Boiboi Badana Ta

1. Hebouhebou ia kahirakahira neganai dahaka do ita karaia?

¹ Bema palani oi karaia emu turadia o famili totona aria ta do oi karaia, emu nega bona moni do oi gaukaralaia bona mai moale ida idia do oi boiria, ani? Unai hegeregerena, Iehova ena orea be hebouhebou ena program totona gau momo ia hegaegaelaia. Iehova ia ura ma haida ita boiria hebouhebou idia mai totona. Unai dainai, hebouhebou ia kahirakahira neganai, ita be wiki toi lalonai unai do ita karaia. Dahaka ese ita do ia durua mai moale ida taunimanima ita boiria totona?

2. Taunimanima boiria gaukara ita durua totona dahaka ita laloa be namo?

² Iehova ese unai hebouhebou ena program amo ita ia durua dalana ita laloa neganai, unai ese ita do ia hagoadaia taunimanima boiria gaukarana ita habadaia totona. (Isa. 65:13, 14) Laloatao, lagani ta ta ai, unai gaukara ese anina namona ia havaraia danu. (“Anina Ia Havaraia” maua itaia.) Ita boiria taudia haida be do idia mai to ma haida be do idia mai lasi. Herevana hida idia mai, to iseda gaukara amo Iehova do ita hanamoa bona Iena hariharibada karana do ita hahedinaraia.—⁠Sal. 145:3, 7; Apok. 22:17.

3. Boiboi pepadia be edena bamona do ita hariharilaia?

³ Namona be elda oreana ese kongrigeisen idia hadibaia edena dala ai boiboi pepadia do idia hariharilaia, taunimanima idia noho lasi rumadia ai do idia rakatania eiava pablik haroro gabudiai do idia hariharilaia. Wikeni ai boiboi pepadia oi hariharilaia neganai, bema mai dalana magasin oi hariharilaia danu. Boiboi pepadia hariharilaia gaukarana ia ore neganai, do ita moale badina ita diba mai ura bada ida momo ita boiria Iehova ese ia hegaegaelaia hebouhebou idia mai totona!

Anina Ia Havaraia

Lagani haida gunanai, taihu ta be boiboi pepana ia hariharilaia noho lalonai, ia laloa unai gaukara ese anina namona do ia havaraia eiava lasi. Ia gwau: ‘Taunimanima ese inai boiboi pepana idia abia neganai hebouhebou do idia mai, eiava?’ Saturday daba ena program lalonai, taihu ese Sikh tomadiho tauna ta ia itaia, ia be ena badinai ia helai dainai taihu ia lao bona ia hedavari henia. Gabeai taihu ia diba unai tauna be boiboi pepana ta ia abia dainai hebouhebou dekenai ia mai. Taihu ese unai tau ena henanadai momo ia haerelaia. Unai tau ia gwau program ia moalelaia bada bona hebou idia mai taudia edia toana bona kara ia moalelaia danu. Unai dina tamona lalonai, taihu be ena badinai idia helai headava taudia rua ia hedavari henidia. Idia danu be boiboi pepana ta idia abia bona basi amo hebouhebou idia lao. Hebou idia moalelaia dainai palani idia karaia Sunday ena program do idia lao danu. Taihu ia laloparara pepapepa hariharilaia karana be mai anina bada.
Vanegai hebouhebou ta dekenai, regula painia gaukara idia karaia headava taudia rua be tau buruka ta bona ena adavana idia hedavari henia. Unai burukadia rua idia gwau, inai be edia nega ginigunana hebouhebou ta dekenai idia noho. Unai painia taudia ese idia nanadaidia: “Ta ese umui ia boiria dainai umui mai, a?” Idia gwau: “Ruma dekenai ai giroa lou neganai, emai iduara henunai boiboi pepana ta ai itaia.” Boiboi pepana idia duahia bona ena murina kahanai ia noho adres idia hahonua. Hebou idia lao tadikaka bona taihu be unai burukadia ida dina tubu ena aniani idia ania hebou. Hebou idia moalelaia dainai, murina dinana ena program idia lao danu. Tadikaka ese dala idia karaia idia lou henia totona.