Badina Maorodia Gwauraia

LALOHADAI ta oi gwauraia neganai, kamonai taudia idia henanadai diba: “Dahaka dainai unai be momokani? Dahaka ese ia hamomokania hereva henia tauna ena hereva lau abia dae be maoro?” Oi be hadibaia tauna dainai, emu maduna be unai bamona henanadai oi haerelaia eiava kamonai taudia oi durua haere idia davaria totona. Bema emu hereva lalonai lalohadai ta be mai anina bada, namona be badina maorodia oi hahedinaraia unai idia abia dae totona. Unai dala ai emu hereva ese edia lalona do ia veria.

Aposetolo Paulo ese lalona veria karana ia gaukaralaia. Badina maorodia ia gwauraia, ia herevalaia namonamo, bona mai momokani ida ia hereva, unai amo ia hereva henia taudia edia lalohadai ia haidaua toho. Ia ese ita dekenai haheitalai namona ia hahedinaraia. (Kara 18:4; 19:8) To momokani, hutuma idia hereva henia taudia haida be lalona veria karana amo taunimanima idia hakaua kerere. (Mat. 27:20; Kara 14:19; Kol. 2:4) Reana lalohadai kererena idia gwauraia guna, idia maoro lasi sivaraidia idia gaukaralaia, anina lasi gaudia amo idia hamomokania toho, edia lalohadai idia hakoikoia gaudia idia dadaraia, eiava hemami idia havaraia toho to badina lalohadailaia karana idia havaraia lasi. Namona be ita naria namonamo, unai hereva daladia ita dadaraia.

Dirava Ena Hereva Sibona Amo. Gau badana be ita hadibaia gaudia be sibona eda lalohadai lasi. Ita ura ma haida dekenai Baibel amo ita dibaia gaudia ita hadibaia. Unai gaukara lalonai, hesiai tauna mai ena kamonai bona kara maoromaoro oreana ese ia halasia bukadia be ita idia durua bada. Unai buka ese ita idia hagoadaia Baibel ita stadilaia namonamo. Unai dainai, ma haida ita hamaoroa Baibel idia itaia neganai, iseda lalohadai ia maoro do ita hamomokania totona ita karaia lasi, to badina mai manau ida ita ura idia sibona ese Baibel ena hereva do idia itaia. Iesu Keriso ida ita lalo-tamona, ia be guriguri ai iena Tamana ia hamaoroa: “Oiemu hereva be hereva momokani.” (Ioa. 17:17) Iehova Dirava, guba bona tanobada Havaraia Tauna, ena siahu be hereadae. Badina maorodia ita gwauraia diba bema idia be iena Hereva amo.

Reana nega haida oi hereva henia taudia be Baibel idia diba lasi eiava idia abia dae lasi ia be Dirava ena Hereva. Namona be oi laloa namonamo edena negai Baibel ena siri ta oi gwauraia. To namona be dala oi karaia unai siahu bada bukana dekenai edia lalona oi veria haraga totona.

Oi gwau diba badina badana ta ia hahedinaraia siri maorona ta ena hereva oi gwauraia sibona be hegeregere, a? Reana lasi. Reana ena badina siridia amo oi hahedinaraia unai siri ese emu hereva ia hamomokania. Bema siri ta ena hakaua herevana sibona oi hahedinaraia bona badina siridia ese oi herevalaia gauna idia herevalaia lasi, reana gau ma haida danu oi gaukaralaia be namo. Reana siri ma haida amo kamonai taudia oi durua be namo, bena idia abia dae oi herevalaia gauna be Baibel ena lalohadai ta.

Siri ese ia hamomokania gauna oi habadaia kava lasi. Oi duahia namonamo. Reana unai siri be oi herevalaia gauna ia hahedinaraia. To, emu hereva ese kamonai tauna ena lalona ia veria totona, namona be ia itaia dahaka dainai unai siri ese oi herevalaia gauna ia hamomokania.

Hamomokania Gaudia Ma Haida. Reana nega haida Baibel amo lasi to sivarai ia gwauraia maoromaoro bukana ma ta amo hamomokania herevadia oi abia be namo, taunimanima ese Baibel ena namo idia itaia totona.

Hegeregere, reana ita itaia diba guba gaudia oi hahedinaraia, Havaraia Tauna ia noho oi hamomokania totona. Reana guba gaudia idia heau taravatudia, graviti bamona, oi herevalaia bona oi hahedinaraia unai bamona taravatu idia noho dainai ita laloa diba Taravatu Karaia Tauna ia noho danu. Emu hereva be do ia namo bema ia be Dirava ena Hereva hegeregerena. (Iobu 38:​31-33; Sal. 19:1; 104:24; Roma 1:20) Unai bamona gaudia be namo, badina idia hahedinaraia Baibel ena hereva be ita itaia diba gaudia ida ia hegeregere.

Oi ura ta oi durua, Baibel be Dirava ena Hereva ia abia dae totona, a? Reana diba bada taudia edia hereva oi gwauraia, to unai be hamomokania gauna korikorina, a? Unai bamona hereva ese unai diba bada taudia idia matauraia taudia sibona idia durua. Saiens gaudia amo oi hamomokania diba Baibel be momokani, a? Bema goevadae lasi saiens taudia edia lalohadai oi atoa guna, unai be badina aukana lasi. To, bema Dirava ena Hereva amo oi hamatamaia bena saiens taudia idia davaria gaudia amo oi hahedinaraia Baibel ena hereva be maoro, emu hereva do oi hamomokania namonamo.

Herevana dahaka oi ura hamomokania, namona be hamomokania gaudia idia hegeregere. Hamomokania herevadia hida oi gaukaralaia be kamonai taudia amo do oi diba. Hegeregere, bema 2 Timoteo 3:​1-5 ena hereva amo nega dokona oi herevalaia, reana niusi ena sivarai badana ta amo kamonai taudia dekenai oi hahedinaraia diba taunimanima be ‘lalokau idia diba lasi.’ Reana unai haheitalai tamona amo oi hamomokania diba unai nega dokona ena toana be hari ia guguru.

Nega momo, edia kahana badana idia hegeregere gaudia rua oi hahegeregerea be namo. Unai hahegeregerea karana sibona ese lalohadai ta ia hamomokania lasi, ena anina be Baibel ena hereva amo oi hahedinaraia. To hahegeregerea karana dainai ta ese lalohadai ta ena namo ia itaia diba. Reana unai bamona hahegeregerea karana amo oi hahedinaraia Dirava ena Basileia be gavamani ta. Reana oi hahedinaraia taunimanima edia gavamani hegeregerena, Dirava ena Basileia be mai ena lohia taudia, taunimanima, taravatu, hahemaoro dalana, bona edukeisen dalana.

Nega momo, sivarai momokanidia amo oi hahedinaraia diba Baibel ena sisiba badinaia karana be aonega dalana. Oi gwauraia lalohadai durua totona oi dekenai idia vara gaudia oi herevalaia diba. Hegeregere, ta dekenai Baibel ita duahia bona stadilaia ena anina oi herevalaia neganai, reana unai kara ese emu mauri ia hanamoa dalana oi hahedinaraia diba. Aposetolo Petero be ena tadikaka ia hagoadaia totona, ia ese Iesu ena toana ia idau negana, ia itaia gauna, ia herevalaia. (2 Pet. 1:​16-18) Paulo danu ese ena mauri gaudia ia herevalaia. (2 Kor. 1:​8-10; 12:​7-9) To momokani, namona be oi dekenai idia vara gaudia oi herevalaia momo lasi, kamonai taudia be oi do idia laloa bada garina.

Taunimanima edia mauri bona laloa dalana be idauidau dainai, hamomokania gauna ta be tau ta dekenai ia hegeregere to reana ma ta dekenai ia hegeregere lasi. Unai dainai, dahaka hamomokania gaudia oi gaukaralaia bona edena dala ai unai oi karaia oi abia hidi neganai, kamonai taudia edia lalohadai oi laloa. Aonega Herevadia 16:23 ia gwau: “Aonega tauna ena kudouna ese, iena hereva ia hamaoromaoroa noho, bona iena hereva ese, iena diba idia habadaia noho.”