April 18 Purana Ena Sediual

APRIL 18 PURANA

Ane 29 Bona Guriguri

□ Kongrigeisen Baibel Stadi:

cl karoa 2 par. 1-7 (25 min.)

□ Tiokratik Haroro Sikuli:

Baibel duahiduahi: Iobu 28-32 (10 min.)

No. 1: Iobu 30:​1-​23 (4 min. ia hanaia lasi)

No. 2: Bema Ta Ia Gwau: “Umui ese Iesu Umui Abidadama Henia Lasi”​​—rs rau 218 par. 3–rau 219 par. 2 (5 min.)

No. 3: Dahaka Dainai Ita Laloa Guna Bena Ita Hereva?​​—Aon. 16:23 (5 min.)

□ Hesiai Hebou:

Ane 144

5 min: Hadibaia Herevadia.

10 min: Henanadai Idia Henia Neganai. Tok amo Haroro Sikuli bukana, rau 177, paragraf 2 ia lao rau 178 ena dokona herevalaia. Haheitalai kwadogina ta amo oi hahedinaraia, gaukara turana ta be pablisa ta dekenai ita abia dae gaudia ia henanadailaia. Pablisa be sibona dekenai ia herevahereva edena bamona do ia haere, gabeai unai henanadai ia haerelaia.

10 min: “ ‘Dirava Ena Lalokau’ Bukana amo Baibel Stadi Karaia Dalana.” Henanadai bona haere.

10 min: Sivarai Namona Harorolaia Daladia​​—Ruma-Ta-Ruma-Ta Ai. Tok bona henanadai haida amo Orea bukana rau 92, paragraf 3 ia lao rau 95 par 2 karaia. Pablisa ta o rua inteviu henia, ena be idia gorere eiava idia hemarai, to unai ese idia ia koua lasi ruma-ta-ruma-ta haroro gaukara idia karaia totona. Dahaka hahenamo idia abia?

Ane 138 Bona Guriguri

“Dirava Ena Lalokau” Bukana amo Baibel Stadi Karaia Dalana

1. Dahaka dainai “Dirava Ena Lalokau” bukana idia halasia?

¹ Kongrigeisen Baibel Stadi ai “Dirava Ena Lalokau Lalonai Do Umui Noho” bukana ese heduru bada ia henia. Unai buka be Baibel ena hereva badadia ia hadibaia lasi, to ita ia durua Iehova ena taravatu ita diba bona ura henia totona. Haroro gaukara ai unai buka do ita hariharilaia lasi.

2. “Dirava Ena Lalokau” bukana be daidia ida ita stadilaia bona edena bamona do ita gaukaralaia?

² “Dirava Ena Lalokau” bukana be stadi buka iharuana ai ia lao, unai dainai Baibel stiuden ida Baibel Hadibaia bukana ita haorea murinai, unai buka do ita stadilaia. Namona be ita laloatao, hereva momokani dibaia bona badinaia karana dekenai taunimanima edia laloparara be idauidau. Namona be stadi taudia ta ta edia laloparara hegeregerena edia stadi ita karaia. Gau badana be ita stadilaia kahana ia lalopararalaia namonamo. Buka haida idia stadilaia vadaeni to hebou idia mai lasi, bona idia dibaia gaudia idia ura lasi badinaia taudia ida, “Dirava Ena Lalokau” bukana do ita stadilaia lasi.

3. Bema hari ita be Dirava Tomadiho Henia bukana amo ta ita stadi henia, dahaka ita karaia be namo?

³ Bema hari Dirava Tomadiho Henia bukana amo ta oi stadi henia bona karoa ginigabedia sibona idia do noho, vadaeni namona be unai buka umui haorea, bona stiuden oi hagoadaia ia sibona ese “Dirava Ena Lalokau” bukana ia duahia totona. Bema lasi, “Dirava Ena Lalokau” bukana dekenai umui hanaia bona karoa ginigunana amo stadi umui hamatamaia diba. Baibel Hadibaia bukana hegeregerena, apendiks do oi herevalaia diba eiava lasi, be oi sibona.

4. Bema stiuden be Baibel Hadibaia bona “Dirava Ena Lalokau” bukadia ia haorea lasi lalonai ia bapatiso, dahaka ita karaia be namo?

⁴ Bema stiuden be buka rua ia do haorea lasi lalonai ia bapatiso, namona be ia oi stadi henia noho ela bona “Dirava Ena Lalokau” bukana ia haorea. Ena be stiuden ia bapatiso vadaeni, oi ese ena stadi ena hora, lou henia, bona Baibel stadi do oi ripotilaia. Oi ia bamoa tadikaka o taihu ese unai stadi ena hora ia ripotilaia danu.

5. Edena dala ai “Dirava Ena Lalokau” bukana ita gaukaralaia, haroro lasi pablisa ita durua totona?

⁵ Bema Kongrigeisen Hesiai Komiti ese oi ia abia hidi ia haroro lasi pablisa ta oi stadi henia totona, reana oi do idia noia “Dirava Ena Lalokau” bukana ena karoa haida umui stadilaia totona. Unai bamona stadi be nega daudau lalonai do umui karaia lasi. Unai buka matamatana ese ita do ia durua ‘Dirava ena lalokau lalonai ita noho’ totona!​—Iuda 21.