“Emui Abidadama Helagana Ena Latanai Emui Mauri Do Umui Haginia”

1, 2. Dahaka haginia gaukara oi karaia noho, bona dahaka dainai oi gaukara namonamo be mai anina bada?

OI BE oi gaukara goada ruma ta oi haginia totona. Unai gaukara be lagani haida lalonai oi karaia vadaeni bona nega vaira ai do oi karaia noho. Unai gaukara be ia auka, to oi moalelaia. Herevana dahaka ia vara, to emu lalona oi hadaia do oi hesiku lasi, badina bema gaukara namona oi karaia, hari bona vaira nega mauri namona do oi abia. To bema emu gaukara ia namo lasi, do oi moale lasi. Dahaka dainai? Badina oi haginia noho rumana be oi!

² Hahediba tauna Iuda be ita ia hagoadaia eda abidadama ita hagoadaia totona. Keristani taudia ia hagoadaia ‘Dirava ena lalokau lalonai do idia noho’ totona bona idia do ia durua gauna badana ia hahedinaraia. Ia gwau: “Emui abidadama helagana ena latanai emui mauri do umui haginia goada.” (Iuda 20, 21) Edena dala ai emu abidadama oi hagoadaia diba, unai amo Dirava ena lalokau lalonai do oi noho? Mani eda abidadama ita haginia goada daladia toi ita herevalaia.

IEHOVA ENA KARA MAOROMAORO TARAVATUDIA ABIDADAMA HENIA NOHO

3-5. (a) Satani ena koikoi dainai, Dirava ena taravatu be edena dala ai oi laloa kerere diba? (b) Edena dala ai Dirava ena taravatu ita laloa be namo, bona edena bamona unai ese ita do ia durua? Haheitalai gwauraia.

³ Gau ginigunana be, Dirava ena taravatu dekenai iseda abidadama ita hagoadaia be namo. Inai buka oi stadilaia lalonai, iseda kara idia biagua kara maoromaoro taravatu momo oi dibaia vadaeni. Iehova ena kara maoromaoro taravatudia dekenai dahaka oi laloa? Satani ia ura oi ia koia bona oi laloa Iehova ena taravatu bona hakaua herevadia be idia auka bona oi idia koua emu ura gaudia oi karaia totona. Ia ese unai koikoi dalana ia gaukaralaia Eden umana dekenai, bona unai nega amo ema bona hari unai dala ia gaukaralaia noho. (Genese 3:1-6) Unai koikoi dalana amo oi do ia hamorua, a? Emu lalohadai ese unai do ia hahedinaraia.

⁴ Mani inai haheitalai oi laloa: Uma gabu namo hereana ta lalonai oi loaloa neganai, magu badana ta oi itaia uma gabu ena kahana ta ia koua. Magu kahana ai ia noho gabu ena toana be namo herea bona oi ura oi vareai. Matamanai, reana oi laloa unai magu ese oiemu loaloa karana ia koua. To, unai magu lalona oi itaia neganai, dagedage laiona ta ia noho. Unai laiona be ia hunia bona ia ura animal haida ia ania! Hari oi laloparara unai magu be taunimanima gimaia totona idia haginia. Animal dikana ta be ia hunia bona ia ura oi ia ania gwauraia, a? Baibel be ita ia hadibaia, ia gwau: “Do umui laloa maoromaoro, bona naria namonamo. Umui dekenai ia tuari henia tauna, Satani, be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.”—1 Petero 5:8.

⁵ Satani be unai dagedage laiona bamona. Iehova ia ura lasi Satani ese ita do ia ania dainai, Ia ese taravatu ia henia Satani ena “koikoi karadia” amo ita ia gimaia totona. (Efeso 6:11) Unai dainai, Dirava ena taravatu ita laloa dobu neganai, do ita itaia iseda guba Tamana Iehova be ita ia lalokau henia dainai unai taravatu ia henia. Bema unai bamona ita laloa, eda mauri do ia namo bona do ita moale. Iamesi ia gwau: “Taravatu goevadaena, ura kwalimu gauna unai, ia itaia noho bona ia badinaia noho tauna, be unai bamona ia karaia dainai do ia moale.”—Iamesi 1:25, NW.

6. Dirava ena taravatu bona hakaua herevadia dekenai iseda abidadama ita hagoadaia dala namo hereana be dahaka? Haheitalai ta gwauraia.

⁶ Taravatu Henia Tauna bona ena taravatu edia namo dekenai iseda abidadama ita hagoadaia dalana hereadaena be, iseda mauri lalonai Dirava ena taravatu do ita badinaia. Hegeregere, “Keriso ena taravatu” ta be ma haida dekenai “ia henia hereva ibounai” do ita hadibaia. (Galatia 6:2; Mataio 28:19, 20) Keristani taudia ese idia badinaia taravatu ta be, hanaihanai tomadiho totona idia hebou bona ta ta idia hagoadaia. (Heberu 10:24, 25) Danu, Dirava ena taravatu ta be, hanaihanai mai iseda kudouna ibounai ida ia do ita guriguri henia. (Mataio 6:5-8; 1 Tesalonika 5:17) Unai taravatu ita badinaia neganai, do ita laloparara Iehova ena lalokau dainai unai hahegani ia henia. Ita badinaia dainai ita moale bona unai moale be inai lalohisihisi tanobadana lalonai ita davaria diba lasi. Dirava ena taravatu oi badinaia dainai oi davaria namo oi laloa dobu neganai, emu abidadama Dirava ena taravatu dekenai ia habadaia, ani?

7, 8. Edena dala ai idia laloa Iehova ena taravatu do idia badinaia be ia auka taudia be Baibel ese ia durua?

⁷ Nega haida, haida idia lalohekwarahi badina idia laloa lagani ta ta lalodiai Iehova ena taravatu idia badinaia be ia auka. Idia gari badina idia laloa nega ta kerere ta do idia karaia. Bema oi be unai bamona oi laloa, namona be inai hereva oi laloatao: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho. Egu oda hereva bema umui kamonai henia neganai, emui noho be do ia namo, mai maino danu, sinavai hegeregerena, bona emui kara maoromaoro be goada, davara ena hurehure bamona.” (Isaia 48:17, 18) Unai hereva ese oi do ia hagoadaia dalana oi lalohadailaia vadaeni, a?

⁸ Unai siri amo Iehova ia gwau, ia ita kamonai henia karana amo namo do ita davaria. Bema unai ita karaia, ia be ita dekenai hahenamo rua ia gwauhamatalaia. Ginigunana be: Iseda maino be sinavai bamona do ia aru hanaihanai. Iharuana be: Iseda kara maoromaoro be do ia goada, davara ena hurehure bamona. Bema kone dekenai oi gini bona oi itaia hurehure be kone dekenai ia daekau bona ia giroa lou neganai, oi diba hanaihanai hurehure be unai bamona do ia karaia, do ia doko diba lasi. Iehova ia gwau emu kara maoromaoro be hanaihanai unai bamona do ia noho. Bema Iehova oi abidadama henia noho, oi do ia durua oi kwalimu totona! (Salamo 55:22) Unai gwauhamata namodia ese emu abidadama Iehova bona ena kara maoromaoro taravatudia dekenai ia hagoadaia, ani?

“ITA HEKWARAHI NOHO LO TAUDIA AI ITA LAO TOTONA”

9, 10. (a) Dahaka dainai Keristani taudia be lo taudia ai idia lao be namo? (b) Edena dala ai Dirava ena lalohadai laloa bada karana ese moale ia havaraia diba?

⁹ Iseda abidadama ita hagoadaia dalana iharuana be inai siri ese ia hahedinaraia: “Ita hekwarahi noho lo taudia ai ita lao totona.” (Heberu 6:1, NW) Unai be Keristani tauna ese do ia tahua gauna namona. Hari inai negai goevadae taudia ai ita lao be hegeregere lasi, to lo taudia ai ita lao diba. Ma danu, Keristani taudia be lo taudia ai idia lao neganai, Iehova idia hesiai henia karana idia moalelaia bada. Dahaka dainai?

¹⁰ Lo Keristani tauna be Iehova ena lalohadai ia laloa bada. (Ioane 4:23) Paulo ia gwau: “Tauanina ena kara idia karaia noho taudia ese tauanina ena ura gaudia sibona idia laloa. To Lauma Helaga ena kara idia karaia noho taudia ese Lauma Helaga ena ura gaudia sibona idia laloa.” (Roma 8:5) Tauanina gaudia laloa momo karana ese moale do ia havaraia lasi. Badina unai bamona ia karaia tauna be hari inai nega sibona ia laloa, sibona ena ura gaudia, moni bona kohu ia laloa bada. To, Dirava ena lalohadai ia laloa bada tauna be ia moale, badina moale Diravana Iehova ena ura sibona ia tahua guna. (1 Timoteo 1:11) Lo Keristani tauna ia ura Iehova ia hamoalea bona herevana hahetoho ia davaria, to ia moale noho. Dahaka dainai? Badina hahetoho negadiai ia ese Satani ena hereva ia hakoikoia, ena abidadama ia hagoadaia bona ena guba Tamana ia hamoalea.—Aonega Herevadia 27:11; Iamesi 1:2, 3.

11, 12. (a) Paulo be Keristani tauna ena ‘lalona ia hadibaia lou, hadibaia lou’ karana dekenai dahaka ia gwau, bona unai hereva ena anina be dahaka? (b) Iseda tauanina ia goada bona ena kahana ta ta ita gaukaralaia namonamo totona, dahaka ita karaia be namo?

¹¹ Lo Keristani taudia ai ita lao totona, hadibaia lou hadibaia lou karana be mai anina bada. Inai siri mani oi laloa: “Aniani korikori be tau badadia idia ania diba. Idia sibona ese edia lalona idia hadibaia lou, hadibaia lou, ela bona idia manada vadaeni. Unai neganai idia be maoro bona kerere edia toana idia diba namonamo.” (Heberu 5:14) Paulo be iseda lalona hadibaia lou hadibaia lou karana ia herevalaia neganai, ia ese Greek herevana ta ia gaukaralaia. Unai hereva be guna Greece dekenai eksasais idia karaia rumana ai idia gaukaralaia momo. Unai hereva ena anina ta be ‘jimnasi gadara tauna ia treinini bamona.’ Jimnasi gadara tauna ena treinini karana mani ita laloa.

¹² Ita vara neganai, iseda tauanina be gau momo ia karaia diba lasi. Hegeregere, beibi be ena imana bona aena gaukaralaia dalana ia diba namonamo lasi. Unai dainai, ena imana ia davea kava, nega haida iena vairana ia botaia, ia hoa bona ia tai. To, ena tauanina kahana ta ta ia gaukaralaia loulou neganai, ia manada. Beibi ia rau, ia bada sisina neganai ia raka, bena ena aena idia goada neganai ia heau diba.a To, jimnasi tauna be edena bamona? Jimnasi spot tauna oi itaia, ia roho bona ia giroa goevagoeva neganai, oi laloparara ia be hora momo lalodiai ia treinini goadagoada ena tauanina be unai gadara ia manadalaia totona. Baibel ia gwau tauanina ia goada totona treinini ita karaia ese “ita do ia durua sisina.” To, Baibel amo iseda lalona ita hadibaia lou hadibaia lou be mai anina bada!—1 Timoteo 4:8.

13. Edena dala ai iseda lalona ita hadibaia lou hadibaia lou diba?

¹³ Inai buka lalonai, gau momo ita herevalaia vadaeni, bona unai ese oi do ia durua emu lalona oi hadibaia lou hadibaia lou totona. Unai oi karaia neganai, Iehova abidadama henia lo Keristani tauna ai do oi lao. Emu mauri dinadia ta ta lalonai oi ura abia hidi oi karaia neganai, namona be Dirava ena taravatu bona hakaua herevadia oi lalohadailaia bona oi gurigurilaia guna. Abia hidi ta oi ura karaia neganai, sibona oi nanadaia: ‘Edena Baibel taravatu o hakaua herevana be unai gauna ia herevalaia? Edena dala ai lau badinaia diba? Edena bamona kara ese egu guba Tamana do ia hamoalea?’ (Aonega Herevadia 3:5, 6; Iamesi 1:5) Abia hidi ta ta oi ura karaia totona unai gaudia oi lalohadailaia dainai, emu lalona ita hadibaia lou hadibaia lou, dahaka be maoro bona dahaka be kerere oi diba totona. Unai bamona oi karaia neganai, oi be lo Keristani tauna ai do oi lao.

14. Iseda abidadama ia goada noho totona, dahaka ita ura henia bada be namo, bona dahaka gaudia do ita dadaraia?

¹⁴ Ena be ita be lo taudia ai ita lao vadaeni, to hanaihanai iseda abidadama ita hagoadaia noho be namo. Tauanina dalanai ita tubu totona ita aniani be gau badana. Unai hegeregerena Paulo ia gwau: “Aniani korikori be tau badadia idia ania diba.” Emu abidadama oi hagoadaia noho totona, gau badana be Dirava ese ia henia aniani korikorina oi ania. Oi dibaia gauna oi badinaia neganai, unai be aonega karana, bona Baibel ia gwau: “Gau badana momokani be aonega.” Unai dainai, iseda Tamana ese ia henia hereva momokani ita ura henia bada be namo. (Aonega Herevadia 4:5-7; 1 Petero 2:2) To, Dirava amo ia mai aonega bona diba ita abia dainai, namo lasi ita heagi bona ita laloa ita be haida ita hereaia. Hanaihanai iseda kara ita tahua be namo, unai amo heagi o lalohadai kerere haida be iseda kudouna ai do idia tubu lasi. Paulo ia gwau: “Umui sibona emui kara do umui tahua, bona emui mauri do umui tohoa, umui be abidadama korikori taudia o lasi.”—2 Korinto 13:5.

15. Dahaka dainai iseda abidadama ia goada totona, lalokau ita hahedinaraia be gau badana?

¹⁵ Ena be ruma haginia gaukarana ia ore, to lagani momo lalodiai ruma ena dika gaudia ita hanamoa o bese ia bada ia lao bona ruma ita habadaia be gau badana. Lo taudia ai ita lao bona iseda abidadama ia goada totona, dahaka ia noho be namo? Lalokau be gau badana. Iseda lalokau Iehova dekenai bona iseda tadikaka taihu dekenai ita habadaia noho be gau badana. Bema ita be lalokau lasi, iseda diba bona gaukara ibounai be anina lasi, unai be regerege bada ita karaia kava bamona. (1 Korinto 13:1-3) Bema lalokau ita hahedinaraia, lo Keristani taudia ai ita lao bona eda abidadama do ia goada ia lao noho.

IEHOVA ESE IA HENIA HELARO OI LALOABOIO LASI

16. Satani be edena bamona lalohadai ia havaraia, bona Iehova be dahaka ia henia ita ia gimaia totona?

¹⁶ Iseda abidadama ita hagoadaia dalana ihatoina mani ita laloa. Iesu murinai raka namonamo tauna ai oi lao totona, emu laloa dalana oi naria namonamo be namo. Satani, inai tanobada biaguna, be taunimanima ia doria lalohadai kereredia idia abia totona, hegeregere idia laloa gau namona ta do ia vara lasi, ta ta idia abidadama henia lasi bona hanaihanai idia lalometau. (Efeso 2:2) Unai bamona lalohadai kereredia be Keristani tauna ta dekenai dika bada ia havaraia diba—ruma ta ena au o timba ia bodaga bona ruma ia hadikaia bamona. Ita moale badina Iehova be ita ia durua gauna ta ia henia—helaro.

17. Edena dala ai Baibel ese ia hahedinaraia helaro be mai anina bada? Haheitalai gwauraia.

¹⁷ Baibel ese Satani bona ena tanobada ita tuari henia totona ita hahedokilaia tuari dabua ena kahana ta ta ia herevalaia. Tuari dabua ena kahana badana be kwara gauna, “hahemauri helarona” unai. (1 Tesalonika 5:8, NW) Baibel negadiai, tuari tauna ia diba bema tuari lalonai ia be kwara gauna ia atoa lasi, do idia hamasea haraga. Kwara gauna be auri amo idia karaia bona animal ena kopina amo idia karaia hati latanai idia turia kau. Unai ese tuari tauna ena kwarana ia gimaia dainai bero ta do ia davaria lasi. Kwara gauna ese tuari tauna ena kwarana ia gimaia bamona, helaro ese emu lalona o emu lalohadai ia gimaia diba.

18, 19. Iesu be dahaka haheitalai namona ia hahedinaraia, bona edena dala ai ia ita tohotohoa diba?

¹⁸ Iesu be haheitalai hereadaena, badina hanaihanai ena helaro ia laloa bada. Tanobada ai ena hanuaboi ginigabena ai ia haheaukalaia hisihisina mani oi laloa. Iena turana namona ta be moni ia ura henia bada dainai, Iesu ia samania. Turana ma ta be Iesu ia gorea. Haida ese idia rakatania bona idia heau. Iena hanua taudia be ia idia dadaraia, bona idia boiboi bada Roma tuari taudia ese satauro ai idia hamasea totona. Ita gwau diba Iesu ia davaria hahetoho ese ita davaria hahetoho ia hanaia momokani. Dahaka ese ia durua ia haheauka totona? Heberu 12:2 ia gwau: “Iesu be satauro dainai ia hesiku lasi. Lasi momokani. Ia diba guba ena moale be iena vairanai ia noho dainai, ia ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho.” Iesu be iena vairanai ia noho “guba ena moale” ia laloaboio lasi.

¹⁹ Iesu vairanai dahaka moale ia noho? Ia diba bema hahetoho ia haheaukalaia, ia ese Iehova ena ladana do ia hahelagaia. Do ia hamomokania Satani be koikoi tauna. Unai helaro namona dainai Iesu ia moale bada! Danu ia diba, Iehova ese iena kara namona dainai do ia hanamoa. Unai hahenamo be vaira negana ai ia be ena Tamana ida do ia noho hebou lou. Nega dikadia lalonai, Iesu be unai helaro namona ia laloa bada. Ita danu be unai bamona ita karaia be namo. Ita danu be vaira negana ai ia noho moalena do ita laloa bada. Iehova ese ita ta ta dekenai iena ladana hahelagaia gaukarana ia henia—unai be hahenamo badana. Herevana dahaka hahetoho o hedibagani ita davaria, to bema Iehova ena lohia dalana ita abia dae bona iena lalokau lalonai ita noho, ita hamomokania Satani be koikoi tauna.

20. Dahaka ese oi ia durua diba lalohadai maorona oi abia bona emu helaro oi laloa bada noho totona?

²⁰ Iehova be ia ura bada ena abidadama hesiai taudia edia ahuna namona do ia henia. (Isaia 30:18; Malaki 3:10) Iehova be mai moale ida ena hesiai taudia edia kudouna ena ura gaudia namodia ia henia. (Salamo 37:4) Unai dainai, emu vairanai ia noho helaro namona do oi laloa bada noho. Satani ena tanobada dikana ena lalohadai gagevadia oi abia dae lasi. Bema oi itaia metairametaira inai tanobada ena lalohadai be emu lalona ai ia vareai noho, namona be “Dirava ena maino, lalohadai ibounai ia hereaia gauna” totona Iehova oi guriguri henia. Dirava ena maino ese emu kudouna bona laloa dalana do ia gimaia.—Filipi 4:6, 7, NW.

21, 22. (a) “Hutuma bada” taudia edia helaro namona be dahaka? (b) Unai helaro dekenai dahaka gauna oi ura henia bada, bona emu lalona oi hadaia dahaka oi karaia totona?

²¹ Unai be helaro namo hereana! Bema oi be “hisihisi badana” amo do oi roho mauri “hutuma bada” tauna ta, do oi abia mauri namona mani oi laloa. (Apokalupo 7:9, 14, NW) Satani bona ena demoni ibounai idia ore neganai, mauri namona do oi moalelaia—hari unai bamona mauri oi abia lasi. Oibe, ita ibounai be Satani ena hahetoho ena metau ita mamia. Unai dainai Satani ena hahetoho idia ore neganai, mai moale ida tanobada be paradaiso ai do ita halaoa bona unai gaukara be Iesu bona iena 144,000 guba lohia taudia ese do idia naria! Unai nega ai, do ita moale bada herea badina gorere idauidau do idia ore, mase amo iseda lalokau taudia do ita welkam henia, bona Dirava ena ura hegeregerena ai do ita noho! Danu, goevadae taudia ai ita lao neganai, ahuna namona ma ta do ita abia, unai be Roma 8:21 (NW) ese ia gwauraia—“Dirava ena natudia edia ura kwalimu hereadaena” do ita abia.

²² Iehova ia ura unai ura kwalimu do oi abia. Unai ura kwalimu oi abia totona, Dirava badinaia karana be mai anina bada. Unai dainai, hari inai negai oi hekwarahi dina ta ta ai Iehova oi badinaia totona be namo, ani? Vadaeni, namona be emu abidadama helagana do oi hagoadaia noho, unai amo Dirava ena lalokau lalonai do oi noho ela bona hanaihanai!