Oiemu Gaukara Ena Anina Do Oi Moalelaia

1-3. (a) Taunimanima momo edia lalohadai moni gaukara dekenai be dahaka? (b) Baibel ena lalohadai be dahaka gaukara dekenai, bona inai karoa lalonai edena henanadai do ita laloa?

HARI inai negai taunimanima momo be edia gaukara idia moalelaia lasi. Idia ura lasi dina ta ta ai gaukara dekenai idia lao bona hora momo lalonai gaukara idia karaia. Edena dala ai unai bamona taudia ita durua diba edia lalohadai idia haidaua bona edia gaukara idia moalelaia totona?

² Baibel be gaukara goadagoada karana dekenai lalohadai maorona ia gwauraia. Ia hahedinaraia iseda gaukara bona ita abia anina namona be hahenamo ta. Solomona ia gwau: “Ita ibounai ese iseda gaukara ena anina do ita moalelaia, do ita aniani bona inuinu. Inai be Dirava ena harihari gauna.” (Hadibaia Tauna 3:​13) Iehova, ita ia lalokau henia bona iseda namo ia laloa bada Diravana, be ia ura iseda gaukara bona ia havaraia anina do ita moalelaia. Dirava ena lalokau lalonai ita noho totona, namona be iena lalohadai gaukara dekenai ita abia dae bona ena hakaua herevadia ita badinaia.​​—Hadibaia Tauna 2:​24; 5:​18.

³ Inai karoa lalonai, ita be inai henanadai foa do ita laloa: Edena dala ai iseda gaukara ena anina namona ita moalelaia diba? Edena bamona gaukara be Keristani taudia momokanidia ese idia karaia lasi? Edena dala ai iseda moni gaukara ese eda tomadiho gaukara idauidau do ia koua lasi? Bona ita karaia diba gaukara badana be dahaka? To, namona be gaukara taudia hereadaedia rua​​—Iehova Dirava bona Iesu Keriso​—​edia haheitalai mani ita itaia guna.

GAUKARA KARAIA TAUNA BADANA BONA GAUKARA KARAIA TAUNA NAMONA

4, 5. Edena dala ai Baibel ese ia hahedinaraia Iehova ena gaukara be anina ia havaraia?

⁴ Iehova be Gaukara Karaia Tauna Badana. Genese 1:1 ia gwau: “Matamaia neganai Dirava ese guba bona tanobada ia karaia.” Dirava be tanobada havaraia gaukara ia haorea murinai, ia gwau gau ibounai be “namo herea.” (Genese 1:​31) Oibe Iehova, “moale Diravana” ena gaukara be anina ia havaraia dainai ia moale bada.​​—1 Timoteo 1:​11, NW.

⁵ Iseda gaukara goadagoada Diravana be hanaihanai ia gaukara noho. Ena be Dirava ese tanobada bona mauri gaudia ia havaraia gaukarana be idaunegai ia haorea, to Iesu ia gwau: “Egu Tamana be ia gaukara noho ia mai bona hari.” (Ioane 5:​17) Ena Tamana be dahaka gaukara ia karaia noho? Guba amo Ia ese taunimanima ia naria bona ia hakaua noho. Ia ese ‘tau matamatadia’ ia abia hidi, idia be horoa Keristani taudia bona Iesu ida guba dekenai do idia lohia. (2 Korinto 5:​17) Dirava be ia gaukara noho iena ura gauna taunimanima totona ia hagugurua totona​​—Ia idia lalokau henia taudia be tanobada matamata ai mauri hanaihanai do idia abia. (Roma 6:​23) Iehova be ena gaukara ese ia havaraia anina namona dainai ia moale. Taunimanima milioni momo be Basileia ena sivarai namona idia abia dae, Dirava ese idia ia veria bona ena lalokau lalonai idia noho totona edia mauri idia haidaua noho.​​—Ioane 6:​44.

6, 7. Iesu be dahaka gaukara idauidau ia karaia?

⁶ Iesu be nega daudau lalonai ia hahedinaraia ia be gaukara goadagoada tauna. Iesu be tanobada ai ia do mai lasi neganai, ia be Dirava ia durua “guba dekenai bona tanobada dekenai” idia noho gaudia ibounai idia karaia totona, bona ia be “gaukara karaia tauna” namona. (Aonega Herevadia 8:​22-​31; Kolose 1:​15-​17) Iesu be tanobada ai ia noho neganai, ia gaukara goadagoada. Ia be mero matamata neganai, ruma haginia gaukara ia dibaia, bona idia gwauraia “kapenta tauna.”a (Mareko 6:​3, NW ) Unai gaukara be gaukara metauna bona diba taudia ese idia karaia, bona unai nega ai timba utua gabuna, ruma haginia kohudia idia hoihoilaia sitoa bona paua tulu be lasi. Mani oi laloa, Iesu be sibona ia lao ena au ia abia totona—reana au ia utua bona ia abia lao ena gaukara gabuna dekenai. Iesu oi itaia diba, a? Ia be ruma ta ia haginia noho​​—guhi ia atoa noho, iduara ia karaia, bona helai gaudia haida bona teibolo ia karaia danu. Oibe, Iesu ia diba momokani gaukara ita karaia namonamo neganai, do ita moale.

⁷ Iesu be haroro gaukara ia karaia namonamo tauna. Ia be lagani toi mai kahana lalonai, inai mai anina bada gaukara ia karaia goadagoada. Ia ura taunimanima momo ia haroro henia dainai, nega ia halusia kava lasi, to daba maragi ia noga bona ia gaukara ela bona hanuaboi. (Luka 21:​37, 38; Ioane 3:2) Iesu be “hanua badadia bona hanua maragidia edia lalonai ia haroro loaloa, Dirava ena Basileia ena Sivarai Namona ia harorolaia.” (Luka 8:1) Iesu be aena amo kilomita handred momo ia raka taunimanima dekenai sivarai namona ia harorolaia totona.

8, 9. Edena dala ai Iesu ese ena haroro gaukara ia moalelaia?

⁸ Iesu ese ena haroro gaukara ena anina namona ia moalelaia, a? Oibe! Ia ese Basileia ena hereva momokani ena uhe ia hadoa, bona edia anina be idia auka bona mage vadaeni utua totona. Iesu be Dirava ena gaukara ia karaia amo goada ia abia, unai dainai nega haida ia aniani lasi badina ia ura ena gaukara ia karaia haorea. (Ioane 4:​31-​38) Iesu be tanobada ai ena hesiai gaukara ia haorea murinai, ia moale bada, bona ena Tamana dekenai ia gwau diba: “Lau ese tanobada dekenai oi lau hanamoa vadaeni, lau dekenai gaukara oi henia danu be lau karaia haorea vadaeni.”—Ioane 17:4.

⁹ Momokani, Iehova bona Iesu be haheitalai namodia, badina edia gaukara goadagoada karana ese anina namona ia havaraia bona idia moale. Iehova ita lalokau henia dainai ita ura ‘Dirava ena kara bamona do ita karaia.’ (Efeso 5:1) Iesu ita lalokau henia dainai ita ura ‘iena aena gabudia dekenai ita raka.’ (1 Petero 2:​21) Unai dainai, namona be hari do ita tahua, edena dala ai eda gaukara ena anina namona ita moalelaia diba.

ISEDA GAUKARA ENA ANINA NAMONA ITA MOALELAIA DALANA

10, 11. Dahaka ese ita ia durua diba iseda gaukara dekenai lalohadai maorona ita abia totona?

¹⁰ Keristani taudia be moni gaukara idia karaia be namo. Ita ura iseda gaukara ita moalelaia, to unai be do ia auka bema ita karaia moni gaukara ita ura henia lasi. Edena dala ai unai bamona gaukara ena anina namona ita moalelaia diba?

¹¹ Lalohadai maorona oi abia. Iseda mauri ita haidaua diba lasi, to iseda lalohadai ita haidaua diba. Dirava ena lalohadai ita laloa dobu neganai, ita do ia durua iseda gaukara dekenai lalohadai maorona ita abia totona. Hegeregere, bema oi be ruma bese ena kwarana, namona be oi laloatao emu gaukara​—herevana ia be gaukara namona lasi bona davana be maragi​—be mai anina bada emu ruma bese oi naria totona. Dirava ena matanai emu ruma bese naria karana be maduna badana ta. Dirava ena Hereva ia gwau bema ta be iena ruma bese ia naria lasi, “iena dika ese abidadama lasi murimuri tauna ena dika ia hanaia vadaeni.” (1 Timoteo 5:8) Oi laloparara emu moni gaukara be oi ia durua sibona Dirava ese ia henia maduna oi huaia totona, unai dainai emu gaukara oi moalelaia, to emu gaukara turadia be idia moale lasi.

12. Mai kara momokani ida ita gaukara goadagoada ena ahuna be dahaka?

¹² Kara momokani ita badinaia bona gaukara ita karaia namonamo. Diba ita abia bona ita gaukara goadagoada neganai, hahenamo momo do ita abia. Mai edia diba ida gaukara idia karaia namonamo taudia be edia biagudia ese idia ura henidia bada. (Aonega Herevadia 12:24; 22:29) Ita Keristani taudia be eda gaukara lalonai kara momokani ita hahedinaraia be namo​​—moni bona kohu ita henaoa lasi, o gaukara negana ai sibona eda ura gaudia ita karaia lasi. (Efeso 4:​28) Karoa 14 ai ita herevalaia bamona, kara momokani ita badinaia neganai, ahuna namona do ita abia. Gaukara tauna be kara momokani ia hahedinaraia neganai, ena gaukara biaguna ese ia do ia abidadama henia. Bona ena be iseda biaguna be iseda gaukara goadagoada karana ia itaia o lasi, to ita moale badina iseda “lalomamina be ia goeva” bona ita diba Dirava be iseda gaukara ia moalelaia.​​—Heberu 13:​18, NW; Kolose 3:​22-​24.

13. Gaukara gabuna ai iseda haheitalai namona ese dahaka namo ia havaraia diba?

¹³ Ita laloparara iseda kara ese Dirava ia hanamoa diba. Iseda moni gaukara gabudiai Keristani kara ita hahedinaraia neganai, ma haida ese idia itaia. Dahaka ia vara diba? Iseda kara amo “iseda Hamauria Tauna Dirava” ena sivarai namona ita hahairaia diba. (Tito 2:​9, 10) Oibe, iseda kara namo dainai ma haida do idia itaia iseda tomadiho dalana be namo herea, bona do idia ura Iehova idia tomadiho henia. Gaukara gabuna ai oi be haheitalai namona oi hahedinaraia dainai, emu gaukara turana ta be hereva momokani ia abia dae neganai, do oi moale bada! Mai anina bada gauna be, oi diba emu kara namona ese Iehova ia hanamoa bona iena kudouna ia hamoalea, bona unai be hahenamo ta.​​—Aonega Herevadia 27:11; 1 Petero 2:​12.

MAI AONEGA IDA MONI GAUKARA ITA ABIA HIDI

14-16. Moni gaukara ita abia hidi gwauraia neganai, edena mai anina bada henanadai rua ita lalodia be namo?

¹⁴ Baibel ia gwau lasi edena moni gaukara ita abia dae bona edena do ita dadaraia. To, namo lasi ita laloa moni gaukara idauidau ita abia dae diba. Baibel ese ita ia durua diba Dirava ese ia moalelaia gaukara ita abia hidi bona ia ura henia lasi gaukara ita dadaraia totona. (Aonega Herevadia 2:6) Moni gaukara oi abia hidi gwauraia neganai, inai mai anina bada henanadai rua oi laloa be namo.

¹⁵ Inai moni gaukara lalonai idia karaia karadia be Baibel ese ia taravatua, a? Baibel be kaivakuku karaia gaukarana, henaohenao, bona koikoi karadia ia taravatua. (Esodo 20:4; Kara 15:29; Efeso 4:​28; Apokalupo 21:8) Bema moni gaukara lalonai unai bamona kara idia karaia, do ita dadaraia. Iehova ita lalokau henia dainai, ita ura lasi iena taravatu ia utua moni gaukarana ta ita karaia.​​—1 Ioane 5:3.

¹⁶ Inai gaukara ita karaia neganai, ita be haida edia kerere lalonai ita vareai, a? Mani inai haheitalai oi laloa. Risepsen gaukara be gaukara namona ta. To, bema bogana lalonai natuna hamasea kliniki dekenai Keristani taihu ta idia boiria risepsen gaukara ia karaia totona, be edena bamona? Momokani, ia ese natuna hamasea karana do ia karaia lasi. To, iena gaukara ese unai kliniki dekenai idia karaia gaukara ia durua, bona bogana lalonai natuna hamasea karana be Dirava ese ia inai henia. (Esodo 21:​22-​24) Iehova ita lalokau henia dainai, ita ura lasi Baibel ese ia taravatua karadia ita durua.

17. (a) Moni gaukara ita abia hidi neganai, dahaka gaudia ita laloa dobu be namo? (Rau 203 ai maua itaia.) (b) Edena dala ai iseda lalomamina ese ita ia durua diba Dirava ita hamoalea abia hidi ita karaia totona?

¹⁷ Edena moni gaukara ita abia dae bona edena ita dadaraia totona, paragraf 15 bona 16 dekenai idia noho henanadai rua ita laloa dobu karana ese ita do ia durua. Danu, ita ura moni gaukara ita abia hidi neganai, gau ma haida do ita laloa namonamo guna.b Namo lasi ita laloa hesiai tauna oreana ese do idia vara gaudia ibounai dekenai taravatu do ia atoa. Unai dainai laloa kehoa ita gaukaralaia be gau badana. Karoa 2 dekenai ita itaia bamona, iseda lalomamina ita hadibaia totona namona be ita tahua edena dala ai iseda mauri lalonai Dirava ena Hereva ita badinaia diba. ‘Iseda lalona ita gaukaralaia karana amo iseda lalona ita hadibaia’ neganai, iseda lalomamina ese ita ia durua diba Dirava ia hamoalea abia hidi ita karaia bona Dirava ena lalokau lalonai ita noho totona.​​—Heberu 5:​14.

MONI GAUKARA DEKENAI LALOHADAI MAORONA ABIA

18. Dahaka dainai lalohadai maorona ita abia be auka?

¹⁸ “Nega ena dokona” lalonai ‘metau dikadia momo idia vara’ dainai, Iehova ita hamoalea abia hidi ita karaia be auka. (2 Timoteo 3:1) Danu gaukara ita davaria bona nega daudau unai kampani dekenai ita noho be auka. Ita be Keristani taudia dainai, ita diba iseda ruma bese ita naria totona ita gaukara goada be gau badana. To bema ita naria namonamo lasi, gaukara gabuna ai lalona veria gaudia o tanobada ena kohu laloa bada karana ese iseda Dirava tomadiho henia karana ia hadikaia diba. (1 Timoteo 6:​9, 10) To mani ita itaia, edena dala ai abia hidi ita karaia neganai lalohadai maorona ita abia, unai amo “mai anina bada gaudia” ita atoa guna.​​—Filipi 1:​10, NW.

19. Dahaka dainai Iehova ita abidadama henia momokani diba, bona unai ese ita ia durua dahaka ita dadaraia totona?

¹⁹ Iehova do oi abidadama henia momokani. (Aonega Herevadia 3:​5, 6) Iehova ita abidadama henia momokani diba. Badina ia be ita ia laloa bada. (1 Petero 5:7) Iseda dabu gaudia ia diba namonamo dainai, gau namodia momo ia henia. (Salamo 37:25) Unai dainai, iena sisiba Baibel amo ita kamonai henia be namo: “Moni do umui ura henia dikadika lasi. To umui dekenai ia noho gauna, be inai bamona do umui laloalaia, ‘Lau dekenai noho gauna be namo, ia hegeregere vadaeni.’ Badina be Dirava be inai bamona ia hereva, ia gwau: ‘Lau ese umui do lau negea lasi, bona umui do lau rakatania lasi. Lasi bona lasi momokani.’ ” (Heberu 13:5) Ful-taim hesiai gaukara idia karaia taudia momo idia hamomokania Iehova ese tauanina dalanai idia ia naria. Bema ita abidadama momokani Iehova ese ita do ia naria, iseda ruma bese naria karana do ita lalohekwarahilaia momo lasi. (Mataio 6:​25-​32) Moni gaukara ese ita do ia koua lasi sivarai namona ita harorolaia bona hebou dekenai ita lao totona.​​—Mataio 24:14; Heberu 10:​24, 25.

20. Gau tamona sibona oi raraia ena anina be dahaka, bona edena bamona unai oi karaia diba?

²⁰ Gau tamona sibona oi raraia. (Mataio 6:​22, 23, NW ) Matana be gau tamona sibona ia raraia, anina be eda mauri lalonai gau momo do ita laloa lasi. Keristani tauna ena matana be gau tamona sibona ia raraia​​—Dirava ena ura do ia karaia. Bema iseda matana be gau tamona sibona ia raraia, ita be dava bada moni gaukara do ita tahua momo lasi bona kohu momo maurina do ita tahua lasi. Bona bisinesi be kohu matamatadia idia hahedinaraia bona taunimanima edia lalona idia veria idia moale totona unai kohu do idia hoia, to unai ese ita do ia koia lasi. Edena dala ai gau tamona sibona oi raraia diba? Abiatorehai karana do oi dadaraia. Emu nega idia haorea kava kohu idauidau oi haboua lasi. Baibel ena sisiba ita badinaia be namo, ia gwau: “Bema ita be mai iseda aniani, dabua bona noho gabuna, unai be hegeregere.” (1 Timoteo 6:8) Namona be emu mauri lalonai kohu momo oi tahua lasi.

21. Dahaka dainai mai anina bada gaudia ita abia hidi be namo? Bona iseda mauri lalonai dahaka ita atoa guna be namo?

²¹ Iehova tomadiho henia karadia ita atoa guna. Dina ta ta ai iseda mauri lalonai iseda nega bona goada be bada lasi dainai, namona be mai anina bada gaudia ita atoa guna. Bema lasi, anina lasi gaudia dekenai eda nega bada ita haorea kava diba, bona mai anina bada gaudia do ita karaia lasi. Iseda mauri lalonai edena gaudia be mai anina bada? Tanobada taudia momo idia laloa sikuli badana dekenai idia lao be mai anina bada. Badina unai amo gaukara namona idia abia diba. To, Iesu be ia murinai idia raka taudia ia hadibaia ‘Dirava ena Basileia . . . do idia tahua guna.’ (Mataio 6:​33) Oibe, ita be Keristani taudia dainai, iseda mauri lalonai Dirava ena Basileia ita atoa guna be namo. Namona be iseda mauri lalonai ita karaia abia hidi, ita tahua gaudia, bona ita karaia gaudia ese idia hahedinaraia, ita dekenai Basileia bona Dirava ena ura be mai anina bada gaudia, to kohu bona taunimanima ese idia laloa bada gaudia be anina lasi.

HARORO GAUKARA ITA KARAIA GOADAGOADA

22, 23. (a) Keristani taudia edia gaukara badana be dahaka, bona edena dala ai ita hahedinaraia unai gaukara ita laloa bada? (Rau 206 ai maua itaia.) (b) Namona be ita ta ta iseda lalona ita hadaia dahaka ita karaia totona?

²² Ita diba ita be tanobada ena dokona negana ai ita noho dainai, Keristani taudia momokanidia edia gaukara badana​​—haroro bona hahediba taudia halaoa gaukarana unai​​—ita laloa bada. (Mataio 24:14; 28:​19, 20) Iesu bamona, ita ura nega bada ita henia taunimanima hamauria gaukarana ita karaia totona. Edena bamona ita hahedinaraia diba unai gaukara ita laloa bada? Dirava ena taunimanima momo be mai edia kudouna ibounai ida nega bada idia henia haroro gaukara idia karaia totona. Haida be edia mauri dalana idia haidaua, unai amo painia gaukara eiava misinari gaukara idia karaia diba. Tama sina idia diba Iehova hesiai henia gaukara be mai anina bada dainai, edia natudia idia hagoadaia ful-taim hesiai gaukara idia karaia totona. Basileia idia harorolaia goadagoada taudia edia gaukara ese ia havaraia anina namona idia moalelaia, a? Oibe! Mai iseda kudouna ibounai ida Iehova ita hesiai henia karana ese moale bona hahenamo momo ia havaraia.​​—Aonega Herevadia 10:22.

²³ Ita momo be hora momo lalonai moni gaukara ita karaia iseda ruma bese ita naria totona. Laloatao, Iehova ia ura iseda gaukara ena anina namona ita moalelaia. Bema iseda lalohadai bona kara be Dirava ena lalohadai bona hakaua herevadia hegeregerena, iseda gaukara do ita moalelaia. To, namona be iseda lalona ita hadaia iseda moni gaukara ese iseda gaukara badana​— Dirava ena Basileia ena sivarai namona harorolaia gaukarana unai​—do ia hadikaia lasi. Iseda mauri lalonai unai gaukara ita atoa guna neganai, ita hahedinaraia Iehova ita lalokau henia bona iena lalokau lalonai do ita noho.