STADI 11

Mai Goada ida Hereva

Roma 12:11

POINT BADANA: Mai goada ida oi hereva unai amo kamonai taudia oi hagoadaia bona durua gau ta idia karaia totona.

Mai kudouna ibounai ida oi hereva. Emu tok oi hegaegaelaia neganai, do oi herevalaia gauna oi laloa bada be namo. Danu, emu tok ena hereva oi stadilaia namonamo, unai amo mai kudouna ibounai ida do oi hereva.
Kamonai taudia oi laloa. Do oi duahia bona hadibaia gauna ese ma haida do ia durua dalana oi laloa dobu be namo. Oi ura kamonai taudia edia ura oi habadaia dainai hadibaia dala namona oi tahua.
Emu hereva dalana oi hamauria. Mai goada ida oi hereva. Emu imana oi gaukaralaia dalana bona vairana ena toana amo emu hemami oi hahedinaraia.

Namo lasi emu tok lalonai kara tamona sibona oi hahedinaraia loulou, bena kamonai taudia idia hesiku o idia kamonai namonamo lasi. Nega maorona ai, imana gaukaralaia. Point badadia oi herevalaia neganai, mai goada ida oi hereva unai amo kamonai taudia oi durua diba kara ta idia karaia totona. To namo lasi tok ibounai lalonai oi hereva goadagoada dainai kamonai taudia idia hesiku.