Dirava Ena Hadibaia Dalana be Hereadae
“Gau ibounai lau laloa be anina lasi gaudia, inai mai anina bada gauna do lau abia totona, gauna be inai: Keriso Iesu, lauegu Lohiabada do lau diba momokani.”—FILI. 3:8.
1, 2. Keristani taudia haida be dahaka abia hidi idia karaia, bona dahaka dainai?
ROBERT be ia maragi neganai, sikuli dekenai maka namodia ia abia. Ena mauri lagani be eit neganai, ena tisa ta be ena ruma dekenai ia vadivadi, bona Robert ia hamaoroa ia be sikuli badadia dekenai ia lao diba. Unai tisa ia ura Robert be gabeai doketa tauna ai do ia lao. Haisikuli ai maka namodia ia abia dainai, ia be ena hanua ena iunivesiti badana ta dekenai ia lao diba. To Robert be taunimanima momo ese idia laloa bada gauna ia dadaraia, unai amo ena tahua gauna, regula painia gaukarana ia karaia diba.
2 Robert bamona, Keristani taudia momo—matamata bona buruka—be inai tanobada ai gaukara namodia eiava ladana bada idia abia diba. To haida be unai gaudia idia dadaraia, unai amo Dirava ena hesiai gaukara idia karaia diba. (1 Kor. 7:29-31) Robert bamona, dahaka dainai Keristani taudia idia ura bada edia haroro gaukara idia habadaia? Badina badana be Iehova idia lalokau henia, bona Ena hadibaia dalana ena namo idia laloa bada. Bema hereva momokani oi diba lasi, emu mauri be edena bamona oi lalohadailaia vadaeni, a? Iehova ena hadibaia dalana ena hahenamo idauidau ita laloa neganai, unai ese ita do ia durua sivarai namona ita laloa bada bona ma haida dekenai ita harorolaia goadagoada totona.
Dirava ese Ita Ia Hadibaia be Hahenamo Badana
3. Dahaka dainai ita diba Iehova ia ura bada goevadae lasi taudia ia hadibaia?
3 Iehova be kara namo Diravana dainai, ia ura bada goevadae lasi taudia ia hadibaia. Isaia 54:13 be horoa Keristani taudia ia perovetalaia neganai, ia gwau: “Lau sibona ese oiemu noho taudia do lau hadibaia, vadaeni mauri namona bona maino do idia davaria.” Unai hereva be Keriso ena “mamoe idaudia” dekenai ia momokani danu. (Ioa. 10:16) Unai be hari inai negai ia guguru noho peroveta herevana hegeregerena. Isaia be matahanai ta ai ia itaia taunimanima be bese idauidau amo tomadiho momokani dekenai idia lao noho. Isaia ia gwau: “Lohiabada ena ororo dekenai do ita daekau, Israela ena Dirava ena Dubu Helaga dekenai do ita lao. Ia ese iena kara ita dekenai do ia hadibaia, bona ita ese unai Dirava ena dala dekenai do ita raka. Badina be Lohiabada ena hadibaia hereva, be Ierusalema dekena amo ia mai noho. Siona dekena amo Lohiabada ese, iena bese taudia dekenai ia hereva henia noho.” (Isa. 2:1-3) Dirava ese ita ia hadibaia be hahenamo badana!
4. Iehova be ia hadibaia taudia amo dahaka ia ura?
4 Dirava ena hadibaia dalana amo namo ita abia totona, dahaka ita karaia diba? Gau badana be ita manau bona ma haida ese ita idia hadibaia diba. Salamo torea tauna Davida ia gwau: “Lohiabada be namo bona maoromaoro. . . . Ia ese manau taudia dekenai, iena dala ia hadibaia.” (Sal. 25:8, 9) Bona Iesu ia gwau: “Egu Tamana e, guba bona tanobada ena lohia, lau hanamoa oi dekenai, badina be inai gaudia aonega taudia bona diba taudia dekena amo oi hunia vadaeni, to memero maragidia dekenai oi hedinaraia vadaeni.” (Luka 10:21) Oi be “manau taudia dekenai iena hariharibada ia henia” Diravana kahirakahira oi lao, a?—1 Pet. 5:5.
5. Edena dala sibona amo Dirava ena diba ita abia diba?
5 Ita be Iehova ena hesiai taudia dainai, ita sibona iseda diba bona aonega amo hereva momokani ita dibaia, a? Lasi. Iseda diba bona aonega amo Dirava ena diba do ita abia lasi. Iesu ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba.” (Ioa. 6:44) Iehova be haroro gaukara bona lauma helaga amo mamoe bamona taudia, “bese ibounai edia kohu namodia” unai, be ia dekenai ia veria mai. (Hag. 2:7) Iehova ese oi ia veria mai iena Natuna dekenai oi lao totona dainai oi moale, a?—Ieremia 9:23, 24 duahia.
Iehova Ena Hadibaia Dalana ese Iseda Mauri Ia Haidaua
6. Taunimanima be “Lohiabada ena diba” idia abia neganai, dahaka ia vara diba?
6 Isaia be iseda negai taunimanima edia kara idia idau idia lao karana ia perovetalaia neganai, laulau herevadia ia gaukaralaia. Guna idia dagedage taudia be hari idia manau. (Isaia 11:6-9 duahia.) Bese, tano, iduhu eiava ma gau haida dainai ma haida idia inai henia taudia be hari mai maino ida idia noho hebou. Laulau dalanai, edia kaia be hama amo idia makohia bona tano geia auri idia karaia. (Isa. 2:4) Dahaka dainai edia mauri idia haidaua? Badina idia be “Lohiabada ena diba” idia abia bona edia mauri lalonai idia badinaia. Ena be Dirava ena hesiai taudia be idia goevadae lasi, to idia be tanobada hegegemadai tadikaka oreana ta bamona idia noho. Sivarai namona bona ia havaraia kara namodia be taunimanima ibounai ese idia ura henia, unai ese ia hahedinaraia Dirava ena hadibaia dalana be hereadae.—Mat. 11:19.
7, 8. (a) Dirava ena hadibaia dalana ese edena “tanobada ena siahu” gaudia amo taunimanima ia ruhaia? (b) Dahaka ese ia hahedinaraia Dirava ena hadibaia dalana ese Iehova ia hanamoa?
7 Aposetolo Paulo ese Dirava ena hesiai taudia edia gaukara be tuari ida ia hahegeregerea. Ia gwau: “Aiemai tuari gaudia be tanobada ena tuari gaudia bamona lasi. Lasi, to Dirava dekena amo ia mai siahuna ai ese ai gaukaralaia, ia ese tanobada ena siahu ia haorea diba. Hepapahuahu hereva koikoi ai koua noho. Bona Dirava ena diari idia tahua taudia edia dala koua gwauraia taudia danu ai koua noho.” (2 Kor. 10:4, 5) Dirava ena hadibaia dalana ese “tanobada ena siahu” gaudia haida amo ita ia ruhaia. Tanobada ena siahu gaudia haida be dahaka? Idia haida be hahediba hereva koikoidia, babalau o meamea karadia, bona taunimanima edia lalohadai, to unai be haida sibona ita gwauraia. (Kol. 2:8) Dirava ena hadibaia dalana ese taunimanima ia durua kara dikadia idia rakatania bona Dirava ese ia ura henia karadia idia hahedinaraia totona. (1 Kor. 6:9-11) Ruma bese maurina ia hanamoa. Bona helaro lasi taudia ia durua mauri namona idia abia totona. Hari inai negai unai bamona diba ita abia be namo.
8 Iehova ese taunimanima ia durua kara momokani idia hahedinaraia totona, mani inai haheitalai ita laloa. (Heb. 13:18) India dekenai, hahine ta be Baibel stadi ia abia dae bona gabeai bapatiso lasi pablisa ai ia lao. Dina ta, Kingdom Hall haginia gabuna dekenai ia gaukara bona ruma dekenai ia giroa lou neganai, basi naria gabuna ta dekenai golo ageva ta ia davaria, unai ageva ena davana be K3,000 bamona. Ena be ia be ogogami hahinena, to pulisi steiseni dekenai ia lao bona unai ageva ia henia lou. Pulisi steiseni dekenai ia gaukara pulisi tauna ia hoa bada! Gabeai pulisi tauna ta ese ia nanadaia: “Dahaka dainai oi ura inai ageva oi henia lou?” Taihu ia gwau: “Baibel ena hahediba herevadia lau stadilaia karana ese egu mauri ia haidaua, unai dainai lau ura kara momokani lau hahedinaraia.” Unai pulisi tauna ia hoa dainai, unai taihu ia bamoa elda tauna ia hamaoroa: “Inai gabu dekenai taunimanima 38 milioni mai kahana idia noho. Bema taunimanima 10 umui durua unai hahine ena kara bamona idia karaia totona, unai be namo herea.” Dirava ena hadibaia dalana ese taunimanima milioni momo edia mauri ia haidaua dainai, Iehova ita hanamoa totona badina momo idia noho.
9. Edena dala ai taunimanima be edia mauri idia haidaua diba?
9 Baibel bona Iehova ena lauma helaga ese taunimanima idia durua diba edia mauri idia haidaua totona. (Roma 12:2; Gal. 5:22, 23) Kolose 3:10 ia gwau: “Mauri matamata umui kwatua vadaeni. Inai mauri matamata be Dirava ese ia havaraia. Bona ia ese nega ibounai diba matamata ia henia noho, ia lao bona Dirava ena toana momokani do umui abia.” Baibel ai ia noho herevana be mai ena siahu tau ta ena lalona ai idia noho gaudia ia hahedinaraia totona, bona ena laloa dalana bona ena lalohadai gau haida dekenai ia haidaua diba. (Heberu 4:12 duahia.) Ta be Baibel amo diba maoromaoro ia abia bona Iehova ena kara maoromaoro taravatudia hegeregerena ena mauri ia haidaua neganai, ia be Dirava ena turana ai ia lao bona mauri hanaihanai ia abia diba.
Vaira Nega Totona Ita Hegaegae
10. (a) Dahaka dainai Iehova sibona be ita ia durua diba nega vaira totona ita hegaegae? (b) Tanobada hegegemadai ai dahaka do ia vara?
10 Iehova be vaira nega ia diba dainai, Ia sibona ese ita ia durua diba ita hegaegae totona. Ia sibona ese taunimanima edia vaira nega ia abia hidi. (Isa. 46:9, 10) Baibel ena peroveta herevadia ese idia hahedinaraia “Lohiabada ena dina badana be ia kahirakahira vadaeni.” (Sep. 1:14) Unai dina ai, Aonega Herevadia 11:4 ena hereva do ia guguru: “Dirava ena Kota bada dinana dekenai, oiemu kohu bada ese gau namona ta, oi dekenai do idia henia lasi, to kara maoromaoro ese, mase dekena amo oi ia hamauria diba.” Iehova ese Satani ena tanobada ia hahemaoro henia negana ia ginidae neganai, Dirava ena lalonamo ita abia be gau badana. Unai nega ai moni be anina lasi. Esekiela 7:19 ia gwau: “Idia ese edia siliva be ariara dekenai do idia negea, edia golo danu, gau mirona bamona, do idia negea lao.” Unai hereva ita diba dainai, unai ese ita do ia durua mai aonega ida abia hidi ita karaia totona.
11. Dirava amo ia mai aonegana ese edena dala ta ai ita ia durua nega vaira totona ita hegaegae?
11 Iehova ena dina badana totona ita hegaegae neganai, Iena hadibaia dalana ese ita do ia durua mai anina bada gaudia ita atoa guna totona. Aposetolo Paulo be Timoteo ia tore henia, ia gwau: “Inai tanobada mauri ena kohu momo taudia do oi hamaoroa, do idia hekokoroku lasi. Bona idia do oi hamaoroa danu inai tanobada ena kohu do idia abidadama henia lasi, to Dirava sibona do idia abidadama henia.” Ena be ita be taga taudia lasi, to Dirava amo ia mai sisibana ese ita ia durua diba. Ena anina be dahaka? Tanobada ena kohu ita haboua lasi, to namona be “kara namodia” ita hahedinaraia bona “gaukara namodia” ita karaia noho. Bema iseda mauri lalonai Iehova hesiai henia karana ita atoa guna, ita be ‘vaira negana totona badina namona ita haginia.’ (1 Tim. 6:17-19, NW ) Unai bamona ita karaia neganai ita be aonega ita hahedinaraia, badina Iesu ia gwau: “Bema tau ta ese tanobada ibounai ia abia, to iena mauri ia halusia, be edena bamona namo do ia abia?” (Mat. 16:26, 27) Iehova ena dina be ia mai kahirakahira dainai, namona be ita ta ta be inai ita laloa: ‘Lauegu kohu be edeseniai lau haboua noho? Lau be Dirava eiava kohu momo lau hesiai henia, a?’—Mat. 6:19, 20, 24.
12. Ena be haida idia laloa iseda haroro gaukara be anina lasi, to dahaka dainai unai gaukara ita goadalaia noho be namo?
12 Baibel ese ia gwauraia “gaukara namodia” amo mai anina bada gauna be: Basileia harorolaia bona hahediba taudia halaoa gaukarana. (Mat. 24:14; 28:19, 20) Aposetolo taudia edia negai bamona, haida idia laloa iseda haroro gaukara be anina lasi. (1 Korinto 1:18-21 duahia.) To, unai ese ita harorolaia sivaraina ena namo ia hadikaia lasi, bona nega ia do noho lalonai taunimanima dekenai unai sivarai namona ita herevalaia be mai anina bada, unai amo edia abidadama idia hahedinaraia diba. (Roma 10:13, 14) Ma haida ita durua Dirava ena hadibaia dalana amo namo idia abia neganai, ita be hahenamo momo do ita abia.
Sibona Edia Ura Idia Dadaraia Dainai Namo Idia Davaria
13. Paulo be sivarai namona dainai dahaka gaudia ia dadaraia?
13 Paulo be Keristani tauna ai ia do lao lasi neganai, Iuda edia sene taudia edia kara dekenai diba bada ia abia. Reana ena mauri lagani be 13 bamona neganai, iena hanua Taso ia rakatania bona Ierusalema dekenai ia lao. Taravatu hadibaia tauna badana Gamaliela amo diba ia abia. (Kara 22:3) Unai nega ai Paulo be stiuden ma haida ia hereaia, bona bema Iuda tomadihona ia badinaia ia be ladana bada do ia abia. (Gal. 1:13, 14) To, sivarai namona ia abia dae bona haroro gaukara ia matamaia neganai, unai gaudia ibounai ia dadaraia. Paulo be ia abia hidi gauna dainai ia lalohisihisi, a? Lasi. Ia gwau: “Gau ibounai lau laloa be anina lasi gaudia, inai mai anina bada gauna do lau abia totona, gauna be inai: Keriso Iesu, lauegu Lohiabada do lau diba momokani. Ia dainai gau ibounai lau negea vadaeni. Lau laloa idia be momoru.”—Fili. 3:8.
14, 15. Ita be ‘Dirava ena gaukara karaia’ taudia dainai, dahaka hahenamo ita abia?
14 Paulo bamona, hari inai negai Keristani taudia be sivarai namona idia harorolaia totona sibona edia ura gaudia idia dadaraia. (Mar. 10:29, 30) Unai bamona ita karaia dainai, gau haida ita reaia, a? Robert, paragraf 1 ai ita herevalaia tauna, ena hereva ese momo edia lalohadai ia hahedinaraia: “Lau dadaraia gaudia dainai lau lalohisihisi lasi. Ful-taim hesiai gaukara lau karaia dainai lau moale bada, unai dala amo Dirava ena ‘kara lau tahua, Ia lau tohoa bona lau diba Iehova be namo momokani.’ Ena be gau haida lau dadaraia Dirava ena hesiai gaukara lalonai egu tahua gauna lau hagugurua totona, to nega momo Iehova be lau ia hanamoa bona lau abia lou gaudia be guna lau dadaraia gaudia idia hanaia. Toana be lau be gau ta lau halusia lasi!”—Sal. 34:8; Aon. 10:22.
15 Bema haroro bona hahediba gaukarana be lagani haida lalonai oi karaia vadaeni, oi danu be Iehova ena kara oi tahua bona Ia oi tohoa amo oi diba Ia be namo, ani? Sivarai namona harorolaia gaukarana oi karaia lalonai, lauma helaga ese oi ia durua dalana oi itaia, a? Iehova ese edia kudouna ia kehoa bona sivarai namona idia abia dae taudia edia moale oi itaia vadaeni, a? (Kara 16:14) Iehova ese oi ia durua koua gaudia oi hanaia totona, unai amo emu hesiai gaukara oi habadaia diba, a? Iehova ese nega aukadia ai oi ia durua, unai amo goada oi abia ia oi hesiai henia noho totona, a? (Fili. 4:13) Iseda hesiai gaukara ai Iehova ena heduru ita mamia neganai, do ita abia dae momokani Iehova ia noho bona Ia kahirakahira ita lao diba. (Isa. 41:10) Ita be ‘Dirava ena gaukara karaia’ taudia ai ita lao be hahenamo badana ta.—1 Kor. 3:9.
16. Dirava ena hadibaia dalana lalonai oi karaia hesiai gaukara be edena bamona oi laloa?
16 Taunimanima momo idia ura edia mauri lalonai mai anina bada gauna ta do idia karaia. Hari inai negai ita itaia ena be taunimanima be gau momo idia karaia, to daudau lasi unai gaudia idia laloaboio. To, hari inai negai Iehova be ena ladana ia hahelagaia totona ia karaia gaudia be tiokratik histori lalonai do idia noho hanaihanai. Unai be do ita laloaboio lasi. (Aon. 10:7; Heb. 6:10) Namona be mai moale ida ma haida dekenai Iehova bona ena kara ita hadibaia, unai gaukara ita laloa bada.
Edena Bamona Do Oi Haere?
• Iehova ia ura ia hadibaia taudia be dahaka idia karaia?
• Dirava amo ia mai diba ese taunimanima edia mauri be edena bamona ia haidaua?
• Dirava amo ia mai diba amo ma haida ita durua dainai, dahaka hahenamo ita abia?
[Picture on page 23]
Iehova ese ia hadibaia taudia be tanobada hegegemadai tadikaka oreana ta bamona idia noho
[Picture on page 24]
Ita be ‘Dirava ena gaukara karaia’ taudia ai ita lao be hahenamo badana, ani?