“Dirava be Lohia Dainai Ia Ai Kamonai Henia be Maoro”

1-3. (a) Dahaka dainai aposetolo taudia be Sanhedrin vairanai idia gini, bona dahaka be mai anina bada? (b) Dahaka dainai aposetolo taudia edia gini goada karana ita laloa bada be namo?

SANHEDRIN ena diadi taudia be idia badu dikadika! Iesu ena aposetolo taudia be unai kota badana vairanai idia gini. Dahaka dainai? Sanhedrin ena hahelaga tauna badana bona gunalaia tauna, Iosepa Kaiapa, ese idia ia hereva henia, ia gwau: “Umui ai oda henia inai ladanai do umui hadibaia lasi.” Ia badu dikadika dainai, Iesu ena ladana ia gwauraia lasi. Ma ia gwau: “Ierusalema ibounai be emui hahediba herevana amo umui hahonua vadaeni, bona umui ura inai tauna ena rara be ai latanai umui atoa.” (Kara 5:28) Idia gwau: Haroro gaukara hadokoa, bema lasi, panisi do umui abia!

² Aposetolo taudia be dahaka do idia karaia? Idia be Iesu ena hahegani idia badinaia bona idia haroro, Iesu be Dirava amo siahu ia abia. (Mat. 28:18-20) Aposetolo taudia be gari dainai haroro gaukara do idia hadokoa, a? Eiava do idia gini goada bona haroro gaukara do idia karaia noho, a? Mai anina bada gauna be inai: Dirava do idia kamonai henia o taunimanima? Petero be aposetolo taudia ibounai totona ia hereva. Ia be mai gari lasi ida ia hereva goevagoeva.

³ Sanhedrin edia hagaria herevadia dainai aposetolo taudia be dahaka idia karaia? Ita be Keristani taudia korikoridia dainai, ita ura idia karaia gauna ita dibaia. Ita danu be unai hahegani ita abia. Bona Dirava ese ita ia henia gaukarana ita karaia lalonai, dagedage do ita davaria danu. (Mat. 10:22) Ita idia inai henia taudia do idia ura iseda gaukara idia koua eiava idia taravatua. Dahaka do ita karaia? Aposetolo taudia edia abidadama idia dogoatao auka bona Sanhedrin vairanai idia gini goada karana ita laloa neganai, unai ese ita ia durua bada.a

“Iehova Ena Aneru ese Dibura Ruma Ena Iduara Ia Kehoa” (Kara 5:12-21a)

4, 5. Dahaka dainai Kaiapa bona Sadukea taudia “idia mama”?

⁴ Nega ginigunana Petero bona Ioane idia koua haroro gaukara do idia karaia lasi neganai, idia gwau: “Ai itaia bona kamonai gaudia herevalaia karana do ai hadokoa lasi.” (Kara 4:20) Unai murinai, Petero, Ioane, bona aposetolo taudia ma haida be dubu helaga lalonai haroro gaukara idia do karaia noho. Idia ese hoa karadia momo idia karaia hegeregere, gorere taudia idia hanamoa bona demoni idia luludia. Unai be “Solomona Ena Du” ai idia karaia, unai gabu be dubu helaga ena ist kahanai ia noho, unuseniai Iuda taudia momo idia hebou. Oibe, Petero ena laulau (shadow) be gorere taudia haida latanai ia diho neganai, idia danu idia namo lou! Unai taudia momo ese Dirava ena hereva momokani idia abia dae. Unai dainai “Lohiabada idia abidadama henia taudia, tatau bona hahine, edia namba ia bada daekau.”​—Kara 5:12-15.

⁵ Kaiapa bona Sadukea tomadiho oreana be “idia mama henidia bada,” bona aposetolo taudia be dibura ruma ai idia atodia. (Kara 5:17, 18) Dahaka dainai Sadukea taudia idia badu dikadika? Badina aposetolo taudia ese Iesu ena toreisi lou sivaraina idia harorolaia, to Sadukea taudia be toreisi lou herevana idia abia dae lasi. Aposetolo taudia idia gwau, Iesu abidadama henia karana sibona amo mauri do idia abia, to Sadukea taudia be idia gari, dika ibounai ese Iesu be edia Gunalaia Tauna ai idia halaoa, bena Roma ese do ia panisidia. (Ioa. 11:48) Unai dainai Sadukea taudia idia ura bada aposetolo taudia edia gaukara idia koua!

6. Hari, daidia ese Iehova ena hesiai taudia idia inai henia, bona dahaka dainai ita hoa lasi?

⁶ Hari inai negai danu, tomadiho koikoi ena gunalaia taudia ese haida idia doria Iehova ena hesiai taudia dagedage henia totona. Idia ese gavamani bona niusi halasia oreadia idia gaukaralaia iseda haroro gaukara idia koua totona. Unai kara dainai ita hoa, a? Lasi. Iseda haroro gaukara amo tomadiho koikoi ena dika ita hahedinaraia. Kudou-maoro taudia ese Baibel ena hereva momokani idia abia dae neganai, idia ese Baibel ia hadibaia lasi lalohadaidia bona kara idia dadaraia. (Ioa. 8:32) Unai dainai, nega momo ita gwauraia sivaraina ese tomadiho gunalaia taudia ia habadua, ani?

7, 8. Edena dala ai aneru ena hereva ese aposetolo taudia ia durua, bona dahaka henanadai ita laloa be namo?

⁷ Aposetolo taudia be dibura ruma lalonai edia kota negana idia naria noho lalonai, reana idia laloa edia abidadama dainai edia inai taudia ese do idia hamasedia. (Mat. 24:9) To hanuaboi ai, gau idauna ta ia vara, “Iehova ena aneru ese dibura ruma ena iduara ia kehoa.”b (Kara 5:19) Aneru ese idia dekenai inai hakaua herevana ia henia, “dubu helaga lalonai umui gini” bona umui ‘haroro noho.’ (Kara 5:20) Momokani, unai hereva amo aposetolo taudia idia diba idia be kara maorona idia karaia noho. Danu, aneru ena hereva ese idia ia hagoadaia, herevana dahaka ia vara, to idia gini goada be namo. Aposetolo taudia be mai abidadama bona gari lasi ida “daba maragi ai dubu helaga lalonai idia vareai bona idia hadibaia matamaia.”​—Kara 5:21.

⁸ Namona be sibona ita nanadaia: ‘Bema dagedage lau davaria, mai abidadama bona gari lasi ida do lau haroro noho, a?’ ‘Dirava ena Basileia gwauraia guguru’ gaukarana be mai gari lasi ida do ita karaia noho, badina ita diba aneru ese inai mai anina bada gaukarana ia durua.​—Kara 28:23; Apok. 14:6, 7

“Dirava be Lohia Dainai Ia Ai Kamonai Henia be Maoro, To Taunimanima Lasi” (Kara 5:21b-33)

9-11. Sanhedrin idia ura aposetolo taudia edia haroro gaukara idia koua neganai, idia be dahaka idia karaia? Bona dahaka haheitalai namona idia hahedinaraia?

⁹ Kaiapa bona Sanhedrin ena diadi taudia ma haida idia hegaegae, aposetolo taudia kota henia totona. Bona Gadi taudia idia siaia dibura ruma ai aposetolo taudia idia hakaua mai totona, to idia diba lasi aneru ese aposetolo taudia idia ruhaia vadaeni. Idia lao neganai idia hoa, badina idia itaia aposetolo taudia idia noho lasi, ena be dibura rumana idia lokaia namonamo bona “gima taudia be iduara dekenai idia gini.” (Kara 5:23) Dubu helaga ena kapten ia kamonai, aposetolo taudia be dubu lalonai Iesu Keriso ena ladana idia harorolaia—unai gaukara dainai idia be dibura rumana ai idia atoa! Vadaeni kapten bona ena ofesa taudia be dubu helaga dekenai idia lao haraga, aposetolo taudia idia dogoatao bona Sanhedrin dekenai idia hakaua lao.

¹⁰ Inai karoa ena matamanai ita herevalaia bamona, dubu gunalaia taudia be mai badu ida aposetolo taudia idia koua idia haroro lasi totona. Aposetolo taudia be dahaka idia karaia? Aposetolo taudia totona ia hereva tauna, Petero, be mai gari lasi ida ia gwau: “Dirava be lohia dainai ia ai kamonai henia be maoro, to taunimanima lasi.” (Kara 5:29) Unai dainai aposetolo taudia be haheitalai namona Keristani taudia ibounai dekenai. Bema tanobada ena lohia taudia ese Dirava ena ura idia koua, eiava idia ura ita ese Dirava ia taravatu gauna ta ita karaia, vadaeni idia do ita kamonai henia lasi. Hari iseda negai danu, bema “gavamani” ese iseda haroro gaukara idia taravatua, namona be Dirava ena hahegani ita badinaia. Sivarai namona ita harorolaia noho. (Roma 13:1) Bona aonega dalanai Dirava ena Basileia do ita harorolaia.

¹¹ Aposetolo taudia be mai gari lasi ida idia hereva dainai, diadi taudia idia badu dikadika. Edia lalona idia hadaia, “aposetolo taudia idia hamasea” totona. (Kara 5:33) Toana be unai gari lasi bona gaukara goada witnes taudia be edia abidadama dainai do idia mase. To, dala idauna ai heduru do idia abia!

“Umui ese Edia Gaukara Do Umui Koua Diba Lasi” (Kara 5:34-42)

12, 13. (a) Gamaliela ese ena gaukara turadia dekenai dahaka sisiba ia henia, to dahaka idia karaia? (b) Hari, Iehova be edena dala ai ena taunimanima totona do ia kara? Bona ‘kara maoromaoro dainai hisihisi ita abia’ neganai, dahaka gaudia rua ita dibaia be namo?

¹² Gamaliela, be “Taravatu hadibaia tauna bona taunimanima ibounai ese idia matauraia” tauna, ia hereva.c Toana be ena gaukara turadia ese ia idia matauraia bada, badina unai hebou ia gunalaia, bona “oda ia henia, aposetolo taudia be do idia siaia murimuri ai nega sisina do idia naria.” (Kara 5:34) Gamaliela be guna haida ese idia havaraia heiriheiri ia herevalaia, edia gunalaia taudia idia mase murinai, unai heiriheiri idia hadokoa. Unai dainai kota taudia ia noia mai haheauka ida aposetolo taudia idia kara henia, badina edia Hakaua Tauna, Iesu, be vanegai sibona ia mase. Gamaliela be lalona veria dalanai ia hereva, ia gwau: “Inai tatau edia gaukara umui koua lasi, to idia umui rakatania. Badina bema inai hahediba hereva eiava gaukara be taunimanima amo, do ia ore, to bema ia be Dirava amo, umui ese edia gaukara do umui koua diba lasi. Umui naria namonamo, badina dika umui be Dirava umui tuari henia noho.” (Kara 5:38, 39) Diadi taudia ese iena hereva idia abia dae. To, aposetolo taudia idia kwadia bona idia oda henia, “Iesu ena ladanai do idia hereva lasi.”​—Kara 5:40.

¹³ Hari danu, Iehova ese dagi bada taudia, Gamaliela bamona, do ia gaukaralaia Iena taunimanima durua totona. (Aon. 21:1) Iehova ese ena lauma ia gaukaralaia diba lohia taudia, diadi taudia, eiava taravatu idia karaia taudia edia lalona ia haidaua diba unai amo iena ura hegeregerena do idia kara. (Neh. 2:4-8) To bema ‘kara maoromaoro dainai hisihisi ita abia’ bona Iehova ese unai ia koua lasi, namona be inai gaudia rua ita diba. (1 Pet. 3:14) Ginigunana be, Iehova ese ita dekenai goada ia henia diba ita haheauka totona. (1 Kor. 10:13) Iharuana be, ita idia inai henia taudia be Dirava ena gaukara ‘idia koua diba lasi.’​—Isa. 54:17.

14, 15. (a) Aposetolo taudia idia dadabaia neganai, dahaka dainai idia lalomanoka lasi? (b) Iehova ena taunimanima be mai moale ida idia haheauka ena ekspiriens ta gwauraia.

¹⁴ Aposetolo taudia idia kwadia dainai, idia lalomanoka, a? Lasi momokani! “Sanhedrin idia rakatania bona mai moale ida idia lao.” (Kara 5:41) Dahaka dainai idia “moale”? Momokani, idia kwadia ena hisihisi dainai idia moale lasi. To, idia moale badina idia diba Iehova badinaia karana idia hahedinaraia noho bona Iesu ena haheitalai namona idia tohotohoa dainai, dagedage idia abia.​—Mat. 5:11, 12.

¹⁵ Iseda Keristani tadikaka ginigunadia bamona, sivarai namona dainai hisihisi ita abia neganai, mai moale ida ita haheauka. (1 Pet. 4:12-14) Ita idia hagaria, idia dagedage henia, o dibura ruma ai idia atoa dainai ita moale lasi. To Iehova ita badinaia noho dainai ita moale. Hegeregere, Henryk Dornik ita laloa, lagani momo lalonai gavamani aukana henunai, hisihisi bada ia davaria. Ia gwau August 1944 ai, gavamani taudia ese ia bona ena kakana be dibura kamepa dekenai idia siaia. Edia inai taudia idia gwau: “Ia auka edia lalona ita haidaua gau ta idia karaia totona. Edia abidadama dainai idia mase karana ese idia dekenai moale ia mailaia.” Tadikaka Dornik ia gwau: “Ena be lau ura lasi lau idia hamasea, to mai gari lasi ida Iehova lau badinaia dainai, hisihisi lau haheaukalaia karana ese lau ia hamoalea.”​—Iam. 1:2-4.

16. Edena dala ai aposetolo taudia idia ura sivarai namona idia harorolaia guguru? Bona edena dala ai edia haroro dalana ita tohotohoa?

¹⁶ Aposetolo taudia be maoromaoro edia haroro gaukarana idia hamatamaia lou. Mai gari lasi ida, “dina ibounai dubu helaga ai bona ruma-ta-ruma-ta ai, Iesu Keriso ena sivarai namona idia hadibaia bona harorolaia noho, idia hadokoa lasi.”d (Kara 5:42) Unai haroro goadagoada taudia be edia lalona idia hadaia, haroro gaukara idia karaia guguru totona. Iesu ena hereva hegeregerena, aposetolo taudia be taunimanima edia ruma dekenai sivarai namona idia abia lao. (Mat. 10:7, 11-14) Unai dala amo, Ierusalema ibounai be edia hadibaia hereva amo ia honu. Hari inai negai, Iehova ena Witnes taudia be aposetolo taudia ese idia karaia haroro dalana idia tohotohoa. Eda teritori ai ruma ta ta ita vadivadi henia amo ita hahedinaraia, ita ura taunimanima ibounai ese sivarai namona idia kamonai. Iehova ese iseda ruma-ta-ruma-ta gaukarana ia hanamoa, a? Oibe! Inai nega dokona lalonai, taunimanima milioni momo be Basileia ena sivarai namona idia kamonai, bona Witnes taudia ese edia ruma idia vadivadi henia neganai, momo ese nega ginigunana sivarai namona idia kamonai.

“Gaukara Idia Karaia” Diba Tatau (Kara 6:1-6)

17-19. Dahaka hekwakwanai ia vara, bona aposetolo taudia ese dahaka idia karaia unai idia hamaoromaoroa totona?

¹⁷ Kongrigeisen matamatana lalonai hekwakwanai ta ia vara. Unai be dahaka hekwakwanai? Ierusalema idia vadivadi henia taudia momo be bapatiso idia abia bona edia hanua dekenai idia giroa lou lasi neganai, idia ura diba ma haida idia abia. Ierusalema ai idia noho hahediba taudia be mai edia ura ida moni idia haboua, unai amo aniani bona gau ma haida idia hoia diba. (Kara 2:44-46; 4:34-37) Unai negai gau ta ia vara. Hahediba taudia ese “dina ta ta ena aniani idia haria neganai, Grik gado idia hereva vabu idia laloaboio.” (Kara 6:1) To, Heberu gado idia hereva vabu idia laloa bada. Toana be idia huanai, ma haida sibona idia laloa bada. Inai be hekwakwanai badana, badina unai ese bese hapararaia karana ia havaraia diba.

¹⁸ Aposetolo taudia—hakaua oreana unai—idia laloparara, ‘Dirava ena hereva idia rakatania, bona aniani haria gaukarana idia karaia’ be aonega karana lasi. (Kara 6:2) Unai hekwakwanai hamaoromaoroa totona, hahediba taudia idia hamaoroa “lauma helaga bona aonega amo idia honu” tatau 7 do idia tahua, bona aposetolo taudia ese unai tatau do idia abia hidi unai “gaukara idia karaia” totona. (Kara 6:3) Unai gaukara idia karaia diba tatau idia abia hidi be namo, badina aniani haria gaukarana sibona do idia karaia lasi, to moni do idia naria, gau ma haida do idia hoia bona unai gaudia idia rekodia danu. Idia abia hidi tatau be mai edia Grik ladadia, unai dainai reana Grik vabu ese unai do idia moalelaia. Idia guriguri bona idia laloa namonamo murinai, “gaukara idia karaia” diba tatau seven idia abia hidi.e

¹⁹ Unai tatau seven be aniani haria gaukarana do idia naria dainai, haroro gaukara do idia karaia lasi, a? Lasi! Unai tatau huanai idia ta be Stefano, ia be mai gari lasi bona goada ida ia haroro tauna. (Kara 6:8-10) Filipo danu be idia ta, bona Baibel ese ia gwauraia “evanelia tauna.” (Kara 21:8) Ia hedinarai goevagoeva, unai tatau seven be Basileia harorolaia goadagoada taudia.

20. Hari inai negai, edena dala ai Dirava ena taunimanima ese aposetolo taudia edia kara idia tohotohoa?

²⁰ Hari inai negai, Iehova ena taunimanima ese aposetolo taudia idia tohotohoa. Kongrigeisen ai maduna huaia totona idia abia hidi tatau ese Dirava ena aonegana idia gaukaralaia bona lauma helaga ena hakaua dalana idia badinaia be namo. Hakaua Oreana ena hakaua henunai, Baibel ena taravatu idia badinaia tatau idia abia hidi, kongrigeisen ai elda eiava hesiai gaukara idia karaia totona.f (1 Tim. 3:1-9, 12, 13) Baibel ena taravatu idia badinaia tatau be lauma helaga amo idia abia hidi. Unai gaukara goadagoada tatau ese gaukara momo idia karaia. Hegeregere, elda taudia ese dala idia karaia Keristani burukadia idia durua totona. (Iam. 1:27) Elda taudia haida be Kingdom Hall haginia gaukarana idia karaia, hebouhebou gaudia idia hegaegaelaia, o Hospital Liesen Komiti ida idia gaukara hebou. Hesiai taudia danu be kongrigeisen durua totona maduna haida idia huaia, bona elda taudia be mamoe naria bona hadibaia gaukarana idia gunalaia. Ena be kongrigeisen lalonai mai edia maduna, to Dirava ese ia henia gaukara badana, Basileia sivarai namona harorolaia gaukarana unai, idia laloa bada danu be namo.​—1 Kor. 9:16.

“Dirava Ena Hereva be Gabu Ibounai Dekenai Ia Lao” (Kara 6:7)

21, 22. Dahaka ese ia hahedinaraia, Iehova be kongrigeisen matamata ia hanamoa?

²¹ Iehova ena heduru dainai, unai kongrigeisen matamatana ese dagedage karana ia hanaia bona kongrigeisen lalonai ia vara hekwakwanai ia hamaoromaoroa. Momokani, Iehova ese idia ia hanamoa, badina Baibel ia gwau: “Dirava ena hereva be gabu ibounai dekenai ia lao, bona Ierusalema ai hahediba taudia edia namba ia bada daekau haraga, bona hahelaga taudia momo be abidadama taudia ai idia lao.” (Kara 6:7) Kara bukana lalonai, unai be gaukara ia tubu daekau ena ripoti ta. (Kara 9:31; 12:24; 16:5; 19:20; 28:31) Hari, tanobada ena kahana haida lalonai, Basileia harorolaia gaukarana ia bada daekau ena ripoti ita kamonai neganai, unai ese ita ia hagoadaia, ani?

²² Keristani ginigunadia edia negai, idia badu dikadika tomadiho gunalaia taudia ese edia dagedage karana idia hadokoa lasi. Kahirakahira dagedage karana be do ia bada ia lao. Karoa ma ta ai do ita itaia, Stefano idia dagedage henia bada.