Iesu Ena Hahediba Taudia ai Idia Lao Taudia

DIRAVA ena hesiai tauna namo hereana be daika?— Oibe, ia be Iesu Keriso. Oi laloa iena kara ita tohotohoa diba, a?— Baibel ia gwau, ia ese ita badinaia diba haheitalai namo hereana ia hahedinaraia. Bona ita ia boiria ena hahediba taudia ai ita lao totona.

Iesu ena hahediba tauna ai ita lao ena anina oi diba, a?— Ena anina be momo. Gau ginigunana be, ia amo diba ita abia be namo. To unai sibona lasi. Namona be ia gwauraia gaudia ita abia dae momokani. Bema unai bamona ita karaia, ia gwauraia gaudia do ita karaia.

Taunimanima momo idia gwau Iesu idia abia dae. Oi laloa idia ibounai be ena hahediba taudia, a?— Lasi, idia momo be ena hahediba taudia lasi. Reana dubu dekenai idia lao. To idia momo ese nega idia atoa lasi Iesu ia hadibaia gaudia idia dibaia totona. Momokani, Iesu ena haheitalai idia tohotohoa taudia sibona be Iesu ena hahediba taudia.

Iesu be tanobada dekenai ia noho neganai, iena hahediba taudia ai idia lao taudia haida mani ita herevalaia. Filipo be Iesu ena hahediba taudia ginigunadia ta. Filipo be ia lao ena turana Natanaela (ena ladana ma ta be Batolomeo) ia tahua totona, laulau dekenai oi itaia bamona ia be au henunai ia helai noho. Natanaela be Iesu dekenai ia mai neganai, Iesu ia gwau: ‘Israela tauna korikori be inai, ia be kara momokani tauna!’ Natanaela ia hoa bona ia henanadai: ‘Edena bamona lau oi diba?’

Iesu ia gwau: “Filipo ese oi do ia boiria lasi, fig au henunai oi noho neganai, lau itaia oi.” Natanaela ia hoa bada badina Iesu be ia noho gabuna ia diba, unai dainai ia gwau: “Oi be Dirava ena Natuna, oi be Israela ena King!”​​—Ioane 1:​49.

Filipo bona Natanaela be hahediba taudia ai idia do lao lasi neganai, dina gunana ai ma haida be Iesu ena hahediba taudia ai idia lao vadaeni. Idia be Andrea bona ena kakana Petero bona Ioane bona ena kakana Iamesi. (Ioane 1:​35-​51) To, gabeai, unai tatau foa be edia haoda gaukarana dekenai idia giroa. Bena nega ta Iesu be Galilea Gohuna ena kone dekenai ia raka noho neganai, ia itaia Petero bona Andrea ese edia reke be gohu dekenai idia negea diho. Iesu be idia ia boiria, ia gwau: “Lauegu murinai umui raka.”

Iuda (ena ladana ma ta be Tadeo)

Unai gabu amo ma ia raka lao noho neganai, Iesu ese Iamesi bona Ioane ia itaia. Idia be vanagi dekenai edia tamana ida edia reke idia hanamoa noho. Iesu ese idia ia boiria danu ia murinai idia raka totona. Bema Iesu ese oi ia boiria, dahaka do oi karaia? Maoromaoro ia murinai do oi raka, a?— Unai tatau be Iesu idia diba. Idia diba ia be Dirava ese ia siaia tauna. Unai dainai maoromaoro edia haoda gaukarana idia rakatania bona Iesu murinai idia raka.​​—Mataio 4:​18-​22.

Toma

Unai tatau be Iesu murinai idia raka taudia ai idia lao neganai, anina be gabeai kara namodia sibona idia karaia, a?— Lasi. Reana oi laloatao, unai tatau be idia huanai daika ia bada idia hepapahuahulaia. To Iesu ena hereva idia kamonai, bona mai edia ura bada ida edia kara idia haidaua. Bema edia kara bamona ita karaia, ita danu be Iesu ena hahediba taudia ai ita lao diba.

Iesu be taunimanima idauidau ia boiridia iena hahediba taudia ai idia lao totona. Nega ta, matamata lohia tauna mai ena kohu bada be Iesu dekenai ia mai bona mauri hanaihanai abia dalana ia henanadailaia. Kohu bada lohia tauna ia gwau ia maragi negana amo Dirava ena taravatu ia badinaia neganai, Iesu ese ia boiria: “Oi mai, egu murina dekenai do oi raka.” Oi diba dahaka ia vara?​—

Unai tauna ia kamonai Iesu ena hahediba tauna ai ia lao karana ese kohu momo maurina ia hereaia neganai, ia lalohisihisi bada. Iesu ena hahediba tauna ai ia lao lasi, badina ena moni ia lalokau henia bada, to Dirava ia lalokau henia bada lasi.​​—Luka 18:​18-​25.

Iesu be kahirakahira lagani ta mai kahana ia haroro murinai, ia ese ena hahediba taudia 12 ia abia hidi aposetolo taudia ai idia lao totona. Aposetolo taudia be ia ese ia siaia gaukara idauna idia karaia totona. Edia ladadia oi diba, a?— Mani ita itaia bema edia ladadia ita dibaia diba. Edia laulau oi itaia, bona mani edia ladadia oi gwauraia. Bena emu laloatao karana amo edia ladadia oi gwauraia.

Gabeai, aposetolo taudia 12 amo ta be aposetolo dikana ai ia lao. Iena ladana be Iuda Iskariote. Gabeai, hahediba tauna ma ta ia abia hidi aposetolo tauna ai ia lao totona. Iena ladana oi diba, a?— Iena ladana be Mataia. Gabeai, Paulo bona Banaba be aposetolo taudia ai idia lao danu, to idia be aposetolo taudia 12 ena kahana ai idia lao lasi.​​—Kara 1:​23-​26; 14:14.

Ioane

Inai buka ena Karoa 1 amo ita dibaia hegeregerena, Iesu ese natudia maragidia ia laloa bada. Dahaka dainai unai bamona ia karaia?— Badina ia diba idia be iena hahediba taudia ai idia lao diba. Momokani, maragidia edia herevahereva dalana amo taunimanima badadia edia lalona idia veria diba idia kamonai, bona Hadibaia Tauna Badana idia dibaia totona.

Hahine momo be Iesu ena hahediba taudia ai idia lao danu. Iesu be hanua ma haida dekenai haroro totona ia lao neganai, haida be ia ida idia lao. Idia haida be Maria Magadala, Ioana bona Susana. Reana ia idia durua ena aniani idia nadua bona ena dabua idia huria totona.​​—Luka 8:​1-3.

Oi ura Iesu ena hahediba tauna ta ai oi lao, a?— Laloaboio lasi, iseda uduna amo ita hereva sibona lasi ita be iena hahediba taudia. Namona be herevana edeseniai ita noho, iseda kara amo ita hahedinaraia ita be iena hahediba taudia, Keristani heboudia dekenai ita lao negadiai sibona lasi. Gabu haida oi laloa diba, unuseniai Iesu ena hahediba tauna ta bamona ita kara diba, a?—

Oibe, namona be ruma ai unai bamona ita karaia. To gabu ma ta be sikuli ai. Oi bona lau ese ita laloaboio lasi gauna be inai, Iesu ena hahediba tauna korikorina ai ita lao totona, namona be dina ibounai herevana edeseniai ita noho Iesu ena kara ita tohotohoa.

Petero