Famili ida Iehova Tomadiho Henia

Inai buklet amo oi dibaia vadaeni bamona, Baibel ai idia noho hakaua herevadia ese oi bona emu famili do idia durua. Iehova ia ura do umui moale. Ia gwauhamata, bema Iena tomadiho karana umui atoa guna, “unai gaudia ibounai be umui dekenai do ia henia.” (Mataio 6:33) Ia ura oi ese ia do oi tura henia. Namona be nega ibounai oi gaukara goada emu hetura karana Iehova ida ia goada totona. Unai be hahenamo badana.​—Mataio 22:37, 38.

1 EMU HETURA KARANA IEHOVA IDA OI HAGOADAIA

BAIBEL IA GWAU: “Iehova, ia gwau: ‘Lau be emui tamana ai do lau lao, bona umui be egu natudia memero bona kekeni ai do umui lao.’” (2 Korinto 6:18) Dirava ia ura oi be iena turana korikorina ai do oi lao. Unai ia vara diba dalana ta be guriguri karana. Iehova ese oi ia noia “nega ibounai do [oi] guriguri.” (1 Tesalonika 5:17) Ia ura emu kudouna ai idia noho lalohadai bona ura ibounai ia diba. (Filipi 4:6) Emu famili ida oi guriguri hebou neganai, do idia itaia oi ese Dirava be tau korikorina ta bamona oi laloa.

To danu, Dirava oi kamonai henia be gau badana. Unai oi karaia totona namona be Baibel bona Baibel idia herevalaia bukadia oi stadilaia. (Salamo 1:1, 2) Oi dibaia gaudia oi laloa dobu. (Salamo 77:11, 12) Danu, namona be hanaihanai iseda Keristani heboudia dekenai oi lao.​—Salamo 122:1-4.

Emu hetura karana Iehova ida oi hagoadaia diba dala badana ta be ma haida dekenai ia oi herevalaia. Unai bamona oi karaia neganai, Iehova kahirakahira do oi lao.​—Mataio 28:19, 20.

OI KARAIA DIBA GAUNA:

• Dina ta ta ai, nega oi atoa Baibel oi duahia bona oi guriguri totona

• Namona be oi bona emu famili ese Iehova tomadiho henia karana umui atoa guna, to moale karadia be gabeai

2 RUMA BESE ENA TOMADIHO UMUI MOALELAIA

BAIBEL IA GWAU: “Dirava kahirakahira do umui lao bona ia be umui kahirakahira do ia mai.” (Iamesi 4:8) Namona be ruma bese ena tomadiho totona sediual oi karaia bona nega ibounai umui badinaia. (Genese 18:19) To, unai sibona be hegeregere lasi. Namona be emui dina ta ta maurina ai Dirava umui laloa. Emu famili ena hetura karana Dirava ida ia goada totona, “ruma dekenai umui noho neganai, bona dala dekenai umui raka neganai. Bona umui hekure noho, o umui gaukara noho neganai” Iehova umui herevalaia. (Deuteronomi 6:6, 7) Namona be Iosua bamona oi laloa, ia gwau: “Lau, bona lauegu famili taudia, ai ese Lohiabada sibona ena hesiai gaukara do ai karaia.”​—Iosua 24:15.

OI KARAIA DIBA GAUNA:

• Sediual namona oi karaia unai amo emu famili taudia ta ta oi durua namonamo diba