Edena Dala Ai Iehova ese Oi Do Ia Laloatao?
‘EGU Dirava e, mani lau oi laloatao.’ Nega haida Nehemia ese unai bamona herevadia amo Dirava ia noia. (Nehemia 5:19; 13:14, 31) Nega momo taunimanima be hekwakwanai bona hisihisi idia davaria neganai, unai bamona noinoi herevadia amo Dirava dekenai heduru idia tahua.
To, taunimanima ese Dirava idia noia idia do ia laloatao neganai dahaka idia laloa? Ia hedinarai goevagoeva, idia ura Dirava ese edia ladana sibona do ia laloatao lasi. Idia be Iesu danu idia hamasea hebou kara dika tauna ia laloa bamona idia laloa. Ia be ena turana hegeregerena lasi, to Iesu ia noia, ia gwau: “Iesu e, oiemu Basileia do oi abia neganai, do oi laloa lau!” Ia ura Iesu ese ia be daika sibona do ia laloatao lasi to ia ura ia totona gau ta do ia karaia–ia do ia hatorea isi lou.—Luka 23:42.
Hanaihanai, Baibel ese ia hahedinaraia Dirava dekenai “laloatao” ena anina be kara namona ta do ia karaia. Hegeregere, dina 150 lalonai tanobada be abata ena ranu ese ia koua murinai, ‘Dirava ese Noa ia laloatao, bona lai ta ia siaia mai tanobada dekenai, bona ranu ia diho hamatamaia.’ (Genese 8:1) Lagani handred momo idia ore murinai, Pilistia taudia ese ena matana idia hakepulua bona idia guia tauna, Samson, ia guriguri: ‘Iehova e, mani lau oi laloatao bona lau oi hagoadaia inai nega tamona sibona.’ Iehova ese Samson ia laloatao dainai taunimanima edia goada ia hanaia goadana be Samson ia henia, ia ese Dirava ena inai taudia edia davana do ia henia totona. (Gunalaia Taudia 16:28-30) Bona Nehemia totona, Iehova ese ena hekwarahi ia hanamoa, bona Ierusalema dekenai tomadiho momokanina idia haginia lou.
Aposetolo Paulo ia gwau: “Buka Helaga dekenai idia torea hereva be ita dekenai hadibaia totona idia torea, vadaeni do ita gini goada, bona Dirava ena namo dekenai do ita naria, mai haheauka danu.” (Roma 15:4) Bema Iehova ena ura ita karaia amo ia ita laloatao, guna iena abidadama hesiai taudia idia karaia bamona, ita diba momokani Iehova ese ita do ia laloatao bona ita do ia durua dina ta ta eda dabu gaudia do ita abia, ita abia hahetoho lalodiai ita do ia hagoadaia, bona Dirava idia dadaraia taudia do ia hahemaoro henia neganai ita do ia hamauria.—Mataio 6:33; 2 Petero 2:9.