Iesu Ena Siahu ese Demoni Edia Siahu Ia Hereaia

DIRAVA ena aneru ta be Satani Diabolo ai ia lao ena badina oi laloatao, a?— Ia be sibona ena namo ia laloa bada, ia ura ia idia tomadiho henia dainai Dirava ia dadaraia. Aneru ma haida ese Satani idia badinaia, a?— Oibe, idia badinaia. Baibel ese idia ia gwauraia Satani “ena aneru,” eiava lauma dikadia.—Apokalupo 12:9.

Unai aneru dikadia eiava demoni ese Dirava idia abidadama henia, a?— Baibel ia gwau ‘lauma dikadia idia abia dae Dirava ia noho.’ (Iamesi 2:​19) To hari idia gari. Badina idia diba idia karaia kara dikadia dainai Dirava ese idia do ia panisia. Edena kara dika idia karaia?—

Baibel ia gwau unai aneru ese edia noho gabuna guba idia rakatania, bona idia diho mai tanobada dekenai taunimanima bamona idia noho totona. Unai bamona idia karaia badina idia ura tanobada dekenai idia noho hahine mai hairaidia ida idia mahuta hebou. (Genese 6:​1, 2; Iuda 6) Mahuta hebou karana dekenai dahaka oi diba?—

Tau bona hahine idia mahuta hebou murinai, beibi ta be sinana ena bogana lalonai ia tubu diba. To aneru idia mahuta hebou be kerere. Dirava ia ura headava tau bona hahine sibona idia mahuta hebou. Unai amo bema beibi ia vara, tau bona hahine ese idia naria diba.

Aneru be taunimanima edia tauanina idia abia bona tanobada hahinedia ida idia mahuta hebou neganai, edia beibi be tau badadia ai idia lao. Idia be dagedage taudia momokani, bona taunimanima idia hahisidia. Unai dainai Dirava ese abata badana ia siaia unai tau badadia bona taunimanima dikadia ibounai ia hadikaia ore totona. To Noa ia hamaoroa lagatoi eiava bouti badana ta do ia karaia, kara maoromaoro idia karaia taudia hamauridia totona. Hadibaia Tauna Badana ia gwau Abata dekenai ia vara gauna ita laloa be mai anina bada.—Genese 6:​3, 4, 13, 14; Luka 17:​26, 27.

Abata ia mai neganai, aneru dikadia dekenai ia vara gauna oi diba, a?— Taunimanima edia tauanina idia rakatania bona guba dekenai idia giroa lou. To unai neganai idia be Dirava ena aneru lasi, unai dainai idia be Satani ena aneru eiava demoni ai idia lao. Bona edia natudia, taunimanima badadia unai, dekenai dahaka ia vara?— Abata dekenai idia mase ore. Bona Dirava idia kamonai henia lasi taudia ibounai danu.

Abata negana amo, Dirava ese demoni ia koua dainai taunimanima bamona do idia hedinarai lou lasi. To ena be demoni ita itaia diba lasi, idia ese taunimanima idia veria kara dikadia momokani idia karaia totona. Hari, idia ese hekwakwanai momo idia havaraia, guna bamona lasi. Unai ia vara badina idia be guba amo idia negedia diho vadaeni tanobada dekenai.

Oi diba dahaka dainai demoni ita itaia diba lasi?— Badina idia be lauma taudia. To ita diba idia be mauri taudia. Baibel ia gwau Satani ese “tanobada taudia ibounai ia koia noho,” bona ena demoni ese ia idia durua noho.​—Apokalupo 12:​9, 12.

Diabolo bona ena demoni ese ita idia hakaua kerere eiava koia diba danu, a?— Oibe, ita idia koia diba, bema ita naria namonamo lasi. To ita gari lasi be namo. Hadibaia Tauna Badana ia gwau: ‘Diabolo be lau dekenai mai ena siahu lasi.’ Bema Dirava kahirakahira ita noho, Ia ese Diabolo bona ena demoni amo ita do ia gimaia.​—Ioane 14:30.

Gau badana be ita diba, demoni idia ura dahaka kara dikadia ita karaia. Unai ita lalohadailaia namonamo. Demoni taudia be tanobada dekenai idia mai neganai, edena bamona kara dikadia idia karaia?— Abata ia do mai lasi neganai, hahine ida idia mahuta hebou, aneru dekenai unai be maoro lasi. Hari, taunimanima be mahuta hebou karana dekenai Dirava idia kamonai henia lasi neganai, demoni idia moale. Mani oi lau nanadaia, Daidia sibona idia mahuta hebou be namo?— Oi hereva maoro, headava taudia sibona.

Hari memero bona kekeni momo idia mahuta hebou, to unai be kerere. Baibel ese ia hahedinaraia Dirava ese tau bona hahine edia tauanina ena hehuni kopina kahadia ia karaia. Iehova ese badina namona ta totona unai kopina kahana ia karaia, bona headava taudia sibona ese idia moalelaia diba. Taunimanima ese Iehova ia taravatua gauna idia karaia neganai, demoni idia moale. Hegeregere mero bona kekeni be ta ta edia kopina idia gadaralaia neganai, lauma dikadia idia moale. Ita ura lasi demoni ita hamoalea, ani?—

Demoni ese gau ma ta danu idia ura henia to Iehova ese ia ura henia lasi. Oi diba unai gauna be dahaka?— Unai be dagedage karadia. (Aonega Herevadia 3:31) Dagedage karadia be bema taunimanima idia kara auka bona ma haida idia hahisia. Laloaboio lasi, taunimanima badadia, demoni edia natudia unai, be unai bamona idia karaia.

Danu, demoni idia ura taunimanima idia hagaridia. Nega haida mase taudia bamona idia hedinarai. Reana mase taudia edia gadona idia tohotohoa. Unai amo demoni ese momo idia koia bena idia abia dae mase taudia be idia mauri bona mauri taudia ida idia herevahereva diba. Oibe, demoni ese taunimanima momo idia veria lauma taudia idia abia dae totona.

Unai dainai namona be ita gima noho, unai amo Satani bona ena demoni ese ita do idia koia lasi. Baibel ia gwau: ‘Satani sibona ese iena kara ia senisia diba aneru namona ta bamona, bona ena hesiai taudia be unai bamona idia karaia danu.’ (2 Korinto 11:​14, 15) To, momokani demoni be taunimanima dikadia. Mani ita itaia edena bamona idia ura edia kara ita tohotohoa.

Taunimanima momo be edeseni amo dagedage karadia, mahuta hebou karadia bona lauma taudia idia dibaia?— Televisen program bona muvi idauidau, bona komik bukadia duahia karana amo unai gaudia idia dibaia, ani? Unai gaudia ita karaia ese ita be Dirava kahirakahira eiava Diabolo bona ena demoni kahirakahira ia abia lao? Dahaka oi laloa?—

Oi laloa daika ia ura ita ese gau dikadia ita kamonai henia bona itaia?— Oibe, Satani bona ena demoni. Unai dainai, oi bona lau be dahaka ita karaia be namo?— Namona be ita idia hanamoa gaudia ita duahia, kamonaia bona itaia, unai ese ita do ia durua Iehova ita hesiai henia totona. Ita karaia diba gau namodia haida oi laloa diba, a?—

Bema kara namodia ita karaia, demoni ita gari henidia be badina lasi. Iesu ena goada ese edia goada ia hereaia, bona ia idia gari henia. Nega ta demoni be Iesu dekenai idia boiboi idia gwau: “Ai haorea totona oi mai, a?” (Mareko 1:​24) Iesu ese Satani bona ena demoni do ia hadikaia ore negana ia mai neganai do ita moale, ani?— Unai nega ita naria noho lalonai, ita diba momokani Iesu ese demoni edia amo ita do ia gimaia, bema ia bona ena guba Tamana kahirakahira ita noho.