Tadikaka Matamatadia​—Haida ese Umui Idia Abidadama Henia Diba, A?

1. Tadikaka matamatadia be dahaka idia karaia diba?

TADIKAKA matamata e, umui be mai emui goada bona kongrigeisen lalonai gaukara momo umui karaia diba. (Aon. 20:29) Reana oi ura hesiai tauna ai oi lao, to oi mamia ma haida idia laloa oi be mero matamata sibona eiava oi be ekspiriens lasi unai maduna oi huaia totona. To, ena be oi be matamata, hari gau haida oi karaia diba, unai amo tadikaka taihu ese oi idia abidadama henia bona matauraia diba.

2. Inai stadi lalonai dahaka do ita herevalaia?

² Inai stadi lalonai, King Davida ena mauri do ita herevalaia. Bona Iuda ena king rua, Asa bona Iehosapata edia sivarai do ita itaia danu. Hari, unai tatau toi ese idia davaria hekwakwanai, bona tadikaka matamata ese edia haheitalai amo do idia dibaia gaudia do ita herevalaia.

KING DAVIDA AMO DIBA OI ABIA

3. Edena dala ai matamata taudia ese buruka taudia idia durua diba?

³ Davida be matamata neganai, ma haida ese idia laloa bada gaukara ia dibaia. Davida be Dirava ia tura henia namonamo, bona hap gadaralaia dalana ia dibaia danu. Bona unai diba ia gaukaralaia king Saulo ia durua totona. (1 Sam. 16:16, 23) Tadikaka matamata e, emu diba amo tadikaka taihu ma haida oi durua diba, a? Reana oi itaia buruka taudia haida edia tablet eiava mobael fon amo sibona edia stadi idia karaia, eiava hebou dekenai idia gaukaralaia totona idia ura ma ta ese idia do ia hadibaia. Unai gaudia gaukaralaia dalana oi diba dainai, buruka taudia oi durua diba.

4. Tadikaka matamata be Davida ena haheitalai amo dahaka kara idia dibaia? (Rau 1 ena laulau itaia.)

⁴ Dina ta ta ai, Davida ia hahedinaraia ia be gaukara goada tauna bona ma haida ese idia abidadama henia diba. Hegeregere, ia be tau matamata neganai, ena tamana ena mamoe ia naridia namo herea. Unai gaukara lalonai dika haida ia davaria. Gabeai, Davida be King Saulo ia hamaoroa, ia gwau: “Emu hesiai tauna be ena tamana ena mamoe naria tauna ai ia lao, bona laiona ta ia mai bona mamoe oreana amo mamoe ta ia abia lao. Nega ma ta ai, bea ta ia mai bona unai bamona ia karaia danu. Vadaeni ia murinai lau heau lao bona lau botaia bona ena uduna amo mamoe lau hamauria.” (1 Sam. 17:34, 35) Davida ia diba ia ese mamoe do ia gimadia bona ia naridia, unai dainai mai gari lasi ida dagedage animal ia heatu henidia. Tadikaka matamata ese Davida ena haheitalai idia tohotohoa diba bona idia abia maduna idauidau idia huaia namonamo diba.

5. Salamo 25:14 hegeregerena, tadikaka matamata ese dahaka mai anina bada gauna idia karaia be namo?

⁵ Davida be mero matamata neganai, ia be Iehova ia tura henia bona unai be mai anina bada. Ia be hap ia gadara eiava goada tauna be gau badana lasi. Iehova be Davida ena Dirava sibona lasi, to iena Turana namona, unai be mai anina bada. (Salamo 25:14 duahia.) Tadikaka matamata e, emu hetura karana emu guba Tamana ida oi hagoadaia be gau badana, unai amo hahenamo idauidau oi abia diba.

6. Davida be dahaka hekwakwanai ia davaria?

⁶ Davida ia davaria hekwakwanai ta be, haida idia laloa ia be kara kava merona. Hegeregere, Davida ia ura Goliata ia heatu henia neganai, King Saulo ese ia koua, ia hamaoroa: “Oi be mero sibona.” (1 Sam. 17:31-33) Ena kakana danu ia gwau, ia be ia loa kava bona ena gaukara ia laloa lasi. (1 Sam. 17:26-30) To, Iehova ia diba Davida be gaukara goada merona. Bona Davida ia goada totona, iena Turana, Iehova dekenai ia tabekau bona Goliata ia alaia mase.​—1 Sam. 17:45, 48-51.

7. Davida ena sivarai amo dahaka oi dibaia?

⁷ Davida ena sivarai amo dahaka oi dibaia? Oi haheauka be gau badana. Nega sisina ia hanaia murinai, maragi negana amo oi idia diba taudia do idia laloparara, oi be mero badana ai oi lao vadaeni. To, Iehova be emu mauri lagani sibona ia itaia lasi. Ia be oi ia diba namonamo, bona oi karaia diba gaukara ia itaia danu. (1 Sam. 16:7) Gau badana be emu hetura karana Dirava ida oi hagoadaia. Davida ese Iehova ia havaraia gaudia ia stadilaia karana amo ena Havaraia Tauna ena kara ia diba namonamo, bona ia tura henia. (Sal. 8:3, 4; 139:14; Roma 1:20) Oi karaia diba gauna ma ta be, oi goada totona Iehova dekenai do oi tabekau. Hegeregere, oi be Iehova ena Witnes merona dainai, sikuli ai emu turadia ese oi idia hevasehalaia, a? Namona be Iehova oi noia, unai hekwakwanai oi hanaia totona. Bona Baibel, pablikeisen, bona vidio idauidau edia sisiba oi badinaia danu. Iehova ese hekwakwanai ta ta ai oi ia durua karana oi itaia neganai, emu abidadama ia goada. Ma danu, haida idia itaia Iehova oi tabekau henia neganai, oi do idia abidadama henia.

8-9. (a) Dahaka ese Davida ia durua ia haheauka totona? (b) Tadikaka matamata ese Davida ena haheitalai amo dahaka idia dibaia?

⁸ Davida ese ia davaria hekwakwanai ma ta mani ita itaia. Samuela ese ia horoa king ai do ia lao, to Davida be lagani momo ia naria murinai Iuda ena king ai idia halaoa. (1 Sam. 16:13; 2 Sam. 2:3, 4) Dahaka ese Davida ia durua ia haheauka totona? Ia lalomanoka lasi, to ia karaia diba gaukara ia karaia. Hegeregere, Davida be Filistia tanona ai ia hunia lalonai, Israela besena ena inai taudia ia tuari henidia. Unai amo ia ese Iuda tanona ena hetoana ia gimaia.​—1 Sam. 27:1-12.

⁹ Tadikaka matamata ese Davida ena sivarai amo dahaka idia dibaia? Dala ia kehoa neganai, emu tadikaka taihu oi durua noho. Mani tadikaka Rikadob ena sivarai ita itaia. Ia mero maragi neganai, ia ura dikadika regula painia gaukara ia karaia. To elda taudia ese idia hamaoroa do ia naria sisina. Rikado ia lalohisihisi lasi, to iena haroro gaukara ia habadaia. Ia gwau: “Unai nega lau laloa neganai, lau laloparara gau haida lau hanamoa be namo. Kamonai taudia lau davaridia neganai, lau lou henidia, bona unai lau karaia totona lau hegaegae namonamo. Unai nega ai, egu Baibel stadi ginigunana lau hamatamaia danu. Egu haroro gaukara lau hanamoa neganai, egu abidadama danu ia goada ia lao.” Hari, Rikado be regula painia namona bona hesiai tauna ta.

10. Davida be abia hidi ia do karaia lasi neganai, dahaka ia karaia guna?

¹⁰ Davida ena mauri ai ia davaria hekwakwanai ma ta mani ita herevalaia. Ia bona ena tatau be Filistia tanona ai idia hunia lalonai, edia ruma bese idia rakatania bona tuari totona idia lao. Idia noho lasi lalonai, edia inai taudia idia mai bona edia noho gabuna idia hadikaia bona edia ruma bese idia abidia lao. Reana Davida do ia laloa ia be tuari tauna goadana dainai, ia sibona ese palani ta do ia karaia edia ruma bese idia hamauria totona. To, Davida be Iehova ena heduru ia tahua. Hahelaga tauna Abiatara ena heduru amo, Davida ese Iehova ia nanadaia: “Inai dadidadi tuari oreana murinai do lau lao, a?” Iehova ese Davida ia hamaoroa unai do ia karaia bona do ia kwalimu. (1 Sam. 30:7-10) Inai sivarai amo dahaka oi dibaia?

11. Abia hidi oi do karaia lasi neganai, namona be dahaka oi karaia guna?

¹¹ Abia hidi oi do karaia lasi neganai, ma haida edia lalohadai oi tahua guna. Emu tama sina oi hereva henidia. Danu, elda taudia amo lalohadai namodia oi abia diba. Unai tatau be Iehova ese ia abidadama henidia, bona oi ese oi abidadama henidia diba. Iehova ena matanai idia be “harihari gaudia” bamona. (Efe. 4:8) Edia abidadama oi tohotohoa bona edia aonega herevadia oi kamonai neganai, namo do oi davaria. Hari, mani King Asa ena sivarai ita herevalaia.

KING ASA AMO DIBA OI ABIA

12. King Asa ia lohia matamaia neganai, dahaka kara namodia ia hahedinaraia?

¹² King Asa be tau matamata neganai, ia be manau bona gari lasi tauna. Hegeregere, ia ese ena tamana, Abaisa, ena gabu ia abia neganai kaivakuku gaudia ia hadikaia ore. Danu ia ese “Iuda taudia ia hamaoroa edia sene taudia edia Dirava Iehova idia tahua bona ena Taravatu bona hahegani idia badinaia totona.” (2 Siv. 14:1-7) Danu Etiopia tauna Sera bona ena tuari taudia 1 milioni be Iuda idia tuari henia neganai, Asa be mai aonega ida Iehova ena heduru totona ia noinoi, ia gwau: “Iehova e, oi ese taunimanima momo eiava goada lasi taudia oi durua diba. Iehova emai Dirava e, ai oi durua, badina ai be oi dekenai ai tabekau noho.” Unai guriguri namona ese ia hahedinaraia, Asa ia abidadama Iehova ese ia bona ena taunimanima ia hamauria diba. Oibe, Asa ena guba Tamana “Iehova ese Etiopia taudia ia halusia.”​—2 Siv. 14:8-12.

13. Gabeai, Asa dekenai dahaka ia vara bona dahaka dainai?

¹³ Momokani, tuari taudia hutuma idia mai Asa idia tuari henia totona be gari gauna, to Asa ia kwalimu. To madi, hekwakwanai maragina ta ia davaria neganai, Asa be Iehova ena heduru ia tahua lasi. Basa, Israela ena king dikana ese Asa ia ura tuari henia neganai, ia be Asuria ena king amo heduru ia tahua. Bona unai ese dika bada herea ia havaraia! Iehova ese peroveta tauna Hanani amo Asa ia hamaoroa: “Oi be Suria ena king dekenai oi tabekau bona emu Dirava Iehova dekenai oi tabekau lasi dainai, Suria ena king ena tuari taudia be oi amo idia heau mauri vadaeni.” Momokani, unai nega amo, tuari be nega ibounai Asa dekenai ia vara. (2 Siv. 16:7, 9; 1 Ki. 15:32) Unai sivarai amo dahaka ita diba?

14. (a) Edena dala ai Iehova dekenai oi tabekau diba? (b) Timoteo Ginigunana 4:12 oi badinaia neganai, edena bamona tauna ai do oi lao?

¹⁴ Namona be oi manau bona Iehova dekenai oi tabekau noho. Oi bapatiso neganai, oi hahedinaraia Iehova oi abidadama henia. Bona ia ese oi ia abia dae iena ruma bese lalonai. Mai anina bada gauna be Iehova dekenai oi tabekau. Emu mauri lalonai abia hidi badadia oi ura karaia neganai, toana be Iehova ena heduru oi tahua be auka lasi. To, abia hidi ma haida be edena bamona? Moale karadia, moni gaukara, bona tahua gaudia dekenai abia hidi oi ura karaia neganai, Iehova dekenai oi tabekau be gau badana! Sibona emu aonega dekenai oi tabekau lasi. To, Baibel ena hakaua herevadia oi badinaia be namo. (Aon. 3:5, 6) Unai oi karaia neganai, Iehova be oi dekenai do ia moale bona tadikaka taihu ese oi do idia matauraia.​—1 Timoteo 4:12 duahia.

KING IEHOSAPATA AMO DIBA OI ABIA

15. 2 Sivarai 18:1-3; 19:2 hegeregerena, King Iehosapata be dahaka kerere ia karaia?

¹⁵ Momokani, ita ibounai be goevadae lasi taudia, bona nega haida oi be kerere do oi karaia. To namo lasi unai ese oi ia koua Iehova oi hesiai henia totona. Mani King Iehosapata ena sivarai ita itaia. Ia be mai ena kara namodia haida. Ia be mero matamata neganai, “ena tamana ena Dirava ia hesiai henia bona ena hahegani ia badinaia.” Danu, Iuda ena siti ibounai dekenai lohia taudia ia siaia taunimanima dekenai Iehova idia hadibaia totona. (2 Siv. 17:4, 7) Ena be ia be kara momokani tauna, to nega haida Iehosapata be abia hidi kereredia ia karaia. Unai abia hidi kererena ta dainai, Iehova ese ia sisiba auka henia. (2 Sivarai 18:1-3; 19:2 duahia.) Unai sivarai amo dahaka oi dibaia?

16. Rajiv ena sivarai amo dahaka oi dibaia?

¹⁶ Sisiba oi abia dae bona badinaia be gau badana. Reana oi hekwarahi, emu mauri lalonai mai anina bada gaudia oi atoa guna totona. To oi lalomanoka lasi. Mani, Rajiv ena ekspiriens ita laloa. Iena mero negana ia laloa, ia gwau: “Nega haida lau diba lasi dahaka do lau karaia. Vaia, matamata taudia haida hegeregeredia, lau be spot gadara bona moale karadia lau laloa bada, to hebou lao bona haroro gaukara lau laloa bada lasi.” Dahaka ese Rajiv ia durua? Elda namona ta ese Rajiv ia sisiba henia. Rajiv ia gwau: “Ia ese lau ia durua, 1 Timoteo 4:8 ena hakaua herevana lau laloa totona.” Rajiv be ia manau bona unai sisiba ia abia dae, bona iena mauri lalonai mai anina bada gaudia ia laloa lou. Ia gwau: “Egu lalona lau hadaia, Iehova hesiai henia gaukarana do lau atoa guna. Lagani haida murinai, lau hegeregere hesiai tauna ena maduna lau abia totona.” Rajiv ena ekspiriens amo dahaka oi dibaia? Oi dainai, emu guba Tamana do ia moale.

EMU GUBA TAMANA OI HAMOALEA

17. Tadikaka taihu ese tadikaka matamata be edena bamona idia laloa?

¹⁷ Tadikaka taihu idia moale bada, badina tadikaka matamata be “mai lalotamona ida” Iehova idia hesiai henia. (Sep. 3:9) Mai emui lalona ibounai bona goada ida Iehova umui hesiai henia dainai, idia be umui idia ura henia.​—1 Ioa. 2:14.

18. Aonega Herevadia 27:11 hegeregerena, Iehova ese tadikaka matamatadia be edena bamona ia laloa?

¹⁸ Tadikaka matamatadia e, laloatao, Iehova be umui ia lalokau henia bona ia abidadama henia. Ia gwau dina gabedia ai, tadikaka matamatadia be iena gaukara karaia totona do idia haboua. (Sal. 110:1-3) Ia diba oi be ia oi lalokau henia bona oi ura emu lalona ibounai ida do oi hesiai henia. To kerere oi karaia neganai, haida edia sisiba bona matahakani herevadia oi abia dae be namo. Namona be oi laloparara, unai be Iehova amo ia mai. Unai dainai, sibona emu kara dekenai oi hesiku haraga lasi, bona ma haida dekenai haheauka karana oi hahedinaraia be namo. (Heb. 12:6) Emu asainmen idauidau do oi karaia namonamo. Oi karaia gaudia ibounai lalonai, namona be emu guba Tamana oi hamoalea.​—Aonega Herevadia 27:11 duahia.