Lohiabada Ena Anibou Ena Anina Oi Dekenai be Dahaka?
“Tau ta ese bema inai paraoa do ia ania, bona inai kapusi do ia inua mai ena kerere danu, ia ese Lohiabada ena tauanina bona iena rarana do ia hadikaia.”—1 KORINTO 11:27.
1. Lagani 2003 ai, edena anina bada hebouna do idia karaia, bona unai hebou be edena dala ai ia matamaia?
LAGANI 2003 ai mai anina bada hebouna be April 16 ai, dina ia diho neganai do idia karaia. Iehova ena Witnes taudia be unai nega ai Iesu Keriso ena mase ena Memorial totona do idia hebou. Hereva ginigunana ai ita itaia hegeregerena, Iesu bona ena aposetolo taudia ese Nisan 14, 33 C.E. ai, Pasova aniani idia karaia murinai, ia ese unai hebou, ena ladana ma ta be Lohiabada ena Anibou, ia hamatamaia. Memorial dekenai idia gaukaralaia hatubua lasi paraoa bona uaina kakakaka ese ia laulaulaia gaudia be Keriso ena tauanina goevadaena bona ena rarana—unai boubou gauna sibona ese taunimanima be idia abia kara dika bona mase amo ia ruhaia diba.—Roma 5:12; 6:23.
2. Dahaka sisiba be 1 Korinto 11:27 dekenai ia noho?
2 Unai Memorial paraoa idia ania bona uaina idia inua taudia be mai hemataurai ida unai idia karaia be namo. Aposetolo Paulo be idaunegai Korinto Keristani taudia ia tore henia neganai unai ia hahedinaraia goevagoeva, badina unuseniai Lohiabada ena Anibou be dala maorona ai idia badinaia lasi. (1 Korinto 11:20-22) Paulo ia gwau: “Tau ta ese bema inai paraoa do ia ania, bona inai kapusi do ia inua mai ena kerere danu, ia ese Lohiabada ena tauanina bona iena rarana do ia hadikaia.” (1 Korinto 11:27) Unai hereva ena anina be dahaka?
Haida ese Memorial Idia Matauraia Lasi
3. Lohiabada ena Anibou dekenai Korinto Keristani taudia edia kara be edena bamona?
3 Korinto Keristani taudia momo be Memorial gaudia idia ania bona inua neganai, mai hemataurai ida idia karaia lasi. Nega ta, idia huanai idia parara, bona haida be edia adorahi aniani do idia mailaia bena hebou vairanai eiava lalonai do idia ania, bona nega momo idia aniani bona inuinu badabada. Idia edia lalona be ia hegaegae lasi bona lauma dalanai idia noga lasi danu. Unai dainai ‘Lohiabada ena tauanina bona iena rarana idia hadikaia.’ Adorahi aniani idia ania lasi taudia be idia hitolo bona hebou idia laloa lasi. Oibe, momo idia aniani bona inuinu neganai, mai hemataurai ida idia karaia lasi bona unai hebou badana ena anina idia laloa lasi. Unai dainai hahemaoro hereva aukadia idia abia!—1 Korinto 11:27-34.
4, 5. Dahaka dainai Memorial paraoa idia ania bona uaina idia inua hanaihanai taudia be sibona idia tahua namonamo be gau badana?
4 Lagani ta ta ai Memorial dinana ia kahirakahira neganai, namona be paraoa idia ania bona uaina idia inua taudia be sibona edia kara idia tahua namonamo be namo. Dala maorona ai unai anibou ena aniani idia abia totona, lauma dalanai idia namo be gau badana. Iesu ena boubou gauna dekenai hemataurai lasi karana, eiava gwau-edeede karana, ia hahedinaraia tauna be “Dirava ena bese dekena amo do idia atoa siri” diba, hegeregere idaunegai Israela tauna dekenai idia karaia bamona, bema ia goeva lasi negana ai maino karaia boubou gauna ia ania.—Levitiko 7:20; Heberu 10:28-31.
5 Paulo ese Memorial be idaunegai Israela dekenai idia karaia anibou danu ia hahegeregerea. Ia gwau anibou taudia be Keriso lalonai idia aniani bona inuinu hebou, bena ma ia gwau: “Lohiabada ena kapusi bona lauma dikadia edia kapusi ruaosi nega tamona umui inua diba lasi. Lohiabada ena pata dekenai noho aniani, bona lauma dikadia edia pata dekenai noho aniani ruaosi be nega tamona umui ania diba lasi.” (1 Korinto 10:16-21) Bema Memorial paraoa ia ania bona uaina ia inua hanaihanai tauna ta be kara dikana ta ia karaia, namona be Iehova dekenai iena dika ia gwauraia hedinarai bona kongregesen naria tatau amo heduru ia tahua be namo. (Aonega Herevadia 28:13; Iamesi 5:13-16) Bema ia helalo-kerehai momokani bona helalo-kerehai karadia ia hahedinaraia, Memorial paraoa ia ania bona uaina ia inua neganai do ia kerere lasi.—Luka 3:8.
Mai Hemataurai ida Unai Kara Idia Itaia Taudia
6. Dirava ese daidia sibona dekenai dala ia kehoa Lohiabada ena Anibou lalonai idia aniani totona?
6 Hari inai negai, Keriso ena tadikaka 144,000 edia orena taudia idia kara namo henia taudia be Lohiabada ena Anibou lalonai paraoa idia ania bona uaina idia inua diba, a? (Mataio 25:31-40; Apokalupo 14:1) Lasi. Dirava ese unai hahenamo be lauma helaga amo ia horoa taudia sibona dekenai ia kehoa, idia be ‘Keriso ia abia hanamoa gaudia do idia abia’ totona. (Roma 8:14-18; 1 Ioane 2:20) Vadaeni, Basileia ena lohia siahuna henunai tanobada paradaisona ai do idia mauri hanaihanai helarona idia abia taudia be dahaka do idia karaia be maoro? (Luka 23:43; Apokalupo 21:3, 4) Idia be Iesu ida guba dekenai ahuna do idia abia taudia lasi, unai dainai Memorial dekenai idia lao neganai, idia be mai hemataurai ida unai anibou idia itaia taudia.—Roma 6:3-5.
7. Dahaka dainai aposetolo edia nega ai idia noho Keristani taudia idia diba Memorial paraoa idia ania bona uaina idia inua diba?
7 Aposetolo taudia edia negai, Keristani taudia momokanidia be lauma helaga amo idia horoa. Idia momo be lauma ena harihari gaudia ta eiava ma haida, hegeregere gado idauidau dekenai idia hereva karana, idia gaukaralaia. Unai dainai, unai taudia idia diba idia be lauma amo idia horoa taudia bona Memorial paraoa do idia ania bona uaina do idia inua diba. To, iseda nega lalonai, Dirava ena lauma amo idia vara herevadia amo unai idia dibaia diba, hegeregere inai bamona herevadia: “Dirava ena Lauma ese ia hakaua taudia be Dirava ena natuna. Badina be Dirava ese umui ia henia Laumana ese hesiai taudia mai gari danu umui ia halaoa lasi. Lasi, to Dirava ese umui ia henia Laumana ese Dirava ena natuna umui ia halaoa vadaeni. Unai dainai Lauma ena siahu dekena amo, Dirava dekenai ita hereva henia neganai, ‘Tamagu e, lauegu Tamana lalokau e!’ ita gwauraia diba.”—Roma 8:14, 15.
8. Mataio karoa 13 dekenai, “uiti” be daidia ia laulaulaia bona “ava” be daidia ia laulaulaia?
8 Lagani handred momo lalonai, “ava,” eiava Keristani koikoi taudia, edia huanai horoa taudia korikoridia be “uiti” bamona idia tubu. (Mataio 13:24-30, 36-43) Lagani 1870 bamona amo, “uiti” ena toana ia hedinarai namonamo, bona lagani ma haida murinai horoa Keristani naria taudia dekenai inai hereva idia gwauraia: “Namona be elda taudia . . . ese [Memorial totona] idia hebou taudia dekenai inai hereva do idia atoa—(1) [Keriso ena] rarana dekenai idia abidadama; bona (2) Lohiabada bona ena hesiai gaukara totona idia helaga, ela bona idia mase. Bena idia ese unai bamona idia laloa bona unai bamona idia helaga taudia do idia boiria Lohiabada ena mase idia laloa totona.”—Studies in the Scriptures, Kahana VI, The New Creation, rau 473.a
“Mamoe Idaudia” Tahua Karana
9. Lagani 1935 ai idia hahedinaraia “hutuma bada herea” be daidia, bona unai dainai guna Memorial paraoa idia ania bona uaina idia inua taudia be dahaka idia karaia?
9 Gabeai, Iehova ena orea be Keriso ena murinai idia raka horoa taudia sibona lasi to ma haida danu idia laloa bada. Unai gauna be lagani 1935 bamona ai ia hedinarai badabada. Lagani 1935 ia do abia lasi neganai, Dirava ena taunimanima idia laloa Apokalupo 7:9 (NW ) ese ia gwauraia “hutuma bada herea” be lauma dalanai orea iharuana taudia bona idia toreisi lou vadaeni taudia 144,000 ida guba dekenai do idia hakapua taudia—hegeregere Keriso do ia adavaia kekenina ena turadia bamona. (Salamo 45:14, 15; Apokalupo 7:4; 21:2, 9) To May 31, 1935 ai, Washington, D.C., U.S.A. dekenai, Iehova ena Witnes taudia edia hebouhebou ta dekenai idia gwauraia herevana ta lalonai, Baibel amo idia hahedinaraia unai “hutuma bada herea” be nega ena dokona ai idia noho “mamoe idaudia” ia gwauraia. (Ioane 10:16) Unai hebouhebou murinai, guna Memorial paraoa idia ania bona uaina idia inua taudia haida be unai kara idia hadokoa, badina idia lalo-parara edia helaro be tanobada maurina do idia abia, guba maurina lasi.
10. Iseda negai idia noho “mamoe idaudia” taudia edia helaro bona maduna be edena bamona oi gwauraia diba?
10 Lagani 1935 amo, “hutuma bada herea” taudia idia tahua badabada matamaia, bona unai taudia be mauri davalaia boubou gauna idia abidadama henia, Dirava dekenai edia mauri idia gwauhamatalaia, bona Basileia harorolaia gaukarana ai “orea maragi” taudia idia durua. (Luka 12:32) Unai mamoe idaudia taudia edia helaro be tanobada ai do idia mauri hanaihanai, to idia be ma gau haida dekenai hari idia noho orena taudia, Basileia do idia abia taudia, bamona idia karaia. Idaunegai Israela ai idia noho idau bese taudia ese Iehova idia tomadiho henia bona Taravatu idia badinaia bamona, hari mamoe idaudia taudia be Keristani maduna idia abia dae, hegeregere lauma Israela taudia ida sivarai namona idia harorolaia. (Galatia 6:16) To, idau bese tauna ta be Israela ena king eiava hahelaga tauna ai ia lao diba lasi hegeregerena, mamoe idaudia taudia danu be Basileia lalonai idia lohia diba lasi eiava hahelaga gaukara idia karaia diba lasi.—Deuteronomi 17:15.
11. Dahaka dainai ta ese Dirava dekenai ena mauri ia gwauhamatalaia dinana ese iena helaro ia hahedinaraia diba?
11 Lagani 1930 murinai ia hedinarai matamaia, guba oreana idia abia hidi vadaeni. Hari idia hanaia laganidia momo lalonai, mamoe idaudia tahua gaukarana ia heau noho, bona unai taudia be tanobada helarona idia abia taudia. Bema horoa tauna ta be ena abidadama ia negea, toana be Dirava ese mamoe idaudia amo nega daudau lalonai mai ena kamonai ida Iehova ia hesiai henia tauna ta do ia boiria, 144,000 taudia edia namba hagugurua totona.
Haida Idia Laloa Kerere Ena Badina
12. Edena bamona hemami dainai ta ese Memorial paraoa ia ania lasi bona uaina ia inua lasi be namo, bona dahaka dainai?
12 Horoa Keristani taudia idia diba momokani idia be guba maurina totona idia boiria taudia. To, bema haida be unai bamona idia boiria lasi to Memorial paraoa idia ania bona uaina idia inua be edena bamona? Hari idia diba idia be unai guba helarona idia abia lasi dainai, edia lalona ena mamina ese idia do ia hadibaia unai kara idia hadokoa totona. Bema tau ta ia diba momokani Dirava ese ia boiria lasi, to ia sibona ia gwau Dirava ese ia boiria guba ai king bona hahelaga tauna ai ia lao totona, unai tauna be Dirava ese do ia lalo-namo henia lasi. (Roma 9:16; Apokalupo 20:6) Iehova ese Levi tauna Kora ia hamasea badina mai hekokoroku ida Arona ena hahelaga gaukarana ia ura abia. (Esodo 28:1; Numera 16:4-11, 31-35) Bema Keristani tauna ta ia diba ia be dala kererena ai Memorial paraoa ia ania bona uaina ia inua, namona be unai do ia hadokoa bona mai manau ida Iehova ia guriguri henia, ena dika ia gwauatao totona.—Salamo 19:13.
13, 14. Dahaka dainai haida idia laloa idia be guba maurina totona idia boiria taudia?
13 Dahaka dainai haida idia laloa idia be guba maurina totona idia boiria taudia? Unai bamona taudia be reana adavana ena mase eiava dika ma ta dainai tanobada ena mauri idia ura henia lasi. Eiava edia turana namona ta ia gwau ia be horoa tauna dainai idia ura ia ida gabu tamona idia lao. Momokani, Iehova ese tau ta ia abia hidi lasi unai hahenamo idia abia taudia ia makaia totona. Bona ia ese Basileia abia taudia ia horoa neganai, gadona ta idia kamonai amo unai horoa karana ia hamomokania lasi.
14 Tomadiho hahediba hereva koikoina ta be taunimanima namodia ibounai be guba dekenai do idia lao dainai, reana haida idia laloa idia danu be guba maurina totona idia boiria. Unai dainai, namona be ita naria namonamo, lalohadai kereredia eiava ma gau haida ese ita idia koia garina. Hegeregere, reana haida be sibona idia nanadaia diba: ‘Muramura haida lau abia noho dainai unai ese egu hemami ia haidaua, a? Nega momo hemami goadana ta lau abia bona unai hemami lau laloa kerere diba, a?’
15, 16. Dahaka dainai haida idia gwau idia be horoa taudia?
15 Reana haida be sibona idia nanadaia diba: ‘Lau ura ladana bada lau abia, a? Hari ia noho siahuna eiava gabeai Iesu ida do idia abia siahuna lau ura henia dikadika, a?’ Dirava ese Basileia do idia abia taudia ia boiria neganai, idia momo be kongregesen dekenai gaukara badadia idia abia lasi. Bona guba maurina totona idia boiria taudia be ladana bada idia tahua lasi eiava idia horoa dainai idia heagi lasi. Idia be “Keriso ena laloa [idia] abia” taudia edia manau karana idia hahedinaraia.—1 Korinto 2:16.
16 Reana haida idia gwau idia be guba maurina totona idia boiria taudia badina Baibel amo diba bada herea idia abia. To, lauma amo idia horoa tauna be hoa dalanai ena lalo-parara ia bada herea lasi, badina Paulo ese horoa taudia haida be ia hadibaia bona ia sisiba henidia. (1 Korinto 3:1-3; Heberu 5:11-14) Iehova be ena taunimanima edia lauma aniani ia henia dalana ta ia atoa vadaeni. (Mataio 24:45-47) Unai dainai ta do ia laloa lasi ia be Keristani horoa tauna ta dainai iena aonega ese tanobada helarona idia abia taudia edia aonega ia hereaia. Ta ese Baibel henanadai ia haerelaia namonamo, ia haroro namonamo, eiava hereva ia henia namonamo karadia ese idia hamomokania lasi ia be horoa tauna. Tanobada helarona idia abia taudia danu be unai gaudia idia karaia namonamo diba.
17. Lauma amo ta idia horoa karana be edena bamona ia vara bona daika dekenai ia vara?
17 Bema iseda Keristani tadikaka ta be guba maurina totona ia henanadai, elda ta eiava Keristani goadana ta ida unai idia herevalaia diba. To, tau ta ese ma ta totona unai gauna do ia abia hidi diba lasi. Guba maurina totona idia boiria tauna be unai hamomokania totona ma haida do ia nanadaia be anina lasi. Idia be idia “vara matamata lou, bodaga gauna amo lasi, to bodaga lasi [bona] havaraia lou diba uhena amo, mauri bona noho hanaihanai Diravana ena hereva lalona amo.” (1 Petero 1:23, NW ) Dirava ese ena lauma amo unai tauna be “tau matamatana” ai do ia halaoa “uhena” ia hadoa, bona guba helarona ia henia. (2 Korinto 5:17) Bona Iehova ese unai tauna ia abia hidi. Unai horoa karana be “taunimanima edia ura dainai, o edia kara dainai lasi, to inai be Dirava ena bogahisihisi dainai sibona.” (Roma 9:16) Vadaeni ta be edena bamona do ia diba momokani ia be guba maurina totona idia boiria tauna?
Horoa Taudia Idia Diba Momokani Ena Badina
18. Edena dala ai Dirava ena lauma bona horoa taudia edia lauma idia hereva hebou?
18 Dirava ena lauma ese horoa Keristani taudia ia hadibaia momokani idia be guba helarona idia abia taudia. Paulo ia gwau: “Dirava ese umui ia henia Laumana ese Dirava ena natuna umui ia halaoa vadaeni. Unai dainai Lauma ena siahu dekena amo, Dirava dekenai ita hereva henia neganai, ‘Tamagu e, lauegu Tamana lalokau e!’ ita gwauraia diba. Dirava ena Lauma, bona iseda lauma danu idia hereva hebou, idia gwauraia, ita be Dirava ena natuna. Bema ita be Dirava ena natuna neganai, ita ese Dirava ena bese taudia do idia abia hanamoa gaudia be ita danu do ita abia, bona Dirava ese Keriso ia henia hanamoa gaudia do ita abia danu. Badina bema Keriso danu ita hisihisi nega tamona, be ia danu iena hairaina do ita abia nega tamona.” (Roma 8:15-17) Lauma helaga ena hakaua henunai, unai lauma, eiava lalohadai mai siahuna, ese horoa taudia ia veria, Baibel lalonai Iehova ena lauma natudia totona ia gwauraia herevadia edia anina idia dekenai idia hamomokania totona. (1 Ioane 3:2) Dirava ena natuna ai idia lao ena hemami be iena lauma ese idia dekenai ia havaraia bona idia lalonai helaro idauna ia havaraia. (Galatia 4:6, 7) Oibe, tanobada ai mauri hanaihanai idia abia bona edia ruma bese taudia bona edia turadia be idia ida idia noho be namo herea, to unai be Dirava amo idia abia helarona lasi. Dirava ese ena lauma amo idia lalonai guba maurina ena helaro goadana ia havaraia dainai, mai edia ura ida tanobada ai idia abia hetura karadia bona idia karaia diba gaudia ibounai idia rakatania.—2 Korinto 5:1-5, 8; 2 Petero 1:13, 14.
19. Keristani horoa taudia edia mauri dekenai gwauhamata matamatana ena anina be dahaka?
19 Horoa Keristani taudia be edia guba helarona idia daradaralaia lasi, idia diba gwauhamata matamatana lalonai idia abia vareai vadaeni. Iesu ese Memorial ia hamatamaia neganai ia gwauraia, ia gwau: “Inai kapusi be maino karaia gwauhamata matamatana lauegu rarana dekenai, umui totona do ia bubua.” (Luka 22:20) Unai gwauhamata matamatana idia karaia taudia be Dirava bona horoa taudia. (Ieremia 31:31-34; Heberu 12:22-24) Iesu be huanai ia gini tauna. Keriso ena rara dainai, unai gwauhamata be dala ia karaia Iuda taudia amo bona idau bese taudia amo danu taunimanima haida idia haboua, Iehova ena ladana abia totona bona Aberahamo ena “natuna” ai idia lao totona. (Galatia 3:26-29; Kara 15:14) Unai “noho hanaihanai gwauhamata” ese dala ia kehoa lauma Israela taudia idia toreisi lou, bona guba dekenai doko diba lasi maurina idia abia totona.—Heberu 13:20.
20. Horoa taudia be Keriso ida edena gwauhamata lalonai idia vareai?
20 Horoa taudia be edia helaro idia diba momokani. Idia be gwauhamata ma ta lalonai idia vareai danu, bona unai be Basileia gwauhamatana. Keriso ida do idia abia gaudia dekenai Iesu ia gwau: “Metau bona dibagani be lau dekenai idia ginidae negadia lalonai, umui ese lau umui badinaia noho, lau umui rakatania lasi. Unai dainai, egu Tamana ese Basileia ta ia henia lau dekenai hegeregerena, lau danu Basileia ta lau henia inai, umui dekenai.” (Luka 22:28-30) Unai gwauhamata, Keriso bona ia ida do idia lohia hebou king taudia ida ia karaia gwauhamatana, be do ia gini hanaihanai.—Apokalupo 22:5.
Memorial Negana—Moale Bada Negana
21. Edena dala ai Memorial negana lalonai namo bada ita davaria diba?
21 Memorial negana ai gau momo ita moalelaia diba. Unai nega lalonai idia makaia Baibel duahiduahi amo namo bada ita abia diba. Unai be nega namona guriguri, Iesu ena mauri bona mase lalohadailaia, bona Basileia harorolaia totona. (Salamo 77:12; Filipi 4:6, 7) Unai hebou ita karaia neganai, Dirava bona Keriso ese unai mauri davalaia boubou gauna amo idia hahedinaraia lalokauna ita laloa lou. (Mataio 20:28; Ioane 3:16) Unai harihari gauna dainai helaro bona goada ita abia bona namona be iseda lalona ia hagoadaia Keriso bamona ita raka totona. (Esodo 34:6; Heberu 12:3) Namona be Memorial ese ita ia hagoadaia ita, Dirava ena hesiai taudia, eda gwauhamata ita hagugurua totona bona mai kamonai ida iena lalokau Natuna ena murinai ita raka totona.
22. Dirava ese taunimanima dekenai ia henia harihari gauna hereadaena be dahaka, bona edena dala ta ai unai gauna totona iseda tanikiu karana ita hahedinaraia diba?
22 Iehova ese harihari gaudia namodia ia henia! (Iamesi 1:17) Iena hereva ese ita ia hakaua, iena lauma ese ita ia durua, bona mauri hanaihanai helarona ita abia. Dirava ena harihari gauna hereadaena be Iesu ena boubou gauna, horoa taudia bona abidadama idia hahedinaraia taudia ibounai edia dika gwauatao totona. (1 Ioane 2:1, 2) Unai dainai Iesu ena mase ena anina oi dekenai be dahaka? April 16, 2003, dina ia diho murinai, edia tanikiu karana idia hahedinaraia totona Lohiabada ena Anibou hebouna idia karaia taudia huanai do oi noho, a?
[Footnote]
a Iehova ena Witnes taudia ese idia halasia, to hari idia printaia lasi.
Emu Haere be Dahaka?
• Daika be Memorial paraoa ia ania bona uaina ia inua diba?
• Dahaka dainai “mamoe idaudia” be Lohiabada ena Anibou idia lao neganai mai hemataurai ida unai kara idia itaia sibona?
• Horoa Keristani taudia be edena bamona idia diba idia be Keriso ena mase ena Memorial dekenai paraoa idia ania diba bona uaina idia inua diba?
• Memorial negana be edena bamona nega namona?
[Graph/Pictures on page 18]
(For fully formatted text, see publication)
Memorial ai Idia Hebou Taudia
MILIONI
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Picture on page 10]
Inai lagani ai Lohiabada ena Anibou idia karaia neganai do oi noho, a?
[Pictures on page 13]
Memorial negana be nega namona Baibel duahiduahi bona Basileia harorolaia karadia habadaia totona