Dirava Ena Hakaua Herevadia ese Oi Idia Durua Diba
REANA oi diba, animal lalonai ia noho dibana ese idia ia biagudia. Masini momo be idia karaia dalana hegeregerena sibona idia gaukara. To, Dirava ese taunimanima ia havaraia dalana be hakaua herevadia idia badinaia. Edena bamona unai oi diba momokani? Iehova, kara maoromaoro taravatudia ibounai ia Hamatamaia Tauna, ese taunimanima ginigunadia ia havaraia neganai, ia gwau: “Taunimanima ita karaia namo, iseda toana bona iseda laulau hegeregerena.” Havaraia Tauna be lauma; ena tauanina be iseda hegeregerena lasi, unai dainai iena “toana” ita abia ena anina be ena kara toana bona kara namodia haida ita hahedinaraia diba. Taunimanima ese hakaua herevadia, idia abia dae kara namo taravatudia, hegeregerena edia mauri idia palanilaia diba. Iehova ese unai bamona hakaua herevadia momo be iena Hereva lalonai ia atoa.—Genese 1:26; Ioane 4:24; 17:17.
Reana tau ta ia gwau: ‘To Baibel dekenai hakaua herevadia handred momo idia noho. Idia ibounai lau dibaia diba lasi.’ Momokani. To mani inai oi laloa: Ena be Dirava ena hakaua herevadia iboudiai be namo, to idia haida be hakaua hereva badadia. Mataio 22:37-39 amo unai oi itaia diba, Iesu ia hahedinaraia Mose ena Taravatu ena hahegani bona hakaua herevadia huanai, idia haida be mai anina bada.
Hakaua hereva badadia be dahaka? Baibel ena hakaua hereva badadia be iseda hetura karana Iehova ida idia herevalaia. Bema unai ita badinaia, Havaraia Tauna be iseda kara maoromaoro kampasi ena hamaoromaoroa tauna badana ai do ia lao. Danu, hakaua herevadia ma haida ese eda hetura karana taunimanima ma haida ida idia haidaua diba. Idia ita badinaia neganai, lau guna lalohadaina do ita dadaraia.
Namona be Baibel ena anina bada hereva momokanidia ita laloa guna. Unai hereva momokani be dahaka, bona ena anina ita dekenai be edena bamona?
‘Ataiai Momokani Diravana ese Tanobada Ia Biagua Noho’
Buka Helaga ese ia hahedinaraia goevagoeva Iehova be iseda Havaraia Tauna Badana bona Siahu Ibounai Diravana. Ma ta be ia ida ita hahegeregerea lasi o ena gabu ia abia diba lasi. Unai be hereva momokani badana Baibel dekenai.—Genese 17:1; Hadibaia 12:1.
Salamo bukana torea tauna ta ese Iehova be inai bamona ia herevalaia, ia gwau: “Oi sibona, Ataiai Momokani Diravana, ese tanobada oi biagua noho.” Idaunegai King Davida, ia gwau: “Lohiabada e, . . . oi be King momokani, basileia ibounai be oi ese oi biagua noho.” Bona peroveta tauna badana Ieremia ia gwau: “Lohiabada e, ta oi hegeregerena ia noho lasi. Oi be bada, bona oiemu ladana ena siahu be bada.”—Salamo 83:18; 1 Sivarai 29:11; Ieremia 10:6.
Dina ta ta lalonai, Dirava idia herevalaia hereva momokanidia be edena bamona ita badinaia diba?
Ia hedinarai goevagoeva iseda mauri lalonai daika be hereadae—iseda Havaraia Tauna bona Mauri Henia Tauna. Unai dainai sibona eda ladana habadaia urana—reana haida dekenai unai ura ia goada herea—ita dadaraia be maoro, ani? Ita ia hakaua aonega herevana ta be inai, “gau ibounai do umui karaia Dirava hanamoa totona.” (1 Korinto 10:31) Unai dala dekenai peroveta tauna Daniela be haheitalai namona.
Idaunegai sivaraina ia gwau Babulonia ena King Nebukanesa be nega ta ia nihi dainai ia lalo-hekwarahi bada bona ia ura unai nihi ena anina ia diba. Ena be ma haida idia daradara, to Daniela ese king ia ura ia diba gauna ia gwauraia maoromaoro. Daniela ese sibona ena ladana ia habadaia, a? Lasi, to ia ese guba dekenai ia noho Diravana, “hunia gaudia ia hedinaraia” Tauna, ia hanamoa. Daniela ma ia gwau: “Lauegu aonega dekenai inai hunia gauna lau hedinaraia lasi. Lauegu aonega ese taunimanima edia aonega ia hereaia lasi.” Daniela be hakaua herevadia ia badinaia tauna. Unai dainai Daniela bukana ai, nega toi ia gwau Dirava ese Daniela ia “lalokau henia bada.”—Daniela 2:28, 30; 9:23; 10:11, 19.
Daniela oi tohotohoa neganai, namo do oi davaria. Daniela ena haheitalai oi laloa murinai, oi itaia kara ta ena badina be mai anina bada. Oi karaia gauna dainai, daika idia hanamoa be namo? Herevana emu noho dalana be edena bamona, to oi hegeregere Baibel ena hakaua hereva badana—Iehova be Siahu Ibounai Lohiabadana—oi badinaia totona. Unai bamona oi karaia neganai, Dirava ese oi do ia “lalokau henia bada.”
Hari namona be hakaua hereva badadia rua ita laloa, taunimanima ma haida bamoa karana dekenai ita do ia hakaua. Gabu momo dekenai taunimanima be sibodia edia namo idia laloa bada, unai dainai taunimanima ma haida bamoa karana be mai ena hekwarahi.
“Do Umui Manau”
Sibona idia atoa guna taudia be nega momo idia moale lasi. Momo edia mauri ia namo vadaeni, to idia ura ia namo herea bona harihari do idia abia. Idia laloa manau be manoka karana. Idia laloa haheauka be ma haida sibona ese idia hahedinaraia be namo. To, ladana bada idia tahua neganai, kara ta be taravatu lasi. Oi laloa idia bamona do oi karaia eiava idau dalana oi abia hidi diba?
Dirava ena hesiai taudia ese unai kara be dina ta ta iboudiai idia itaia, to namo lasi unai kara idia tohotohoa. Lo Keristani taudia ese idia abia dae hakaua herevana be, “bema tau ta sibona ia hanamoa neganai, inai be anina lasi Dirava ena vairanai. To bema tau ta Dirava ese ia hanamoa neganai, inai be hanamoa momokani.”—2 Korinto 10:18.
Filipi 2:3, 4 ena hakaua herevana oi badinaia neganai, heduru do oi abia. Unai siri ese oi ia hagoadaia, “sibona emui ladana do umui habadaia gwauraia lasi, bona do umui hekokoroku lasi. To umui ibounai ta ta dekenai do umui manau. Umui ta ta nega ibounai inai bamona do umui laloa, ‘Haida be idia namo herea, to lau be namo lasi.’ ” Unai dainai “emui namo sibona do umui tahua lasi. Lasi, to umui ta ta ibounai ese haida edia namo do umui tahua, bona do umui durudia noho.”
Idaunegai Heberu taudia edia hahemaoro tauna, Gideona, be sibona ia laloa namonamo bona sibona ena ladana ia habadaia kava lasi. Ia be Israela gunalaia tauna ena dagi ia tahua lasi. To, unai dagi totona ia idia abia hidi gwauraia neganai, Gideona ia gwau ia hegeregere lasi. Ia gwau: “Manase iduhu dekenai, bona lau danu be maragi herea, egu famili lalonai.”—Gunalaia Taudia 6:12-16.
Danu, Iehova ese Gideona ia durua bena ia kwalimu murinai, Eparaima taudia idia ura ia ida idia hepapahuahu. Gideona be dahaka ia karaia? Ia kwalimu dainai sibona ia laloa bada, a? Lasi. Mai ena manau ida ia haere dainai dika badana ia vara lasi. Ia gwau: “Lauegu kara ese emui kara ia hereaia diba, a?” Gideona ia manau.—Gunalaia Taudia 8:1-3.
Momokani, Gideona ena sivarai be idaunegai ia vara. To, unai sivarai ita laloa neganai, namo ita davaria. Oi itaia diba Gideona ena lalohadai be hari taunimanima momo idia abia lalohadaina amo ia idau momokani, bona iena lalohadai hegeregerena ia noho dainai, namo ia abia.
Sibona laloa guna lalohadaina ese iseda namo laloa bada karana ia hakererea diba. Baibel ena hakaua herevadia ese unai idia hamaoromaoroa diba, ita ia hadibaia Havaraia Tauna bona ma haida bona sibona ita laloa neganai, iseda namo korikori ita itaia diba.
Baibel ena hakaua herevadia ita badinaia neganai, lau guna lalohadaina ita hanaia. Iseda hemami eiava taunimanima edia kara idauidau ese ita do ia biagua noho lasi. Kara maoromaoro taravatudia ita dibaia noho neganai, Hamatamaia Tauna do ita dibaia namonamo danu. Oibe, Baibel ita duahia lalonai, Dirava ena hakaua herevadia ita laloa namonamo ena hekwarahi ese anina namona do ia havaraia.—Maua itaia.
Iehova ese taunimanima ia karaia neganai idia ese animal idia hereadia, badina animal be idia lalonai ia noho dibana ese ia doridia hegeregerena kara idia karaia. Dirava ena ura ita badinaia ena anina be iena hakaua herevadia ita gaukaralaia. Unai dainai iseda kara maoromaoro kampasi ita naria namonamo be namo, unai kampasi ese Dirava do ia karaia nega matamatana dekenai ita do ia hakaua. Baibel ese ia gwauraia dainai, ita diba kahirakahira tanobada ibounai oromana matamatana, “kara maoromaoro sibona do ia noho” gabuna, do ia vara.—2 Petero 3:13.
[Box/Picture on page 6]
Heduru Idia Henia Hakaua Herevadia Haida Baibel Amo
Ruma bese lalonai:
“Tau tamona sibona ena namo do ia tahua lasi, to namona be tau haida edia namo do ia tahua.”—1 Korinto 10:24.
“Lalokau be sibona ena gau ia tahua lasi.”—1 Korinto 13:4, 5.
“Tau ese iena adavana do ia lalokau henia, ia sibona ia lalokau henia hegeregerena.”—Efeso 5:33.
“Hahine taudia e, emui adavana do umui kamonai henia.”—Kolose 3:18.
“Oiemu tamana, ia ese oi ia havaraia tauna, do oi kamonai henia, bona oiemu sinana ia buruka neganai do oi matauraia.”—Aonega Herevadia 23:22.
Sikuli gabunai, moni gaukara gabunai, o bisinesi karadia dekenai:
“Metau sikele koikoidia idia gaukaralaia noho taudia, be Lohiabada ese ia badu henidia noho . . . Kara dika tauna ena davana be davana momokani lasi.”—Aonega Herevadia 11:1, 18.
“Henaoa tauna be do ia henaoa lou lasi. To gaukara namona iena imana dekena amo do ia karaia.”—Efeso 4:28.
“Bema tau ta ese gaukara ia karaia lasi neganai, aniani ta umui henia lasi.”—2 Tesalonika 3:10.
“Emui hesiai gaukara ibounai lalonai, mai emui kudouna ibounai do umui karaia . . . Lohiabada ena gaukara umui karaia bamona.”—Kolose 3:23.
“Ai ura be nega ibounai kara maoromaoro do ai karaia.”—Heberu 13:18.
Taga laloa dalana:
“Bema kohu momo oi tahua haraga haraga, oi ese matakani do oi davaria.”—Aonega Herevadia 28:20.
“Moni ia ura henia noho tauna ese moni do ia abia, to unai moni ena bada be hegeregere lasi ia dekenai, vadaeni ma haida ia tahua noho.”—Hadibaia Tauna 5:10.
Sibona eda namo tahua karana:
“Oi sibona dekenai, hanamoa momo do oi tahua be namo lasi.”—Aonega Herevadia 25:27.
“Tau ta ese oi do ia hanamoa be namo, to oi sibona do oi hanamoa lasi.”—Aonega Herevadia 27:2.
“Umui ta ta ibounai dekenai lau hamaoroa inai: Oi hekokoroku lasi.”—Roma 12:3.
“Bema tau ta sibona inai bamona ia laloa, ‘Lau be namo,’ to momokani ia be namo lasi neganai, ia be sibona ia koia.”—Galatia 6:3.
[Picture on page 5]
Daniela ese Dirava ia hanamoa
[Picture on page 7]
Dirava ena hakaua herevadia hegeregerena ma haida kara henia karana ese hetura namona bona moale ia havaraia
[Picture Credit Line on page 7]
U.S. Fish & Wildlife Service, Washington, D.C./Robert Bridges