Iehova—“Hamauria Tauna” Baibel Negadiai
“Dirava e, lau dekenai do oi mai haraga. Oi be lauegu durua Tauna, bona egu hamauria Tauna danu.”—SAL. 70:5.
1, 2. (a) Edena negai Dirava ena hesiai taudia ese heduru totona idia guriguri be namo? (b) Edena henanadai ia vara, bona edeseniai haere ita davaria diba?
TAMA sina ta be idia holide lalonai idia kamonai, edia natuna kekeni, ena mauri lagani 23, be ia boio. Tama sina idia diba edia natuna dekenai dika ta ia vara. Vadaeni, edia kohu idia haboua bena ruma dekenai idia giroa lou. Unai nega dikana lalonai, idia be Iehova idia guriguri henia idia ia durua totona. Ena be mauri lagani 20 tadikaka ta be gorere ta ia abia, bona gabeai ia paralais. Karaharaga ia be Iehova ia guriguri henia. Adavana lasi sina ta be moni gaukara ia tahua bona ena moni be hegeregere lasi ena natuna kekeni ena mauri lagani 12 ia ubua totona. Iena lalohekwarahi be Iehova dekenai ia gurigurilaia. Oibe, Dirava idia tomadiho henia taudia be hahetoho o metau badadia idia abia neganai, Iehova idia guriguri henia idia Ia durua totona. Nega ta oi be hekwakwanai ta oi abia, bona Iehova oi noia oi ia durua haraga totona, a?
2 Henanadai badana be inai: Heduru totona Iehova ita guriguri henia neganai, Ia be eda guriguri do ia haerelaia, a? Davida be Salamo karoa 70 amo unai henanadai ia haerelaia—unai ese eda abidadama do ia hagoadaia. Ia be Iehova ia badinaia goadagoada, to ena mauri lalonai hekwakwanai momo ia davaria. Ia ese Iehova be inai bamona ia herevalaia: “Dirava e, . . . Oi be lauegu durua Tauna, bona egu hamauria Tauna danu.” (Sal. 70:5) Salamo karoa 70 ita itaia neganai, unai ese ita do ia durua hekwakwanai negadiai eda “Hamauria Tauna” Iehova ita tahua bona ita abidadama henia ena badina ita lalopararalaia totona.
“Oi be . . . Egu Hamauria Tauna”
3. (a) Salamo karoa 70 lalonai Davida be dahaka heduru ia noia? (b) Salamo karoa 70 ese ia hahedinaraia, Davida be dahaka ia abia dae?
3 Salamo karoa 70 ena siri 1 bona siri 5 lalonai, Davida be Dirava ia noia ia do ia durua haraga totona. (Salamo 70:1-5 duahia.) Ena guriguri lalonai, inai hereva “mai haraga” bona “durua haraga” ia gaukaralaia. Salamo karoa 70 Siri 2 ia lao Salamo karoa 70 siri 4 dekenai, Davida be Dirava ia noia gau faiv ia karaia totona. Hereva toi be ia idia alaia gwauraia taudia totona. Hegeregere, Davida ia noinoi Iehova ese ena inai taudia do ia halusia bona edia kara dainai do Ia hahemaraidia. Salamo karoa 70 Siri 4 ai, Davida be Dirava ena taunimanima totona ia noinoi. Hegeregere, Davida ia guriguri Iehova idia tahua taudia be do idia moale bona Iehova do idia hanamoa. To Salamo karoa 70 siri 5 lalonai, Davida be Iehova dekenai ia gwau: “Oi be lauegu durua Tauna, bona egu hamauria Tauna danu.” Davida be unai hereva, “Oi be” ia gaukaralaia neganai, ia hahedinaraia ia be Iehova ia abidadama henia momokani. Davida ia abia dae Iehova be heduru do ia henia.
4, 5. Salamo karoa 70 ese Davida ena kara be edena bamona ia herevalaia, bona dahaka ita diba momokani?
4 Salamo karoa 70 ese Davida ena kara be edena bamona ia herevalaia? Ena be badu taudia idia ura Davida idia alaia mase, to ia be sibona ena aonega dekenai unai hekwakwanai ia hamaoromaoroa lasi. To, ia diba momokani Iehova be Iena nega bona ura dalanai dagedage taudia edia davana do ia henia. (1 Sam. 26:10) Nega ibounai Davida ia diba momokani, Iehova be Ia idia tahua taudia do ia durua bona hamauria. (Heb. 11:6) Davida ia diba momokani Iehova idia tomadiho henia taudia idia moale bona ma haida dekenai Iehova ena kara hereadaedia idia harorolaia be maoro.—Sal. 5:11; 35:27.
5 Davida bamona, namona be ita abia dae momokani Iehova be eda Durua Tauna bona “Hamauria Tauna.” Unai dainai, bema hahetoho aukadia ita davaria o ita mamia heduru ita abia be namo, Iehova ita noia ita ia durua haraga totona. (Sal. 71:12) To, Iehova be edena dala ai unai guriguri do ia haerelaia? Unai ita do kikilaia lasi lalonai, namona be Iehova ese hekwakwanai lalonai Davida ia hamauria daladia toi ita herevalaia guna.
Iehova ese Dagedage Taudia amo Davida Ia Hamauria
6. Dahaka dainai Davida ia diba Iehova be kara namo taudia ia hamauria Diravana?
6 Davida be toretore helagadia amo ia diba, kara maoromaoro taudia be Iehova amo heduru idia abia diba. Hegeregere, Iehova be Abata Badana amo taunimanima dikadia ia hamasea neganai, Noa bona ena ruma bese be ia hamauria. (Gen. 7:23) Iehova ese lahi bona salipa amo Sodoma bona Gomora ai idia noho taunimanima dikadia ia hamasea neganai, ia ese kara maoromaoro tauna Lota bona ena natuna kekeni rua ia durua idia roho mauri totona. (Gen. 19:12-26) Iehova ese hekokoroku tauna Farao bona ena tuari orea goadana be Davara Kakakakana ai ia hamasea, to Israela taudia ia gimaia ela bona idia roho mauri. (Eso. 14:19-28) Unai sivarai dainai Davida be salamo bukana lalonai ia gwau, “iseda Dirava be taunimanima ia hamauria Diravana.”—Sal. 68:20.
7-9. (a) Dahaka dainai Davida ia diba momokani Iehova ese ia hamauria diba? (b) Davida be daika ia hanamoa?
7 Danu, Davida be badina ma ta dainai, ia diba momokani Iehova ese ia hamauria diba. Davida be sibona ena matana amo ia itaia Iehova be ‘nega ibounai ita ia gimaia noho. Iena noho hanaihanai imadia ese ita idia hagoadaia noho.’ (Deu. 33:27) Nega momo, Iehova be “dagedage taudia” edia imana amo Davida ia hamauria. (Sal. 18:17-19, 48) Mani inai sivarai ita laloa.
8 Davida be tuari dalana ia diba momo dainai, nega ta Israela hahine be ia idia hanamoa. To King Saulo be unai ia kamonai neganai, ia mama bona nega rua kahirakahira io amo Davida ia gwadaia. (1 Sam. 18:6-9) Dahaka dainai unai nega rua lalonai Saulo ena io ese Davida ia gwadaia lasi? Ia be tuari daladia ia diba momo dainai, Saulo ena io ese reaia, a? Lasi. Baibel ia gwau: “Lohiabada be [Davida] danu ia noho.” (1 Samuela 18:11-14 duahia.) Gabeai, Saulo be dala ia karaia Pilistia taudia ese Davida idia alaia totona. To unai palani ia guguru lasi neganai, Saulo “ia itaia bona ia diba, Lohiabada be momokani Davida dekenai ia noho.”—1 Sam. 18:17-28.
9 Vadaeni Davida be daika ia hanamoa? Salamo karoa 18 ena sinado maragina ia gwau, Lohiabada ese Davida ia hamauria dainai, Davida be Iehova tanikiu henia anena ia abia. Davida ia gwau: “Lohiabada be egu Nadi Badana. Ia be egu magu, bona egu hamauria Tauna. Egu Dirava be egu kohoro, lau heau mauri gabuna.” (Sal. 18:2) Iehova ese ena taunimanima ia hamauria dalana ena sivarai ita diba neganai, unai ese iseda abidadama ia hagoadaia, ani?—Sal. 35:10.
Davida Ia Gorere Neganai, Dirava ese Ia Naria
10, 11. Salamo karoa 41 ese ia hahedinaraia nega ta ai Davida be ia gorere, bona unai sivarai amo dahaka ita dibaia?
10 Salamo karoa 41 ese ia hahedinaraia, nega ta ai King Davida be ia gorere bada. Unai dainai, iena inai taudia haida idia gwau, reana Davida be “iena hekure gabuna dekena amo do ia toreisi lou lasi.” (Salamo karoa 41 Siri 7, 8) Edena negai Davida be ia gorere? Salamo karoa 41 ai idia noho herevadia ese idia hahedinaraia, Abesaloma ia ura ena tamana ena king dagina ia abia neganai, Davida be lalometau bada ia davaria.—2 Sam. 15:6, 13, 14.
11 Hegeregere, Davida ia gwau ena turana namona o ia ida ia aniani hebou tauna ta be ia ura ia do ia “hadikaia.” (Salamo karoa 41 Siri 9) Unai sivarai dainai, ita be Davida ena mauri lalonai ia vara gauna ta ita laloa diba. Davida ena turana namona, Ahitopela be Abesaloma ida King Davida idia gwau-edeede henia. (2 Sam. 15:31; 16:15) Mani oi laloa: Davida be ia gorere bada bona bedi dekenai ia hekure sibona, bona ia diba ia badinai idia noho taudia haida idia ura king ia mase, unai amo edia palani dikadia do idia hagugurua diba.—Salamo karoa 41 Siri 5.
12, 13. (a) Davida ese Iehova ia abidadama henia karana be edena bamona ia herevalaia? (b) Dirava ese Davida be edena bamona ia hagoadaia?
12 Nega ibounai Davida be ena “Hamauria Tauna” ia abidadama henia. Iehova ia tomadiho henia tauna ta ia gorere neganai, Davida ia gwau: “Lohiabada ese ia do ia durua, bema hisihisi ia davaria neganai. Bona unai tau, ogogami taudia ia laloa tauna, ia gorere neganai, be Lohiabada ese do ia durua. Lohiabada ese unai tau ena gorere, be do ia hanamoa lou momokani.” (Sal. 41:1, 3) Unai siri lalonai ita itaia Davida be Iehova ia abidadama henia, badina ia gwau “Lohiabada ese do ia durua.” Davida ia diba momokani Iehova be ia do ia hamauria. Edena dala ai?
13 Davida ia gwau Iehova be hoa karana ta do ia karaia bona ena gorere do ia kokia, a? Lasi, to Davida ia diba momokani Iehova ese ia do ia “durua”—anina be Davida ia gorere bona bedi ai ia hekure neganai, Iehova be durua bona goada ia henia. Momokani, Davida ia ura unai bamona heduru ia abia. Gorere ese Davida ena goada ia haorea sibona lasi, to Davida ena inai taudia be king hadikaia herevadia momo idia gwauraia danu. (Salamo karoa 41 Siri 5, 6) Reana Iehova ese Davida ia durua hereva namodia ia laloa lou totona, unai ese Davida ena lalona ia hagoadaia. Davida ia gwau: “Oi ese lau do oi durua, badina be lau ese kara maoromaoro lau karaia noho.” (Salamo karoa 41 Siri 12) Danu, herevana dahaka hahetoho ia vara, to Davida ia goada ena badina be, Iehova ia gwau Davida be kara maoromaoro tauna. Gabeai, Davida be gorere amo ia namo lou. Iehova be gorere taudia ia naria ena sivarai ita diba neganai, unai ese iseda abidadama ia hagoadaia, ani?—2 Kor. 1:3.
Iehova ese Tauanina Durua Gaudia Ia Henia
14, 15. Edena negai Davida bona ena turadia ese heduru idia abia be namo, bona idia ese dahaka heduru idia abia?
14 Davida be Israela taudia edia king ai ia lao neganai, ia bona ena vadivadi taudia momo be aniani bona uaina namodia momo idia moalelaia. (2 Sam. 9:10) To danu, Davida be hitolo maurina ia mamia. Hegeregere, Abesaloma ia gwau-edeede bona ena tamana ena king dagina ia abia gwauraia neganai, Davida bona ena turadia be Ierusalema idia rakatania, Gilead tanona dekenai idia heau lao. Gilead be Ioridane Sinavai ena ist kahanai ia noho. (2 Sam. 17:22, 24) Idia be unai bamona gabudia ai idia loaloa dainai, idia ura idia aniani, ranu idia inua, bona idia laga-ani. To, heduru be edeseniai idia abia diba?
15 Daudau lasi murinai, Davida bona ena turadia be Mahanaimi ai idia ginidae. Unuseniai tatau goadadia toi ia davaria—Sobi, Makiri, bona Barasilai. Unai tatau idia ura dikadika Iehova ese ia abia hidi king idia durua, ena be edia mauri idia haboioa diba. Momokani, bema Abesaloma be king dagina ia abia, reana ia ese Davida idia durua taudia ibounai do ia panisia. Unai tatau toi be Davida bona ena turadia dekenai mahuta gaudia, uiti, bali, idia gabua gaudia, bini idauidau, hani, bata, mamoe bona gau ma haida idia mailaia. (2 Samuela 17:27-29 duahia.) Reana unai tatau toi edia kara namodia be Davida ese ia moalelaia. Bona reana Davida be edia kara ia laloaboio lasi, ani?
16. Davida bona ena turadia idia dabu neganai, daika be heduru ia henia?
16 To daika be Davida bona ena turadia ia naridia? Davida ia diba momokani Iehova be ena taunimanima ia naria. Momokani, Iehova ese ena hesiai taudia ia gaukaralaia diba edia tadikaka, idia dabu taudia unai, idia durua totona. Davida be Gilead tanona dekenai unai tatau toi edia kara namona ia laloa lou neganai, ia diba Iehova be ia bona ena turadia ia naria. Davida ena mase negana ia kahirakahira neganai, ia gwau: “Gunaguna lau be mero, harihari lau be buruka, to nega ta kara maoromaoro tauna ta be Dirava ese ia rakatania, a? Lasi momokani, nega ta lau itaia lasi. Bona tau namona ena natuna be nega ta idia hitolo, a? O iena natuna ese aniani totona taunimanima idia noia, a? Lasi, nega ta lau itaia lasi. Lasi momokani.” (Sal. 37:25) Ita moale badina ita diba Iehova be gau namodia momo ia henia diba Diravana, ani?—Aon. 10:3.
“Iehova ese Ena Taunimanima Ia Hamauria Diba”
17. Nega momo Iehova be dahaka ia karaia?
17 Baibel negadiai Iehova be taunimanima momo herea, Davida danu, ia hamauria. Davida ena nega murinai, Dirava be nega momo Petero ena hereva ia hagugurua, ia gwau: “Bema hisihisi bona metau Dirava badinaia taudia dekenai idia noho neganai, Lohiabada ese inai hisihisi dekena amo idia ia hamauria diba.” (2 Pet. 2:9) Sivarai rua mani ita laloa.
18. Hesekaia ena negai, Iehova be edena dala ai ena taunimanima ia hamauria?
18 Lagani 700 B.C.E. ai, Asuria ena tuari taudia goadadia be Iuda ai idia vareai bona idia gwau Ierusalema do idia hadikaia neganai, King Hesekaia ia guriguri: “Lohiabada, aiemai Dirava e, oi dekenai lau noinoi, . . . ai do oi hamauria. Vadaeni tanobada basileia ibounai be do idia diba, oi Lohiabada e, oi sibona be Dirava momokani.” (Isa. 37:20) Hesekaia ia ura Dirava ena ladana ia abia isi. Bona Iehova be Hesekaia ena guriguri ia haerelaia. Badina hanuaboi tamona lalonai, aneru tamona be Asuria taudia 185,000 ia alaia mase bona Iehova ena kamonai hesiai taudia ia hamauria.—Isa. 37:32, 36.
19. Aposetolo edia negai, Keristani taudia be edena sisiba idia badinaia dainai idia roho mauri?
19 Iesu be kahirakahira do ia mase dainai, peroveta herevana ta ia gwauraia, Iudea ai ena hahediba taudia idia mauri totona. (Luka 21:20-22 duahia.) Lagani haida idia hanaia bena lagani 66 C.E. ai, Iuda taudia be gavamani idia gwau-edeede henia dainai, Roma lohia tauna (Cestius Gallus) mai ena Roma tuari oreana be Ierusalema dekenai idia lao. Unai tuari taudia be dubu vairanai o not kahanai ia noho maguna ena kahana idia geia, to daudau lasi murinai, idia ese Ierusalema idia rakatania. Kamonai Keristani taudia be Iesu ena peroveta herevana—heau mauri herevana—idia laloa bada dainai, ororo dekenai idia heau lao haraga. Lagani 70 C.E. ai, Roma ena tuari taudia idia giroa neganai, Ierusalema ibounai idia hadikaia. Iesu ena hereva idia badinaia Keristani taudia sibona be unai dika amo idia roho mauri.—Luka 19:41-44.
20. Dahaka dainai ita diba momokani Iehova be eda “Hamauria Tauna”?
20 Iehova ese ena taunimanima ia hamauria sivaraidia ita laloa dobu neganai, unai ese eda abidadama do ia hagoadaia, ani? Momokani, idaunegai idia vara gaudia ese ita idia durua, Iehova ita abidadama henia totona. Herevana hari o vaira negana ai dahaka hekwakwanai do ia vara, to ita diba momokani Iehova be eda “Hamauria Tauna.” To, Iehova be edena dala ai ita do ia hamauria? Bona paragraf 1 ai ita herevalaia taudia be Iehova ese edena bamona ia durudia? Unai henanadai be stadi gabena ese do ia haerelaia.
Oi Laloatao, A?
• Salamo karoa 70 ese edena bamona ita ia hagoadaia?
• Davida ia gorere neganai, edena dala ai Iehova ese ia naria?
• Edena haheitalai ese ia hahedinaraia Iehova be dagedage taudia amo ena taunimanima ia hamauria diba?
[Picture on page 6]
Iehova be Hesekaia ena guriguri ia haerelaia