Iehova ese Ia Idia Abidadama Henia Taudia Ia Naria
“Oiemu lalokau bona oiemu hereva momokani, oi ese oi badinaia noho gaudia, ese lau do idia naria nega ibounai.”—SALAMO 40:11.
1. King Davida ese Iehova dekenai dahaka ia noia, bona hari unai noinoi be edena bamona ia guguru?
IDAUNEGAI Israela besena ena lohia, King Davida be ‘Iehova totona ia naria mai haheauka danu’ bona ia gwau Iehova ese ‘ia dekenai ia hebogahisi bona ena taitai ia kamonai.’ (Salamo 40:1) Davida be matana amo Iehova ese Ia idia lalokau henia taudia ia naria dalana ia itaia. Unai dainai, Davida ese Iehova ia noia nega ibounai ia do ia naria. (Salamo 40:11) Davida be “toreisi lou ena mauri namo herea” do idia abia abidadama taudia ta, bona hari Iehova ese ia laloatao noho unai hahenamo ia henia totona. (Heberu 11:32-35) Oibe, vaira negana ai hahenamo namona do ia abia momokani, badina iena ladana be Iehova ena “buka ta” lalonai ia noho.—Malaki 3:16.
2. Baibel siridia ese edena bamona idia hahedinaraia Iehova be ita ia naria?
2 Heberu karoa 11 ese ia herevalaia abidadama taudia idia mauri noho neganai, Iesu Keriso be tanobada ai ia do mai lasi. To, idia ese Iesu ena hahediba herevana hegeregerena idia noho. Ia gwau: “Iena mauri ia ura dogoatao tauna ese mauri do ia halusia, to iena mauri inai tanobada dekenai ia laloa lasi tauna be mauri do ia abia, ia lao bona hanaihanai.” (Ioane 12:25) Vadaeni, ia hedinarai goevagoeva, ena be Iehova ese unai tauna ia naria, to ia dekenai idia vara hisihisi eiava dagedage do ia koua lasi. To, ena anina be lauma dalanai ia gimaia, unai amo Dirava vairanai ladana namona ia abia diba.
3. Dahaka ese ia hamomokania Iehova ese Keriso Iesu ia naria, bona unai dainai dahaka hahenamo idia vara?
3 Iesu Keriso be ena inai taudia ese idia dagedage henia, idia hereva dika henia, bena mai hemarai bona hisihisi bada dalanai idia hamasea. To, unai be Dirava ese Mesia do ia naria gwauhamatana ia hakoikoia lasi. (Isaia 42:1-6) Iesu ia mase bena dina ihatoina ai ia toreisi lou karana ese ia hamomokania, Iehova be iena taitai ia kamonai—Davida ena taitai ia kamonaia hegeregerena. Vadaeni, Iehova ia haere bona Iesu dekenai goada ia henia ia gini auka totona. (Mataio 26:39) Iehova ese Iesu ia naria dainai, guba dekenai mase diba lasi maurina ia abia, bona iena boubou gauna idia abidadama henia taudia milioni momo be mauri hanaihanai idia abia diba.
4. Dirava ese horoa Keristani taudia bona “mamoe idaudia” dekenai dahaka gwauhamata ia henia?
4 Davida bona Iesu ia naridia hegeregerena, ita diba Iehova be mai ena ura ida iena hesiai taudia hari inai negai do ia naridia danu. (Iamesi 1:17) Tanobada ai idia do noho Iesu ena horoa tadikaka be Iehova ena gwauhamata idia abia dae diba, ia gwau: “Dirava ese ita ia abia hidi, guba dekenai mauri do ita abia. Inai mauri ia noho hanaihanai, ia be goevagoeva, ia bodaga diba lasi. Inai mauri be guba dekenai umui totona ia noho hegaegae. Umui ese Dirava umui abidadama henia dainai, iena siahu ese umui do ia naria noho ela bona hamauria dinana ia ginidae. Inai hamauria ia noho hegaegae, bona nega dokona dekenai do ia hedinarai momokani.” (1 Petero 1:4, 5) Tanobada ai do idia noho “mamoe idaudia” ese Dirava bona ena gwauhamata, salamo torea tauna ese ia torea gauna idia abidadama henia diba, ia gwau: “Lohiabada dekenai umui abidadama henia taudia ibounai e, Lohiabada do umui lalokau henia. Lohiabada ese abidadama taudia ia gimaia noho.”—Ioane 10:16; Salamo 31:23.
Lauma Dalanai Ita Ia Naria
5, 6. (a) Hari inai negai, Dirava ena taunimanima be edena dala ai ia naridia? (b) Horoa taudia bona tanobada helarona idia abia taudia edia hetura karana Dirava ida be edena bamona?
5 Hari inai negai, Iehova ese dala ia hegaegaelaia iena taunimanima be lauma dalanai ia naria totona. Ena be idia dekenai dagedage, nega aukadia eiava vaia mauri lalonai idia davaria hekwakwanai idauidau ia koua lasi, to heduru ia henia edia hetura karana Ia ida idia naria totona. Idia ese unai dala ai Dirava idia tura henia diba, badina Dirava ese ia hegaegaelaia mauri davalaia boubouna idia abidadama henia. Unai abidadama Keristani taudia haida be Dirava ese lauma helaga amo ia horodia bona idia be guba dekenai Keriso ida do idia lohia. Dirava ese iena kara maoromaoro lauma natudia ai ia halaodia, bona inai hereva be idia dekenai ia momokani: “Dirava ese dibura ena siahu dekena amo ita ia hamauria vadaeni, bona iena Natuna, iena lalokau, ena Basileia lalonai ita ia abia vareai vadaeni. Dirava ena Natuna ese ita ia hoia lou, bona iseda kara dika ia gwauatao, iena rarana dekena amo.”—Kolose 1:13, 14.
6 Mai edia abidadama Keristani taudia milioni momo be Dirava ese ia hegaegaelaia mauri davalaia boubouna amo hahenamo idia abia diba danu. Baibel ia gwau: “Taunimanima ena Natuna ia mai lasi, hesiai taudia ese iena gaukara idia karaia totona, to ia mai be hesiai gaukara ia karaia totona, bona iena mauri do ia atoa diho, taunimanima momo edia dika davana karaia totona.” (Mareko 10:45) Unai Keristani taudia be vaira negana idia moalelaia badina, nega korikori ai “Dirava ena natuna edia hairaina” do idia abia. (Roma 8:21) To, unai ia do vara lasi neganai, idia ta ta be edia hetura karana Dirava ida idia laloa bada bona idia hekwarahi ia goada noho totona.
7. Hari inai negai, Iehova ese iena taunimanima be lauma dalanai, edena dala ai ia naria?
7 Iehova ese iena taunimanima be lauma dalanai ia naridia dalana ta be, sikuli program ta amo edia diba ia habadaia. Unai ese ia durudia hereva momokani idia diba namonamo totona. Ena Hereva, ena orea, bona ena lauma helaga amo Iehova ese ena taunimanima dekenai hakaua herevadia ia henia noho. “Hesiai tauna mai ena kamonai, bona mai ena kara maoromaoro” ena hakaua henunai, Dirava ena taunimanima tanobada hegegemadai be ruma bese tamona bamona. Herevana, Iehova ena hesiai taudia be tano idauidau taudia, hesiai tauna oreana ese lauma dalanai bona nega haida tauanina dalanai danu idia ia naria.—Mataio 24:45.
8. Iehova ia diba iena abidadama taudia be dahaka do idia karaia, bona edena bamona unai ese idia ia hagoadaia?
8 Iehova be Iesu idia inai henia taudia edia dagedage karana ia koua lasi hegeregerena, hari Keristani taudia dekenai danu unai kara ia koua lasi. To, ita gwau lasi unai ia hahedinaraia Iehova ia badu. Lasi vaitani! To, ena kara ese ia hahedinaraia Iehova ia diba momokani, unai hepapahuahu badana lalonai idia be iena kahanai do idia gini. (Iobu 1:8-12; Aonega Herevadia 27:11) Iehova be “kara maoromaoro ia ura henia noho. Iena abidadama taudia, be ia ese do ia rakatania lasi. Kara maoromaoro taudia be, Lohiabada ese do ia naridia namonamo ela bona hanaihanai.”—Salamo 37:28.
Lalokau Bona Hereva Momokani Karana ese Ia Gimadia
9, 10. (a) Edena dala ai Iehova be hereva momokani karana amo iena taunimanima ia naria? (b) Edena dala ai Baibel ia hahedinaraia Iehova ese ena hebogahisi-mai-lalokauna amo iena abidadama taudia ia naria?
9 Salamo 40 lalonai, Davida ese Iehova ia noia ena lalokau bona hereva momokani karana ese do ia naria. Iehova ese iena taravatu ia hahedinaraia namonamo, badina Ia be hereva momokani tauna bona kara maoromaoro ia ura henia. Dirava ena taravatu hegeregerena idia noho taudia be, iena taravatu idia dadaraia taudia momo ese idia davaria lalohekwarahi, gari bona hekwakwanai idauidau amo ia gimadia. Hegeregere, bema drag dikadia ania bona inuinu kekero karana, matabodaga bona dagedage karadia ita dadaraia neganai, ita bona iseda lalokau taudia amo, unai gaudia ese idia havaraia lalohisihisi ita koua diba. Bona Iehova ena hereva momokani amo idia hure oho taudia danu—nega haida Davida ia karaia bamona—bema idia helalo-kerehai neganai, Iehova be edia “hunia gabuna” ai ia lao diba. Unai bamona taudia be mai moale ida idia boiboi diba: “Oi ese dika dekena amo lau do oi hamauria.” (Salamo 32:7) Oibe, Dirava ena hebogahisi-mai-lalokauna be hereadae!
10 Dirava ena hebogahisi-mai-lalokauna ia hahedinaraia dalana ma ta be, ia ese iena hesiai taudia ia hadibaia inai tanobada dikana amo do idia gini siri, badina kahirakahira do ia hadikaia ore. Baibel ia gwau: “Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai. Badina be tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho.” Unai hadibaia hereva ita kamonai bona ita badinaia neganai, ita be mauri hanaihanai ita abia diba, badina unai siri ma ia gwau: “Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”—1 Ioane 2:15-17.
Laloa Kehoa, Diba Maoro Bona Aonega ese Ita Idia Gimaia
11, 12. Edena dala ai laloa kehoa, diba maoro bona aonega ese ita idia gimaia?
11 Dirava ena lalonamo idia ura abia taudia dekenai Davida ena natuna Solomona ese inai ia torea: “Oiemu laloa kehoa bona oiemu diba maoro ese, oiemu mauri do idia naria namonamo.” Bona danu ia gwau: “Aonega . . . do oi abia. . . . Aonega do oi rakatania lasi, bona ia ese oi do ia naria. Aonega do oi ura henia, bona ia ese oi do ia gimaia.”—Aonega Herevadia 2:11; 4:5, 6.
12 Dirava ena Hereva amo ita dibaia gaudia ita laloa dobu neganai, ita ese laloa kehoa karana ita karaia unai. Unai bamona ita karaia neganai, iseda laloparara karana ia hanamoa, unai amo mai anina bada gaudia ita abia hidi diba. Unai be mai anina bada, badina ita momo ita diba, taunimanima be anina bada lasi gaudia idia abia hidi neganai, hekwakwanai idia vara. Satani ena tanobada ese kohu, ladana bada bona dagi bada amo iseda lalona ia veria, to Iehova ia gwau lauma gaudia be mai anina bada. Bema ta be lauma gaudia ia atoa guna lasi, iena ruma bese do ia parara, turadia ida ena hetura karana do ia dika bona lauma dalanai ia ura tahua gaudia be do idia hure oho. Unai bamona tauna dekenai Iesu ena hereva do ia momokani: “Tau ta bema tanobada ibounai ia abia, to iena mauri ena lauma ia halusia, dahaka namo dohore ia abia?” (Mareko 8:36) Aonega dalana be Iesu ena sisiba do ita badinaia: “Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.”—Mataio 6:33.
Sibona Laloa Bada Karana Ena Dika
13, 14. Sibona laloa bada karana anina be dahaka, bona dahaka dainai unai bamona ita karaia be aonega karana lasi?
13 Taunimanima be vaia sibodia idia laloa momo. To, bema iseda mauri lalonai sibona iseda ura bona namo ita laloa bada, dika ia vara diba. Unai dainai, iseda hetura karana Iehova ida ita gimaia totona, Iehova ese ita ia sisiba henia, namona be sibona laloa bada karana ita dadaraia. Sibona laloa bada karana anina be “ta be sibona ena ura, ena dabu gaudia bona ena namo ia laloa momo.” Unai be hari inai negai idia noho taudia edia kara korikorina ia gwauraia hedinarai, ani? Hoa gauna be, Baibel ena peroveta herevana ia gwau Satani ena tanobada ena “dokona” ai, “taunimanima ese idia edia ura sibona do idia tahua,” eiava sibona edia ura do idia laloa bada.—2 Timoteo 3:1, 2.
14 Keristani taudia idia laloparara Baibel ena oda herevana, ma haida edia namo tahua bona lalokau henidia ita sibona ita lalokau henia bamona, be aonega herevana. (Luka 10:27; Filipi 2:4) Taunimanima idia laloa unai ese namo ia havaraia lasi, to bema ita ura iseda headava ia namo, ruma bese ia moale, bona iseda turadia ida ita hebamo namonamo, unai kara be mai anina bada. Unai dainai, namona be mai momokani ida Iehova ia hesiai henia tauna be ena mauri lalonai sibona ena ura ia dadaraia, bona mai anina bada gaudia ia tahua guna. Ia tahua guna mai anina bada gauna be ia tomadiho henia Diravana, Iehova, ena ura.
15, 16. (a) Sibona laloa bada karana ese edena bamona kara ia havaraia diba, bona daika be unai bamona ia karaia? (b) Momokani, bema ta be ma haida ia hahemaoro henidia haraga neganai, ia be dahaka ia karaia unai?
15 Sibona ia laloa bada tauna ia laloa ia sibona be maoro, unai kara dainai unai tau be ma haida edia lalohadai do ia laloa bada lasi, bona ena be ia be siahu lasi kara ta ia karaia totona, to ia karaia sibona. Baibel ia gwau: “Oi ese taunimanima haida oi gwauraia kerere, a? Oi dekenai lau hereva, oiemu kerere oi hunia diba lasi, oi be hereva maorona ta lasi. Badina haida oi gwauraia kerere neganai, oi danu be edia kerere oi karaia noho. Unai dekena amo oi sibona oi hadikaia noho.” (Roma 2:1; 14:4, 10) Iesu ena negai idia noho tomadiho gunalaia taudia idia laloa idia be maoro dainai, idia hegeregere Iesu bona iena murinai idia raka taudia idia gwauraia dika totona. Unai idia karaia neganai, idia sibodia be hahemaoro taudia ai idia halaoa. Idia laloparara lasi idia be mai edia kerere dainai, edia hereva amo idia sibodia idia hahemaoro henia.
16 Iuda, Iesu ia gorea tauna, be ma haida hahemaoro henia tauna ai sibona ia halaoa. Betania dekenai, Maria be Iesu ena kwarana dekena dehoro mai ena bonana namona ia bubua neganai, Iuda be ia badu. Ia gwau: “Badina dahaka inai dehoro be ia hoia lasi? 300 kina do ia abia, ogogami taudia dekenai do idia harihari henia.” To, Baibel ese Iuda ena hereva ia gwauraia hedinarai, ia gwau: “Unai bamona ia hereva, be ogogami taudia dekenai ia bogahisihisi lasi, badina ia be henaoa tauna, ia be moni ena maua ia naria, bona idia udaia moni be ia ese ia henaoa.” (Ioane 12:1-6) Namona be Iuda eiava tomadiho gunalaia taudia edia kara ita karaia lasi, idia ese ma haida idia hahemaoro henia haraga, to edia kara amo sibodia idia hahemaoro henia.
17. Mani haheitalai ta amo hekokoroku eiava lalogoada karana edia dika oi hahedinaraia.
17 Madi, ena be Keristani ginigunadia haida be Iuda bamona henaohenao taudia ai idia lao lasi, to idia hekokoroku bona heagi. Iamesi ese idia ia herevalaia, ia gwau: “Umui heagi noho bona umui hekokoroku noho.” Bena ia gwau: “Unai bamona hekokoroku ibounai be dika.” (Iamesi 4:16) Ita karaia gaudia eiava Iehova ena hesiai gaukara lalonai ita abia maduna ita hekokorokulaia neganai, ita sibona ita hadikaia unai. (Aonega Herevadia 14:16) Mani aposetolo Petero ita laloatao, mai lalogoada ida ia gwau: “Taunimanima ibounai ese oi do idia rakatania, to lau be lasi. . . . Oi danu do ita mase nega tamona, to do lau hereva lasi inai bamona, ‘Lau diba lasi Iesu.’ ” Momokani, ita sibona dekenai gau ta dainai ita heagi diba lasi. Ita dekenai idia noho gaudia ibounai be Iehova ena hebogahisi-mai-lalokauna dainai ita abia. Unai ita laloatao neganai do ita hekokoroku lasi.—Mataio 26:33-35, 69-75.
18. Iehova ena lalohadai be dahaka hekokoroku karana dekenai?
18 Baibel ia gwau: “Hekokoroku be hadikaia gabuna dekenai ia lao noho, bona sibona ia gwauraia bada tauna, be do ia moru momokani.” Dahaka dainai? Iehova ia haere: “Hekokoroku, bona manau lasi karadia . . . lau ura henia lasi.” (Aonega Herevadia 8:13; 16:18) Unai dainai, Iehova be “Asuria ena king ena hekokoroku hereva bona iena heagi bada dainai” ia badu dikadika! (Isaia 10:12) Iehova ese unai king ia panisia. Kahirakahira, Satani ena tanobada ibounai, sibona idia abia isi hekokoroku lohia taudia, ita itaia taudia bona ita itaia lasi lauma taudia unai, be Iehova ese do ia panisidia danu. Ita ura lasi Iehova ena inai taudia edia kara, sibona edia ura idia tahua guna karana unai, ita tohotohoa!
19. Edena dala ai Dirava ena taunimanima be idia hekokoroku to idia manau danu?
19 Keristani taudia korikoridia idia hekokoroku diba badina idia be Iehova ena hesiai taudia. (Ieremia 9:24) To danu, do idia manau be namo. Dahaka dainai? “Badina be ita ibounai ita kara dika vadaeni, bona Dirava ena hairaina guba dekenai ita abia be hegeregere lasi.” (Roma 3:23) Unai dainai, iseda ladana, ita be Iehova ena hesiai taudia, ita gimaia totona, namona be aposetolo Paulo ena lalohadai ita abia, ia gwau, “Keriso Iesu be tanobada dekenai ia mai, be kara dika taudia hamauria totona,” bena ma ia gwau: “Bona kara dika tau dikana momokani be lau inai.”—1 Timoteo 1:15.
20. Hari inai negai, edena dala ai Iehova ese iena taunimanima ia gimaia, bona vaira neganai edena bamona do ia gimadia?
20 Iehova ena taunimanima be mai moale ida sibodia edia ura idia dadaraia bona Dirava ena ura idia atoa guna dainai, ita diba momokani Iehova ese lauma dalanai idia do ia gimaia noho. Ita diba danu hisihisi badana ia mai neganai, Iehova ese ena taunimanima be lauma dalanai sibona do ia gimaia lasi, to tauanina dalanai danu do ia gimadia. Dirava ena tanobada matamatana ai idia vareai neganai, do idia boiboi: “Momokani, inai be iseda Dirava. Ita ese ia ita abidadama henia, bona ia ese ita ia hamauria vadaeni. Inai be Lohiabada! Ita ese ita abidadama henia, bona hari ita moale bada noho, ia ese ita ia hamauria dainai.”—Isaia 25:9.
Oi Laloatao, A?
• Edena dala ai Iehova ese Davida bona Iesu ia gimaia?
• Iehova ena taunimanima hari inai negai be edena bamona ia gimadia?
• Dahaka dainai ita sibona ita laloa bada be namo lasi?
• Dahaka dainai ita hekokoroku to ita manau be namo?
[Pictures on page 21]
Edena dala ai Iehova ese Davida bona Iesu ia naria?
[Pictures on page 22, 23]
Hari inai negai, edena dala haida ai Dirava ese iena taunimanima be lauma dalanai ia gimaia?
[Pictures on page 24]
Ena be ita hekokoroku badina Iehova ita hesiai henia, to namona be hanaihanai ita manau be namo