KAHANA 5
Emui Varavara ida Maino Umui Karaia Dalana
“Inai bamona kara be dabua bamona do umui hahedokilaia, . . . hariharibada, lalomanau, manau, bona boga-auka.”—Kolose 3:12
Tau bona hahine idia headava neganai, idia be ruma bese matamata ta. Ena be emu tama sina oi lalokau henidia bona matauraia, to headava murinai emu adavana do oi atoa guna be namo. Iseda varavara haida idia laloa tama sina be gau badana. To, Baibel ena hakaua herevadia ese oi do ia durua unai oi laloa namonamo totona. Unai amo emu varavara ida maino ai do umui noho, bona do oi gaukara goada oi bona emu adavana umui moale totona.
1 LALOHADAI MAORONA
BAIBEL IA GWAU: “Emu tamana bona emu sinana oi matauraia.” (Efeso 6:2) Herevana emu mauri lagani be hida, to hanaihanai emu tama sina oi matauraia be namo. Namona be oi laloparara, emu adavana be mai ena tama sina bona ia be edia natuna dainai, do ia durudia danu. Unai dainai, emu adavana be iena tama sina ia durua neganai oi badu lasi, badina “lalokau be ia mama lasi.”—1 Korinto 13:4; Galatia 5:26.
OI KARAIA DIBA GAUNA:
Inai hereva oi gwauraia lasi: “Emu famili be hanaihanai lau idia hadikaia” eiava “Emu sinana be lau karaia gaudia ia ura henia lasi”
Namona be emu adavana ena laloa dalana oi lalopararalaia toho
2 EMU HEADAVA OI GIMAIA
BAIBEL IA GWAU: “Tau ese tamana sinana do ia rakatania, iena adavana dekenai do ia noho, ruaosi be tauanina tamona do idia lao.” (Genese 2:24) Ena be oi headava vadaeni, to reana emu tama sina be idia laloa idia ese oi idia biagua noho be maoro. Unai dainai, emu headava lalonai gau haida idia vara neganai, idia ura edia lalohadai idia gwauraia danu, to unai be maoro lasi.
Emu adavana ida oi herevahereva bona umui abia hidi dahaka gaudia dekenai emui tama sina ese edia lalohadai idia gwauraia diba o lasi. Bena mai lalokau ida idia umui hadibaia. Tama sina oi hereva auka henidia lasi, to mai hemataurai ida umui herevahereva. (Aonega Herevadia 15:1) Manau, haheauka bona badu haraga lasi karadia ese oi do idia durua, oi bona emu varavara huanai maino do ia noho bona “mai lalokau ida umui ta ta emui kara do umui haheaukalaia.”—Efeso 4:2.
OI KARAIA DIBA GAUNA:
Bema oi itaia varavara be emui headava idia biagua momo, nega namona ta ai emu adavana ida unai do umui herevalaia
Mai lalotamona ida abia hidi umui karaia edena dala ai unai hekwakwanai do umui hamaoromaoroa