LESENI 32

Dirava Ena Basileia be Hari Ia Lohia Noho!

Printaia Gauna

Lagani 1914 amo Dirava ena Basileia be guba ai ia lohia matamaia. Danu, unai nega ai taunimanima edia lohia negana ginigabena ia matamaia. Edena dala ai unai ita diba? Baibel ena peroveta herevadia bona lagani 1914 amo tanobada ai idia vara gaudia, bona taunimanima edia kara ese unai ia hamomokania dalana do ita herevalaia.

1. Baibel ena peroveta herevana ese dahaka ia hahedinaraia?

Baibel bukana Daniela ese ia hahedinaraia, Dirava ena Basileia be “lagani 7” ena dokona ai do ia lohia matamaia. (Daniela 4:16, 17) Lagani handred momo murinai, Iesu ese unai nega ia gwauraia “idau bese edia nega,” bona ia hadibaia unai nega be ia do ore lasi. (Luka 21:24) Inai stadi ai do ita itaia lagani 7 be lagani 1914 ai ia doko.

2. Lagani 1914 amo, tanobada ai dahaka gaudia idia vara, bona taunimanima edia kara be edena bamona?

Iesu ena hahediba taudia be ia idia nanadaia: “Do oi noho negana bona inai nega oromana ena dokona ena toana be dahaka?” (Mataio 24:3) Iesu be idia dekenai ia gwau, ia be guba ai Dirava ena Basileia ena King ai ia lao bena ia lohia matamaia murinai, peroveta herevadia momo do idia vara. Hegeregere, tuari, hitolo bada, bona tano mareremarere. (Mataio 24:7 duahia.) Danu Baibel ia peroveta, “dina gabedia ai” taunimanima edia kara ese mauri do idia “hametaua bada.” (2 Timoteo 3:1-5) Lagani 1914 amo idia vara gaudia bona taunimanima edia kara ese unai ia hamomokania.

3. Dirava ena Basileia ia lohia matamaia negana amo, dahaka dainai tanobada ai dika momo idia vara?

Iesu be Dirava ena Basileia ena King ai ia lao murinai, guba ai Satani mai ena demoni ia tuari henidia. Unai tuari ai Satani ia kwalimu lasi. Baibel ia gwau, “ia bona ena aneru be tanobada dekenai idia negea diho.” (Apokalupo 12:9, 10, 12) Satani ia badu dikadika badina ia diba ia do idia hadikaia ore. Unai dainai tanobada ibounai dekenai hisihisi bona dika idauidau ia havaraia noho. Unai gaudia amo ita laloparara dahaka dainai dika ia bada ia lao noho! Dirava ena Basileia ese unai hekwakwanai ibounai do ia kokia.

DIBA MA HAIDA ABIA

Dirava ena Basileia be lagani 1914 amo ia lohia matamaia ita dibaia dalana, bona unai ena anina ita dekenai oi stadilaia.

4. Baibel ena peroveta herevadia ese lagani 1914 ia hamomokania

VIDIO itaia.

VIDIO: Lagani 1914 ai Dirava Ena Basileia Ia Lohia Matamaia (5:02)

Dirava ese nihi ta amo idaunegai Babulonia ena King Nebukanesa dekenai vaira negai do idia vara gaudia ia hahedinaraia. Daniela ese unai nihi bona ena anina ia herevalaia karana amo ia hahedinaraia unai be Nebukanesa ena lohia gaukarana bona Dirava ena Basileia ia herevalaia.—Daniela 4:17 duahia.a

Daniela 4:20-26 duahia, bena chart gaukaralaia inai henanadai haerelaia totona:

(A) Nebukanesa be ena nihi ai dahaka ia itaia?—Siri 20 bona 21 itaia.
(B) Au dekenai dahaka do ia vara?—Siri 23 itaia.
(C) “Lagani 7” ena dokona ai dahaka do ia vara?—Siri 26 itaia.

Nihi ai Ia Hedinarai Au ese Dirava Ena Basileia Ia Herevalaia Dalana

PEROVETA HEREVANA (Daniela 4:20-36)

Lohia negana

(A) Au lata herea ta

Lohia negana ia stopu

(B) “Au utua diho,” bona “lagani 7 idia ore”

Au ena gabana be auri bona kopa amo idia hagegea.

Lohia negana ia matamaia lou

(C) “Emu basileia do oi abia lou”

Peroveta herevana be nega ginigunana ia guguru neganai . . .

(D) Au ese daika ia laulaulaia?—Siri 22 itaia.
(E) Edena dala ai iena lohia negana ia stopu?—Daniela 4:29-33 duahia.
(F) “Lagani 7” ena dokonai, Nebukanesa dekenai dahaka ia vara?—Daniela 4:34-36 duahia.

NEGA GINIGUNANA IA GUGURU

Lohia negana

(D) Nebukanesa, Babulonia ena King

King Nebukanesa be mai hekokoroku ida ia gini noho.

Lohia negana ia stopu

(E) Lagani 606 B.C.E. murinai, Nebukanesa be ia kavakava bona lagani 7 korikoridia lalonai ia lohia lasi

Nebukanesa be tano ai ia hekure bona ava ia ania noho animal ta bamona.

Lohia negana ia matamaia lou

(F) Nebukanesa ia namo lou bona ia lohia matamaia lou

King Nebukanesa be imana ia abia isi, bona guba ia itaia noho.

Peroveta herevana be nega iharuana ia guguru neganai . . .

(G) Au ese daidia ia laulaulaia?—1 Sivarai 29:23 duahia.
(H) Edena dala ai edia lohia negana ia stopu? Edena dala ai ita diba Iesu be tanobada ai ia noho neganai, idia lohia noho lasi?—Luka 21:24 duahia.
(I) Edena nega ai bona edeseniai unai lohia negana ia matamaia lou?

NEGA IHARUANA IA GUGURU

Lohia negana

(G) Israela ena king ese Dirava ena lohia negana idia laulaulaia

Israela ena king ta ta be terona ai idia helai. Bona diari be edia latanai ia diho noho.

Lohia negana ia stopu

(H) Ierusalema idia hadikaia, bona lagani 2,520 lalonai Israela ena bese amo king ta ia lohia lasi

Lagani 607 B.C.E. ai, idaunegai Ierusalema be lahi ese ia hadikaia. Unai murinai lagani 2,520 idia hanaia.

Lohia negana ia matamaia lou

(I) Iesu be guba ai Dirava ena Basileia ena King ai ia lao bona ia lohia matamaia

Lagani 1914 C.E, Iesu be guba dekenai ena terona ai ia lohia. Diari be ia amo ia diho.

Lagani 7 ena daudau be edena bamona?

Baibel ena kahana haida ese ita ia durua, kahana ma haida ita lalopararalaia totona. Hegeregere Baibel ai, Apokalupo bukana ia gwau, nega toi mai ena kahana ta (3 1/2) be dina 1,260. (Apokalupo 12:6, 14) Unai dainai lagani 7 be dina 2,520. Nega haida Baibel ai inai hereva dina tamona ena anina be lagani tamona. (Esekiela 4:6) Unai dainai Daniela bukana ese ia herevalaia lagani 7 ena daudau be lagani 2,520.

5. Lagani 1914 amo tanobada ai gau momo idia idau

VIDIO itaia.

VIDIO: Lagani 1914 amo Tanobada ai Gau Momo Idia Idau (1:10)

Iesu ia peroveta, King ai ia lao murinai, tanobada ai gau idauidau do idia vara. Luka 21:9-11 duahia, bena inai henanadai herevalaia:

Edena gaudia be oi itaia eiava oi kamonai idia vara noho?

Aposetolo Paulo ese inai nega dokona ai taunimanima edia lohia dalana dainai do idia vara gaudia ia herevalaia. Timoteo Iharuana 3:1-5 duahia, bena inai henanadai herevalaia:

Hari inai negai, oi itaia taunimanima ese unai bamona karadia idia hahedinaraia noho, a?

Laulau: Inai piksa ese nega dokona ena toana ia hahedinaraia. 1. Tuari ena gunalaia tauna be podium ai ia gini bona mai boiboi ida imana ia abia isi. 2. Tano mareremarere ese ia hadikaia bildin. 3. Tuari peleini. 4. Hutuma be mask idia karaia bona idia raka lao mai. 5. New York ai, be terorist taudia ese idia hadikaia Twin Tower be lahi ese ia araia noho. 6. Tau ta be drag ia abia. 7. Tau ta be imana ia abia isi bona mai badu ida ena hahine dekenai ia boiboi. 8. Drag bona alkahol idauidau. 9. Hahine rua be dava bada dabua bona herahera gaudia idia hahedokilaia bona laulau idia abia noho. 10. Konset ta dekenai miusiki gadaralaia tauna ese hutuma ia gunalaia. 11. Gwau-edeede tauna ta ese petrol kavabu mai ena lahi ia negea.

6. Dirava ena Basileia ena lohia karana ese ita ia hagoadaia be namo

Mataio 24:3, 14 duahia, bena inai henanadai herevalaia:

Edena mai anina bada gaukarana ese ia hahedinaraia Dirava ena Basileia ia lohia noho?
Edena dala ai unai gaukara oi durua diba?

Dirava ena Basileia ia lohia noho bona tanobada do ia biagua dinana be ia kahirakahira vadaeni. Heberu 10:24, 25 duahia, bena inai henanadai herevalaia:

Ita itaia “dina be ia kahirakahira noho” dainai, ita ta ta ese dahaka ita karaia be namo?

Laulau: 1. Baibel stiuden ta be Iehova ena Witnes taudia edia hebou ta dekenai ia lao. 2. Unai seim stiuden be ena turana ta dekenai ia haroro. — Bema oi dibaia gaudia ese ta do ia durua bona hamauria, dahaka do oi karaia be namo?

REANA TA DO IA HENANADAI: “Dahaka dainai Iehova ena Witnes taudia idia gwau 1914 be mai anina bada laganina?”

Edena bamona do oi haere?

POINT BADANA

Baibel ena peroveta hereva, nega duahia karana, bona tanobada ai idia vara gaudia ese idia hamomokania, Dirava ena Basileia be hari ia lohia noho. Ita hahedinaraia unai ita abia dae bema Basileia ita harorolaia bona kongrigeisen heboudia dekenai ita lao.

Riviu

Baibel ai Daniela bukana ese ia perovetalaia lagani 7 ena dokona ai dahaka ia vara?
Dahaka dainai oi abia dae momokani Dirava ena Basileia be lagani 1914 ai ia lohia matamaia?
Edena dala ai do oi hahedinaraia Basileia be hari ia lohia noho?

Leseni ia ore deit:

Tahua Gauna

Oi gaukara goada unai amo do oi hegeregere sivarai namona harorolaia totona.

Gau ma haida:

Emu tahua gauna ma ta

REFERENS ITAIA

Histori torea taudia bona ma haida ese lagani 1914 ai tanobada ia idau dalana idia herevalaia dalana oi stadilaia.

“Taunimanima Edia Kara ia Dika Bona Ia Senisi Haraga” (Noga!, April 2007)

Mataio 24:14 ai ia noho peroveta herevana ese tau ta ena mauri ia haidaua dalana oi duahia.

“Beisbol Gadara Lau Ura Henia Momokani!” (Gima Kohorona No. 3 2017)

Edena dala ai ita diba Daniela karoa 4 ai ia noho peroveta herevana ese Dirava ena Basileia ia herevalaia?

“Dirava Ena Basileia be Edena Negai Ia Lohia Matamaia? (Kahana 1)” (Gima Kohorona, October 1, 2014)

Dahaka ese ia hamomokania Daniela karoa 4 ese ia herevalaia “lagani 7” be lagani 1914 ai ia doko?

“Dirava Ena Basileia be Edena Negai Ia Lohia Matamaia? (Kahana 2)” (Gima Kohorona, January 1, 2015)

a Inai leseni ena Referens Itaia kahana ai idia noho atikol ginigabedia rua oi duahia.