Moale Karadia Maorodia Abia Hidi Dalana

1, 2. Moale karadia dekenai, dahaka abia hidi ita karaia be namo?

OI URA au huahua namona ta, hegeregere apolo oi ania, to oi itaia ena kahana be ia bodaga. Dahaka do oi karaia? Oi be inai oi karaia diba: Apolo ibounai, ena bodaga kahana danu do oi ania sibona; eiava apolo ibounai do oi negea; eiava apolo ena bodaga kahana oi utua oho bona kahana namona sibona do oi ania. Edena do oi abia hidi?

² Miusiki, muvi bona moale karadia haida be unai apolo bamona. Nega haida, oi ura moale karana ta oi karaia, to oi itaia hari inai negai moale karadia momo lalonai matabodaga karadia idia karaia. Dahaka do oi karaia? Taunimanima haida be inai tanobada ena moale karadia ibounai idia abia dae sibona. Haida be ibounai idia dadaraia badina idia ura lasi kara dikana ta idia moalelaia. Ma haida be moale karadia dikadia idia dadaraia, to nega ta ta moale karana maorona ta idia abia dae. Dirava ena lalokau lalonai oi noho totona, edena dala do oi abia hidi?

3. Dahaka gaudia do ita stadilaia?

³ Reana, ita momo be moale karadia dikadia do ita dadaraia bona moale kara maorodia do ita abia dae. Ita laloparara, moale karadia haida ita karaia be namo, to namona be moale karadia maorodia sibona ita abia hidi. Unai dainai, namona be ita tahua edena moale karadia be maoro bona edena be kerere. To guna, namona be ita tahua moale karadia ese edena dala ai iseda tomadiho karana Iehova dekenai idia hanamoa o hadikaia diba.

“GAU IBOUNAI DO UMUI KARAIA DIRAVA HANAMOA TOTONA”

4. Moale karadia oi ura abia hidi neganai, edena dala ai emu gwauhamata ese oi ia durua diba?

⁴ Lagani 1946 ai ia bapatiso Witnes burukana ta ia gwau: “Egu lalona lau hadaia, bapatiso tok ibounai dekenai lau noho bona lau kamonai namonamo, egu bapatiso negana hegeregerena.” Dahaka dainai? Ia gwau: “Egu gwauhamata lau laloa karana ese lau ia hagoadaia Iehova lau badinaia noho totona.” Reana oi be unai lalohadai oi abia dae danu. Oiemu mauri ibounai lalonai Iehova do oi hesiai henia gwauhamatana oi laloa lou karana ese oi do ia hagoadaia oi haheauka noho totona. (Hadibaia Tauna 5:4; Heberu 10:7) Momokani, emu gwauhamata oi laloa dobu karana ese oi ia durua emu haroro gaukara bona emu mauri lalonai oi karaia gaudia ma haida, hegeregere moale karadia oi lalohadailaia namonamo totona. Paulo be ena negai idia noho Keristani taudia ia tore henia neganai, unai hereva ia hamomokania, ia gwau: “Umui aniani o umui inuinu, o dahaka dahaka umui karaia neganai, inai gau ibounai do umui karaia Dirava hanamoa totona.”—1 Korinto 10:31.

5. Edena dala ai Levitiko 22:18-20 ese ita ia durua Roma 12:1 ena sisiba ita lalopararalaia totona?

⁵ Emu mauri lalonai oi karaia gaudia ibounai be mai anina bada Iehova tomadiho henia karana dekenai. Unai dainai, Paulo be Roma kongrigeisen ia tore henia neganai, mai anina bada herevana ta ia gwauraia. Idia ia sisiba henia: “Emui tauanina umui henia Dirava dekenai. Boubou gauna bamona do umui henia, mai mauri bona mai helaga danu, Dirava umui dekenai do ia moale totona. Inai bamona tomadiho momokani Dirava dekenai umui henia be namo.” (Roma 12:1) “Tauanina” ena anina be emu lalona, kudouna bona goada, bona idia ibounai oi gaukaralaia Dirava oi hesiai henia totona. (Mareko 12:30) Paulo ia hahedinaraia iseda tauanina be “boubou gauna” ta bamona Iehova dekenai ita henia. Unai be sisiba hereva badana, badina Mose ena Taravatu lalonai boubou gauna mai ena bero o toto be Dirava ese ia abia dae lasi. (Levitiko 22:18-20) Unai hegeregerena, bema Keristani tauna ta ena boubou gauna be dala ta ai ia miro, Dirava ese do ia dadaraia. Edena dala ai ia miro diba?

6, 7. Edena dala ai Keristani tauna ese ena tauanina ia hamiroa diba, bona dahaka dika do ia davaria?

⁶ Paulo ese Roma Keristani taudia ia sisiba henia: “Emui mauri [“tauanina ena,” NW] kahana ta umui henia lasi kara dika dekenai, dika do ia karaia totona.” Danu Paulo ese idia ia hamaoroa: “Tauanina ena kara umui hamasea.” (Roma 6:12-14; 8:13) Iena revareva matamanai “tauanina ena kara” ena haheitalai haida ia gwauraia. Kara dika taudia ia herevalaia neganai, ia gwau: “Edia uduna be, taunimanima hadikaia bona hereva dagedage dekenai idia honu. Taunimanima alaia totona, edia aena idia heau haraga.” “Dirava dekenai gari henia kara idia laloa lasi.”a (Roma 3:13-18) Keristani tauna be ena tauanina do ia hamiroa bema ena “tauanina ena kahana ta” ia gaukaralaia unai bamona kara dikadia ia karaia totona. Hegeregere, hari bema Keristani tauna ta be mai ena ura ida matabodaga laulaudia o ponografi eiava dagedage muvi ia raraia momo, ia be “[ena matana] ia henia kara dika dekenai” bona iena tauanina ibounai ia hamiroa noho. Tomadiho dalanai ia henia boubou gauna be ia helaga lasi bona Dirava ese do ia abia dae lasi. (Deuteronomi 15:21; 1 Petero 1:14-16; 2 Petero 3:11) Keristani tauna ese moale karadia dikadia ia abia hidi dainai ena hetura karana Iehova ida ia hadikaia diba!

⁷ Oibe, bema ita ese moale karadia dikadia ita abia hidi, Iehova ita rakatania diba. Unai dainai ita ura moale karadia maorodia, iseda boubou gauna Dirava dekenai do ia hamiroa lasi gaudia unai, ita abia hidi. Namona be hari edena moale karadia be maoro bona edena be kerere ita tahua.

“DIKA DO UMUI NEGEA MOMOKANI”

8, 9. (a) Moale karadia be edena kahana rua ai ita atoa diba? (b) Edena moale karadia ita dadaraia be namo, bona dahaka dainai?

⁸ Moale karadia be kahana rua ai ita atoa diba: (1) Moale karadia haida be Keristani taudia ese idia dadaraia momokani bona (2) moale karadia haida be Keristani taudia ese do idia lalohadailaia namonamo guna bena gabeai abia hidi idia karaia. Namona be Keristani taudia ese idia dadaraia momokani moale karadia ita herevalaia guna.

⁹ Karoa 1 ese ia hahedinaraia bamona, moale karadia haida be Baibel ese ia taravatua. Unai gaudia haida be Internet ena Web sait haida, muvi haida, TV program haida, dagedage karadia bona demoni idia tomadiho henia miusiki dikadia. Unai bamona moale gaudia lalonai Baibel ena hakaua herevadia o taravatu ia utua karadia haida idia hahedinaraia bona toana be idia dika lasi, to Keristani taudia be unai bamona moale karadia idia dadaraia be namo. (Kara 15:28, 29; 1 Korinto 6:9, 10; Apokalupo 21:8) Unai gaudia oi dadaraia neganai, Iehova dekenai oi hahedinaraia “dika do oi negea momokani” bona hanaihanai kara dika do oi inai henia. Unai amo, “abidadama korikori” do oi dogoatao noho.—Roma 12:9; Salamo 34:14; 1 Timoteo 1:5.

10. Moale karadia dekenai edena bamona lalohadai ita dadaraia be namo, bona dahaka dainai?

¹⁰ To, haida idia laloa matabodaga laulau o muvi idia itaia karana be dika ta do ia havaraia lasi. Idia gwau, ‘Unai kara be muvi o TV dekenai lau raraia sibona, to do lau karaia lasi.’ Unai bamona lalohadai be kerere bona unai bamona ia laloa tauna be sibona ia koia noho. (Ieremia 17:9) Bema ita be Iehova ese ia taravatua karadia ita moalelaia, ita be “dika ita negea momokani,” a? Bema kara dikadia ita itaia, edia sivarai ita duahia, o kamonai loulou neganai, unai ese iseda lalomamina do ia hadikaia diba. (Salamo 119:70; 1 Timoteo 4:1, 2) Danu, iseda kara namo ia hadikaia diba eiava do ita laloa haida ese idia karaia kara dika be ia dika momokani lasi.

11. Edena dala ai Galatia 6:7 ena hereva moale karadia dekenai be ia momokani?

¹¹ Keristani taudia haida dekenai unai ia vara. Idia be matabodaga karadia idia karaia, badina TV o muvi dekenai unai kara idia itaia momo. Baibel ia gwau: “Tau ta aniani uhena ia hadoa, vadaeni unai bamona aniani sibona be do ia abia.” (Galatia 6:7) Unai bamona taudia be edia kara dika ena davana idia abia neganai, unai siri ena anina idia lalopararalaia. To, oi be unai dika oi dadaraia diba. Bema emu lalona dekenai kara maoromaoro sibona oi laloa, emu mauri lalonai hahenamo momo do oi davaria.—Rau 77 ai, maua ladana “Edena Moale Karana Do Lau Abia Hidi?” itaia.

BAIBEL ENA HAKAUA HEREVADIA AMO ABIA HIDI KARAIA

12. Edena dala ai moale karadia dekenai Galatia 6:5 ena hereva ia momokani? Bona abia hidi ita karaia totona edeseniai hakaua herevadia ita tahua be namo?

¹² Hari be kahana namba 2 do ita herevalaia—moale karadia haida be Keristani taudia ese do idia lalohadailaia namonamo guna bena gabeai abia hidi idia karaia. Unai gaudia dekenai Baibel ese taravatu ta ia atoa lasi. Keristani tauna be unai bamona moale karadia ia ura karaia neganai, ia sibona ese abia hidi do ia karaia edena be namo bona edena be dika. (Galatia 6:5) To, unai abia hidi ita karaia gwauraia neganai, Baibel lalonai hakaua herevadia, o hereva momokani idia noho ita idia durua totona, unai amo Iehova ena lalohadai ita abia. Unai hakaua herevadia ita badinaia neganai, moale karadia bona gau ibounai dekenai “Iehova ena ura” do ita lalopararalaia.—Efeso 5:17.

13. Dahaka ese ita do ia durua Iehova ese ia inai henia moale karadia ita dadaraia totona?

¹³ Namona be ita abia dae Keristani taudia edia lalomamina, diba maoromaoro bona laloa kehoa be idauidau. (Filipi 1:9, NW) Unai dainai, Keristani taudia idia laloparara moale karadia dekenai idia ta ta edia ura gaudia be idauidau. Namo lasi ita laloa Keristani taudia ibounai be abia hidi tamona do idia karaia. Danu, Dirava ena hakaua herevadia ese iseda lalona bona kudouna ia biagua neganai, do ita ura Iehova ese ia inai henia moale karadia ita dadaraia.—Salamo 119:11, 129; 1 Petero 2:16.

14. (a) Moale karadia ita abia hidi neganai, dahaka ita laloa be namo? (b) Edena dala ai iseda mauri lalonai Basileia gaudia ita atoa guna diba?

¹⁴ Moale karadia oi abia hidi neganai, mai anina bada gauna ta oi laloa danu be namo: Emu nega. Oi abia hidi moale karana ese ia hahedinaraia oi be dahaka gaudia oi abia dae, bona unai gaudia oi karaia totona bema nega bada oi haorea, unai ese ia hahedinaraia oi be edena gaudia oi laloa bada. Keristani taudia dekenai, Dirava tomadiho henia karana be mai anina bada bona edia mauri lalonai idia atoa guna. (Mataio 6:33) Dahaka oi karaia diba, unai amo emu mauri lalonai Dirava ena Basileia do oi atoa guna? Aposetolo Paulo ia gwau: “Emui kara do umui naria namonamo. Aonega taudia bamona do umui noho, kavakava taudia bamona lasi. Harihari emui nega namona ia noho Dirava ena kara do umui karaia totona. Emui nega do umui haorea kava lasi.” (Efeso 5:15, 16) Momokani, bema moale karadia totona nega sisina oi haria, nega bada do ia noho “mai anina bada gaudia”—emu hetura karana Dirava ida idia hagoadaia gaudia unai—oi karaia totona.—Filipi 1:10, NW.

15. Dahaka dainai moale karadia ita abia hidi neganai, ita tahua namonamo guna be aonega karana?

¹⁵ Moale karadia ita abia hidi neganai, namona be do ita tahua namonamo, unai amo ita diba momokani unai moale karana be ia namo o ia dika. Au huahua ena haheitalai mani ita laloa lou. Oi ura lasi au huahua ena bodaga kahana oi ania dainai, bodaga kahana bona apolo ena kahana namona sisina danu do oi utua oho. Unai hegeregerena, moale karadia ita abia hidi neganai, unai bamona ita karaia be namo. Mai ena aonega Keristani tauna be Baibel ena taravatu idia utua moale karadia sibona ia dadaraia lasi, to idia maoro momokani lasi bona ena hetura karana Iehova ida idia hadikaia diba moale karadia ia dadaraia danu. (Aonega Herevadia 4:25-27) Dirava ena Hereva oi badinaia neganai, oi do ia durua unai bamona oi karaia totona.

“KARA GOEVAGOEVA” ITA LALOA

16. (a) Edena dala ai ita hahedinaraia ita be Iehova ena lalohadai ita abia dae? (b) Edena dala ai Baibel ena hakaua herevadia badinaia karana be emu mauri lalonai oi manadalaia diba?

¹⁶ Keristani taudia korikoridia be moale karadia idia abia hidi neganai, Iehova ena lalohadai idia tahua guna. Baibel ese Iehova ena lalohadai bona taravatu ia hahedinaraia. Hegeregere, King Solomona be Iehova ese ia inai henia gaudia ia herevalaia, idia be ‘uduna mai ena koikoi, kerere lasi taudia alaia karana, kara dika karaia totona laloa idia karaia taudia bona kara dika karaia totona idia haraga momo taudia.’ (Aonega Herevadia 6:16-19) Edena dala ai Iehova ena lalohadai ese emu laloa dalana ia hamaoromaoroa diba? Salamo torea tauna ia gwau: “Iehova umui lalokau henia taudia e, dika umui inai henia.” (Salamo 97:10, NW) Namona be oi abia hidi moale karadia amo oi hahedinaraia oi be Iehova ese ia inai henia karadia oi inai henia danu. (Galatia 5:19-21) Namona be oi laloatao, taunimanima ese oi idia itaia lasi neganai oi karaia karadia ese idia hahedinaraia oi be edena bamona tauna. (Salamo 11:4; 16:8) Bema hanaihanai oi ese Baibel ena hakaua herevadia hegeregerena emu abia hidi oi karaia, vadaeni mai kudouna ibounai ida oi ura emu mauri lalonai oi karaia gaudia ese idia hahedinaraia oi be Iehova ena kara maoromaoro taravatudia oi laloa bada. Bona emu mauri lalonai unai kara do oi manadalaia.—2 Korinto 3:18.

17. Moale karadia ita do abia hidi lasi neganai, edena henanadai ita laloa be namo?

¹⁷ Ma dahaka gau haida oi karaia diba, unai amo do oi diba oi abia hidi moale karana be Iehova ena lalohadai hegeregerena? Inai henanadai mani oi laloa, ‘Edena dala ai unai moale karana ese egu hetura karana Dirava ida ia hadikaia diba?’ Hegeregere, muvi ta oi do itaia lasi neganai, sibona oi nanadaia, ‘Bema unai muvi lau itaia, egu lalomamina do ia hadikaia, a?’ Namona be ita itaia edena hakaua herevadia be ita do idia durua.

18, 19. (a) Edena dala ai Filipi 4:8 ena hakaua herevana ese ita ia durua diba moale karadia maorodia ita abia hidi totona? (b) Edena hakaua hereva ma haida ese oi idia durua? (Futnout itaia.)

¹⁸ Mai anina bada hakaua hereva ta be Filipi 4:8 (NW) ai, ia gwau: “Namona be inai gaudia do umui laloa noho: Momokani gaudia, mai anina bada gaudia, maoromaoro gaudia, kara goeva gaudia, lalokau gaudia, ladana namo gaudia, namo gaudia ibounai, bona taunimanima ese idia hanamoa be maoro gaudia.” Momokani, Paulo be moale karadia ia herevalaia lasi, to iseda kudouna ese idia laloa momo gaudia ia herevalaia. Namona be ita laloa dobu gaudia be Dirava ese ia ura henia gaudia. (Salamo 19:14) To, moale karadia ita abia hidi neganai, Paulo ena hereva ita badinaia diba. Edena dala ai?

¹⁹ Sibona oi nanadaia, ‘Lau abia hidi muvi, vidio gadara, miusiki, eiava moale karadia ma haida be lau idia durua “kara goeva gaudia” lau laloa totona, a?’ Hegeregere, muvi ta oi itaia murinai, emu lalona ai dahaka oi laloa noho? Bema oi laloa gaudia be goeva bona oi idia hamoalea, unai be muvi namona. To, bema oi raraia muvi be emu lalona ia veria gau dikadia oi laloa totona, vadaeni unai be muvi maorona lasi bona dika ia havaraia diba. (Mataio 12:33; Mareko 7:20-23) Dahaka dainai? Badina matabodaga gaudia oi laloa momo neganai, emu lalomamina bona emu hetura karana Iehova ida ia hadikaia diba bona do oi moale lasi. (Efeso 5:5; 1 Timoteo 1:5, 19) Bema unai bamona moale karadia ese emu lalomamina idia hadikaia, namona be emu lalona oi hadaia oi dadaraia totona.b (Roma 12:2) Namona be salamo torea tauna ena lalohadai oi tohotohoa, ia gwau: “Mani lau do oi durua, lau ese anina lasi gaudia do lau tahua lasi.”—Salamo 119:37.

HAIDA EDIA NAMO TAHUA

20, 21. Edena dala ai 1 Korinto 10:23, 24 ita badinaia diba?

²⁰ Gau haida ita abia hidi gwauraia neganai, namona be Paulo ese ia gwauraia mai anina bada hakaua herevana ta ita laloa. Ia gwau: “Gau ibounai be taravatu lasi, to idia ibounai ese namo do idia mailaia lasi. Gau ibounai be taravatu lasi, to idia ibounai ese ita idia hagoadaia lasi. Namo lasi ta be sibona ena namo ia tahua, to namona be ma ta ena namo ia tahua.” (1 Korinto 10:23, 24, NW) Edena dala ai moale karadia ita abia hidi gwauraia neganai, unai hakaua herevana ita badinaia diba? Namona be sibona oi nanadaia, ‘Lau abia hidi moale karana be edena dala ai ma haida do ia durua?’

²¹ Reana emu lalomamina ia abia dae moale karana ta be “taravatu lasi” o ia maoro. To, bema oi itaia tadikaka taihu edia lalomamina dekenai unai moale karana idia abia dae lasi, unai moale karana do oi dadaraia be namo. Dahaka dainai? Badina Paulo ia hereva bamona, oi ura lasi “oiemu Keristani varavara tauna dekenai oi kara dika”—o “Keriso oi hadikaia”—unai amo idia be Dirava idia badinaia noho diba. Namona be inai sisiba oi abia dae: ‘Dirava ena ekalesia taudia do umui hakaudia kerere lasi.’ (1 Korinto 8:12; 10:32) Hari inai negai, Keristani taudia korikoridia ese Paulo ena sisiba namona idia badinaia dainai, ena be moale karana ta be “taravatu lasi” to bema idia ia “hagoadaia lasi,” unai moale karana idia dadaraia.—Roma 14:1; 15:1.

22. Dahaka dainai Keristani taudia be ma haida edia lalohadai idauidau idia matauraia be namo?

²² To, ma haida edia lalomamina ita matauraia karana dekenai inai ita laloa danu be namo: Bema Keristani tauna ta ena lalomamina ese moale karadia momo ia taravatua, namo lasi ia ese Keristani kongrigeisen lalonai ma haida ia doria iena lalohadai idia abia dae totona. Bema ia be unai bamona ia karaia, ia be haiwei dekenai motuka taria tauna ta bamona, ia ura motuka taria taudia ma haida be iena motuka ena sipidi hegeregerena ai idia heau. Unai be lalohadai maorona lasi. Ena be Keristani tauna ta ena lalomamina be moale karadia momo ia abia dae lasi, to namona be Keristani lalokau dainai ma haida edia lalohadai moale karadia dekenai do ia matauraia, bema idia be Baibel ena hakaua herevadia idia utua lasi. Unai amo ‘taunimanima ibounai ese iena laloa maoromaoro karana do idia itaia.’—Filipi 4:5, NW; Hadibaia Tauna 7:16.

23. Dahaka do oi karaia moale karadia maorodia oi abia hidi totona?

²³ Dahaka oi karaia diba moale karadia maorodia oi abia hidi totona? Baibel ese ia gwauraia dika matabodaga karadia idia hahedinaraia moale karadia oi dadaraia be gau badana. Baibel ese ia gwauraia lasi moale karadia dekenai namona be Baibel ena hakaua herevadia oi badinaia. Oiemu lalomamina ia hadikaia moale karadia do oi dadaraia, bona tadikaka taihu ma haida edia lalomamina ese ia abia dae lasi moale karadia oi dadaraia danu be namo. Namona be oi abia hidi gauna ese Dirava ia hanamoa bona oi bona emu ruma bese be Iehova ena lalokau lalonai do umui noho.