Taunimanima Edia Noho Dalana Hegeregerena Idia Haroro

“Lau ese taunimanima idauidau ibounai edia mauri dalana lau abia dae, dala idauidau ibounai dekena amo, haida do lau veria mauri totona.”​—⁠1 KORINTO 9:⁠22.

1, 2. (a) Edena dala idauidau ai Paulo be haroro tauna namona? (b) Paulo ese ia abia gaukarana be edena bamona ia laloa?

IA BE aonega bada taudia bona dagi bada lasi taudia ia hereva henidia. Roma ena dagi bada taudia bona Perigia ena sikuli bada lasi taudia dekenai lalona veria herevadia ia gwauraia. Iena revareva ese ura kwalimu Greek taudia bona edia lalohadai idia ura lasi haidaua Iuda taudia ia durua. Ena hereva be mai ena siahu bona taunimanima edia lalona ia veria, unai dainai ia gwauraia hereva idia hakoikoia diba lasi. Taunimanima idia diba gaudia ia herevalaia, unai amo haida ia durua Keriso idia abidadama henia totona.​—⁠Kara 20:⁠21.

² Unai tauna be Aposetolo Paulo, ia be haroro daladia ia diba namonamo tauna. (1 Timoteo 1:12) Iesu ese ia dekenai gaukara ia henia “idau bese taudia bona king bona Israela taudia edia vairanai lauegu [Keriso ena] ladana do ia gwauraia.” (Kara 9:15) Ia abia gaukarana be edena bamona ia laloa? Ia gwau: “Lau ese taunimanima idauidau ibounai edia mauri dalana lau abia dae, dala idauidau ibounai dekena amo, haida do lau veria mauri totona. Iesu ena Sivarai Namona dainai, inai kara ibounai lau karaia noho. Bona lau diba, bema inai gaukara lau karaia noho, lau danu ese Sivarai Namona ena mauri hanamoa gaudia do lau abia.” (1 Korinto 9:​19-23) Paulo ena haheitalai amo dahaka ita dibaia, unai ese ita ia durua diba iseda haroro bona hadibaia gaukara lalonai anina namona ita havaraia totona?

Ena Kara Ia Haidaua Tauna ese Gaukara Badana Ia Karaia

3. Paulo be ena kara ia do haidaua lasi neganai, Keristani taudia be edena bamona ia kara henidia?

³ To Paulo be guna ia haheauka, ma haida ia laloa, bona ia abia gaukarana totona ia hegeregere, a? Lasi vaitani! Saulo (guna unai be Paulo ena ladana) be Iuda tomadihona ia badinaia goadagoada dainai, Keriso murinai idia raka taudia ia dagedage henia bada. Ia matamata negana ai, ia ese Stefano idia alaia mase karana ia abia dae. Unai murinai, Saulo be mai ena hebogahisi lasi ida Keristani taudia ia dagedage henidia. (Kara 7:58; 8:​1, 3; 1 Timoteo 1:13) “Saulo be Lohiabada ena diba tahua taudia hagaria bona alaia hereva momo ia gwauraia.” Ierusalema dekenai idia noho abidadama taudia sibona ia dagedage henia lasi, to Damaseko ena not kahana dekenai ia lao bona unuseniai idia noho taudia ia dagedage henidia danu.​—⁠Kara 9:​1, 2.

4. Paulo be dahaka ia haidaua be namo unai amo ena gaukara ia karaia diba?

⁴ Paulo be Keristani tomadiho dalana ia inai henia, badina ia laloa unai tomadiho ena lalohadai idauidau ese Iuda tomadihona do ia hadikaia. Badina guna Paulo be “Farisea tauna” ta, unai ladana ena anina be “gini siri tauna.” (Kara 23:⁠6) Unai dainai, Dirava ese Paulo ia abia hidi idau bese taudia dekenai Keriso ena sivarai do ia harorolaia neganai, ia hoa bada! (Kara 22:​14, 15; 26:​16-18) Badina, Farisea taudia ese haida idia gwauraidia kara dika taudia, bona idia ura lasi unai bamona taudia ida idia aniani hebou! (Luka 7:​36-39) Unai dainai ia hekwarahi bada ena lalohadai gunadia ia haidaua bona Dirava ena laloa hegeregerena ia laloa be namo, Dirava ia ura taunimanima ibounai idia mauri.​—⁠Galatia 1:​13-17.

5. Iseda haroro gaukara lalonai edena bamona Paulo ita tohotohoa diba?

⁵ Ita danu be unai bamona ita karaia be namo. Iseda haroro gaukara lalonai tano bona gado idauidau taudia ita davaria dainai, gau badana be ita hekwarahi iseda lalohadai bona kara ita sekea namonamo totona. Bema ita dekenai haida lalodika henia kava lalohadaina ia noho, namona be unai lalohadai ita kokia. (Efeso 4:​22-24) Reana ita laloparara lasi, to taunimanima edia lalohadai eiava sikuli dekenai idia hadibaia gaudia dainai, unai bamona lalohadai ita abia diba. Unai dainai, reana taunimanima haida ita lalodika henia kava, eiava edia lalohadai ita abia dae lasi. To bema ita ura mamoe bamona taudia ita davaria bona ita durudia, namona be unai bamona lalohadai ita kokia. (Roma 15:⁠7) Paulo danu be unai bamona ia karaia bona ena hesiai gaukara ia habadaia. Lalokau dainai unai gaukara ia karaia, bona ena hadibaia daladia ita tohotohoa be namo. Oibe, Paulo ena ‘aposetolo gaukara’ ita stadilaia neganai, do ita itaia ena haroro bona hadibaia gaukarana lalonai taunimanima ia kamonai henidia, ena haroro dalana ia haidaua bona edia noho dalana hegeregerena idia ia hereva henia.a​—⁠Roma 11:⁠13.

Noho Daladia Idauidau Ia Abia Dae Tauna

6. Edena dala ai Paulo ese ena hereva idia kamonai taudia ia laloa, bona unai dainai dahaka ia vara?

⁶ Paulo ese ena hereva idia kamonai taudia idia abia dae gaudia bona edia noho dalana ia laloa. King Agripa Iharuana ia hereva henia neganai, Paulo ese king ia hanamoa, ia gwau: “Iuda taudia edia kara bona edia hepapahuahu gaudia oi diba namonamo.” Bena Paulo be Agripa ia abia dae gaudia ia diba dainai, unai ia gaukaralaia king ia hereva henia totona. Mai ena lalogoada ida ia hereva namonamo dainai, Agripa ia gwau: “Inai nega kwadogi lalonai Keristani tauna oi halaoa lau.”​—⁠Kara 26:​2, 3, 27, 28.

7. Paulo be Lusitera hanua dekenai ia haroro neganai, edena bamona haroro dalana namona ia gaukaralaia?

⁷ Paulo ese ena haroro dalana ia haidaua danu. Lusitera hanua dekenai, hutuma be ia bona Banaba idia tomadiho henia gwauraia neganai, iena haroro dalana namona dainai hutuma ia koua, bena ia bona Banaba idia tomadiho henia lasi. Taunimanima idia gwau Lukaonia gado ai idia hereva taudia be diba bada lasi bona babalau karadia idia karaia momo taudia. Kara 14:​14-18 ena hereva hegeregerena, Paulo ese Dirava ia havaraia gaudia ia herevalaia, unai gaudia ese idia hamomokania Dirava momokanina ia noho. Hanua taudia ese Paulo ena hereva idia abia dae bona ia bona Banaba idia tomadiho henia lasi.

8. Ena be Paulo be nega haida ia lalohisihisi, to edena bamona ena haroro dalana ia haidaua?

⁸ Momokani, Paulo be goevadae lasi tauna bona nega haida gau haida dainai ia badu. Hegeregere nega ta ai, Iuda tauna ladana Anania ese ia hahemaraia neganai, Paulo ese Anania ia gwau henia. Paulo ia diba lasi Anania be hahelaga tauna badana, to gabeai ia idia hamaoroa ia ese hahelaga tauna ia gwauraia dika neganai, maoromaoro ena sori herevana ia gwauraia. (Kara 23:​1-5) Atena hanua dekenai, Paulo ‘ia itaia kaivakuku ese unai hanua idia hahonua neganai, iena lalona ia hisihisi bada.’ To, gabeai Areo Ororona dekenai Paulo ia haroro neganai, ia ese ena lalohisihisi herevadia ia gwauraia lasi. To Atena taudia dekenai ia ese ‘idia diba lasi Diravana’ totona idia haginia boubou patana bona edia ane karaia taudia ia herevalaia.​—⁠Kara 17:​16-28.

9. Paulo be taunimanima idauidau ia hereva henidia neganai, edena bamona ia hahedinaraia edia noho dalana ia laloa?

⁹ Paulo be taunimanima idauidau ia hereva henia neganai, edia noho dalana hegeregerena ia hereva henidia. Iena hereva idia kamonai taudia edia kastom bona edia noho dalana ia laloa danu. Roma dekenai idia noho Keristani taudia ia tore henia neganai, ia diba idia be unai negai siahu bada basileia henunai idia noho. Unai dainai iena hereva badana idia dekenai be, Keriso ena boubou gauna ese Adamu ena kara dika siahuna ia kokia. Roma Keristani taudia bona ma haida ia hereva henidia neganai, edia lalona ia veria dalanai ia hereva.​—⁠Roma 1:4; 5:​14, 15.

10, 11. Paulo ese edena bamona haheitalai ia gaukaralaia, unai amo ena hereva idia kamonai taudia idia laloparara?

¹⁰ Paulo be dahaka ia karaia ena hereva idia kamonai taudia dekenai Baibel ena hereva dobudia ia hahedinaraia totona? Ia ese taunimanima idia diba bona idia auka lasi haheitalai ia gaukaralaia hereva dobudia ia gwauraia hedinarai totona. Hegeregere Paulo ia diba, Roma taudia be edia hanua lalonai idia karaia igui hesiai gaukarana idia diba. Badina ia tore henia taudia momo be unai gaukara idia karaia. Unai dainai Paulo ese unai gaukara ena haheitalai ia gaukaralaia, unai amo ia hahedinaraia ta be kara dika eiava kara maoromaoro ena hesiai gaukara ia karaia totona, abia hidi do ia karaia.​—⁠Roma 6:​16-20.

¹¹ Buka ta ia gwau, “Roma taudia huanai, biaguna ta ese ena hesiai tauna ia ruhaia diba, eiava hesiai tauna ese ena biaguna dekenai moni ia henia, unai amo ura kwalimu tauna ai ia lao diba. Danu, bema hesiai tauna be dirava ta ena hesiai gaukara ia karaia, ia ruhaia dalana danu idia karaia.” To bema ia ura ena biaguna totona do ia gaukara noho, ena biaguna ese ena gaukara davana do ia henia. Paulo be unai haheitalai amo ia ura hahedinaraia, ta do ia abia hidi edena biaguna​—⁠kara dika eiava kara maoromaoro​—⁠ena hesiai gaukara do ia karaia. Dirava ese Roma Keristani taudia be kara dika ena igui amo ia ruhadia dainai, Ia be edia biaguna. To idia sibona idia abia hidi diba, Dirava eiava edia biaguna gunana, kara dika unai, do idia hesiai henia. Unai haheitalai dainai Roma Keristani taudia be sibodia idia nanadaia diba, ‘Edena biaguna lau hesiai henia noho?’

Paulo Ena Haheitalai amo Diba Ita Abia

12, 13. (a) Dahaka ita karaia be namo iseda hereva idia kamonai taudia edia lalona ita veria totona? (b) Edena kiki herevana oi gaukaralaia mauri dala idauidau taudia oi haroro henidia totona?

¹² Paulo bamona, namona be taunimanima edia hereva ita kamonai henia, haroro dalana ita haidaua bona edia noho dalana hegeregerena ita hereva henidia, unai amo taunimanima idauidau edia kudouna ita veria diba. Iseda hereva idia kamonai taudia ese sivarai namona idia lalopararalaia totona, idia ita vadivadi henidia sibona bona sivarai ita gwauraia eiava Baibel buka haida ita rakatania sibona be hegeregere lasi. To, namona be edia dabu gaudia, idia laloa bada, idia ura bona idia ura lasi gaudia, idia gari bona inai henia gaudia ita dibaia be namo. Ena be unai ita karaia totona ita laloa namonamo bona ita hekwarahi be namo, to tanobada hegegemadai Basileia pablisa be unai bamona idia karaia noho. Hegeregere, Iehova ena Witnes taudia edia brens opesi Hungary dekenai, ia gwau: “Tadikaka ese tano idauidau taudia edia kastom bona mauri dalana idia matauraia bona idia diba unai taudia ese edia kastom do idia abia dae lasi.” Tano ma haida dekenai, Witnes taudia edia lalohadai danu be unai bamona.

¹³ Asia ena tano ta dekenai, taunimanima momo idia laloa bada gaudia be inai: gorere lasi maurina, natuna hadibaia karana bona edukeisen. Unuseniai idia noho Basileia pablisa ese unai gaudia idia herevalaia, to tanobada ia dika ia lao karana eiava taunimanima idia davaria hekwakwanai idia herevalaia lasi. Unai hegeregerena, United States ena siti badana ta ai, pablisa idia davaria edia teritori ta ai taunimanima idia laloa bada gaudia be inai: kara gageva, motuka momo dala dekenai, bona taravatu utua karadia. Witnes taudia ese unai gaudia be edia hamatamaia herevana lalonai idia gaukaralaia, unai amo taunimanima ida Baibel idia herevalaia diba. Ena be hadibaia taudia namodia idia abia hidi herevana be dahaka, to gau badana be edia hereva amo taunimanima idia hagoadaia, namona be Baibel ena hakaua herevadia ita badinaia ena namo bona Dirava ese vaira negai do ia mailaia nega namona idia herevalaia.​—⁠Isaia 48:​17, 18; 52:⁠7.

14. Taunimanima edia noho daladia be idauidau dainai, iseda haroro herevana ita haidaua dalana mani oi gwauraia.

¹⁴ Danu, taunimanima edia kastom, edukeisen bona tomadiho be idauidau dainai, iseda haroro daladia ita haidaua be namo. Bema ta be Havaraia Tauna ia abia dae to Baibel ia abia dae lasi, ia do ita hereva henia dalana, be Dirava ia noho lasi lalohadaina ia abia dae tauna, ita hereva henia dalana amo ia idau. Eiava bema ta ia laloa iseda tomadiho bukadia be edia abidadama haidaua totona ita gaukaralaia, ia dekenai do ita gaukaralaia kiki herevana, be Baibel ia abia dae tauna dekenai ita gwauraia herevana amo do ia idau. Danu, ita hereva henia taudia haida be idia sikuli to ma haida be idia sikuli lasi, unai dainai iseda haroro dalana ita haidaua be gau badana. Hadibaia taudia namodia ese lalohadai bona haheitalai maorodia idia gaukaralaia idia davaria taudia idia hereva henia totona.​—⁠1 Ioane 5:⁠20.

Haroro Taudia Matamatadia Durua

15, 16. Dahaka dainai haroro taudia matamatadia ita durua be gau badana?

¹⁵ Paulo ese sibona ena hadibaia daladia hanamoa karana ia laloa sibona lasi. To, matamata taudia hegeregere Timoteo bona Tito ia durua hadibaia taudia namodia ai idia lao totona. (2 Timoteo 2:2; 3:​10, 14; Tito 1:⁠4) Unai hegeregerena, gau badana be hari inai negai ma haida ita durua hadibaia taudia namodia ai idia lao totona.

¹⁶ Lagani 1914 ai, tanobada hegegemadai Basileia pablisa taudia kahirakahira 5,000 idia noho; hari, pura ta ta lalonai, kamonai matamata taudia 5,000 be bapatiso idia abia noho! (Isaia 54:​2, 3; Kara 11:21) Kamonai matamata taudia be Keristani kongrigeisen idia bamoa bona idia ura haroro gaukara idia karaia neganai, idia ita hadibaia bona hakaua be gau badana. (Galatia 6:⁠6) Gau badana be iseda Biaguna, Iesu, ena hadibaia daladia ita gaukaralaia hahediba taudia ita hadibaia totona.b

17, 18. Edena bamona matamata taudia ita durua diba mai gari lasi ida haroro gaukara idia karaia totona?

¹⁷ Iesu ese taunimanima hutuma ia davaria bena ena hahediba taudia ia hamaoroa do idia hereva henidia, a? Lasi! To haroro gaukara ia herevalaia guna, bena idia ia hagoadaia edia haroro gaukara dainai idia guriguri be namo. Idia durua totona gau toi ia gwauraia: bamoa tauna, teritori, bona sivarai. (Mataio 9:​35-38; 10:​5-7; Mareko 6:7; Luka 9:​2, 6) Ita danu be unai bamona ita karaia diba. Herevana iseda natudia, stiuden matamata, eiava nega sisina daudau lalonai ia haroro lasi tauna ita durua neganai, namona be ita hekwarahi unai gau toi be idia dekenai ita hadibadia namonamo.

¹⁸ Kamonai matamata taudia ita durudia be namo, unai amo mai gari lasi ida Basileia ena sivarai idia harorolaia diba. Idia oi durua auka lasi bona taunimanima edia lalona ia veria kiki herevana ta idia hegaegaelaia totona, a? Haroro gaukara umui karaia neganai, namona be ruma ginigunadia oi karaia, unai amo emu haheitalai amo diba ia abia. Gideona ena kara bamona oi karaia diba, iena turadia dekenai ia gwau: “Lau do umui itaia namonamo, . . . lau ese lau karaia hegeregerena, be umui danu do umui karaia.” (Gunalaia Taudia 7:17) Bena dala ita karaia matamata tauna ia hereva totona. Edia hekwarahi dainai idia ita hanamoa, bona bema namo, heduru hereva ita gwauraia edia haroro daladia idia hanamoa totona.

19. ‘Hesiai gaukara ita karaia namonamo’ lalonai, iseda tahua gauna be dahaka?

¹⁹ Iseda ‘hesiai gaukara ita karaia namonamo’ totona, haroro dala idauidau ita gaukaralaia be gau badana, bona ita ura haroro taudia matamatadia ita durua unai bamona idia karaia totona. Iseda tahua gauna be, ita ura taunimanima ita durua Dirava idia diba bona mauri idia abia. Unai ita laloa neganai, ita hekwarahi be gau badana ‘taunimanima idauidau ibounai edia mauri dalana ita abia dae, unai amo haida do ita veria mauri.’​—⁠2 Timoteo 4:5; 1 Korinto 9:⁠22.

[Footnotes]

Oi Laloatao, A?

• Iseda haroro gaukara lalonai, edena dala haida amo Paulo ita tohotohoa diba?

• Edena dala ai iseda laloa dalana ita haidaua be namo?

• Edena bamona iseda haroro herevana amo taunimanima ita hagoadaia diba?

• Haroro taudia matamatadia be edena bamona ita durudia be namo, unai amo mai gari lasi ida idia haroro diba?

[Blurb on page 29]

Aposetolo Paulo be ena haroro bona hadibaia gaukarana lalonai taunimanima ia kamonai henia, ena haroro dalana ia haidaua bona edia noho dalana hegeregerena ia hereva henidia

[Blurb on page 31]

Iesu ese ena hahediba taudia durua totona gau toi ia gwauraia: bamoa tauna, teritori, bona sivarai

[Pictures on page 28]

Paulo ese ena haroro daladia ia haidaua dainai, taunimanima idauidau haroro henia karana dekenai anina namona ia havaraia

[Picture on page 30]

Haroro taudia namodia ese edia hereva idia kamonai taudia edia kastom idia laloa

[Picture on page 31]

Noho dala idauidau idia abia dae haroro taudia ese kamonai matamata taudia idia durua haroro gaukara idia karaia totona