“Hebogahisi Ena Taravatu” ese Oi Ia Hagoadaia be Namo

LISAa ia gwau, “Tadikaka bona taihu edia hebogahisi karana ese lau ia hagoadaia bada.” Unai kara ese Lisa ia durua hereva momokani ia abia dae totona. Anne danu be unai bamona, ia gwau, “Witnes taudia ese idia hadibaia gaudia sibona lasi, to edia hebogahisi karana dainai hereva momokani lau abia dae.” Unai taihu rua be hebogahisi karana dainai namo bada idia davaria, bona hari Baibel duahia bona laloa dobu karana idia moalelaia.

Edena dala ai ita hahedinaraia hebogahisi karana ese ma haida edia kudouna ia hamarerea diba? Mani dala rua ita herevalaia: Iseda malana bona kara. Bena do ita itaia daidia dekenai hebogahisi karana ita hahedinaraia be namo.

“HEBOGAHISI ENA TARAVATU” EMU MALANA AI

Aonega Herevadia karoa 31 ese ia herevalaia hahine namona ena malana ai “hebogahisi ena taravatu” ia noho. (Aon. 31:26, ftn.) Ia be unai “taravatu” ese ia durua ia herevalaia gaudia bona ia gwauraia dalana ia biagua totona. Danu, tamadia edia malana ai unai “taravatu” ia noho be namo. Tama sina momo idia diba, bema mai badu ida idia hereva, unai ese natudia do ia hahisia bona edia hereva do idia kamonai lasi. Unai dainai, tama sina be mai hebogahisi ida idia hereva neganai, natudia ese edia hereva do idia kamonai bona badinaia diba.

Herevana oi be tama o sina ta eiava lasi, edena dala ai mai hebogahisi ida oi hereva diba? Aonega Herevadia 31:26 ena matamaia kahana ese unai ia hahedinaraia, ia gwau: “Mai aonega ida ia hereva.” Unai ena anina be, hereva maorodia ita abia hidi bona mai gado namo ida ita hereva. Unai ese ita ia durua sibona ita nanadaia totona, ‘Do lau gwauraia herevana ese badu eiava maino ia havaraia?’ (Aon. 15:1) Oibe, ita do hereva lasi neganai, ita laloa namonamo guna be aonega karana.

Aonega herevana ma ta ia gwau: “Ia laloa namonamo lasi tauna ena hereva be tuari kaia amo ta ia gwadaia bamona.” (Aon. 12:18) Iseda gado regena bona ita herevalaia gaudia ese ma haida edia hemami ia hadikaia dalana ita laloa neganai, unai ese ita do ia durua iseda malana ita biagua totona. Oibe, “hebogahisi ena taravatu” ita badinaia neganai, unai ese ita do ia durua, iseda hereva amo ma haida ita hahisia lasi bona badu dalanai ita hereva lasi. (Efe. 4:31, 32) Ita ese lalohadai bona hereva kereredia do ita dadaraia, to mai gado namo ida hereva namodia do ita gwauraia. Iehova ese ena hesiai tauna Elia ia hagoadaia karana amo haheitalai namona ia hahedinaraia. Iehova be aneru amo “gado maragimaragina” dekenai ia hereva. (1 Kin. 19:12) Hebogahisi karana be iseda hereva sibona amo lasi, to iseda kara amo ita hahedinaraia danu. Edena dala ai?

HEBOGAHISI KARADIA ESE MA HAIDA IA HAGOADAIA

Iseda hereva bona kara amo hebogahisi ita hahedinaraia neganai, Iehova ita tohotohoa. (Efe. 4:32; 5:1, 2) Matamanai ita herevalaia hahinena, Lisa, be Witnes taudia ese idia hahedinaraia hebogahisi karana ia herevalaia. Ia gwau: “Nega kwadogina lalonai ai idia doria emai noho gabuna ai rakatania totona neganai, kongrigeisen amo headava tau bona ena hahine be moni gaukara amo idia laga-ani [time off] bona ai idia durua emai kohu ai haboua totona. Unai negai, Baibel lau stadilaia lasi!” Unai hebogahisi karadia ese Lisa ia durua hereva momokani ia diba namonamo totona.

Matamanai ita herevalaia hahine, Anne, be Witnes taudia ese idia hahedinaraia hebogahisi karana ia laloa bada. Ia gwau: “Iehova idia hesiai henia lasi taudia ese lau idia kara henia dalana dainai, ia auka taunimanima lau trast totona.” Ma ia gwau: “Witnes taudia lau hedavari henia neganai idia lau trast lasi. Bona lau laloa, ‘Dahaka dainai lau idia laloa bada?’ To lau ia stadi henia hahine ena hebogahisi karadia ese lau ia hagoadaia.” Dahaka namo ia vara? Ia gwau, “Gabeai, lau dibaia gaudia lau laloa namonamo matamaia.”

Lisa bona Anne be kongrigeisen taudia ese idia hahedinaraia hebogahisi karadia dainai, idia ura hereva momokani idia dibaia noho. Tadikaka taihu edia hebogahisi karana ese idia ia durua Iehova bona ena taunimanima idia trast totona.

DIRAVA TOHOTOHOA BONA MA HAIDA HEBOGAHISI HENIA

Haida be idia tubu daekau dalana dainai, ia auka lasi hereva namodia idia gwauraia bona kiri toana idia hahedinaraia totona. Haida be edia kastom eiava idia manadalaia karana dainai hemataurai karadia idia hahedinaraia. Bema unai gaudia sibona dainai kara namodia ita hahedinaraia, ita be Dirava ena hebogahisi karana ita tohotohoa lasi.​—Kara 28:2 hahegeregerea.

Hebogahisi korikorina be lauma helaga ena huahua ta. (Gal. 5:22, 23) Unai dainai hebogahisi korikorina ita hahedinaraia totona, namona be Dirava ena lauma ese iseda lalohadai bona kara ia biagua. Unai bamona ita karaia neganai, Iehova bona Iesu ita tohotohoa. Bona ita be Keristani taudia dainai, ma haida ita laloa bada. Iehova Dirava bona iseda tadikaka taihu ita lalokau henia dainai hebogahisi karana ita hahedinaraia. Oibe, ita hahedinaraia hebogahisi karana be iseda kudouna amo ia mai bona Dirava ese ia abia dae.

DAIDIA ITA HEBOGAHISI HENIA?

Reana do ia auka lasi ita idia hebogahisi henia taudia eiava ita diba taudia dekenai hebogahisi karana ita hahedinaraia totona. (2 Sam. 2:6) Dala ta be idia dekenai tanikiu karana ita hahedinaraia. (Kol. 3:15) To dahaka do ita karaia bema ta be ita dekenai hebogahisi karana ia hahedinaraia lasi?

Mani inai ita laloa: Iehova be hebogahisi hereadaena ia hahedinaraia Diravana, bona iena Hereva, Baibel, ese ita ia hadibaia unai mai anina bada karana ita hahedinaraia totona. Keristani Grik Toretoredia ai inai hereva “hebogahisi hereadaena” be nega momo ia hedinarai. Edena dala ai Dirava ese ita dekenai hebogahisi karana ia hahedinaraia?

Iehova be taunimanima ibounai dekenai mauri durua gaudia ia henia, unai amo hebogahisi karana ia hahedinaraia. (Mat. 5:45) Momokani, Iehova ita do diba lasi neganai ita dekenai hebogahisi karana ia hahedinaraia. (Efe. 2:4, 5, 8) Hegeregere, iena Natuna korikorina be taunimanima ibounai totona ia henia. Aposetolo Paulo ia gwau Iehova be “iena hebogahisi hereadaena hegeregerena” mauri davana ia henia. (Efe. 1:7) Danu, ena be ita kara dika bona Iehova ena lalona ita hahisia, to ita ia hakaua bona hadibaia noho. “Medu be metairametaira rei latanai ia diho bamona,” Iehova ena hakaua herevadia ese ita idia hakaua namonamo. (Deu. 32:2) Ita be hegeregere lasi Dirava ese ita dekenai ia hahedinaraia hebogahisi karadia ita haloua totona. Bona Iehova ena hebogahisi karana dainai vaira nega ena helaro ita abia diba.​—1 Petero 1:13 hahegeregerea.

Ita diba momokani Iehova ena hebogahisi karana be namo herea bona ita ia hagoadaia. Unai dainai, ma haida sibona dekenai hebogahisi ita hahedinaraia lasi, to ita hekwarahi dina ta ta ai taunimanima ibounai dekenai hebogahisi karana ita hahedinaraia, unai amo Iehova ita tohotohoa. (1 Tes. 5:15) Nega ibounai hebogahisi karana ita hahedinaraia neganai, ita be keru negana ai ia noho lahi bamona. Ita ese iseda famili taudia, tadikaka taihu, gaukara bona sikuli turadia bona eda neiba taudia ita durua diba.

Emu famili eiava kongrigeisen ai emu hereva bona kara namodia ese ia durua taudia haida mani oi laloa. Reana kongrigeisen ai ta be heduru ia ura, hegeregere ena ruma bona uma gabu oi hagoevaia eiava sitoa dekenai ena ura gaudia oi hoia. Danu, haroro gaukara ai oi davaria tauna ta be heduru ia ura neganai ia oi durua, a?

Iehova ita tohotohoa totona, nega ibounai iseda hereva bona kara dekenai “hebogahisi ena taravatu” ita badinaia be namo.