Duahia Taudia Edia Henanadai
Hadibaia Tauna 5:8 be tanobada ena lohia taudia sibona ia herevalaia, eiava Iehova danu?
Inai siri ia gwau: “Bema oi itaia emu provinsi ai gavamani tauna ta ese ogogami taudia ia dagedage henia bona kara maoromaoro bona hahemaoro goevana ia hagagevaia, namo lasi unai kara dekenai oi hoa. Badina unai gavamani tauna be dagi bada tauna ese ia itaia noho, ma danu edia dagi ia hanaia tauna ese idia ia itaia noho.”—Had. 5:8, NWT.
Reana taunimanima edia lalohadai dekenai inai siri ese gavamani edia lohia taudia ia herevalaia. To unai siri ita laloa dobu neganai, ia ese Iehova ena kara ta ia hahedinaraia danu, bona unai ese ita ia hagoadaia bona ita gari lasi.
Hadibaia Tauna 5:8 ese lohia tauna ta ia herevalaia, ia ese ogogami taudia ia hahisia bona ia kara maoromaoro henidia lasi. Namona be unai lohia tauna ia laloaboio lasi, dagi bada tauna ta eiava iena siahu ia hereaia tauna ta ese ia iena kara ia raraia noho. Bona reana unai dagi bada tauna ena siahu idia hereaia lohia taudia ma haida idia noho. To madi, taunimanima edia gavamani lalodiai, lohia taudia ibounai be kara gageva taudia, unai dainai taunimanima be unai kara gageva dainai hisihisi idia mamia.
Ena be toana be dala be lasi, to ita lalogoada diba, badina ita diba Iehova ese taunimanima edia gavamani ena lohia taudia ia raraia noho. Dirava ena heduru ita noia diba bona iseda lalohekwarahi gaudia be ia dekenai ita negea lao diba. (Sal. 55:22; Fili. 4:6, 7) Ita diba “[Iehova] ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.”—2 Siv. 16:9.
Vadaeni Hadibaia Tauna 5:8 ena hereva ese ita noholaia tanobada ena oromana ia herevalaia bona ia hamomokania nega ibounai siahu bada tauna ta ia noho. To mai anina bada gauna be, unai siri ese ita ia hadibaia Iehova be Ataiai Momokani Diravana. Bona hari Iehova be iena Natuna, Iesu Keriso, Basileia ena King amo ia lohia noho. Siahu Ibounai Diravana be gau ibounai bona taunimanima ibounai ia raraia noho, bona ia be maka tamona ai mai kara maoromaoro ida taunimanima ia kara henidia, bona ena Natuna ese unai ia karaia danu.