Mai Emui Ura Bada ida Sivarai Namona Harorolaia
“Lauma amo umui hururu. Iehova ena hesiai gaukara umui karaia.”—ROMA 12:11, NW.
1, 2. Keristani taudia be sivarai namona harorolaia taudia dainai idia ura edena bamona unai gaukara idia laloa noho?
TAU matamatana be iena gaukara matamatana dainai ia moale bada. Iena gaukara dinana ginigunana ai, mai ena ura ida ia naria, iena biaguna ena hadibaia hereva abia totona. Ia ura bada gaukara ia hamatamaia bona unai ia laloa bada. Ia ura iena gaukara do ia karaia namonamo.
2 Unai hegeregerena, ita Keristani taudia ita laloa diba ita be gaukara matamata taudia bamona. Iseda helaro be do ita mauri hanaihanai dainai, ita gwau diba hari sibona Iehova ena gaukara ita matamaia. Momokani, ita Ia Havaraia Tauna be iseda gaukara momo ia laloa vadaeni bona unai do ita karaia ela bona nega hanaihanai. To ita abia gaukara ginigunana be iena Basileia ena sivarai namona ita harorolaia. (1 Tesalonika 2:4) Unai gaukara be Dirava amo ita abia dainai iseda mamina be edena bamona? Tau matamatana hegeregerena, ita ura iseda diba ibounai hegeregerena do ita karaia, mai goada ida, mai moale bada ida—oibe, mai ura bada ida!
3. Sivarai namona harorolaia gaukara dekenai ita kwalimu totona dahaka ita karaia be namo?
3 Momokani, unai bamona ita lalo-goada noho be mai ena hekwarahi. Iseda haroro gaukara sibona lasi, to ma maduna haida ita abia, bona idia haida be reana iseda tauanina bona lalona ena goada idia hamanokaia diba. To nega momo, unai gaudia ita naria diba bona iseda haroro gaukara ita laloa danu. To, unai ita karaia lalonai ita hekwarahi noho. (Mareko 8:34) Iesu ia hereva loulou bema ita ura Keristani gaukara ai ita kwalimu, namona be do ita gaukara mai goada bada ida.—Luka 13:24.
4. Dina iboudiai tanobada ena laloa metau momo be reana edena bamona lauma gaudia ita laloa dalana do ia haidaua diba?
4 Iseda gaukara be momo dainai, nega haida reana ita laloa iseda goada be hegeregere lasi eiava metau bada ita huaia. Tiokratik gaukara ita karaia goadagoada bona ita laloa bada karana be “tanobada ena laloa metau momo gaudia” ese idia koua diba. (Luka 21:34, 35; Mareko 4:18, 19) Ita be goevadae lasi taudia dainai, reana ‘guna eda lalokau ia bada, to hari be lasi.’ (Apokalupo 2:1-4) Iehova totona ita karaia hesiai gaukara haida be reana ita karaia loulou kava sibona. Baibel ese edena bamona ita ia hagoadaia haroro gaukara ita ura henia bada karana ia mauri noho totona?
“Lahi Bamona” Iseda Kudouna Lalonai
5, 6. Aposetolo Paulo ese iena haroro gaukara ena hahenamo be edena bamona ia laloa?
5 Iehova ese ita ia henia gaukarana be mai anina bada herea, unai dainai namo lasi ita laloa ia be ma gaukara haida bamona. Aposetolo Paulo ia laloa sivarai namona harorolaia gaukarana be hahenamo gaukarana, bona ia laloa ia be hegeregere lasi unai gaukara idia henia. Ia gwau: “Dirava ena taudia ibounai edia huanai lau sibona be maragi herea momokani, to inai dagi idauna lau dekenai ia henia vadaeni. Dagi be inai: Sivarai Namona Iuda lasi taudia dekenai do lau harorolaia. Inai be Keriso ena gau namodia ena sivarai, taunimanima sibona edia aonega dekena amo idia davaria diba lasi gauna. Dirava ese gau ibounai ia karaia, bona gunaguna iena palani, iena kara ibounai dohore ia karaia laloa gauna ia hunia, taunimanima dekena amo. Inai palani be gunaguna ia mai bona harihari ia hunia noho. To hari Dirava ese lau ia abia hidi, inai palani do lau gwauraia hedinarai totona.”—Efeso 3:8, 9.
6 Paulo ena lalo-goada karana iena haroro gaukara dekenai be haheitalai namona ita dekenai. Roma taudia dekenai ia siaia revarevana lalonai ia gwau: “Lau ura . . . Sivarai Namona do lau harorolaia.” Sivarai namona dainai ia hemarai lasi. (Roma 1:15, 16) Iena lalohadai be maoro bona ia ura bada haroro gaukara ia karaia.
7. Roma taudia dekenai ia siaia revareva lalonai Paulo be dahaka sisiba ia henia?
7 Aposetolo Paulo ia diba ia laloa goadagoada noho be namo, unai dainai Roma ena Keristani taudia be inai sisiba ia henidia: “Emui gaukara dekenai umui lahedo lasi. Lauma amo umui hururu. Iehova ena hesiai gaukara umui karaia.” (Roma 12:11, NW ) Unai Greek herevana “lahedo” idia hahanaia ena anina be “ia lao metairametaira, gaukara totona ia haraga lasi.” Ena be reana iseda haroro gaukara dekenai ita lahedo lasi, to ita ibounai ita gima namonamo lauma dalana ai metairametaira ita gaukara hamatamaia garina bona bema ita diba unai bamona ia vara iseda lalohadai ita hamaoromaoroa be namo.—Aonega Herevadia 22:3.
8. (a) Dahaka be Ieremia ena kudouna lalonai “lahi” bamona “ia gabua noho,” bona dahaka dainai? (b) Ieremia ena sivarai amo dahaka ita diba?
8 Ita lalo-manoka neganai danu Dirava ena lauma ese ita ia durua diba. Hegeregere, nega ta peroveta tauna Ieremia be lalo-manoka ena mamina ia abia, bona ia laloa peroveta gaukarana do ia rakatania. Iehova be inai bamona ia herevalaia danu: “Lau ese Lohiabada do lau laloaboio, bona iena ladana dekenai do lau hereva lasi.” Unai ese ia hahedinaraia Ieremia be lauma dalana ai momokani ia hegeregere lasi, a? Lasi. Ieremia be lauma dalanai ia goada bada, Iehova ia lalokau henia, bona hereva momokani ia ura henia bada dainai, unai ese ia hasiahua iena peroveta gaukara ia karaia noho totona. Ia gwau: “[Iehova ena] hereva be lahi bamona, lauegu lalona ia gabua noho, ela bona lauegu turiana dekenai. Momokani lau ese oiemu hereva lau koua toho auka herea, to lau koua hegeregere lasi.” (Ieremia 20:9) Nega haida Dirava ena abidadama hesiai taudia idia lalo-manoka diba. To Iehova dekenai heduru idia noia neganai, edia kudouna do ia itaia bona iena lauma helaga do ia henidia haraga bema, Ieremia bamona, edia kudou lalonai iena hereva ia noho.—Luka 11:9-13; Kara 15:8.
“Lauma Helaga Do Umui Koua Lasi”
9. Dahaka ese lauma helaga ena gaukara ita dekenai ia koua diba?
9 Aposetolo Paulo ese Tesalonika taudia ia sisiba henidia: “Lauma helaga do umui koua lasi.” (1 Tesalonika 5:19) Oibe, Dirava ena hahegani amo idia idau karadia bona lalohadaidia dainai lauma helaga ena gaukara ita dekenai ia koua diba. (Efeso 4:30) Hari inai negai Keristani taudia edia gaukara be sivarai namona idia harorolaia. Unai gaukara ita matauraia bada. Ita hoa lasi badina ita diba Dirava idia diba lasi taudia idia laloa iseda haroro gaukara be anina maragi gauna. To bema Keristani tauna be mai ena ura ida iena haroro gaukara ia laloa lasi, reana Dirava ena lauma ese ia hasiahua karana ia habodoa diba.
10. (a) Iseda dekena taudia edia lalohadai be edena dala ai iseda lalona ia veria diba? (b) Korinto Iharuana 2:17 ai iseda haroro gaukara laloa dalana namona be edena bamona ia gwauraia?
10 Keristani kongregesen murimurinai idia noho taudia haida be reana idia laloa iseda haroro gaukara be buka bona magasin hariharilaia gaukarana sibona. Reana ma haida idia laloa kerere, idia laloa ruma ta ruma ta ita lao kontribusen ita abia totona. Bema unai lalohadai dikadia ese iseda lalona idia veria, reana haroro gaukara dekenai anina havaraia dalana do ia koua. Namo lasi unai bamona ita laloa, to namona be iseda gaukara dekenai Iehova bona Iesu bamona ita laloa. Aposetolo Paulo be unai lalohadai namona ia gwauraia: “Ai be haida bamona lasi, Dirava ena hereva ai hoihoilaia lasi. Lasi momokani. Ai be lalona momokani taudia bona inai dagi Dirava dekena amo ai abia. Ai be Keriso ena hesiai taudia dainai, Dirava ena vairana dekenai ai hereva noho, mai laloa maoromaoro danu.”—2 Korinto 2:17.
11. Dahaka ese Keristani taudia ginigunadia ia durudia dagedage negana lalonai danu idia gaukara goadagoada noho totona, bona edia haheitalai dainai edena bamona ita karaia be namo?
11 Iesu ena mase murinai, iena hahediba taudia Ierusalema dekenai be dagedage negana idia davaria. Haida ese idia hagaridia bona idia haganidia haroro idia rakatania. To, Baibel ia gwau “Lauma Helaga ese ibounai ia hahonua, bona Dirava ena hereva idia gwauraia, mai goada danu.” (Kara 4:17, 21, 31) Lagani haida murinai Paulo ena hereva Timoteo dekenai ese ia hahedinaraia Keristani taudia be edena bamona idia lalo-goada noho be namo. Paulo ia gwau: “Dirava ese gari laumana ita dekenai ia henia lasi, to siahu bona lalokau bona aonega Laumana ita dekenai ia henia vadaeni. Unai dainai, iseda Lohiabada ena sivarai do oi gwauraia hedinarai, do oi hemarai lasi. Lau be Sivarai Namona dainai dibura ruma dekenai lau noho, ani? Lau totona do oi hemarai lasi. Lasi, to Dirava ena goada dekena amo do oi haheauka noho, bona lau danu Sivarai Namona totona do ita hisihisi hebou.”—2 Timoteo 1:7, 8.
Iseda Dekena Tauna be Dahaka Ita Henia be Maoro?
12. Sivarai namona ita harorolaia ena badina badana be dahaka?
12 Iseda haroro gaukara ita laloa maoro totona, namona be ura maorona dainai ita karaia. Ita haroro ena badina be dahaka? Badina badana be salamo torea tauna ena hereva dekenai ita itaia: “[Iehova] e, . . . oiemu bese taudia ese oi do idia hanamoa bada. Idia ese oiemu King siahuna ena hairaina do idia herevalaia, bona oiemu goada badana do idia gwauraia. Vadaeni taunimanima ibounai ese, oiemu kara badadia ena sivarai do idia diba. Oiemu basileia ena goada bona hairaina danu do idia diba.” (Salamo 145:10-12) Oibe, taunimanima iboudiai vairadiai Iehova ita hanamoa bona iena ladana hahelagaia totona ita haroro. Ena be taunimanima haida sibona be ita idia kamonai henia, to mai abidadama ida hahemauri sivaraina ita harorolaia ese Iehova ia hanamoa.
13. Dahaka dainai ita ura ma haida dekenai hahemauri ena helaro ita harorolaia?
13 Danu, taunimanima ita lalokau henidia dainai ita haroro bona ita ura lasi rara bubua karana dekenai ita kerere. (Esekiela 33:8; Mareko 6:34) Unai be mai anina Paulo ena hereva dekenai ia ese Keristani kongregesen murimurinai idia noho taudia ia herevalaia neganai, ia gwau: “Greek taudia bona Greek lasi taudia dekenai danu, aonega taudia dekenai bona kavakava taudia dekenai danu, lau be abitorehai tauna.” (Roma 1:14, NW ) Paulo ia laloa taunimanima dekenai sivarai namona ia harorolaia be maoro, badina Dirava ena ura be “taunimanima ibounai ese mauri do idia davaria.” (1 Timoteo 2:4) Hari inai nega lalonai, iseda dekena tauna be unai bamona ita lalokau henia bona ita ura ita durua. Iehova ese taunimanima ia lalokau henidia dainai iena Natuna be tanobada dekenai ia siaia idia totona do ia mase. (Ioane 3:16) Unai be davana bada herea ia henia. Ma haida dekenai Iesu ena boubou dainai ia vara hahemauri ena sivarai namona harorolaia totona, nega ita henia bona ita hekwarahi neganai, ita be Iehova ena lalokau ita tohotohoa.
14. Baibel be edena bamona Keristani kongregesen murimurinai idia noho taudia ia herevalaia?
14 Iehova ena Witnes taudia be taunimanima idia laloa neganai, idia laloa idia be Keristani tadikaka oreana taudia ai idia lao diba. Namona be gari lasi dekenai ita haroro, to iseda gari lasi karana be mai dagedage ida lasi. Momokani, Baibel ese tanobada taudia ia herevalaia neganai, hereva mai siahudia ia gaukaralaia. Paulo ese “inai tanobada ena aonega” bona “tanobada ena ura” ia herevalaia neganai, ia be unai hereva “tanobada” ena anina dikana ia herevalaia. (1 Korinto 3:19; Tito 2:12, NW ) Danu, Paulo ese Efeso ena Keristani taudia ia hamaorodia guna “inai tanobada ena kara dika dalana” ai idia raka neganai, lauma dalana ai idia “mase.” (Efeso 2:1-3) Inai hereva bona ma haida be aposetolo Ioane ena hereva hegeregerena: “Satani ese tanobada taudia ibounai ia gunalaia noho.”—1 Ioane 5:19.
15. Keristani kongregesen murimurinai idia noho taudia dekenai dahaka do ita karaia lasi, bona badina be dahaka?
15 To namona be ita laloatao, unai hereva be Dirava idia inai henia tanobada taudia idia herevalaia, idia be taunimanima ta ta idia herevalaia lasi. Keristani taudia be taunimanima ta ta idia haroro henia neganai, do idia hahemaoro henia guna lasi. Taunimanima ta ta do idia gwauraia nanigosi tauna ena badina ta be lasi. Iesu do ia mai bona “mamoe” be “nanigosi” amo do ia hapararadia neganai do ia vara gauna ita gwauraia be iseda gaukara lasi. (Mataio 25:31-46) Iesu be Iehova ese ia abia hidi hahemaoro tauna; ita lasi. Ma danu, sivarai haida ese idia hahedinaraia, guna idia kara dika momokani taudia haida be Baibel ena hereva idia abia dae, edia kara idia haidaua, bona mauri dala goevana idia badinaia Keristani taudia ai idia lao. Unai dainai, ena be unai bamona taudia bamoa dalana ita tahua lasi, to dala ia kehoa neganai ita naria lasi to idia dekenai Basileia ena helaro ita herevalaia. Baibel ia gwau taunimanima haida be abidadama taudia ai idia do lao lasi neganai idia be “mauri hanaihanai abia totona taudia.” Gabeai, abidadama taudia ai idia lao. (Kara 13:48) Ita diba lasi daika daika be unai bamona mauri hanaihanai abia totona taudia ela bona ita haroro henidia guna—sedira nega momo ita haroro henidia. Unai ita laloa neganai, hahemauri sivaraina idia do abia dae lasi taudia be mai “manau” bona mai “mataurai” ida do ita kara henidia, badina ita ura idia haida be mauri sivaraina do idia abia dae.—2 Timoteo 2:25; 1 Petero 3:15.
16. “Hadibaia” dalana ita ura ita hanamoa ena badina ta be dahaka?
16 Iseda hadibaia dalana ita hanamoa noho neganai unai ese iseda ura do ia habadaia sivarai namona ita harorolaia totona. Haheitalai be inai: Spot gadara namona ta be reana unai gadara ia diba lasi tauna ese do ia moalelaia lasi. To unai gadara ia diba momo tauna ese ia moalelaia. Unai hegeregerena, edia “hadibaia” dalana idia hanamoa Keristani taudia ese haroro gaukara dekenai edia moale idia habadaia. (2 Timoteo 4:2; Tito 1:9) Paulo ese Timoteo ia sisiba henia: “Do oi gaukara goada, bona gaukara namona momokani tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.” (2 Timoteo 2:15) Edena dala ai iseda hadibaia dalana ita hanamoa diba?
17. Edena dala ai Baibel ena diba ita “ura henia” diba, bona unai diba be edena dala ai iseda haroro gaukara ia durua diba?
17 Dala ta be diba maoromaoro ma haida ita abia. Aposetolo Paulo ese ita ia hagoadaia, ia gwau: “Beibi matamata ese rata ia ura dikadika bamona, umui ese lauma ena rata goevagoeva do umui ura henia. Badina be unai rata umui inua neganai, emui lauma do idia tubu daekau, bona Dirava ena hamauria do umui davaria.” (1 Petero 2:2) Ia gorere lasi beibina be maoromaoro rata ia ura haraga. To, reana Keristani tauna be Baibel diba do ia “ura henia” be namo. Unai ia karaia diba bema stadi bona duahiduahi namonamo karadia ia habadaia. (Aonega Herevadia 2:1-6) Bema ita ura Dirava ena Hereva hadibaia taudia mai edia aonega ai ita lao, namona be ita hekwarahi bona sibona ita biagua, to unai hekwarahi be mai ena davana namona. Dirava ena Hereva tahua karana ese ia havaraia moalena dainai Dirava ena lauma amo do ita hururu, bona do ita ura bada ma haida dekenai ita diba gaudia ita hadibaia.
18. Keristani heboudia be edena bamona ita idia durua diba hereva momokani ita gaukaralaia namonamo totona?
18 Keristani heboudia danu be mai anina bada Dirava ena Hereva ita gaukaralaia karana dekenai. Baibel siridia be pablik tok ai bona ma Baibel herevadia ai idia duahia neganai, namona be iseda Baibel lalonai ita duahia danu. Hebou edia hereva ita kamonai henia be aonega karana, iseda haroro gaukara idia herevalaia kahadia danu. Namo lasi haheitalai edia anina ita laloa bada lasi, namo lasi idia karaia negana lalonai gau haida ese iseda lalona idia veria. Ma danu, ita sibona ita biagua bona unai hereva sibona dekenai iseda lalona ita henia be namo. (1 Timoteo 4:16) Keristani heboudia be iseda abidadama idia hagoadaia, ita idia durua Dirava ena Hereva ita ura henia, bona ita idia hadibaia sivarai namona idia ura harorolaia taudia ai ita lao totona.
Ita Diba Iehova ese Ita Do Ia Durua
19. Badina be dahaka ita haroro momo be gau badana?
19 ‘Lauma amo idia hururu’ Keristani taudia idia ura bada sivarai namona do idia harorolaia dainai dala idia tahua hanaihanai idia haroro totona. (Efeso 5:15, 16) Momokani, iboudiai edia noho daladia be idauidau, bona iboudiai ese idia henia negana unai taunimanima hamauridia gaukarana dekenai be hegeregere lasi. (Galatia 6:4, 5) To, haroro gaukara dekenai ita atoa negana ia hereaia gauna badana be ma haida dekenai iseda helaro do ita gwauraia momo. (2 Timoteo 4:1, 2) Ita haroro momo neganai, unai gaukara ena anina ita laloa bada karana do ita habadaia danu. (Roma 10:14, 15) Idia hisihisi bona taitai noho bona idia be helaro lasi taudia ita davaria loulou neganai, hebogahisi bona ma haida edia hemami ita laloa bada karana do ita habadaia.—Esekiela 9:4; Roma 8:22.
20, 21. (a) Dahaka gaukara ia do noho? (b) Iehova be edena bamona iseda gaukara ia durua?
20 Iehova be ita dekenai sivarai namona ia henia. Ia ida ita “gaukara hebou” dainai unai be ita ia henia gaukara ginigunana. (1 Korinto 3:6-9) Ita ura bada mai iseda lalona ibounai ida unai Dirava ia henia maduna ita hagugurua, iseda goada hegeregerena. (Mareko 12:30; Roma 12:1) Tanobada dekenai hereva momokani totona idia hitolo bona mauri hanaihanai do idia abia taudia momo idia noho. Gaukara bada ia noho, to ita diba iseda haroro gaukara ita hagugurua noho lalonai Iehova ese ita do ia durua.—2 Timoteo 4:5.
21 Iehova ia ura iena lauma be ita ia henia bona ita dekenai “Lauma Helaga ena tuari kaia,” Dirava ena Hereva, ia henia. Iena heduru amo iseda uduna ita kehoa diba “Sivarai Namona ena hunia hereva do [ita] hedinaraia, mai maoromaoro bona mai gari lasi danu.” (Efeso 6:17-20) Namona be ita idia herevalaia aposetolo Paulo be Tesalonika dekenai Keristani taudia ia tore henidia herevana hegerererena, ia gwau: “Ai ese Sivarai Namona ai mailaia umui dekenai, hereva sibona dekenai lasi, to Lauma Helaga ena siahu dekenai danu. Oibe, ai diba momokani inai Sivarai Namona be hereva momokani dainai, ai gwauraia mai siahu danu.” (1 Tesalonika 1:5) Oibe, namona be mai ura bada ida sivarai namona ita harorolaia!
Riviu
• Tanobada ena laloa metau momo dainai, dahaka ia vara diba iseda ura goadana haroro gaukara dekenai?
• Edena dala ai iseda ura sivarai namona harorolaia totona be iseda kudou lalonai “lahi bamona” do ia “gabua noho”?
• Dahaka lalo-manoka karadia haroro gaukara dekenai ita dadaraia be namo?
• Ita abia dae herevadia idia badinaia lasi taudia be edena bamona ita lalodia be namo?
• Iehova be edena dala ai ita ia durua haroro gaukara dekenai iseda ura goadana ita dogoatao noho totona?
[Pictures on page 9]
Keristani taudia be Ieremia bona Paulo edia gaukara goadagoada karana idia tohotohoa
[Pictures on page 10]
Ita ura bada ita haroro badina Dirava bona iseda dekena taudia ita lalokau henidia