Iehova Ena Siahu Bada Ita Tahua Diba Lasi
“Lohiabada ena ladana be bada herea, bona ita ese iena ladana do ita abia isi. Iena kara badadia [“siahu bada,” NW] do ita tahua diba lasi, iseda laloa be maragi dainai.”—SALAMO 145:3.
1, 2. Davida be edena bamona tauna, bona edena dala ai ia sibona be Dirava henunai ia atoa?
SALAMO 145 ia torea tauna, be idaunegai taunimanima momo ese idia diba tauna ta. Ia maragi neganai, tuari tau badana ia tuari henia bona ia hamasea. Bona tuari pavapavana ta bamona, unai ane ia torea tauna ese ena inai taudia momo ia halusidia. Iena ladana be Davida, bona ia be idaunegai Israela ena king iharuana. Davida ia mase murinai momo ese ena sivarai idia laloatao, unai dainai hari taunimanima momo be ia idia diba danu.
2 Ena be Davida ese gau momo ia hagugurua, to mai ena manau ida sibona ia laloa. Iehova ia anelaia neganai, ia gwau: “Oiemu guba lau itaia, oi ese oiemu imana dekenai oi karaia. Hua bona hisiu danu be oi ese oi atoa. Taunimanima be dahaka, oi ese idia oi laloa noho? Taunimanima be maragi herea, dahaka dainai oi ese oi naridia noho?” (Salamo 8:3, 4) Davida ia laloa lasi ia sibona be bada, to ia gwau Iehova ese ia be ena inai taudia ibounai amo ia hamauria bona Dirava ia herevalaia neganai, ia gwau: “Lohiabada e, oi ese lau oi gimaia, bona lau oi hamauria, bona oi ese lau oi durua dainai, lau be tau badana lau lao.” (2 Samuela 22:1, 2, 36) Iehova ese kara dika taudia dekenai hebogahisi ia hahedinaraia karana amo manau ia hahedinaraia, bona Davida ese Dirava ena hariharibada ia laloa bada.
‘Lauegu Dirava Bona King, Do Lau Hanamoa’
3. (a) Davida ese Israela ia lohiaia karana be edena bamona ia laloa? (b) Davida ia ura Iehova do ia hanamoa ela bona edena nega?
3 Ena be Davida be Dirava ese ia abia hidi king, to ia itaia Iehova be Israela ena King korikorina. Davida ia gwau: “Oi be King momokani, basileia ibounai be oi ese oi biagua noho.” (1 Sivarai 29:11) Bona Davida ia abia dae Dirava be iena Lohia Tauna! Ia gwau: “Lauegu Dirava bona lauegu King, oi do lau hanamoa noho, bona oiemu ladana badana do lau abia isi noho, ela bona hanaihanai. Dina ibounai lau ese oi do lau tanikiu henia, ma oi do lau hanamoa ela bona hanaihanai.” (Salamo 145:1, 2) Davida ena ura be dina ibounai bona nega hanaihanai Iehova Dirava do ia hanamoa.
4. Salamo 145 ese edena koikoi herevadia ia haerelaia?
4 Salamo 145 ese Satani ena hereva, ia gwau Dirava be sibona ena namo ia laloa lohia tauna bona ia havaraia taudia dekenai ura kwalimu ia henia lasi herevana unai, ia haerelaia. (Genese 3:1-5) Unai ane ese Satani ena koikoi herevana, ia gwau taunimanima ese Dirava idia kamonai henia, ia idia lalokau henia dainai lasi, to edia ura gaudia idia abia totona ia haerelaia danu. (Iobu 1:9-11; 2:4, 5) Davida bamona, hari Keristani taudia momokanidia be Diabolo ena samani hereva koikoidia idia haerelaia noho. Idia ese Basileia ena lohia siahuna henunai do idia abia mauri hanaihanai helarona idia laloa bada, badina idia ura nega hanaihanai Iehova do idia hanamoa. Taunimanima milioni momo be unai bamona idia karaia matamaia vadaeni, Iesu ena mauri davalaia boubouna idia abidadama henia bona Iehova idia lalokau henia dainai, mai kamonai ida iena gwauhamata bona bapatiso taudia bamona ia idia hesiai henia.—Roma 5:8; 1 Ioane 5:3.
5, 6. Edena dala idauidau ai Iehova ita hanamoa diba?
5 Mani oi laloa, ita be Iehova ena hesiai taudia dainai, dala idauidau momo ai ia ita hanamoa diba. Iena Hereva, Baibel ai, ita duahia gauna ta ese iseda lalona ia hamarerea momokani neganai, guriguri amo ia ita hanamoa. Dirava ese ena taunimanima ia kara henia dalana eiava ena havaraia gauna ta ese iseda lalona ia hamoalea neganai, mai tanikiu danu ia ita hanamoa diba. Keristani heboudia dekenai Iehova ena ura be abidadama tamona taudia ida ita herevalaia, eiava ma ta ida ita herevahereva neganai, Iehova Dirava ita hanamoa unai. Momokani, Dirava ena Basileia durua totona ita karaia “kara namodia” ibounai ese Iehova ia hanamoa.—Mataio 5:16.
6 Hari inai negai, unai bamona kara namodia edia haheitalai haida be, ogogami tanodia dekenai Iehova ena taunimanima ese tomadiho gabudia momo idia haginia. Unai gaukara badana be tano ma haida dekenai idia noho tadikaka edia heduru monina amo idia karaia. Volantia Keristani taudia haida be unai bamona gabudia dekenai idia lao bona edia heduru amo Kingdom Hall idia haginia. Bona kara namodia ibounai amo mai anina bada gauna be, Iehova ena Basileia ena sivarai namona harorolaia gaukarana amo iena ladana ita hanamoa. (Mataio 24:14) Salamo 145 ena murina siridia ese idia hahedinaraia bamona, Davida ese Dirava ena lohia siahuna ia laloa bada bona Iena king dagina ia abia isi. (Salamo 145:11, 12) Dirava ena lohia dalana mai lalokauna be Davida ese ia laloa bada hegeregerena oi laloa danu, a? Bona hanaihanai ma haida dekenai ena Basileia oi herevalaia, a?
Dirava Ena Siahu Bada Idia Hahedinaraia Gaudia
7. Iehova ita hanamoa ena badina badana oi gwauraia.
7 Salamo 145:3 ese Iehova ita hanamoa ena badina badana ia gwauraia. Davida ia ane, ia gwau: “Lohiabada ena ladana be bada herea, bona ita ese iena ladana do ita abia isi. Iena kara badadia [“siahu bada,” NW ] do ita tahua diba lasi, iseda laloa be maragi dainai.” Iehova ena siahu bada be hetoana lasi. Taunimanima ese idia tahua, lalo-pararalaia, eiava hahetohoa diba lasi. To hari, Iehova ena siahu bada, ita tahua diba lasi gauna unai, ena haheitalai haida ita laloa karana amo, namo ita abia diba.
8. Unives ese edena dala ai Iehova ena siahu bada ia hahedinaraia?
8 Siti ena lamepa diari ia noho lasi gabuna ta dekenai oi lao negana ta mani oi laloa, unai negai ori be lasi hanuaboina ai emu matana be guba dekenai oi negea daekau. Guba koremana dekenai hisiu momo herea oi itaia neganai oi hoa, ani? Unai ese oiemu lalona ia veria Iehova oi hanamoa totona, badina ena siahu bada amo unai guba gaudia ibounai ia havaraia, ani? To, oi itaia hisiu be iseda hisiu oreana lalonai idia noho hisiu haida sibona, iseda tanobada be unai hisiu oreana lalonai ia noho danu. Ma danu, idia gwau hisiu orea be bilioni momo mai kahana, teleskoup oi gaukaralaia lasi neganai, hisiu orea toi sibona oi itaia diba. Oibe, ita duahia diba lasi hisiu bona hisiu oreadia be unives bada herea lalonai idia noho bona unai ese Iehova ena havaraia siahuna ia hahedinaraia.—Isaia 40:26.
9, 10. (a) Iehova ena siahu bada be Iesu Keriso dekenai edena bamona ia hedinarai? (b) Iesu ena toreisi lou ese edena bamona iseda abidadama ia hagoadaia?
9 Iehova ena siahu bada ena kahana ma haida mani oi laloa—hegeregere, Iesu Keriso dekenai. Dirava ese ena Natuna ia havaraia bona nega daudau herea lalonai Iena “gaukara karaia tauna” bamona ia gaukaralaia neganai, iena siahu bada ia hahedinaraia. (Aonega Herevadia 8:22-31) Taunimanima totona Iehova ese ena Natuna tamona be mauri davalaia boubouna bamona ia henia neganai, ena lalokau badana ia hahedinaraia. (Mataio 20:28; Ioane 3:16; 1 Ioane 2:1, 2) Bona Iehova ese Iesu ia hatorea isi lou bona mase diba lasi laumana ai ia halaoa dalana, be taunimanima ese idia lalo-pararalaia diba lasi.—1 Petero 3:18.
10 Iesu ia toreisi lou neganai, gau momo idia vara, unai ese Iehova ena siahu bada, ita tahua diba lasi gauna unai, ia hahedinaraia. Oibe, Iehova ese Iesu ena laloatao karana ia henia lou, unai amo ita itaia diba gaudia bona ita itaia diba lasi gaudia havaraia gaukarana ia laloatao lou. (Kolose 1:15, 16) Idia be inai, lauma taudia, unives, tanobada bona tanobada dekenai idia noho mauri gaudia ibounai. Iehova ese ena Natuna ena diba ia henia lou, unai amo tanobada dekenai ia do mai lasi neganai, guba bona tanobada ai ia itaia gaudia ibounai ia laloatao lou, to unai sibona lasi, Iesu be tanobada ai goevadae tauna bamona ia noho neganai ia dekenai idia vara gaudia danu ia laloatao diba. Oibe, Iehova ena siahu bada, ita tahua diba lasi gauna unai, be Iesu ena toreisi lou dekenai ia hedinarai. Danu, unai kara badana ese ia hahedinaraia ma haida do idia toreisi lou. Unai ese iseda abidadama ia hagoadaia be namo, badina Dirava be ena laloatao karana goevadaena amo, idia mase vadaeni taudia milioni momo ia hatoredia isi lou diba.—Ioane 5:28, 29; Kara 17:31.
Hoa Karadia Bona Kara Badadia
11. Pentekoste 33 C.E. ai, Iehova ese dahaka gaukara badana ia hamatamaia?
11 Iesu ia toreisi lou murinai, Iehova ese hoa karadia momo ia karaia. (Salamo 40:5) Pentekoste 33 C.E. ai, Iehova ese bese matamatana, “Dirava ena Israela” unai, ia haboua matamaia, unai bese lalonai lauma helaga ese ia horoa Keriso ena hahediba taudia idia noho. (Galatia 6:16) Dala badana ai, unai lauma bese matamatana be unai nega lalonai idia noho gabudia dekenai ia bada ia lao. Ena be Iesu ena hahediba taudia idia mase murinai, hereva momokani negea karana amo Kerisendom ia vara, to Iehova ese ena ura ia hagugurua totona hoa karadia momo ia karaia noho.
12. Baibel be tanobada dekenai idia noho gado badadia ibounai dekenai idia hahanaia karana ese dahaka ia hamomokania?
12 Hegeregere, Baibel buka ibounai idia naria namonamo bona hari tanobada dekenai idia noho gado badadia ibounai dekenai idia hahanaia. Baibel hahanaia gaukarana be nega momo hekwarahi negadia bona Satani ena gaukara taudia ese idia hamasea diba negadia ai idia karaia. Momokani, Baibel be gado 2,000 mai kahana dekenai idia hahanaia diba lasi, bema unai be siahu bada Diravana, Iehova ena ura lasi!
13. Lagani 1914 amo, Iehova ena Basileia amo ia ura karaia gaudia ese ena siahu bada be edena bamona idia hahedinaraia?
13 Iehova ena siahu bada be ena Basileia amo ia ura karaia gaudia ese idia hahedinaraia. Hegeregere, lagani 1914 ai, ia ese ena Natuna, Iesu Keriso, be guba Pavapavana ai ia halaoa. Daudau lasi murinai, Iesu be Satani bona ena demoni dekenai kara ta ia karaia. Idia be guba amo ia negedia diho tanobada dekenai bona hari guri dobu masemasena lalonai do ia koudia negana idia naria noho. (Apokalupo 12:9-12; 20:1-3) Unai nega amo, Iesu murinai idia raka horoa taudia ese dagedage bada idia davaria. To, hari Keriso ia giroa mai bona ia noho negana lalonai Iehova ese idia ia durua.—Mataio 24:3; Apokalupo 12:17.
14. Lagani 1919 ai, Iehova ese edena hoa karana ia karaia, bona unai ese dahaka ia havaraia?
14 Lagani 1919 ai, Iehova ese ia karaia hoa karana ma ta ese ena siahu bada ia hahedinaraia. Iesu ena murinai idia raka horoa taudia, unai negai lauma dalanai idia goada lasi, be ia hagoadadia lou. (Apokalupo 11:3-11) Unai lagani amo ema bona hari, horoa taudia ese ia gini vadaeni guba Basileiana ena sivarai namona idia harorolaia goadagoada. Inai namba 144,000 abia totona, horoa taudia ma haida ia gogodia. (Apokalupo 14:1-3) Bona Iehova ese Keriso ena murinai idia raka horoa taudia amo, “tanobada matamatana” ena badina, kara maoromaoro taudia unai, ia havaraia. (Apokalupo 21:1) To abidadama horoa taudia ibounai be guba dekenai do idia lao murinai, “tanobada matamatana” dekenai dahaka do ia vara?
15. Horoa Keristani taudia ese dahaka gaukara idia gunalaia, bona unai ese dahaka ia havaraia?
15 Lagani 1935 ai, August 1 bona August 15 Watchtower ai mai anina bada herevadia idia halasia, Apokalupo karoa 7 ese ia gwauraia “hutuma bada herea” idia herevalaia. Horoa Keristani taudia idia gaukara goadagoada idia ida do idia tomadiho hebou taudia be bese idauidau, iduhu idauidau, taunimanima idauidau bona gado idauidau amo idia tahua matamaia. Unai “hutuma bada herea” taudia be ia mai noho “hisihisi badana” amo do idia roho mauri, edia helaro be “tanobada matamatana” Paradaiso dekenai mauri hanaihanai do idia abia. (Apokalupo 7:9-14, NW ) Horoa Keristani taudia ese Basileia harorolaia bona hahediba taudia halaoa gaukaradia idia gunalaia dainai, taunimanima milioni 6 mai kahana be tanobada paradaisona lalonai mauri hanaihanai do idia abia. Ena be Satani bona ena kara gageva tanobadana amo dagedage idia davaria, to orea ia bada ia lao dainai daika ese hanamoa ibounai ia abia be namo? (1 Ioane 5:19) Iehova sibona ena lauma helaga amo unai ibounai ia hagugurua diba.—Isaia 60:22; Sekaraia 4:6.
Iehova Ena Hairai Bona Ena King Siahuna
16. Dahaka dainai taunimanima ese ‘Iehova ena hairai bona ena King siahuna’ idia itaia diba lasi?
16 Herevana Iehova ese dahaka “hoa karadia” bona “kara badadia” ia karaia, idia ita laloaboio diba lasi. Davida ia gwau: “Lohiabada e, oiemu kara badadia be inai nega taudia, bona gabeai negadia taudia danu ese do idia hanamoa. Idia ese oiemu kara badadia ibounai do idia gwauraia noho. Idia ese oiemu hairaina bona oiemu King siahuna, do idia herevalaia, bona lau ese oiemu hoa karadia do lau laloa noho. Taunimanima ese oiemu kara badadia do idia herevalaia, bona lau ese oiemu ladana ena bada do lau gwauraia.” (Salamo 145:4-6) To, “Dirava be Lauma,” bona taunimanima ese idia itaia diba lasi dainai, Davida ena diba ena bada Iehova ena hairai dekenai be edena bamona?—Ioane 1:18; 4:24.
17, 18. Edena dala ai Davida ese ena hemataurai karana ‘Iehova ena hairai bona ena king siahuna’ dekenai ia habadaia?
17 Ena be Davida ese Dirava ia itaia diba lasi, to dala idia noho ena hemataurai karana Iehova ena king siahuna dekenai ia habadaia totona. Hegeregere, Dirava ese ia karaia kara badadia, tanobada ibounai abatana amo tanobada dikana ia hadikaia sivaraina, be Baibel lalonai ia duahia diba. Davida ia diba danu Dirava ese Israela taudia be Aigupito ena igui amo ia ruhadia neganai, Aigupito ena dirava koikoidia ia hahemaraidia. Unai bamona karadia ese Iehova ena king siahuna bona ena siahu bada ia hamomokania.
18 Davida ese Baibel ia duahia sibona lasi, to ia duahia gaudia ia laloa dobu, unai ese ena hemataurai karana Dirava ena king siahuna dekenai ia habadaia. Hegeregere, Iehova ese Israela taudia dekenai Taravatu ia henia neganai, idia vara gauna ia lalohadailaia. Unai nega ai, guba ia boiboi, kevaru idia hedinarai, ori bada ese guba ia koua, bona kibi ena regena bada idia kamonai. Sinai Ororona ia mareremarere bada bona kwalahu ese ia koua. Israela taudia be ororo henunai idia haboua, bona lahi bona ori huana amo Iehova be aneru ta amo idia dekenai “Taravatu 10” ia gwauraia neganai, unai idia kamonai danu. (Deuteronomi 4:32-36; 5:22-24; 10:4; Esodo 19:16-20; Kara 7:38, 53) Unai ese Iehova ena siahu bada ia hahedinaraia! Dirava ena Hereva idia ura henia taudia ese unai sivarai idia lalohadailaia neganai, ‘Iehova ena hairai bona ena king siahuna’ ese edia lalona ia hamarerea momokani. Oibe, hari Baibel ibounai ia noho, ia lalonai matahanai momo idia noho, idia amo Iehova ena siahu bada ita itaia diba.—Esekiela 1:26-28; Daniela 7:9, 10; Apokalupo, karoa 4.
19. Dahaka ese iseda hemataurai karana Iehova ena king siahu dekenai ia habadaia?
19 Davida ese Dirava ena king siahuna ia laloa bada dalana ta be, Dirava ese Israela taudia dekenai ia henia taravatu ia stadilaia. (Deuteronomi 17:18-20; Salamo 19:7-11) Israela besena be Iehova ena taravatu idia badinaia dainai ladana bada idia abia bona taunimanima ma haida amo idia idau. (Deuteronomi 4:6-8) Davida hegeregerena, ita danu be Baibel ita duahia hanaihanai, ita laloa dobu, bona ita stadilaia namonamo neganai, Iehova ena king siahuna dekenai iseda hemataurai karana do ita habadaia.
Dirava Ena Kara Namodia be Hereadae!
20, 21. (a) Edena kara Salamo 145:7-9 lalonai, ese Iehova ena siahu bada ia hahedinaraia? (b) Unai kara ese Dirava idia lalokau henia taudia ibounai dekenai dahaka ia mailaia?
20 Ita itaia vadaeni bamona, Salamo 145 ena siri ginigunadia 6 ese badina namodia idia henia Iehova ena siahu bada, ita tahua diba lasi gauna, dainai ia ita hanamoa totona. Siri 7 ia lao 9 ese Dirava ena kara namodia ia herevalaia karana amo, Dirava ena siahu bada ia hahedinaraia goevagoeva. Davida ia gwau: “Ma idia ese oiemu kara namodia ena sivarai do idia gwauraia, bona oiemu bogahisihisi, be edia ane dekenai do idia herevalaia. Lohiabada be mai ena lalokau bona mai ena bogahisihisi. Ia be badu haraga lasi, bona ia ese ita ia lalokau henia nega ibounai. Lohiabada ena kara be namo, taunimanima ibounai dekenai. Ia karaia gaudia ibounai dekenai iena bogahisihisi ia henia.”
21 Unuseniai Davida ese Iehova ena kara namodia bona bogahisihisi ia herevalaia—Satani Diabolo ia gwau Iehova ese unai kara ia hahedinaraia lasi. Unai kara ese Dirava idia lalokau henia bona ena lohia siahuna henunai idia noho taudia ibounai dekenai dahaka ia mailaia? Oibe, Iehova ena kara namodia bona ena lohia dalana maorona ese ia idia tomadiho henia taudia ia hamoalea bada dainai, ia hanamoa karana idia hadokoa lasi. Danu, Iehova ese “taunimanima ibounai” ia kara namo henidia. Unai ese taunimanima momo do ia durua nega ia do noho lalonai, idia helalo-kerehai bona Dirava momokanina tomadiho henia taudia ai idia lao totona.—Kara 14:15-17.
22. Iehova ese ena hesiai taudia be edena bamona ia kara henidia?
22 Dirava ese “Mose kahirakahira ia raka hanaia” neganai, ia boiboi ia gwau: “Lau be Lohiabada. Lau Lohiabada be bogahisihisi bona hariharibada Diravana. Lau be badu dekenai lau haraga lasi, to bogahisihisi bona lalokau dekenai lau be haraga.” Davida ese unai kara, Dirava sibona ese ia gwauraia karadia unai, ia laloa bada. (Esodo 34:6) Unai dainai, Davida ia gwau diba: “Lohiabada be mai ena lalokau bona mai ena bogahisihisi. Ia be badu haraga lasi, bona ia ese ita ia lalokau henia nega ibounai.” Ena be Iehova ena siahu bada ita tahua diba lasi, to iena hesiai taudia tanobada dekenai be mai hebogahisi ida ia kara namo henidia, unai amo idia ia matauraia. Ia be hebogahisi Diravana dainai, mai ena ura ida Iesu ena mauri davalaia boubouna amo idia helalo-kerehai taudia edia dika ia gwauatao. Danu Iehova be ia badu haraga lasi, badina iena hesiai taudia ia durua edia manoka gaudia idia hanaia totona, unai amo kara maoromaoro tanobada matamatana dekenai idia noho diba.—2 Petero 3:9, 13, 14.
23. Hereva gabena dekenai edena mai anina bada karana do ita herevalaia?
23 Davida ese Iehova ena hebogahisi mai lalokauna eiava ena noho hanaihanai lalokauna ia abia isi. Momokani, Salamo 145 ena siri oredia ese idia hahedinaraia Iehova be edena bamona unai kara ia hahedinaraia, bona ena hebogahisi mai lalokauna dekenai ena kamonai hesiai taudia idia kara dalana ia hahedinaraia danu. Unai be hereva gabena dekenai do ita herevalaia.
Edena Bamona Do Oi Haere?
• Edena dala idauidau ai “dina ibounai” Iehova ita hanamoa diba?
• Edena haheitalai ese idia hahedinaraia Iehova ena siahu bada ita tahua diba lasi?
• Edena dala ai Iehova ena king siahuna matauraia karana ita habadaia diba?
[Picture on page 3]
Guba ena hisiu oreadia ese Iehova ena siahu bada idia hahedinaraia
[Credit Line]
Courtesy of Anglo-Australian Observatory, photograph by David Malin
[Picture on page 4]
Iesu Keriso dekenai edena bamona Iehova ena siahu bada ia hedinarai?
[Picture on page 5]
Israela taudia ese Siona Ororona ai Taravatu 10 idia abia neganai, Iehova ena king siahuna idia itaia