unai drama lalonai mai anina bada kahana ta ia hedinarai, bona oi be unai kahana lalonai oi noho danu! Unai kahana ese Iehova Dirava ena lohia siahuna abia isi karana ia hahedinaraia. Unai drama be tano ta ai ia vara hekwakwanai ta ia hahedinaraia. Gavamani korikorina ta ia lohia bona ena taunimanima naria namonamo totona taravatu ia atoa. To, oreana ma ta ia noho bona koikoi bona dagedage dalanai taunimanima ia biagua. Unai orea ese gavamani korikorina ena lohia dalana ia gwau-edeede henia bona taunimanima ia doria unai gavamani idia tuari henia totona.
3 Hari tanobada hegegemadai unai bamona hekwakwanai ia vara noho. Siahu Ibounai Diravana, Iehova ena gavamani maorona ia lohia noho. (Sal. 83:18) To, taunimanima be dagedage oreana ta ese ia hagaridia noho. Unai orea be Satani Diabolo ese ia gunalaia. (1 Ioa. 5:19) Satani ena orea ese Dirava ena gavamani ia gwau-edeede henia bona taunimanima ibounai ia doria unai gavamani idia gwau-edeede henia totona. Unai hekwakwanai be edena bamona ia vara? Dahaka dainai Dirava ese unai orea ia haorea lasi? Ita ta ta be dahaka ita karaia diba?
Hekwakwanai Ena Kahana Idauidau
4. Tanobada hegegemadai ia vara noho hekwakwanai ese edena gau rua ia hamomokania?
4 Tanobada hegegemadai ia vara hekwakwanai ese inai gaudia rua do ia hamomokania: (1) Iehova ese taunimanima ia lohiaia be maoro, bona (2) taunimanima be Iehova ena lohia siahuna idia badinaia noho diba. Baibel ese nega momo Iehova ia gwauraia “Siahu Ibounai Lohiabada.” Salamo torea tauna ese ane amo ia hahedinaraia Iehova ia abidadama henia, ia gwau: “Siahu Ibounai Lohiabada [Iehova, NW ] e, oi be lauegu magu.” (Sal. 73:28) Inai hereva “Siahu Ibounai Lohiabada” ena anina be ia lohia tauna ena siahu be bada bona ena lohia dalana be ataiai momokani. Unai bamona lohia tauna ese guba bona tanobada gaudia ibounai ia lohiaia. Oibe, badina namodia dainai ita abia dae diba Iehova Dirava be Ataiai Momokani Diravana.—Dan. 7:22.
5. Dahaka dainai Iehova ena lohia siahuna ita abia isi be maoro?
5 Iehova Dirava be Havaraia Tauna dainai, ia be guba bona tanobada gaudia ibounai edia Lohiabada. (Apokalupo 4:11 duahia.) Iehova be iseda Kota Biaguna, Taravatu Henia Tauna bona King. (Isa. 33:22) Namona be ita abia dae Iehova be iseda Siahu Ibounai Lohiabada, badina ia ese ita ia havaraia bona iena ura dainai ita mauri noho. Iehova ena lohia siahuna do ita abia isi totona, namona be ita laloatao “Lohiabada be guba ena King momokani, bona ia be taunimanima, aneru, bona gau ibounai edia biaguna.”—Sal. 103:19; Kara 4:24.
6. Dirava badinaia karana ena anina be dahaka?
6 Iehova ena lohia siahuna ita abia isi totona, namona be ia ita badinaia noho. Dirava badinaia karana anina be mai iseda kudouna ibounai ida Dirava ena taravatu goevadia ita badinaia. Dirava ia badinaia tauna be kara maoromaoro tauna. Baibel ese Iobu be unai bamona ia gwauraia.—Iobu 1:1.
Hekwakwanai Ia Matamaia Dalana
7, 8. Edena dala ai Satani ese Iehova ena lohia siahuna ia hepapahuahulaia?
7 Lagani 6,000 mai kahana idia hanaia vadaeni, gwau-edeede aneruna ta ese Iehova ena lohia siahuna ia hepapahuahulaia. Unai bamona ia karaia, badina ia ura taunimanima ese ia do idia tomadiho henia. Ia ese Adamu bona Heva ia dibagania, bena idia ese Iehova idia gwau-edeede henia. Danu, ia gwau Dirava be Adamu bona Heva ia koia, unai amo Iehova ena ladana ia hadikaia. (Genese 3:1-5 duahia.) Unai gwau-edeede aneruna be Dirava ena Inai Tauna badana, Satani (Gwau-edeede Tauna), Diabolo (Ladana Hadikaia Tauna), Gaigai Badana (koikoi tauna) bona Huala Badana (gau momo ania ore tauna) ai ia lao.—Apok. 12:9.
8 Satani ia ura Dirava ena lohia siahuna ia abia. Unai hekwakwanai ia vara dainai, Siahu Ibounai Lohiabada Iehova be dahaka do ia karaia? Unai gwau-edeede taudia toi—Satani, Adamu bona Heva be maoromaoro do ia hamasea, a? Ia be mai ena siahu idia ia hamasea totona, bona unai amo do ia hamomokania ia be siahu ibounai Diravana. Iehova ia gwau iena taravatu idia utua taudia be do idia mase, unai dainai bema idia ia hamasea, unai ese ena hereva do ia hamomokania. To, dahaka dainai Dirava be unai bamona ia karaia lasi?
9. Satani be Adamu bona Heva ia dibagania neganai, dahaka ia gwau?
9 Satani be Adamu bona Heva ia dibaganidia bona Dirava idia dadaraia neganai, unai be hegeregere Satani ia gwau, Iehova be maoro lasi taunimanima do ia hamaoroa ia idia tomadiho henia totona. Danu, Satani ese Adamu bona Heva ia veria dainai, ia gwau guba bona tanobada taudia ibounai be Dirava do idia gwau-edeede henia. Iobu ena sivarai dekenai ia hedinarai bamona, Satani ia gwau ia be taunimanima ibounai ia veria diba Iehova idia dadaraia totona. To, Iobu be Siahu Ibounai Lohiabada Iehova ia dadaraia lasi.—Iobu 2:1-5.
10. Iehova be karaharaga Satani ia hamasea lasi dainai, dahaka ia vara?
10 Iehova be ena lohia siahuna hamomokania totona karaharaga Satani ia hamasea lasi, to nega ia henia ia gwauraia herevadia ia hamomokania totona. Danu, Dirava ese taunimanima dekenai nega ia henia unai amo do idia hahedinaraia idia be iena lohia siahuna idia abia isi. Vadaeni, idia hanaia laganidia lalonai dahaka ia vara? Satani be dagedage bada oreana ta ia haginia. To, Iehova ese unai orea bona Satani Diabolo do ia hadikaia ore bona do ia hamomokania iena lohia dalana be maoro. Eden umana ai gwau-edeede karana ia vara neganai, Iehova Dirava ia diba nega vaira ai gau namona ta do ia vara dainai, ia ese unai ia perovetalaia.—Gen. 3:15.
11. Taunimanima momo be Iehova ena lohia siahuna idia abia isi totona, dahaka idia karaia?
11 Taunimanima momo be Iehova ena lohia siahuna idia matauraia, idia abidadama henia bona iena ladana idia hahelagaia. Idia haida be Abela, Enoka, Noa, Aberahamo, Sara, Mose, Ruta, Davida, Iesu, hahediba taudia ginigunadia bona hari idia noho Dirava badinaia taudia milioni momo. Idia ese Dirava ena lohia siahuna idia abia isi bona idia hamomokania Satani be koikoi tauna, badina ena be ia gwau taunimanima ibounai be Dirava do idia dadaraia, to unai ia vara lasi.—Aon. 27:11.
Hekwakwanai Hamaoromaoroa Dalana
12. Dahaka dainai ita diba momokani Dirava be kara dika do ia raraia sibona lasi?
12 Oibe, Iehova be idia vara kara dika do ia raraia sibona lasi. Nega dokona ai ita noho dainai, ita diba Iehova be kahirakahira iena lohia siahuna do ia abia isi bona kara dika do ia haorea. Iehova ese kara dika taudia be Abata amo ia haorea. Ia ese Sodoma bona Gomora hanuadia ia hadikaia ore bona Farao mai ena tuari taudia ia hamasea. Sisera bona ena tuari taudia bona Asuria king Senakeriba bona ena tuari taudia be hegeregere lasi Iehova idia tuari henia totona. (Gen. 7:1, 23; 19:24, 25; Eso. 14:30, 31; Gun. 4:15, 16; 2 Kin. 19:35, 36) Unai dainai, ita diba Iehova Dirava be ena ladana bona ena Witnes taudia idia dagedage henia taudia do ia haorea. Danu, hari idia vara gaudia ese idia hamomokania Iesu be ia lohia noho, bona inai tanobada dikana ena dokona be kahirakahira.—Mat. 24:3.
13. Iehova ese ena inai taudia ia hadikaia ore neganai, edena bamona ita roho mauri diba?
13 Iehova ena inai taudia ida do ita mase hebou lasi totona, gau badana be Iehova ena lohia siahuna do ita badinaia. Edena bamona unai do ita karaia? Satani ena dagedage lohia oreana do ita dadaraia bona ena taunimanima do ita gari henia lasi. (Isa. 52:11; Ioa. 17:16; Kara 5:29) Unai neganai iseda guba Tamana ena lohia siahuna do ita abia isi, bona ia be Guba bona Tanobada Edia Lohia ai ia lao bona ena ladana idia hadikaia taudia ia haorea neganai, do ita roho mauri.
14. Baibel lalonai dahaka sivarai idia noho?
14 Baibel ese Iehova ena lohia siahuna bona taunimanima be unai lohia siahuna idia abia isi karana ia herevalaia. Baibel ena karoa ginigunadia toi lalonai Dirava ese guba bona tanobada ia karaia bona Adamu bona Heva idia kara dika ena sivarai ia gwauraia. Baibel ena karoa ginigabedia toi ese taunimanima do idia goevadae lou ena sivarai ia gwauraia. Baibel ena buka ma haida ese Siahu Ibounai Lohiabada Iehova ena ura taunimanima, tanobada bona guba totona do ia hagugurua dalana idia herevalaia. Genese bukana ese Satani bona kara dika idia vara dalana ia hahedinaraia, to Apokalupo bukana ena dokona ai kara dika do ia ore, Satani Diabolo ena mase, bona Dirava ena ura be tanobada ai do ia vara guba ai ia vara hegeregerena ia herevalaia. Oibe, Baibel ese kara dika bona mase edia badina ia gwauraia. Danu, Dirava ese tanobada ai unai gaudia do ia haorea dalana bona Dirava badinaia taudia be mai moale ida do idia noho ela bona hanaihanai ia herevalaia danu.
15. Lohia siahuna ena drama ia ore neganai hahenamo ita davaria totona, dahaka ita karaia be namo?
15 Kahirakahira inai tanobada ena toana be do ia idau momokani. Lohia siahuna ena drama be kahirakahira do ia ore. Platfom amo Satani do idia kokia bona idia hamasea, bona Dirava ena gavamani sibona do ia lohia ela bona hanaihanai. Unai nega ai ita noho bona Baibel ese ia herevalaia hahenamo idauidau ita moalelaia totona, namona be hari Dirava ena lohia siahuna ita badinaia. Namo lasi ita lalorua, to Dirava ena kahanai ita gini bona ita gwau: “Lohiabada be lau dekenai ia noho.”—Sal. 118:6, 7.
Dirava Ita Badinaia Noho Diba!
16. Dahaka dainai taunimanima be Iehova ena lohia siahuna idia badinaia diba?
16 Iehova ena lohia siahuna ita abia isi bona ita badinaia noho diba badina aposetolo Paulo ia gwau: “Umui dekenai idia pidia dibagani ibounai ese taunimanima ibounai dekenai danu idia pidia noho. To Dirava be ia momokani. Ia ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa. Vadaeni inai dala dekena amo unai dibagani dekena amo do umui kwalimu diba.” (1 Kor. 10:13) Paulo ese ia herevalaia hedibagani be dahaka, bona edena dala ai Dirava ese ita totona dala ta do ia kehoa?
17-19. (a) Israela taudia be dahaka hedibagani lalonai idia moru? (b) Dahaka dainai Dirava ita badinaia noho diba?
17 Israela besena ese idia davaria “dibagani” ese ia hahedinaraia, gau haida ese ita idia veria diba Dirava ena taravatu ita utua totona. (1 Korinto 10:6-10 duahia.) Israela taudia be “gau dikadia” idia ura henia dainai, hedibagani lalonai idia moru. Ena be nega daudau lalonai vamu idia ania lasi, to Dirava ese mana ia henidia bona idia hitolo lasi. To, Iehova ese hoa dalanai kibi manudia ia henidia neganai, mataganigani karana idia hahedinaraia.—Num. 11:19, 20, 31-35.
18 Mose be Sinai Ororona ai Iehova amo Taravatu ia abia lalonai, Israela taudia be boromakau natuna ena kaivakuku idia tomadiho henia bona lebulebu karadia idia karaia. Edia gunalaia tauna Mose ia noho lasi dainai, hedibagani lalonai idia moru. (Eso. 32:1, 6) Kahirakahira gwauhamata tanona ai do idia vareai neganai, Israela taudia tausen momo be Moaba hahinedia ese edia lalona idia veria idia heudahanai totona. Israela taudia tausen momo be edia kara dika dainai idia mase. (Num. 25:1, 9) Nega haida, Israela taudia be idia gwau-edeede; nega ta Mose bona Dirava dekenai idia maumau! (Num 21:5) Danu, Dirava ese Kora, Datana bona Abirama bona edia bamodia ia hamasea murinai, Israela taudia idia maumau idia gwau unai tatau idia mase be maoro lasi. Unai dainai, Dirava ese Israela taudia 14,700 be gorere dikana ta amo ia hamasedia.—Num. 16:41, 49.
19 Israela taudia ese unai hedibagani idia dadaraia diba. To, edia abidadama ia manoka, bona Iehova ese idia dekenai ia hahedinaraia lalokau bona kara maoromaoro daladia idia laloaboio dainai, unai kara dika idia karaia. Israela taudia dekenai ia vara bamona, hari ita davaria hedibagani be vaia taunimanima ibounai ese idia davaria danu. Bema unai hedibagani ita dadaraia totona ita gaukara goada bona Dirava dekenai ita tabekau, iseda Dirava badinaia karana do ita haboioa lasi. Unai hahegoada herevana ita abidadama henia diba, badina “Dirava be ia momokani” bona “Ia ese [ita] do ia naria, [iseda] goada ia hanaia dibagani” ese ita do ia hamorua lasi. Hedibagani ita davaria neganai, Iehova be ita ia rakatania lasi, to ita ia hagoadaia, unai amo iena ura do ita badinaia.—Sal. 94:14.
20, 21. Hedibagani ita davaria neganai, edena dala ai Iehova ese “dala ta ia kehoa”?
20 Iehova ese ita ia hagoadaia hedibagani ita dadaraia karana amo ia be ‘dala ta ia kehoa.’ Hegeregere, Dirava badinaia karana ita rakatania totona, dagedage taudia ese ita do idia dadabaia o hamasea diba. Bona reana ita gari dainai Dirava badinaia karana ita rakatania diba. To, 1 Korinto 10:13 ai Paulo ena hahegoada herevana ese ita ia durua, badina ita diba unai hedibagani be nega kwadogi sibona lalonai do ia vara gauna. Iehova ese ita do ia hagoadaia unai hedibagani do ita haheaukalaia, unai amo ia do ita rakatania lasi. Dirava ese iseda abidadama ia hagoadaia, unai amo ia do ita badinaia noho diba.
21 Iehova ese iena lauma helaga amo ita ia hagoadaia. Hedibagani ita dadaraia totona, lauma helaga ese Baibel ena hagoadaia herevadia be iseda lalona ai do ia atoa. (Ioa. 14:26) Unai amo hedibagani ita davaria neganai, dala kererena do ita abia hidi lasi. Hegeregere, ita diba Iehova ena lohia siahuna be maoro bona ita badinaia be namo. Momo be unai idia diba dainai, hedibagani idia haheaukalaia ela bona idia mase. To, namo lasi idia mase neganai, ita laloa Iehova ese “dala ta ia kehoa” unai. Lasi, to hedibagani idia davaria neganai Iehova ese goada ia henia idia haheauka totona. Iehova ese unai dala ai ita ia durua diba. Danu, Dirava ese iena aneru goadadia ia gaukaralaia “mauri do idia abia taudia durua totona.” (Heb. 1:14) Gabeai stadi herevana ese do ia hahedinaraia, Dirava idia badinaia taudia sibodia ese Siahu Ibounai Lohiabada ena lohia siahuna do idia abia isi ela bona hanaihanai. Unai taudia ita bamoa diba bema Siahu Ibounai Lohiabada Iehova dekenai ita tabekau.
Edena Bamona Do Oi Haere?
• Dahaka dainai ita abia dae Iehova be iseda Siahu Ibounai Lohiabadana?
• Dirava badinaia karana ena anina be dahaka?
• Edena dala ai ita diba kahirakahira Iehova ese ena lohia siahuna do ia hamomokania?
• Korinto Ginigunana 10:13 ena hereva hegeregerena, dahaka dainai Dirava ita badinaia noho diba?
[Picture on page 24]
Satani ese Adamu bona Heva ia dibagania Iehova idia gwau-edeede henia totona
[Picture on page 26]
Hedibagani oi dadaraia bona Iehova ena lohia siahuna oi badinaia