Hekwakwanai Hamaoromaoroa Daladia

Umui headava neganai, hekwakwanai idauidau do idia vara. Unai hekwakwanai idia vara badina emui hemami, lalohadai bona mauri daladia be idauidau. Eiava reana hekwakwanai be ma haida ese do idia havaraia o do idia vara kava.

Nega haida ita ura lasi iseda hekwakwanai ita hamaoromaoroa, to Baibel ese ita ia hagoadaia, namona be ita hekwarahi eda hekwakwanai ita hamaoromaoroa totona. (Mataio 5:23, 24) Emui hekwakwanai umui hamaoromaoroa diba, bema Baibel ena hakaua herevadia umui badinaia.

1 HEKWAKWANAI UMUI HEREVALAIA

BAIBEL IA GWAU: “Herevahereva danu be mai ena nega.” (Hadibaia Tauna 3:1, 7) Namona be nega oi atoa emu adavana ida emui hekwakwanai umui herevalaia totona. Emu hemami bona lalohadai korikori be emu adavana dekenai oi gwauraia hedinarai. Nega ibounai ta ta dekenai “hereva momokani do umui gwauraia.” (Efeso 4:25) Ena be oi badu dikadika, to namona be emu hemami oi biagua. Mai gado namo ida oi haere neganai, badu o heai do ia vara lasi.​—Aonega Herevadia 15:4; 26:20.

Ena be emu adavana ena hereva dekenai oi lalotamona lasi, to mai gado namo ida oi hereva, bona oi hahedinaraia ia oi lalokau henia bona matauraia. (Kolose 4:6) Namona be karaharaga hekwakwanai umui hamaoromaoroa, bona emui herevahereva namonamo karana umui hadokoa lasi.​—Efeso 4:26.

OI KARAIA DIBA GAUNA:

• Nega maorona umui abia hidi emui hekwakwanai umui herevalaia totona

• Emu adavana ia hereva neganai, namona be oi kamonai namonamo bona iena hereva oi utua lasi. Gabeai oi danu do oi hereva

2 KAMONAI BONA LALOPARARA

BAIBEL IA GWAU: “Do umui hebogahisi henia bona lalokau henia, tadikaka idia lalokau heheni bamona. Bona umui ta ta dekenai hemataurai hahedinaraia karana do umui gunalaia.” (Roma 12:10) Kamonai karana be mai anina bada. Emu adavana ena lalohadai oi lalopararalaia totona, ena ‘hemami oi laloa bona oi lalomanau’ be gau badana. (1 Petero 3:8; Iamesi 1:19) Namona be iena hereva oi kamonai namonamo. Ena be oi bisi noho, to emu gaukara oi hadokoa sisina bona emu adavana oi kamonai henia, eiava oi nanadaia bema nega ma ta ai unai umui herevalaia. Bema oi laloa emu adavana be emu inai tauna lasi to turana namona ta, vadaeni ia dekenai “do oi badu haraga lasi.”​—Hadibaia Tauna 7:9.

OI KARAIA DIBA GAUNA:

• Mai laloa kehoa ida emu adavana ena hereva oi kamonai be namo, herevana iena hereva oi moalelaia lasi

• Emu adavana ena hereva anina oi lalopararalaia totona oi kamonai namonamo. Iena hereva dalana, kara bona vairana toana oi itaia danu be namo

3 UMUI ABIA HIDI GAUNA BADINAIA

BAIBEL IA GWAU: “Hekwarahi ibounai ese davana namona idia henia noho, to hereva kava ese ogogami ia havaraia noho.” (Aonega Herevadia 14:23) Hekwakwanai hamaoromaoroa dala namona ta umui abia hidi sibona be hegeregere lasi. Namona be umui abia hidi dalana umui badinaia danu. Unai umui karaia be mai ena hekwarahi, to unai ese anina namona do ia havaraia. (Aonega Herevadia 10:4) Bema umui gaukara hebou, emui hekwarahi ena ‘davana namona’ do umui abia.​—Hadibaia Tauna 4:9.

OI KARAIA DIBA GAUNA:

• Hekwakwanai hamaoromaoroa totona, umui ta ta ese do umui badinaia diba daladia umui abia hidi

• Umui sekea loulou, dahaka gaudia umui hanamoa be namo