Keristen Taudia Edia Lalohadai Gavamani Ena Siahu Taudia Dekenai

“Gavamani ta ia noho diba lasi bema Dirava ia ura lasi neganai.”​—ROMA 13:1.

1. Dahaka dainai ita gwau diba Iehova be Atai Momokani Siahuna?

GAVAMANI ena siahu bona gau ta havaraia siahuna idia hahegeregeredia. Atai Momokani Tauna be idia mauri bona idia mauri lasi gaudia iboudiai ia havaradia, ia be Iehova Dirava. Ia be Atai Momokani Siahuna. Keristen momokani taudia edia hemami be guba aneru edia hemami bamona, idia gwau: “Aiemai [Iehova], aiemai Dirava e, oi be hegeregere momokani vadaeni, taunimanima ibounai ese hairai bona mataurai oi do idia henia, bona oiemu siahu henunai do idia noho. Badina be gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.”​—Apokalupo 4:11.

2. Edena bamona ita diba idaunegai pavapava taudia idia diba taunimanima ma haida idia biagudia be ia maoro lasi, bona Iesu ese Pontio Pilato dahaka ia hamaoroa?

² Idaunegai pavapava taudia momo be edia dagi ena siahu ena maoro idia hamomokania totona, idia gwau idia be dirava ta eiava idia gwau idia be dirava ta ena hereva tauna, bona unai ese ia hahedinaraia idia diba taunimanima ta be ma taunimanima haida ia biagudia be maoro lasi.a (Ieremia 10:23) Mai ena gwaumaoro dagi siahuna be Iehova Dirava ena amo sibona. Pontio Pilato, Iudea ena Roma gavana tauna dekenai Keriso ia gwau: “Bema atai dekenai Diravana ese siahu ia henia lasi oi dekenai, oi be siahu lasi danu do oi noho.”​—Ioane 19:11.

“Gavamani Ta Ia Noho Diba Lasi Bema Dirava Ia Ura Lasi Neganai”

³ Aposetolo Paulo be Roma Basileia ena siahu henunai idia noho Keristen taudia ia tore henidia, ia gwau: “Taunimanima ibounai ese gavamani do idia kamonai henia. Badina be gavamani ta ia noho diba lasi bema Dirava ia ura lasi neganai. Gavamani ena siahu be Dirava ese ia henia.” (Roma 13:1) Iesu ia gwau Pilato ena dagi siahuna be “atai dekenai Diravana” amo ia abia, unai ena anina be dahaka? Bona edena dala amo Paulo ia abia dae iena nega lalonai politikol taudia edia dagi siahuna be Dirava amo idia abia? Unai ena anina be idia abia dae inai tanobada ena politikol taudia ta ta iboudiai be Iehova ese ia abidia hidi, a?

4. Iesu bona Paulo be Satana edena bamona idia gwauraia, bona Iesu ese Satana ena hereva ta ia hakoikoia lasi, unai hereva be dahaka?

⁴ Unai be maoro lasi, badina Iesu ese Satana ia gwauraia “inai tanobada ena lohia,” bona aposetolo Paulo ese ia gwauraia “inai tanobada ena dirava,” ani? (Ioane 12:31; 16:11; 2 Korinto 4:4) Ma danu, Iesu ia dibagania neganai, Satana be ia dekenai “tanobada ena basileia ibounai” ia hahedinarai henia, ia gwau unai basileia biagua ‘siahuna’ ia dekenai ia noho dainai, Iesu ia henia diba. Iesu ese iena hedibagani ia dadaraia, to ia gwau lasi Satana be unai dagi ena siahu ia dogoatao lasi bona ma tau ta dekenai ia henia diba lasi.​—Luka 4:​5-8.

5. (a) Gavamani ena siahu idia herevalaia neganai, Iesu bona Paulo edia hereva ena anina be dahaka? (b) Gavamani ena “siahu be Dirava ese ia henia.” Unai hereva ena anina be dahaka?

⁵ Satana be ia gwau-edeede neganai, bona Adam bona Eva ia dibaganidia bona Iehova ena lohia dalana idia gwau-edeede henia neganai, Iehova ese Satana ia hamasea lasi karana amo ia dekenai inai tanobada ia henia do ia lohiaia totona. (Genese 3:​1-6; Esodo 9:​15, 16 itaia danu.) Vadaeni, Iesu bona Paulo edia hereva ena anina be Eden lalonai taunimanima ginigunadia rua ese tiokratik dalana, Dirava ena lohia dalana unai, idia dadaraia, bona unai murinai Iehova ese ia koudia lasi dainai, taunimanima ese idia biagua gavamani idia haginidia, unai gavamani ena taravatu henunai noho namo do idia davaria gwauraia. Nega ta ta ai, iena ura do ia hagugurua totona, Iehova ese pavapava haida eiava gavamani haida ia hamorudia. (Daniel 2:​19-21) Ma haida ia koudia lasi dainai idia lohia noho diba. Iehova ese pavapava haida ia koudia lasi dainai, ita gwau diba idia dekenai “siahu be Dirava ese ia henia.”

Idaunegai Keristen Taudia Bona Roma Gavamani Taudia

⁶ Iuda tomadiho oreadia be Israel ia biagua Roma gavamanina idia hamorua toho bona idia tuari henia, to idaunegai Keristen taudia be idia ida idia tuari lasi. Roma gavamani ena lohia taudia be mai edia taravatu danu, tano bona davara dekenai idia noho taudia idia biagua heiriheiri ia vara lasi totona; taunimanima durudia totona ranu ia heau daladia, dala, bona nese momo idia karadia; bona edia kara momo amo taunimanima idia durudia, Keristen taudia idia laloa unai gavamani be ‘Dirava ena hesiai gaukara ia karaia idia ia hanamodia totona.’ (Roma 13:​3, 4) Heiriheiri ia vara lasi totona taravatu idia karaia, bona unai taravatu idia noho dainai Keristen taudia be mai edia dala gabu iboudiai dekenai sivarai namona idia harorolaia, Iesu ese ia haganidia hegeregerena. (Mataio 28:​19, 20) Mai edia lalona ena mamina namona ida, idia be Roma taudia idia gwauraia takisi monina idia henia diba, ena be unai moni haida Roma taudia ese idia gaukaralaia Dirava ia ura lasi karadia dekenai.​—Roma 13:​5-7.

7, 8. (a) Roma 13:​1-7 ita duahia namonamo neganai, dahaka ia hahedinaraia, bona unai karoa ena hereva ena anina be dahaka? (b) Roma gavamani ena siahu taudia be edena negai “Dirava ena hesiai gaukara” idia karaia lasi, bona unai neganai idaunegai Keristen taudia be dahaka idia karaia?

⁷ Roma karoa 13 ena siri 1 ia lao 7 ita duahia namonamo neganai, ia hedinarai goevagoeva politikol “gavamani” be “Dirava ena hesiai gaukara” ia karaia ena anina be kara namo taudia do ia hanamodia bona kara dika taudia do ia panisi henidia. Unai karoa ena hereva ma haida ese idia hahedinaraia, gavamani lasi to Dirava ese dahaka be namo bona dahaka be dika ia gwauraia. Unai dainai, bema Roma ena pavapava eiava politikol siahuna ma ta be idia ura Dirava ia taravatua gaudia idia karaia, eiava, Dirava ia ura idia karaia gaudia idia taravatua, unai neganai idia be Dirava ena hesiai gaukara idia karaia lasi. Iesu ia gwau: “Kaisara ena gau, Kaisara dekenai umui henia, to Dirava ena gau be Dirava dekenai umui henia.” (Mataio 22:21) Bema Roma Gavamani ia ura abia gauna be Dirava ena gau, hegeregere taunimanima edia tomadiho eiava edia mauri, Keristen momokani taudia be aposetolo taudia edia sisiba idia badinaia, idia gwau: “Dirava ai kamonai henia be namo, taunimanima ai kamonai henia be dika.”​—Kara 5:29.

⁸ Keristen ginigunadia be pavapava bona kaivakuku tomadiho henia karadia idia dadaraia, Keristen heboudia idia reaia lasi, bona sivarai namona harorolaia gaukara idia hadokoa lasi dainai dagedage idia davaria. Taunimanima momo idia laloa Pavapava Nero ena oda dainai aposetolo Paulo idia hamasea. Pavapava ma haida danu, hegeregere Domitian, Marcus Aurelius, Septimius Severus, Decius, bona Diocletian, be idaunegai Keristen taudia idia dagedage henidia. Unai pavapava taudia bona edia siahu henunai dagi gaukara taudia be Keristen taudia idia dagedage henidia neganai, idia be “Dirava ena hesiai gaukara” idia karaia lasi.

9. (a) Politikol dagi ena siahu idia abia taudia dekenai dahaka ia momokani, bona politikol dagedage gauna ena siahu bona dagi be daika amo ia abia? (b) Ita gwau diba, Keristen taudia be gavamani ena hereva edena bamona idia badinaia?

⁹ Unai hereva amo ia hedinarai goevagoeva, ena be dala haida dekenai politikol dagi ena siahu idia abia taudia be ‘Dirava ena ura hegeregerena’ idia gaukara, taunimanima be heiriheiri lasi dekenai idia noho totona, to idia be Satana, tanobada ia biagua diravana, ena kahanai idia noho. (1 Ioane 5:19) Idia be tanobada ibounai ena politikol oreana lalonai idia vareai, bona Apokalupo 13:​1, 2 ese “dagedage gauna” amo idia ia laulaulaia. Unai dagedage gauna ena siahu bona ena lohia dagina be “huala badana,” Satana Diabolo amo ia abia. (Apokalupo 12:9) Unai dainai, ita gwau diba, Keristen taudia be unai gavamani ena hereva ibounai idia badinaia kava lasi, to Dirava ese idia dekenai ia henia dagi ena siahu hegeregerena ai idia matauraidia.​—Daniel 3:​16-18 itaia.

Gavamani Ita Matauraia

¹⁰ To, ita gwau lasi Keristen taudia be politikol dagi ena siahu idia abia taudia dekenai idia hevaseha bona idia gwau-edeede henidia. Momokani, unai gavamani taudia momo edia kara ruma dekenai eiava edia dagi gaukara dekenai be namo lasi, unai dainai ita matauraidia be auka. To, aposetolo taudia, edia haheitalai namona amo bona edia sisiba hereva amo, idia hahedinaraia dagi ena siahu idia abia taudia ita matauraidia be namo. Pavapava Heroda Agripa Iharuana be matabodaga tauna, to Paulo be ia vairanai ia gini neganai, mai hemataurai danu ia hereva henia.​—Kara 26:​2, 3, 25.

10, 11. (a) Paulo be edena bamona ia hahedinaraia ita matauraidia noho be namo? (b) Edena dala amo bona badina be dahaka “king taudia bona lohia taudia ibounai totona danu do umui noinoi” be namo?

¹¹ Paulo ia gwau danu, ia maoro bema tanobada dagi ena siahu idia abia taudia be iseda guriguri lalonai ita gwauraidia, ia namo bema ita noinoi iseda Keristen ena mauri bona gaukara durua totona dala idia abia hidi gwauraia neganai. Paulo ia toretore, ia gwau: “Lauegu sisiba ginigunana be, lau ura emui guriguri gaukara lalonai, noinoi, guriguri, bona Dirava tanikiu henia, taunimanima ibounai dainai do umui karaia. King taudia bona lohia taudia ibounai totona danu do umui noinoi. Unai dekena amo, Dirava ita badinaia bona matauraia dainai, mai maino danu do ita noho namonamo. Inai bamona kara be namo, badina be inai dekena amo iseda Hahemauri Diravana ita hamoalea noho. Dirava ia ura taunimanima ibounai ese mauri do idia davaria, bona hereva momokani do idia diba.” (1 Timoteo 2:​1-4) Unai dagi ena siahu idia abia taudia ita matauraidia neganai, reana idia ese iseda haroro dalana idia koua lasi, bona ‘taunimanima momo’ hamauridia gaukarana do ita karaia namonamo diba.

12, 13. (a) Dagi ena siahu idia abia taudia dekenai Petero ena sisiba namona be dahaka? (b) “Kavakava taudia edia hereva kava” be taunimanima edia lalona ia veria Iehova ena Witness taudia idia lalo-dika henidia totona; edena dala amo unai hereva ita koua diba?

¹² Aposetolo Petero ia toretore, ia gwau: “Taunimanima edia taravatu ibounai do umui badinaia, Lohiabada dainai. King do umui kamonai henia, badina ia be siahu bada herea tauna. Gavana taudia danu edia hereva do umui badinaia. Badina be king ese idia ia abia hidi, kara dika taudia do idia panisia, to kara namo taudia do idia hanamoa totona. Badina be Dirava ia ura be emui kara namo dekena amo kavakava taudia edia hereva kava do umui koua. Umui be ura kwalimu taudia, to inai ura kwalimu do umui gaukaralaia kerere lasi. Unai ura kwalimu lalonai umui noho neganai hunia dekenai kara dika do umui karaia lasi, to Dirava ena hesiai taudia mai guia danu do umui noho. Taunimanima ibounai do umui matauraia. [Keristen] taudia ibounai do umui lalokau henia. Dirava do umui gari henia. King do umui matauraia.” (1 Petero 2:​13-17) Unai be sisiba maorona! Ita be Dirava ena hesiai taudia dainai gau ibounai dekenai ia ita badinaia; mai iseda hemataurai ida politikol dagi ena siahu idia abia taudia ita matauraidia Dirava ese idia ia henia dagina hegeregerena, badina be kara dika taudia panisia gaukarana idia karaia dainai.

¹³ Ia hedinarai goevagoeva, tanobada dagi ena siahu idia abia orea taudia momo edia lalohadai Iehova ena Witness taudia dekenai be idia kerere. Unai ia vara badina nega momo Dirava ena taunimanima idia inai henidia bona idia lalo-dika henidia taudia ese idia koidia dainai. Eiava reana iseda sivarai be niuspepa, reidio, bona televisen amo idia diba, to nega haida ita idia herevalaia neganai edia hereva be maoro lasi. Iseda hemataurai karadia amo reana nega haida ita idia dadaraia karana ita kokia diba, bona dala ia kehoa neganai, Iehova ena Witness taudia edia gaukara bona edia hahediba herevadia be dagi ena siahu idia abia taudia dekenai ita hahedinaraia bena hereva maorona do idia diba. Idia bisi bada herea siahu taudia dekenai Jehovah’s Witnesses in the Twentieth Century buklet ese unai hereva ia hahedinaraia namonamo. Hereva ma haida idia ura diba neganai, buka ta ladana Jehovah’s Witnesses​—Proclaimers of God’s Kingdom ita henidia diba, unai be heduru buka namona bona siti edia pablik laiberi dekenai ia noho be namo.

Siahu Dalana Keristen Ruma Bese Ai

¹⁴ Ia hedinarai goevagoeva, Dirava ia ura Keristen taudia be tanobada dagi ena siahu idia abia taudia idia matauraidia, vadaeni, unai hegeregerena, namona be Keristen ruma bese lalonai Dirava ia haginia dalana idia matauraia danu. Aposetolo Paulo be Iehova ena taunimanima totona kwarana dagina ia gwauraia hedinarai namonamo. Ia torea, ia gwau: “Lau ura umui diba, tatau ibounai edia kwarana be Keriso, hahine edia kwarana be edia tau, bona Keriso ena kwarana be Dirava.” (1 Korinto 11:3) Unai be tiokratik dalana, eiava Dirava ena lohia dalana. Ena anina be dahaka?

14, 15. (a) Keristen ruma besena lalonai kwarana be daika? (b) Keristen hahine ese edia adavana be edena bamona idia laloa be namo, bona dahaka dainai?

¹⁵ Tiokratik dalana matauraia karana be iseda ruma dekenai ia hedinarai guna. Bema Keristen hahine be ena adavana ena kwarana dagina ia matauraia lasi​—herevana ia be Witness tauna eiava lasi—​ia be tiokratik dalana ia badinaia lasi. Paulo ese Keristen taudia ia sisiba henidia, ia gwau: “Keriso umui matauraia dainai umui ibounai ta ta dekenai do umui matauraia. Hahine e, emui adavana do umui kamonai henia, Lohiabada umui kamonai henia hegeregerena. Badina tau be iena adavana ena kwarana, Keriso be ekalesia ena kwarana bamona. Bona Keriso be ekalesia ena hamauria tauna, ekalesia be iena tauanina. Unai dainai hahine ese gau ibounai lalonai edia adavana do idia kamonai henia, ekalesia ese Keriso ia kamonai henia bamona.” (Efeso 5:​21-24) Keristen tatau be Keriso ena kwarana dagi ena siahu henunai idia gaukara, unai hegeregerena, namona be Keristen hahine idia diba aonega dalana be edia tau idia kamonai henia, badina Dirava ese tau dekenai siahu ia henia. Unai bamona idia karaia neganai, do idia moale momokani, bona gau badana be inai, Iehova ena hahenamo do idia davaria.

16, 17. (a) Hari inai negai, Keristen ruma bese lalonai idia tubu daekau natudia be natudia ma haida amo edena bamona idia idau diba, bona dahaka dainai unai bamona idia ura karaia? (b) Hari inai negai, memero kekeni ese do idia tohotohoa totona, Iesu ena kara toana namona be dahaka, bona hagoadaia hereva idia abia dahaka do idia karaia totona?

¹⁶ Natudia be tiokratik dalana idia badinaia neganai, mai moale danu edia tamana bona sinana idia matauraidia. Nega dokona lalonai idia noho uru taudia edia natudia be “edia tamana bona sinana do idia kamonai henia lasi,” idia perovetalaia. (2 Timoteo 3:​1, 2) To lauma helaga amo idia torea Dirava ena Hereva lalonai, Keristen natudia dekenai ia gwau: “Memero, kekeni e, nega ibounai emui tamana bona sinana do umui kamonai henia, badina inai kara be Dirava ia ura henia.” (Kolose 3:20) Natudia be tamana bona sinana edia dagi ena siahu idia matauraia neganai, unai ese Iehova ia hamoalea bona iena hahenamo do idia davaria.

¹⁷ Iesu ena kara ese unai ia haheitalaia. Luka ena sivarai lalonai ia gwau: “Ia be idia danu [ena tama sina] Nasareta dekenai idia lao, bona ia kamonai henia idia dekenai. . . . Vadaeni Iesu ia tubu daekau noho mai aonega danu, Dirava bona taunimanima ese idia ura henia.” (Luka 2:​51, 52) Unai nega lalonai Iesu ena mauri lagani be 12, bona unai siri lalonai idia gaukaralaia Greek verb herevana ese ia hahedinaraia, ena tamana bona sinana ia ‘kamonai henia noho.’ Ena lagani be 12 ia hanaia negana ai, idia dekenai ia do kamonai noho. Bema umui memero bona kekeni umui ura lauma dalanai do umui goada umui lao, bona umui ura Iehova bona taunimanima be umui do idia lalo-namo henia, vadaeni, ruma bese lalonai bona gabu ma haida dekenai dagi ena siahu idia abia taudia do umui matauraidia.

Kongregesen Lalonai Naria Taudia Edia Siahu

¹⁸ Kongregesen lalonai gau ibounai idia karaia namonamo totona, Paulo ia torea, ia gwau: “Dirava be ia ura lasi hereva kava bona heai, ia be maino Diravana. . . . Ekalesia ena gaukara ibounai umui karaia namonamo, mai dala maorona, karaia kava lasi.” (1 Korinto 14:​33, 40) Gau ibounai do idia karaia namonamo totona, Keriso, Keristen kongregesen ena Kwarana, be mai edia abidadama tatau dekenai dagi ena gaukara ia henidia. Ita duahia, ia gwau: “Keriso ese . . . haida dekenai be aposetolo dagi ia henia, haida dekenai be peroveta dagi ia henia, haida be evanelia gaukara taudia, haida be haroro taudia, haida be [hakaua bona] hadibaia taudia. Inai bamona harihari gaudia ia henia, be Dirava ena taudia ibounai do ia durua totona. Dirava ena hesiai gaukara do idia karaia namonamo, bona Keriso ena tauanina do ia gini goada totona. To ita ese taunimanima do ita lalokau henia, bona inai lalokau dekena amo hereva momokani do ita gwauraia. Vadaeni Keriso ena mauri dalanai, do ita tubu daekau momokani, bona Keriso be iseda orea ena kwarana.”​—Efeso 4:​11, 12, 15.

19. (a) Ena tanobada kohu ibounai naria totona, Keriso ese daika ia abia hidi, bona dagi bada gaukarana be daidia ia henidia? (b) Keristen kongregesen lalonai, dagi ena gaukara be edena bamona idia haria, bona unai dainai dahaka ita karaia be gau badana?

¹⁹ Hari inai nega dokona lalonai, Keriso be “hesiai tauna mai ena kamonai bona mai ena kara maoromaoro” oreana ia abia hidi “ena kohu ibounai,” eiava ena Basileia gaukara tanobada dekenai ia naria totona. (Mataio 24:​45-47) Keristen ginigunadia edia nega lalonai hegeregerena, unai hesiai tauna be hakaua oreana, bona idia be horoa Keristen taudia, bona Keriso ese siahu ia henidia dala haida idia abia hidi totona bona naria taudia ma haida idia abidia hidi totona. (Kara 6:​2, 3; 15:2) Danu, Hakaua Oreana be Brens Komiti taudia, distrik bona sekit naria taudia, bona tanobada ibounai lalonai, Iehova ena Witness edia kongregesen 73,000 bona ma haida lalodiai, elda taudia dekenai dagi gaukara ia henidia. Unai abidadama Keristen tatau iboudiai ita durudia bona ita matauraidia be namo.​—1 Timoteo 5:17.

20. Dahaka haheitalai ese ia hahedinaraia Iehova ia badu bema Keristen taudia be edia tadikaka, Keristen dagi ena gaukara idia abia taudia unai, idia matauraidia lasi?

²⁰ Keristen kongregesen lalonai naria taudia edia siahu idia abia taudia ita matauraidia karana bona tanobada dagi ena siahu idia abia taudia ita matauraidia karana ita hahegeregerea neganai, inai gau ta ita laloa diba. Taunimanima ese taravatu idia karaia bona Dirava ese unai taravatu ia abia dae neganai, bema tau ta ese unai taravatu ia makohia, “gavamani ena siahu” amo panisi do ia abia, bona ia “kara dika” dainai Dirava ese ia badu henia danu. (Roma 13:​3, 4) Bema tau ta be tanobada taravatu ia makohia neganai Iehova ia badu, vadaeni gwauhamata Keristen tauna ta be Baibel ena taravatu ia hamakohidia bona naria taudia edia siahu idia abia Keristen tadikaka ia matauraidia lasi neganai, Ia badu dikadika!

21. Baibel lalonai edena sisiba be mai moale danu ita ura badinaia, bona murina sivarai dekenai dahaka do idia herevalaia?

²¹ Namo lasi gwau-edeede karana eiava ita sibona eda ura badinaia karana dainai Dirava ena badu ita davaria, to namona be Paulo ena sisiba Filipi Keristen taudia dekenai ita badinaia, ia gwau: “Lauegu lalokau taudia e, umui dekenai lau noho neganai lau umui kamonai henia. Vadaeni harihari umui dekenai lau noho lasi neganai danu lau do umui kamonai henia, inai be gau badana. Mai gari bona mai heudeheude danu emui hahemauri do umui tahua noho. Badina be Dirava ese [emui] lalona dekenai ia gaukara noho. Ia ese ura namodia bona goada umui dekenai ia henia noho, vadaeni iena ura karadia do umui karaia. Gau ibounai umui karaia neganai do umui maumau lasi o hepapahuahu lasi. Unai dekena amo umui be kerere ta lasi, bona emui lalona dekenai dika ta do ia noho lasi, Dirava ena natuna edia kara bamona. Bona umui be inai tanobada taudia mai edia dika bona mai edia kerere bada danu edia huanai umui noho. Umui ese idia edia huanai do umui hedinarai, hisiu ese tanobada idia hadiaria bamona.” (Filipi 2:​12-15) Hari inai nega ena uru taudia momo be mai edia dika bona mai edia kerere bada dainai, idia ura lasi dagi ena siahu idia abia taudia idia matauraidia, to Iehova ena taunimanima be mai edia ura danu dagi ena siahu idia abia taudia idia matauraidia. Unai dainai hahenamo momo idia davaria, murina sivarai dekenai unai do ita itaia.

[Footnotes]

Riviu

◻ Atai Momokani Siahuna be daika, bona dahaka dainai iena siahu be maoro?

◻ Gavamani ena “siahu be Dirava ese ia henia” ena anina be dahaka?

◻ Edena negai gavamani taudia be “Dirava ena hesiai gaukara” idia karaia lasi?

◻ Keristen ruma bese lalodiai, kwarana be daika?

◻ Keristen kongregesen lalonai, naria taudia edia gaukara be edena bamona idia haria?

3. “Gavamani ena siahu” dekenai aposetolo Paulo ena hereva be dahaka, bona Iesu bona Paulo edia hereva dainai dahaka henanadai idia vara?

6. Idaunegai Keristen taudia ese Roma gavamani ena orea be edena bamona idia laloa, bona dahaka dainai?

18. Keristen kongregesen ena kwarana be daika, bona daidia dekenai dagi ena gaukara ia henia?

[Picture on page 18]

Iesu ia gwau: “Kaisara ena gau, Kaisara dekenai umui henia”