Mauri ena Davana

Anina: Iesu Keriso ena rarana ia hebubu neganai mauri ena davana ia karaia. Guba dekenai unai davana ia henia neganai, Iesu ese dala ia kehoa, Adam ena bese taudia be kara dika bona mase amo do ia ruhadia nege totona. Unai kara dika bona mase ita abia, iseda tubuna Adam ena kara dika dainai.

Iesu Keriso ena mase be edena bamona ia idau, edia abidadama dainai idia hamasedia taudia haida edia mase hegeregerena lasi?

Iesu be taunimanima goevadaena ta. Ia vara neganai kara dika ena toana be lasi ia dekenai, bona ia be unai bamona ia goevadae iena mauri ibounai lalonai. “Ia be kara dika ta ia karaia lasi.” “Ia be kara dika lasi, kerere ta lasi. Ia be kara dika taudia bamona lasi.”​—⁠1 Pet. 2:22; Heb. 7:26.

Ia be Dirava ena Natuna idau hereana. Dirava sibona be guba amo ia hereva, Iesu be iena Natuna ia gwauraia. (Mat. 3⁠:17; 17⁠:⁠5) Hari Natuna be guna guba dekenai ia noho; Dirava ese ia ena amo ma gau iboudiai ia havaraia, guba dekenai bona tanobada dekenai danu. Sibona ena ura hagugurua totona, Dirava ese hari Natuna ena mauri haneulato rami-hebou ta ena bogana lalonai ia atoa, taunimanima ta hegeregerena do ia vara totona. Iesu be sibona ia gwauraia taunimanima ena Natuna, unai amo ia hahedinaraia ia be taunimanima korikori ta ai ia lao vadaeni.​—⁠Kol. 1⁠:​15-20; Ioane 1⁠:14; Luka 5⁠:24.

Bema ia ura neganai, ia idia alaia gwauraia taudia edia amo ia roho mauri diba. Ia gwau: “Egu mauri lau atoa diho . . . Tau ta ese lauegu mauri ia kokia lasi, lau sibona lau atoa diho.” (Ioane 10⁠:​17, 18) Ena be ia be mai ena dala ena Tamana do ia noia aneru oreadia do ia siaia ia do idia durua totona, to unai bamona ia karaia lasi. (Mat. 26⁠:​53, 54) Ena be kara dika taudia ese edia palani dikadia hegeregeredia hamasea dalana idia karaia, to iena mase be boubou karana korikori ta.

Iena rarana, ia bubua gauna, be mai ena hahemauri siahuna. “Taunimanima ena Natuna ia mai lasi, hesiai taudia ese iena gaukara idia karaia totona, to ia mai be hesiai gaukara ia karaia totona, bona iena mauri ia henia taunimanima momo edia dika davana karaia totona.” (Mar. 10⁠:45) Unai dainai iena mase be mai anina bada, edia abidadama dainai idia hamasedia taudia edia mase ia hanaia momokani.

Rau 309-10 itaia danu, inai sinado “Memorial” henunai.

Dahaka dainai Iesu ese unai dala tamona sibona amo ita ia hamauria diba, mauri hanaihanai do ita abia totona?

Roma 5:12: “Tau tamona [Adam] dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina be ibounai be mai edia kara dika.” (Ena be kara maoromaoro ita badinaia goadagoada toho, to iseda vara dinadia amo ita ibounai be kara dika taudia. [Sal. 51⁠:5] Mauri hanaihanai be iseda kara maoromaoro ena davana hegeregerena do ita abia dalana be lasi.)

Roma 6:23: “Kara dika ena davana be mase.”

Sal. 49:​6-9: “Idia ese edia taḡa e abidadama heniamu, edia kohu momo herea e heaḡilaiamu. Momokani, tau ta sibona basine hehoi lasi diba, ena mauri davana na Dirava basine henia diba; badina be ena mauri davana na bada herea. Tau ta dia heḡereḡere ena mauri baine hadaudaua hanaihanai, bona mase gabuna basine itaia.” (Taunimanima iboudiai idia goevadae lasi dainai, ta ese ma ta na kara dika bona mase amo ia hamauria diba lasi. Ena moni amo mauri hanaihanai ia hoia diba lasi, bona bema ena mauri be ia atoa diho, ena mase be mai ena hahemauri siahuna lasi, badina be ena kara dika ena davana korikori be unai.)

Badina be dahaka Dirava ia gwau lasi Adam bona Eva be edia gwau-edeede dainai do idia mase, to edia bese taudia iboudiai bema Dirava idia kamonai henia do idia mauri ela bona hanaihanai?

Badina be Iehova ese ‘kara maoromaoro bona hahemaoro ia ura henidia’ dainai. (Sal. 33⁠:5; Deut. 32⁠:4; Ier. 9⁠:24) Unai dainai, unai kerere ia hamaoromaoroa dalana ese ena kara maoromaoro bona ena hahemaoro goevagoeva ia hahedinaraia, bona ena lalokau bona ena hebogahisi danu. Ia hahedinaraia dalana be inai:

(1) Adam bona Eva ese edia natudia ta idia havaraia lasi idia do kara dika lasi neganai, unai dainai edia natudia iboudiai idia goevadae lasi idia vara neganai. Adam ena bese taudia iboudiai be kara dika lalonai idia vara, bona kara dika ese mase ia havaraia. Bema Iehova ese unai ia laloa lasi, anina be sibona ena taravatu maoromaorodia ia badinaia lasi; ia ese kara dika unai bamona ia durua diba lasi. Ia ese hahemaoro goevagoeva dalana amo ia siri lasi; unai dainai aneru ta o taunimanima ta ese ia samania diba lasi.​—⁠Roma 3⁠:​21-26.

(2) Iehova ese hahemaoro goevagoeva dalana do ia badinaia noho lalonai, ia ese Adam ena bese taudia, mai edia lalokau ida ia do idia kamonai henia taudia, edena bamona do ia hamauridia? Bema taunimanima goevadaena ta be boubou gauna bamona ia mase, hahemaoro goevagoeva dalana hegeregerena unai mauri goevadaena be hegeregere, unai heduru be mai edia abidadama ida do idia abia dae taudia edia kara dika do ia hunia. Tau tamona (Adam) ena kara dika ese taunimanima iboudiai na kara dika taudia ai ia halaodia dainai, taunimanima goevadaena ma ta (Adam iharuana hegeregerena) ena rarana bema ia hebubu neganai, unai rara ena davana be edia kara dika ena davana hegeregerena. Adam ia kara dika mai ena ura ida dainai, unai heduru ia abia diba lasi; to iena bese taudia ese do idia abia diba, bema taunimanima ma ta ese kara dika ena davana unai bamona do ia karaia neganai. To unai bamona taunimanima goevadaena ta be lasi. Taunimanima ese hahemaoro goevagoeva idia hagugurua diba lasi. Unai dainai Iehova sibona ese hamauridia dalana ia karaia mai ena lalokau bada ida. (1 Kor. 15⁠:45; 1 Tim. 2⁠:​5, 6; Ioane 3⁠:16; Roma 5⁠:⁠8) Dirava sibona ese ia havaraia Natuna tamona ena lalona ia hegeregere iena Tamana ena ura do ia karaia. Mai ena manau ida ia ese ena hairai guba dekenai ia rakatania bona taunimanima goevadaena ta ai ia lao, bena taunimanima dainai ia mase.​—⁠Fil. 2⁠:​7, 8.

Hereva hegeregerena: Tau ta be taravatu utua tauna ai ia lao bena kota taudia ese hamasea herevana idia gwauraia. Ia mase murinai ena natudia idia ogogami, bona idia be dala lasi edia tamana ena abitorehai bada ena davana do idia karaia. Bena edia tubuna mai hebogahisina ese inai bamona ia durudia: Iena natuna ta, ia dekenai ia noho tauna, be ia ese ia siaia, edia abitorehai ena davana karaia totona bona mauri matamata davaria dalana idia ediai ia kehoa totona. Momokani, unai natu ese namo do idia davaria dalana tamona be, unai heduru do idia abia dae. Reana edia tubuna ia ura do idia gwauhamata henia guna, edia tamana ena kara hegeregerena do idia karaia lasi.

Iesu Keriso be ena boubou gauna amo daidia ia hamauridia guna, bona dahaka totona ia hamauridia?

Roma 1:16: “[Iesu Keriso bona Dirava ena palani ia hagugurua dalana edia] Sivarai Namona be Dirava ena siahu, abidadama taudia ia hamauria, Iuda taudia guna, Iuda lasi taudia danu.” (Iuda taudia ia boiridia guna, Keriso ena amo hahemauri do idia abia totona, bena gabeai Iuda lasi taudia danu be unai bamona ia boiridia.)

Ef. 1:​11-14: “Ia ese ita ia abia hidi, iena bese korikori do ita lao [guba Basileiana do ita abia totona], Keriso danu ita hakapua dainai. . . . Vadaeni, ai [Iuda taudia, aposetolo Paulo danu] be Keriso ai laloa bona abidadama henia taudia ginigunadia dainai, namona be Dirava ena hairaina ai hanamoa bada. Umui [Keristen taudia, Dirava ese idau besedia amo umui ia abidia hidi taudia] danu, Sivarai Namona, hahemauri umui dekenai ia henia hereva momokani umui kamonai henia neganai, Dirava ese iena bese taudia umui ia halaoa. Keriso umui abidadama henia dainai Dirava ese iena gwauhamata toana, Lauma Helaga umui dekenai ia henia. Inai toana dekena amo umui be Dirava ena bese momokani. Lauma Helaga be gabeai Dirava ese ita do ia henia davana namona ena toana. Dirava ese ita ia hoia vadaeni, bona Lauma Helaga dekena amo ita ia makaia, vadaeni ita diba momokani ita be ia dekenai dohore ita noho. Namona be iena hairaina ita hanamoa bada!” (Petero Ginigunana 1⁠:4 ese ia hahedinaraia unai davana namona be guba dekenai do idia abia. Apokalupo 14⁠:​1-4 ese ia hahedinaraia unai davana do idia abia taudia be 144,000. Keriso ida idia be pavapava bona hahelaga taudia ai do idia lao bona tanobada taudia do idia lohiadia ela bona lagani 1,000. Matamana neganai Dirava ena palani be, taunimanima ginigunadia ruaosi edia bese taudia ese tanobada na paradaiso ai do idia halaoa bona do idia noholaia; unai lagani 1,000 lalodiai unai palani ena anina do ia hagugurua.)

Hari inai negai Iesu ena boubou gauna ese daidia danu ia hanamodia noho?

1 Ioane 2:2: “Keriso sibona be [ita, aposetolo Ioane bona Dirava ese ena lauma amo ia horodia Keristen taudia ma haida] iseda kara dika gwauatao dalana. Bona iseda dika sibona lasi, to Keriso be taunimanima ibounai [taunimanima oredia unai, tanobada dekenai mauri hanaihanai helarona be unai dala amo idia abia diba taudia] edia dika gwauatao dalana.”

Ioane 10:16: “Lau be mai egu mamoe idaudia haida danu idia noho. Idia be inai magu lalonai idia noho lasi. Idia danu do lau hakaudia mai, vadaeni egu gadona do idia kamonai, vadaeni orea do ia tamona, naria tauna danu do ia tamona.” (Basileia do idia abia “orea maragi” taudia oredia be tanobada dekenai idia do noho neganai, Iesu Keriso ese hari “mamoe idaudia” ia naridia mai ena lalokau ida; unai dainai idia be Basileia do idia abia taudia ida idia hebou diba, ‘orea tamona’ lalonai. Idia iboudiai ese Iesu ena boubou gauna ena hahenamo momo idia abia, to dala tamona ai idia abia lasi, badina Dirava ese mauri gabedia idauidau idia totona ia gwauhamatalaia vadaeni.)

Apok. 7:​9, 14, BH: “Ini ḡau muridiai na roha lao, hutuma bada-herea na itadia, asi iduahidia, bese idau-idau bona iduhu idau-idau bona hanua idau-idau bona gado idau-idau amo . . . Ini na hisihisi badana amo vada ema, edia dabua na Mamoe Natuna rarana ai e huri, e hakurokuro.” (Anina be, hisihisi badana ia matamaia neganai inai hutuma bada herea idia mauri noho, bona Dirava vairanai idia goeva badina be Iesu ena boubou gauna idia abidadama henia dainai. Dirava ese unai bamona ia gwauraidia maoromaoro, bona edia maoromaoro be hegeregere, ia dainai Dirava ese do ia naridia bena hisihisi badana amo do idia roho mauri tanobada dekenai.)

Nega vairai Iesu ena boubou gauna ese dahaka hahenamo do ia havaradia?

Apok. 5:​9, 10: ‘Ane matamata idia abia, inai bamona: “Oi [Mamoe Natuna, Iesu Keriso] be hegeregere momokani buka do oi abia, bona koua toana do oi hamakohia, badina be oi idia alaia mase, bona oiemu rarana dekena amo taunimanima oi hoidia, Dirava ena taudia do idia lao totona. Bese ibounai, gado ibounai, hanua ibounai bona kopina idauidau ibounai oi ese oi hoidia. Oi ese idia oi haboua, vadaeni idia be Basileia ta bona Dirava ena boubou helaga karaia taudia oi ese idia oi halaoa vadaeni, bona idia ese tanobada do idia gunalaia.” ’ (Iesu ena boubou gauna ese dala ia kehoa, Keriso ida do idia lohia hebou taudia ese mauri guba dekenai do idia abia totona. Nega daudau lasi murinai, tanobada ena gavamani matamatana lalonai do idia lohia taudia iboudiai be edia terona latadiai do idia helai guba dekenai.)

Apok. 7:​9, 10: “Hutuma bada herea lau itaia, duahia diba lasi. Idia be bese idauidau, iduhu idauidau, kopina idauidau, bona gado idauidau. Idia ibounai be helai gabuna badana vairanai bona Mamoe ena Natuna [Iesu Keriso, idia bouboulaia mamoena ta bamona ia mase tauna] vairanai idia gini. Edia dabua be kurokuro, bona edia imana dekenai niu rauna idia dogoatao. Idia boiboi badabada, idia gwau, ‘Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.’ ” (Inai hutuma bada herea be hisihisi badana amo do idia roho mauri ena badina badana ta be Keriso ena boubou gauna idia abidadama henia dainai.)

Apok. 22:​1, 2: “Aneru ese mauri ranuna ena sinavai lau dekenai ia hedinaraia. Ia be galasi bamona ia diari, bona iena ranu be Dirava bona Mamoe ena Natuna edia helai gabuna badana dekena amo ia aru lao. Inai sinavai be hanua ena ariara badana ena huanai ia aru lao. Sinavai ena kahana kahana be mauri auna ia gini. Inai mauri auna ese lagani ta lalonai huahua ia atoa nega 12, hua ta ta ibounai lalonai huahua ia atoa. Inai au ena rauna ese bese idauidau idia hanamoa noho.” (Dirava ena Mamoe Natuna, Iesu Keriso, ena boubou gauna ena hahemauri siahuna be Dirava ese do ia gaukaralaia, taunimanima na kara dika ena anina dikana ibounai amo do ia hamauridia bona mauri hanaihanai do ia henidia totona.)

Roma 8:21: “Dirava ese dina ta iena karaia gaudia [taunimanima] be do ia ruhaidia dika ena bodaga dekena amo, vadaeni Dirava ena natuna edia hairai do idia abia, ma Dirava ese edia dala do ia kehoa, vadaeni kwalimu momokani do idia abia.”

Dahaka ita karaia be namo, Iesu ena boubou gauna hereadaena amo hahenamo hanaihanai do ita abia totona?

Ioane 3:36: “Ena Natuna ia abidadama henia tauna ese mauri hanaihanai do ia abia, to ena Natuna ia kamonai henia lasi tauna be mauri do ia itaia lasi, to Dirava ena badu be iena latanai do ia noho.”

Heb. 5:9: “Ela bona ia [Iesu Keriso] be namo momokani vadaeni, iena namo ese ibounai edia namo ia hanaia. Unai dainai ia be hegeregere vadaeni ia dekenai idia kamonai henia taudia ibounai mauri hanaihanai do ia henidia.”

Dirava ese inai hahemauri dalana ia karaia neganai, dahaka ia hahedinaraia taunimanima dekenai?

1 Ioane 4:​9, 10: “Dirava ese iena lalokau ita dekenai be inai bamona ia hedinaraia: Ia ese iena Natuna tamona tanobada dekenai ia siaia, ia dekena amo mauri do ita abia totona. Lalokau ena anina be inai: ita ese Dirava ita lalokau henia lasi, to Dirava ese ita ia lalokau henia. Bona ia ese iena Natuna ia siaia, ia sibona be iseda dika gwauatao dalana totona.”

Roma 5:​7, 8: “Kara maoromaoro tauna dainai be daika do ia mase? Sedira ta lasi. Sedira tau ta ese tau namona ta dainai do ia mase diba. To Dirava ese iena lalokau badana ia hedinaraia ita dekenai, badina ita be do kara dika noho taudia neganai Keriso be ita dainai ia mase.”

Inai hahemauri dainai, iseda mauri be edena bamona ita gaukaralaia be namo?

1 Pet. 2:24: “Keriso ese sibona ena tauanina dekenai iseda kara dika ia huaia satauro latanai. Unai bamona ia karaia, kara dika dekenai do ita mase totona, bona kara maoromaoro dekenai do ita mauri totona.” (Iehova Dirava bona ena Natuna ese kara badadia idia karaia kara dika amo ita idia hagoevaia totona, unai dainai namona be iseda ura dikadia ita halusidia toho mai eda goada ida. Bema ita diba kara ta be dika, unai kara ita karaia mai eda ura ida be dika rohoroho!)

Tito 2:14: “Keriso ese iena mauri ia henia ita dainai, kara dika ibounai dekena amo ita do ia hamauria totona. Badina be ia ura orea tamona ita do ia halaoa, ia sibona ena orea, do ita goevagoeva, bona iena kara namodia do ita karaia totona.” (Bema inai hahemauri ita laloa bada, Iesu ese ena orea taudia momokanidia ia henidia gaukaradia ita karaia goadagoada be namo.)

2 Kor. 5:​14, 15: “Keriso ena lalokau ese ai ia biagua noho, badina be hari ai diba momokani tau tamona ese taunimanima ibounai dainai ia mase. Inai anina be ita ibounai Keriso danu ita mase hebou vadaeni. Oibe, Keriso ese taunimanima ibounai dainai ia mase. Unai dainai ia dekena amo mauri ita davaria taudia be ita sibona iseda mauri bona iseda ura do ita laloa lasi, to ita dainai ia mase, ma ia toreisi lou tauna ena mauri bona iena ura gaudia do ita laloa bona karaia.”