Hakaua Oreana Amo Ia Mai Revarevana
Iehova Ena Witnes Taudia e:
Aposetolo Paulo be dala idauidau ai ia hahedinaraia, ia be ena Keristani tadikaka ia lalokau henia bona laloa bada. Ia ese Roma Keristani taudia ia hamaoroa: “Iesu Keriso ena ladana dainai Dirava lau hanamoa henia, badina be umui emui abidadama ena sivarai idia gwauraia loaloa tanobada ibounai dekenai.” (Roma 1:8) Oibe, Roma Basileiana henunai idia noho taudia ibounai idia diba, Keristani taudia ginigunadia edia abidadama ia goada bona haroro gaukara idia goadalaia. (1 Tes. 1:8) Unai dainai, Paulo be ena tadikaka ia lalokau henidia bada!
Paulo bamona, nega momo umui ai laloa neganai Iehova ai tanikiu henia. Ai be umui ai lalokau henia bada! Namona be umui abia dae momokani, Iehova be umui ta ta ia lalokau henia. Umui haida be dagedage bada umui davaria noho, to haroro gaukara umui hadokoa lasi. Emui gari lasi karana dainai, Iehova be ia moale bada!—Aon. 27:11.
Hari inai negai, Iehova ena Witnes taudia edia sivarai namodia oi duahia bona laloa dobu neganai, oi diba Lohiabada Iesu Keriso be “mai goada danu ia lao” bona “ia kwalimu,” bona tuari gauna ta be Keriso ena hesiai taudia ia koua diba lasi.—Apok. 6:2; Isa. 54:17.
Paulo be Filipi Keristani taudia dekenai ia gwau: “Dirava lau tanikiu henia noho . . . badina be umui ese lau umui durua noho, Sivarai Namona do lau harorolaia totona.” (Fili. 1:3-5) Ai, Hakaua Oreana be umui ai tanikiu henia danu. Hesiai laganina 2007 lalonai, tano 236 ai, pablisa 6,691,790 be hora 1,431,761,554 idia gaukaralaia, sivarai namona idia harorolaia totona. Umui be sivarai namona halasia gaukarana umui durua bada herea! Momokani, ita ese taunimanima handred tausen momo ita boiria Iehova idia hanamoa totona!
Nega ma ta ai, Paulo ese ia hahedinaraia ia be ena Keristani tadikaka ia lalokau henia bada. Ia be Tesalonika Keristani taudia dekenai ia gwau: “Ai be Tamana Dirava ena vairanai . . . emui kara . . . ai herevalaia. . . . Mai laloa goada danu [“mai haheauka danu,” NW ], iseda Lohiabada Iesu Keriso umui naria noho danu.” (1 Tes. 1:2, 3) Momokani, iseda mauri lalonai hekwakwanai be momo. To unai idia vara neganai, ita haheauka be gau badana. Oi be dahaka hekwakwanai oi davaria noho? Oi badu badina emu gorere ese Iehova oi hesiai henia karana ia hadikaia, a? Emu lalokau adavana, lagani momo lalonai oi bamoa tauna o hahine be ia mase, a? (Aon. 30:15, 16) Oi ura headava to ta oi do davaria lasi, a? Oi ura adavaia tadikaka o taihu be Iehova ia lalokau henia, a? Baibel ena taravatu oi badinaia dainai, oi ura bapatiso tadikaka (o taihu) sibona oi adavaia, a? (1 Kor. 7:39) Mauri ia auka noho negana lalonai, oi hekwarahi emu natudia oi naria totona, a? Herevana emu noho dalana be edena bamona, to bema Dirava ena Basileia oi tahua guna, oi diba Iehova be “emui kara namodia do ia laloaboio lasi.” Tadikaka bona taihu e, kara namodia umui karaia noho bona umui hesiku lasi!—Heb. 6:10; Gal. 6:9.
Dahaka ese oi do ia durua oi haheauka totona? Tesalonika taudia ia durua gauna be inai hereva: “Iseda Lohiabada Iesu Keriso umui naria noho.” Badina namona dainai, gabeai Paulo ia gwau “Dirava ena hamauria do ita naria” o hahemauri helarona be tuari kwara gauna aukana bamona—unai ese Keristani tauna ena lalona ia gimaia diba, lalohadai kerere bona daradara ia abia lasi totona.—1 Tes. 5:8.
Mai moale ida hisihisi oi haheaukalaia karana amo Satani oi hadibaia, Iehova sibona ia lohia be maoro. Satani ia gwau Dirava ena hesiai taudia be sibona edia namo idia laloa bada, Dirava ena hesiai gaukara do idia karaia daudau lasi, bona hisihisi o inai nega dokona ia ore haraga lasi dainai Iehova tomadiho henia kara do idia rakatania. To, oi ese Diabolo ena hereva oi hakoikoia be hahenamo hereadaena! Dina ta ta ai, oi naria noho hahenamo idauidau abia negana be ia kahirakahira noho.
Paulo ese dala idauidau ai ena Keristani tadikaka edia abidadama, haroro gaukara idia durua karana, bona edia haheauka ia hanamoa hegeregerena, ai danu be umui ai hanamoa bona lalokau henia. Umui gaukara goada noho!
Hesiai laganina matamatana lalonai, Iehova ese emui gaukara ia hanamoa bada be namo. Emai hanamoa herevadia ai siaia, ai be
Emui tadikaka,
Iehova Ena Witnes Taudia Edia Hakaua Oreana