Duahiduahi Idia Diba Lasi Taudia Durua Dalana

1. Duahiduahi idia diba lasi taudia dekenai Baibel ita hadibaia neganai, dahaka hekwakwanai idia vara?

¹ Ruma taudia haida idia ura Dirava idia diba, to Baibel o buka ma haida idia itaia neganai, idia gari badina duahiduahi idia diba lasi. Idia dekenai Baibel Hadibaia bukana ita hariharilaia be auka. Edena dala ai idia ita durua Iehova idia tura henia totona? Tano idauidau 20 ai idia noho pablisa haida edia ekspiriens amo unai do ita dibaia. Mani haida ita itaia.

2. Edena tulu amo duahiduahi diba lasi tauna ita durua diba?

² Bema stiuden be ia duahiduahi diba lasi, Dirava Oi Kamonai Henia eiava Dirava Oi Kamonai Henia Bena Oi Mauri Hanaihanai buklet amo oi stadi henia. United States ai, painia ta ese unai buklet ruaosi ia hahedinaraia bena stiuden ia nanadaia edena ia ura bada. Kenya ena brens ofesi ia gwau, unai be tulu namodia, badina Africa taudia be idia ura sivarai amo diba idia abia to henanadai bona haere amo lasi. Sikuli bada taudia ese duahiduahi bona henanadai karana idia abia dae, to sikuli bada lasi taudia do idia hemarai. Bema stiuden be duahiduahi idia diba sisina, pablisa momo idia ura Dirava Ena Sivarai Namona! o Dirava Ena Turana ai Oi Lao Diba! buklet, eiava reana Lauegu Baibel Sivarai Bukana amo stadi idia hamatamaia.

3. Duahiduahi diba lasi taudia dekenai dahaka ita dibaia be namo, unai amo idia ita durua namonamo diba?

³ Hanamoa: Duahiduahi diba lasi taudia momo be reana idia hemarai bona idia laloa idia be anina lasi. Hereva momokani ita hadibaia dala ginigunana be, idia ita durua idia hemarai lasi totona. Idia momo be mai edia aonega. Namona be idia ita matauraia. (1 Pet. 3:15) Bema idia itaia edia hekwarahi be mai anina bada bona diba idia abia noho, unai ese do ia hagoadadia idia stadi noho. Unai dainai idia hanamoa herevadia oi gwauraia momo.

4. Duahiduahi sisina ia diba tauna be edena dala ai ita durua ena stadi ia hegaegaelaia totona?

⁴ Bema stiuden be duahiduahi sisina ia diba, oi hagoadaia ena stadi ia hegaegaelaia totona. South Africa ai, pablisa haida be edia stiuden idia noia, ‘Bema emu ruma tauna o turana ta be duahiduahi ia diba, oi noia oi ia durua.’ Britain ai, pablisa ta ese stadi lalonai ena buka be stiuden ia henidia. Bena paragraf haida idia stadilaia badina ia ura stiuden idia itaia, bema buka idia makaia, haere do idia davaria haraga. India ai, tadikaka ta be gabeai stadi totona, stiuden ia hagoadadia stadi bukana ena laulau idia itaia bona laloa dobu guna.

5. Stadi lalonai, edena dala ai haheauka karana ita hahedinaraia?

⁵ Haheauka: Herevana edena pablikeisen oi gaukaralaia, to point badadia oi laloa bada, bena stiuden oi durua unai ia lalopararalaia namonamo danu. Matamanai, miniti 10 o 15 lalonai umui stadi be namo. Reana stadi ta ta lalonai paragraf haida sibona umui herevalaia. Bema stiuden ena duahia karana be metairametaira, oi haheauka. Ia ese Iehova ia dibaia noho lalonai, ena duahia karana do ia namo ia lao. Emu stiuden oi durua totona, namona be oi boiria Keristani heboudia ia mai danu.

6. Edena dala ai stiuden ita durua duahiduahi ia diba totona?

⁶ Emu stiuden be duahiduahi ia diba neganai, Dirava ena hereva do ia laloparara haraga. (Sal. 1:1-3) Momo be stiuden idia durua totona, stadi ta ta edia dokonai Duahiduahi Bona Toretore Dalana buklet be miniti haida lalonai idia gaukaralaia. Bema stiuden ia hesiku, ia oi hagoadaia totona, namona be ia dibaia vadaeni gaudia haida oi gwauraia hedinarai. Ia oi hamaoroa Iehova ese do ia durua, bona oi hagoadaia Dirava ia guriguri henia. (Aon. 16:3; 1 Ioa. 5:14, 15) Britain ai, pablisa haida be stiuden idia durua tahua gaudia idia atoa bena hagugurua, hegeregere (1) A, B, C bamona gaudia idia dibaia guna, (2) Baibel siri idia tahua, abia hidi, bena duahia bona (3) auka lasi pablikeisen idia duahia. Hanaihanai taunimanima dekenai duahiduahi dalana ita hadibaia sibona lasi, to idia ita durua duahiduahi karana idia ura henia totona.

7. Dahaka dainai duahiduahi diba lasi taudia dekenai hereva momokani oi hadibaia noho, oi hesiku lasi?

⁷ Ena be ta be sikuli badana ia lao lasi, to Iehova ese ia laloa bada. (Iobu 34:19) Dirava be taunimanima edia kudouna ia itaia. (1 Siv. 28:9) Unai dainai, ena be ta be duahiduahi ia diba lasi, to hereva momokani oi hadibaia noho, oi hesiku lasi. Tulu namodia momo idia noho, ia oi durua totona. Gabeai, Baibel Hadibaia bukana umui stadilaia, unai amo stiuden be Baibel ai ena diba do ia habadaia.