Amono Taudia​—Badu amo Hebogahisi Ena Davana Idia Haloua

HARI inai negai Hashemite besena ena basileia, Jordan, ena taoni badana, Amman, ena ladana ese tanobada amo ia boio besena ta ena ladana ia hahedinaraia noho. Idia gwauraidia Amono taudia. Idia be daidia, bona edia moru ese dahaka be ita ia hadibalaia?

Amono taudia be kara maoromaoro tauna Lota amo idia vara. (Genese 19:​35-38) Lota be Aberahamo ena tadina ena natuna, unai dainai Amono taudia be Israela taudia edia varavara bamona. Ena be Lota ena bese taudia ese dirava koikoidia idia tomadiho henia matamaia, to Iehova Dirava ese ia lalodia noho. Israela besena be Gwauhamata Tanona kahirakahira idia lao neganai, Dirava ese ia hamaorodia, ia gwau: “Amono besena . . . do umui dagedage henidia lasi, bona tuari henidia lasi. Amono besena edia tano sisina umui dekenai do lau henia lasi, badina unai tano be Lota ena besena taudia dekenai lau henia, edia tano.”​—Deuteronomi 2:19.

Amono taudia ese unai hebogahisi idia laloa, a? Lasi, idia abia dae lasi Iehova ese gau ta ia henidia vadaeni. Ena be Dirava ese ia hebogahisi henidia, to idia ese Dirava ena bese taudia, Israela taudia, idia inai henidia hanaihanai. Ena be Israela taudia ese Iehova ena hahegani idia badinaia bona idia tuari henidia lasi, to Amono taudia bona edia varavara, Moaba taudia, idia laloa reana do idia tuari henidia. Amono taudia ese Israela taudia idia tuari henidia lasi, to peroveta tauna ta ladana Balama be davana idia henia, hadikalaidia herevana ta do ia gwauraia totona!​—Numera 22:​1-6; Deuteronomi 23:​3-6.

Bena hoa gauna ta ia vara. Baibel ia gwau Balama ese hadikalaidia herevana ia gwauraia diba lasi. Hanamolaidia herevadia mo ia gwauraia diba, ia gwau: “Israela do idia hanamoa taudia, ese namo do idia davaria. To Israela do idia hadikaia taudia, ese dika do idia davaria.” (Numera 24:9) Namona be unai idia itaia taudia iboudiai, Amono taudia danu, edia lalona idia parara, Dirava ia hegaegae vadaeni, iena bese taudia hamauridia totona!

To Amono taudia ese Israela hadikaia daladia idia tahua noho. Gunalaia Taudia edia nega lalonai, Amono be Moaba bona Amaleka ida Gwauhamata Tanona ai idia vareai ela bona Ieriko hanuana idia abia. To nega daudau lasi edia kwalimu ia ore; Israela ena Gunalaia Tauna Ehuda ese ia halusidia. (Gunalaia Taudia 3:​12-15, 27-30) Bena idia tuari heheni lou lasi ela bona Gunalaia Tauna Iepeta ena nega. Unai neganai Israela besena ese kaivakuku idia tomadiho henidia dainai, Iehova ese ia naridia lasi. Lagani 18 bamona lalonai, Dirava ese “Amono taudia ia koua lasi, vadaeni idia ese Israela taudia dekena amo idia kwalimu.” (Gunalaia Taudia 10:​6-9) Bena Israela taudia ese edia kaivakuku idia negedia bona Iepeta murinai idia raka neganai, Amono taudia idia hadareredia momokani.​—Gunalaia Taudia 10:16–11:33.

Saulo be Israela ena king ginigunana ai idia halaoa neganai, gunalaia taudia edia lohia negana ia ore. Bena maoromaoro Amono taudia idia dagedage lou. King Nahasa ese Israela ena hanua ta ladana Iabese-Gileada ia tuari henia, hanua taudia ia hahoaia. Maino herevana idia gwauraia neganai, Nahasa, Amono tauna, ia haere mai ena dagedage ida, ia gwau; “Maino do ita karaia, to lau ese umui ibounai emui matana idibadia do lau kokia.” Bese sivaraina torea tauna, Flavius Josephus, ia gwau unai ena anina be, “edia matadia lauridia be edia kesi ese do idia koudia neganai, tuari ai do idia hegeregere lasi momokani.” To Nahasa ese unai dagedage herevana ia gwauraia, badina korikori be unai Israela taudia amo Israela ibounai ia hahemaraia gwauraia.​—1 Samuela 11:​1, 2.

Amono taudia ese badu amo Iehova ena hebogahisi ena davana idia haloua unai. Iehova ese edia dagedage ia laloa maragi lasi. “Saulo be [Nahasa ena] hereva ia kamonai neganai, Dirava ena Lauma ese ia hasiahua bada herea, bona ia badu dikadika danu.” Dirava ena lauma ese ia hakaudia hegeregerena, Saulo ese tuari taudia 330,000 ia haboua, bena Amono taudia ia hadarerea vaitani dainai, “ta ta sibona idia heau, rua idia heau hebou lasi.”​—1 Samuela 11:​6, 11.

Amono taudia be sibodia edia namo mo idia tahua, idia dagedage bada, bona idia mataganigani, unai dainai gabeai dika bada idia davaria. Iehova ena peroveta tauna Sepanaia ena hereva hegeregerena, idia be ‘Gomora bamona . . . anina lasi tanodia idia lao ela bona hanaihanai. . . . Badina be idia ese Siahu Ibounai Lohiabada ena bese taudia idia kirikirilaia bona idia hereva dika henidia.’​—Sepanaia 2:​9, 10.

Hari inai negai tanobada gunalaia taudia ese Amono dekenai ia vara gauna idia laloa be namo. Dirava ese tanobada besedia unai bamona ia hebogahisi henidia; ia koudia lasi dainai, iena aena atodia gabuna, tanobada, idia noholaia diba. To mataganigani besedia ese tanobada idia naria lasi; idia hadikaia noho, bona niuklia bomu amo idia hadikaia ore diba. Nega momo tanobada besedia ese Iehova tomadiho henia taudia idia hebogahisi henidia lasi, to idia badu henidia bona idia dagedage henidia bada. Vadaeni, Amono taudia edia sivarai ese taunimanima ia hadibadia, badu amo Iehova ena hebogahisi ena davana idia haloua taudia edia kara be ia ese ia laloa momo. Iena nega korikori ai, kara ta do ia karaia, gunaguna ia kara hegeregerena.​—Salamo 2:​6-12 itaia.

[Picture Credit Line on page 8]

Pictorial Archive (Near Eastern History) Est.

[Picture on page 9]

Roma taudia edia ruma gunadia Amman ai; Amono taudia edia hanua badana Raba ena gabu be unai

[Credit Line]

Pictorial Archive (Near Eastern History) Est.

[Picture on page 10]

Gunaguna Amono taudia be inai gabu ai idia noho

[Credit Line]

Pictorial Archive (Near Eastern History) Est.