Dirava Kahirakahira Oi lao
“Taunimanima Ibounai Edia Laloa” Ia Diba
DAIKA be mauri ena hekwakwanai gaudia ese idia hametaua lasi? Nega haida, ita laloa ta ese ita davaria lalometau gaudia o eda hisihisi do ia lalopararalaia lasi. To, iseda hemami ia lalopararalaia tauna ta ia noho—Iehova Dirava. Sivarai Iharuana 6:29, 30 ai, Solomona ena hereva ese ita ia hagoadaia.
Lagani 1026 B.C.E. ai, Ierusalema dekenai dubu helaga idia hahelagaia noho lalonai, Solomona be ia guriguri. Reana miniti 10 bamona lalonai, ena guriguri amo, ia ese Iehova ia hanamoa ia gwau, Dirava be ena hereva ia badinaia, ena gwauhamata ia hagugurudia, bona guriguri ia kamonaia.—1 King Taudia 8:23-53; 2 Sivarai 6:14-42.
Solomona be mai tai ida Dirava ia noia Ia idia tomadiho henia taudia edia guriguri do Ia kamonaia. (Siri 29) Ena be Solomona ese metau idauidau ia herevalaia (siri 28), to ia gwau Dirava idia tomadiho henia taudia ta ta be “sibona ena hisihisi” ia diba bona “ena lalohisihisi” ia mamia. Reana tau ta be gau ta ia lalohisihisilaia, to ma ta be gau idauna ta ia lalohisihisilaia.
Herevana dahaka, Dirava idia gari henia taudia be heduru idia abia diba. Solomona ena guriguri lalonai, ia ese Dirava idia tomadiho henia taudia ta ta ia laloa, idia be “edia imana idia duduia,” bona mai kudouna ibounai ida Iehova idia guriguri henia.a Reana Solomona be ena tamana, Davida, ia lalometau bada neganai, ia gwauraia herevana ia laloatao, ia gwau: “Oiemu laloa hekwarahi be Lohiabada dekenai do oi henia.”—Salamo 55:4, 22.
Edena bamona Iehova ese mai kudouna ibounai ida heduru ia noia tauna Ia haere henia? Solomona ese Iehova ia noia, ia gwau: “Guba dekena amo do oi kamonai, edia kara dika do oi gwauatao, bona idia be oi ese do oi durua.” (Siri 30) Solomona ia diba ‘guriguri ia kamonai’ henia tauna be Ia idia tomadiho henia taudia ta ta ia laloa bada. (Salamo 65:2) Iehova be ita totona heduru maorona ia henia, Ia ese kara dika tauna ena dika ia gwauatao, bema ia helalo-kerehai momokani.—2 Sivarai 6:36-39.
Dahaka dainai Solomona ia diba momokani Iehova be idia helalo-kerehai taudia edia noinoi do ia kamonaia? Ena guriguri lalonai, Solomona ia gwau: “Badina be oi [Iehova] sibona ese taunimanima ibounai edia laloa oi diba noho. Idia ta ta dekenai edia kara, edia kara hegeregerena durua do oi henia.” Iehova be ia idia tomadiho henia taudia edia hisihisi o lalohisihisi ia diba, bona idia lalohekwarahilaia gaudia Ia laloa noho.—Salamo 37:4.
Solomona ena guriguri ese ita ia hagoadaia diba. Reana taunimanima be iseda hemami—sibona iseda “hisihisi” bona “lalohisihisi”—idia lalopararalaia diba lasi. (Aonega Herevadia 14:10) To Iehova be iseda kudouna ia diba, bona ita ia laloa bada. Iseda lalohekwarahi gaudia be guriguri amo ita gwauraia neganai, unai ese ita do ia durua eda hekwakwanai ita haheaukalaia totona. Baibel ia gwau: “Ia ese umui ia naria noho. Unai dainai emui laloa hekwarahi gaudia ibounai be iena imana dekenai do umui atoa.”—1 Petero 5:7.
[Footnote]
a Baibel negadiai, “edia imana idia duduia,” karana ese ia hahedinaraia ta be Dirava dekenai ia guriguri.—2 Sivarai 6:13.