Hua Ta Ta ai Ripoti Maorona Oi Henia, A?

Baibel ena sivarai momo lalodiai taunimanima edia namba idia ripotilaia, unai amo idia vara gaudia idia hahedinaraia. Hegeregere, Gideona bona ena tatau 300 sibona ese Midiana taudia edia kamepa idia hadikaia ore. (Gun. 7:7) Iehova ena aneru ese Asuria ena tuari taudia 185,000 ia aladia mase. (2 Kin. 19:35) Pentekoste 33 C.E. ai, taunimanima 3,000 bamona be bapatiso idia abia, bona daudau lasi murinai abidadama taudia edia namba ia bada daekau 5,000 bamona. (Kara 2:41; 4:4) Unai sivarai ese idia hahedinaraia, guna Dirava ena hesiai taudia idia hekwarahi bada ripoti maorona idia haboua totona.

Hari, Iehova ena orea ese ita ia hadibaia hua ta ta ai eda haroro gaukara ita ripotilaia totona. Unai ita badinaia neganai haroro gaukara idia naria tadikaka ita durua. Ripoti ese idia hahedinaraia bema haroro gaukara ena kahana ta do ita hanamoa be namo o pablisa be momo lasi gabunai ma haida idia siaia diba. Kongrigeisen ai, haroro ripoti ese elda taudia ia durua, edia hesiai gaukara idia habadaia diba taudia bona heduru idia ura abia taudia idia diba totona. Basileia harorolaia gaukarana ia bada ia lao ena ripoti ese Keristani tadikaka oreana ibounai ia hagoadaia. Hua ta ta ai ripoti maorona oi henia, a?

Emu Maduna: Hua ena dokonai, haroro gaukara ai oi karaia vadaeni gaudia oi laloa lou be auka, a? Bema oibe, haroro gaukara ena rekodi oi torea be namo, ani? Haida be kalenda eiava noutbuk ta idia gaukaralaia. Ma haida be haroro gaukara ena ripoti pepana ta idia loalaia. Hua ena dokonai, emu ripoti be emu grup naria tauna dekenai oi henia haraga. Eiava Kingdom Hall ai ripoti mauana lalonai emu ripoti oi udaia diba. Bema oi laloaboio dainai emu ripoti oi henia lasi, namona be emu grup naria tauna oi hadibaia haraga, oi naria lasi ela bona oi dekenai ia mai. Hanaihanai emu ripoti henia karana ese ia hahedinaraia, Iehova ese ia abia hidi dalana oi matauraia bona ripoti idia gogoa bona namba idia haboua tadikaka edia gaukara oi laloa bada.—Luka 16:10.

Grup Naria Tauna Ena Gaukara: Mamoe naria tauna ese ena mamoe ia laloa bada hegeregerena, grup naria tauna be ena grup taudia ese hua ta lalonai idia karaia gaukarana ia laloa bada. (Aon. 27:23) Ia diba bema pablisa ta ta be hanaihanai mai moale ida haroro gaukara idia karaia namonamo o lasi, bona bema hua ta lalonai ta ia haroro lasi, heduru ia henia haraga. Hagoadaia herevana o heduru dalana ma ta ia gwauraia, eiava idia haroro hebou neganai, pablisa ia durua diba.

Hua ena dokonai, grup naria tauna ese dala ia karaia ena grup taudia ibounai ese edia gaukara idia ripotilaia totona, unai amo seketere ese hua vaira ena dina namba 20 ai kongrigeisen ena ripoti maorona be brens ofesi dekenai ia siaia diba. Bema haida be edia haroro ripoti henia totona idia laloaboio momo, namona be dala namona ai idia ia hadibaia lou bona hagoadaia.

Bema hanaihanai eda ripoti ita henia haraga, iseda haroro gaukara ai ita hagugurua gaudia edia ripoti maorona do ia hedinarai goevagoeva. Do oi hekwarahi hua ta ta ai emu ripoti oi henia haraga totona, a?

This is a repeat of article in km 12/02 taken from km-E 12/02 “Do you Contribute to an Accurate Report?”