Dika Ia Vara Neganai

Ena be umui gaukara goada emui headava bona famili lalonai umui moale totona, to idia vara kava dika idauidau dainai hanaihanai umui moale be auka. (Hadibaia Tauna 9:11) Hekwakwanai ita davaria neganai, Dirava be mai lalokau ida heduru ia henia. Bema oi ese inai Baibel ena hakaua herevadia oi badinaia, oi bona emu ruma bese ese hekwakwanai do umui haheaukalaia, herevana ia be hekwakwanai badana.

1 IEHOVA DEKENAI OI TABEKAU

BAIBEL IA GWAU: “Emui lalohekwarahi ibounai be ia dekenai umui negea, badina ia be umui ia laloa bada.” (1 Petero 5:7) Laloatao, umui davaria hahetoho be Iehova ese ia havaraia lasi. (Iamesi 1:13) Ia kahirakahira oi lao noho neganai, ia ese dala maorona ai oi do ia durua. (Isaia 41:10) Baibel ia gwau: “Emui kudouna edia ura gaudia, be ia dekenai do umui hamaoroa.”​—Salamo 62:8.

Danu, dina ta ta ai Baibel oi duahia neganai, lalogoada do oi abia. Unai amo “iseda hisihisi ibounai lalonai [Iehova] ese ita dekenai lalogoada ia henia noho” dalana do oi mamia. (2 Korinto 1:3, 4; Roma 15:4) Ia gwauhamata “Dirava ena maino, laloparara ibounai ia hereaia gauna” be oi dekenai do ia henia.​—Filipi 4:6, 7, 13.

OI KARAIA DIBA GAUNA:

• Iehova oi guriguri henia oi dekenai goada ia henia oi laloa namonamo totona

• Do oi karaia diba gaudia oi lalodia lou namonamo, bona dala maorona oi abia hidi

2 OI SIBONA BONA EMU FAMILI OI NARIA

BAIBEL IA GWAU: “Lalona kehoa tauna ese, nega ibounai diba ia davaria noho. Aonega tauna ese, danu nega ibounai diba ia tahua noho.” (Aonega Herevadia 18:15) Gau ibounai oi tahua namonamo. Emu ruma bese taudia ibounai oi hereva henia, bona idia hereva neganai oi kamonai namonamo. Unai amo idia ta ta edia ura o dabu gaudia do oi dibaia.​—Aonega Herevadia 20:5.

To, bema emu lalokau tauna ta ia mase be edena bamona? Oi tai be kerere lasi. Iesu oi laloa, ia danu be “ena mata ranu ia diho.” (Ioane 11:35; Hadibaia Tauna 3:4) Danu, oi laga-ani bona mahuta namonamo be gau badana. (Hadibaia Tauna 4:6) Unai ese oi do ia durua emu lalometau oi haheaukalaia totona.

OI KARAIA DIBA GAUNA:

• Dika idia do vara lasi lalonai, namona be emu famili ida herevahereva hebou karana oi manadalaia. Unai amo dika ia vara neganai, idia dekenai do ia auka lasi oi idia hereva henia totona

• Guna, unai bamona dika idia davaria taudia oi hereva henia

3 HEDURU MAORONA OI TAHUA

BAIBEL IA GWAU: “Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.” (Aonega Herevadia 17:17) Reana oiemu turana be ia ura oi do ia durua, to ia diba lasi dahaka do ia karaia. Namona be oi ura gaudia be ia oi hadibaia. (Aonega Herevadia 12:25) Danu, Baibel idia diba namonamo taudia amo heduru oi tahua. Baibel amo do idia henia heduru ese oi ia durua diba.​—Iamesi 5:14.

Heduru oi abia diba bema hanaihanai Dirava bona ena gwauhamata idia abidadama henia taudia oi bamoa. Danu heduru idia abia be namo taudia oi durua neganai goada do oi abia. Idia dekenai emu abidadama Iehova bona ena gwauhamata dekenai oi herevalaia. Heduru idia ura taudia oi durua be namo, bona oi idia lalokau henia taudia amo oi daudau lasi be namo.​—Aonega Herevadia 18:1; 1 Korinto 15:58.

OI KARAIA DIBA GAUNA:

• Emu tura namona ta oi hereva henia bona ena heduru oi tahua

• Oi ura oi totona do idia karaia gaudia oi gwauraia namonamo