Hadibaia Hereva Oi Badinaia!

POU! June 3, 1991 ai, Japan dekenai, Fugen Ororona be mai regerege bada ida ia pou bona kahu bona hodahoda dikana ia halasia. Siahu momokani gaudia idia aru diho. Unai ororo ia pou bona taunimanima 43 ia hamasea. Idia roho mauri taudia momo be lahi ese edia kopina ia araia momokani. Haida idia taitai badabada, “mani, ranu, ranu.” Lahi habodoa taudia bona pulisi taudia idia heau lao idia durudia totona.

PURA rua gunanai, Fugen Ororona ena ataiai, lava idia itaia, unai dainai siahu taudia bona unai gabu dekenai idia noho taudia idia naria namonamo. Pura ta gunanai unai ororo ia do pou lasi neganai, hadibaia herevana idia henia taunimanima ese unai gabu idia rakatania totona. Ororo ia pou dinana vairanai, pulisi ese niusi halasia taudia idia noia idia koua gabuna lalonai do idia vareai lasi. To, unai dika ia vara dinana ena adorahi kahana ai unai dika dainai idia mase taudia 43 be unai dika gabuna lalonai idia noho.

Dahaka dainai taunimanima momo be unai gabu lalonai idia vareai o noho? Edia gabu idia rakatania biru taudia haida be idia giroa lou edia kohu bona uma itaia totona. Lahi ororona idia stadilaia taudia toi idia hekwarahi unai lahi ororona kahirakahira idia lao, diba idia abia totona. Niusi ripotilaia taudia bona laulau abia taudia haida be mai gari lasi ida pulisi ese ia koua gabuna dekenai idia vareai badina idia ura unai lahi ororona dekenai idia vara gaudia idia diba. Niuspepa taudia ese idia gaukaralaia takisi taria taudia toi danu be unai gabu dekenai. Pulisi taudia bona lahi habodoa taudia idia gaukara. Idia ta ta be sibona mai edia badina ta ta dainai unai dika gabuna dekenai idia lao​—⁠bona unai dainai edia mauri idia haboioa.

Oi be Dika Gabuna Dekenai Oi Noho, A?

Reana ita ibounai be ia pou diba lahi ororona ta kahirakahira ai ita noho lasi. To, bema tanobada ibounai do ia hadikaia gauna, ita ibounai be dika lalonai ia atoa gauna, be ita ia hadikaia gwauraia be edena bamona? Ena peroveta herevadia idia guguru bukana ese ita ia hadibaia tanobada ibounai hadikaia gauna ta ia mai noho bona inai bamona ia gwauraia: “Dina be do ia dibura, hua danu do ia diari lasi, hisiu guba dekena amo do idia moru, bona guba dekenai idia noho siahu gaudia do idia mareremarere. . . . Tanobada ena bese ibounai do idia tai.” (Mataio 24:​29, 30) Unai ese ia hahedinaraia guba dekenai be hoa gaudia badadia do idia vara bona “tanobada ena bese ibounai” ese unai do idia mamia. Eiava ita gwau diba, unai peroveta herevana ese dika badana ta ia hahedinaraia bona ita ta ta ibounai dekenai ia be mai anina bada.

Unai peroveta buka namona be Baibel. Ai gwauraia vadaeni Baibel sirina ena badina siridia ese tanobada ibounai lalonai do ia vara dika gauna vairanai do idia vara gaudia idia gwauraia goevagoeva. Unai lava bona lahi ororona ena toa ma haida ese Shimabara siti ena ofesa taudia ia hadibaia dika gabuna ena maka idia karaia diba totona hegeregerena, Baibel ese badina idauidau ia gwauraia ita gima bona ita hegaegae ita roho mauri totona. Fugen Ororona dekenai ia vara dika amo gau ta ita dibaia bona ita vairanai ia noho gauna ena metau ita laloa diba.

[Picture Credit Line on page 2]

COVER: Yomiuri/Orion Press/Sipa Press

[Picture Credit Line on page 3]

Yomiuri/Orion Press/Sipa Press