Mai Anina Bada Peroveta Herevana Ta

1. Adamu bona Heva idia kara dika bona daudau lasi murinai, Iehova be dahaka ia karaia? (Genese 3:15)

ADAMU bona Heva idia kara dika bona daudau lasi murinai, Iehova be mai anina bada peroveta herevana ta ia gwauraia, unai ese edia bese taudia dekenai namo ia havaraia. Ia gwauraia herevana be Genese 3:15 ai ia noho.​—Duahia.

2. Dahaka dainai unai peroveta herevana be mai anina bada?

² Genese 3:15 ena peroveta herevana be Baibel ena buka ginigunana ai ia noho. To, Baibel bukadia ma haida ese unai peroveta herevana idia durua danu. Tau ta be ia printaia bukana ena rau ibounai ia hakapua hegeregerena, Genese 3:15 ena hereva ese Baibel ena sivarai ibounai ia hakapua. Unai be, Dirava ese Hahemauri Tauna ta do ia siaia, Diabolo bona ena murinai idia raka taudia ibounai ia hadikaia ore totona.b Iehova idia lalokau henia taudia dekenai unai be moale gauna!

3. Inai atikol ai dahaka do ita herevalaia?

³ Inai atikol ai, Genese 3:15 ena peroveta herevana totona inai henanadai haida do ita haerelaia: Peroveta herevana ese daidia ia herevalaia? Edena dala ai unai peroveta herevana ia guguru? Bona edena dala ai unai peroveta herevana amo namo ita abia?

PEROVETA HEREVANA ESE DAIDIA IA HEREVALAIA?

4. “Gaigai” be daika, bona edena dala ai unai ita diba?

⁴ Genese 3:14, 15 ese ia herevalaia taudia be, “gaigai” ta, gaigai ena “natuna,” “hahine” ta, bona hahine ena “natuna.” Baibel ese ita ia durua unai gaudia ta ta ita dibaia totona.c Mani “gaigai” ita herevalaia guna. Eden umana lalonai gaigai korikorina be Iehova ese ia gwauraia herevana ia lalopararalaia lasi. Unai dainai Iehova ena hahemaoro herevana be aonega aneruna ta totona ia gwauraia. Ia be daika? Apokalupo 12:9 ese unai gaigai ia gwauraia hedinarai. Ia be “idaunegai gaigaina” bona ena ladana be Satani Diabolo. To, gaigai ena natuna be daidia?

5. Gaigai ena natuna be daidia?

⁵ Nega haida Baibel ese inai hereva “natuna” ia gaukaralaia neganai, ena anina be ta ena lalohadai bona kara idia tohotohoa taudia ia herevalaia, idia be iena natuna bamona. Unai dainai gaigai ena natuna be gwau-edeede anerudia bona taunimanima ia herevalaia, idia be Satani hegeregerena Iehova Dirava idia dadaraia bona Iena taunimanima idia inai henia. Noa ena negai guba idia rakatania anerudia, bona danu kara dika taudia ia herevalaia, idia be edia tamana Diabolo idia tohotohoa.​—Gen. 6:1, 2; Ioa. 8:44; 1 Ioa. 5:19; Iuda 6.

6. Dahaka dainai “hahine” be Heva ia herevalaia lasi?

⁶ Hari, “hahine” do ita herevalaia. Ia be Heva ia herevalaia lasi. Dahaka dainai? Mani ena badina ta ita laloa. Unai peroveta herevana ia gwau, hahine ena natuna ese gaigai ena kwarana do ia “moia patapata.” Ita herevalaia bamona, gaigai be kara dika aneruna, Satani, ia herevalaia, bona Heva ena goevadae lasi natuna ta be hegeregere lasi Satani ia moia patapata totona. Unai dainai daika ese Satani do ia hadikaia ore?

7. Apokalupo 12:1, 2, 5, 10 ese ia hahedinaraia hegeregerena, Genese 3:15 ai ia herevalaia hahine be daika?

⁷ Genese 3:15 ese ia herevalaia hahine be Baibel ena buka ginigabena ese ia gwauraia hedinarai. (Apokalupo 12:1, 2, 5, 10 duahia.) Ia be tanobada dekenai ia noho hahinena ta lasi! Hua be hahine ena aena henunai ia noho, bona hisiu 12 be korona ta bamona iena kwarana ai idia noho. Ia ese natuna idauna ta ia havaraia, unai be Dirava ena Basileia. Unai Basileia be guba gauna, unai dainai unai hahine danu be guba amo. Hahine be Iehova ena guba oreana ia laulaulaia, bona kamonai anerudia be unai orea lalonai idia noho.​—Gal. 4:26.

8. Daika be hahine natuna ena kahana ginigunana, bona edena negai unai ia vara? (Genese 22:15-18)

⁸ Danu Baibel ese ita ia durua hahine natuna ena kahana ginigunana ita diba totona. Unai natuna be Aberahamo ena bese tauna ta. (Genese 22:15-18 duahia.) Unai peroveta herevana ia gwau bamona, Iesu be unai abidadama tauna ena bese amo ia mai. (Luka 3:23, 34) To natuna ena siahu ese taunimanima edia siahu ia hereaia, badina ia ese Satani Diabolo ia hadikaia ore diba. Unai dainai, Iesu ena mauri lagani be 30 neganai, ia be lauma helaga ese ia horoa. Unai negai, Iesu be hahine natuna ena kahana ginigunana ai ia lao. (Gal. 3:16) Iesu ia mase bona ia toreisi lou murinai Dirava ese “hairai bona hemataurai” ia henia, bona ‘siahu ia henia, guba bona tanobada gaudia ibounai ia biagua totona,’ danu siahu ia henia “Diabolo ena gaukara ibounai ia haorea momokani totona.”​—Heb. 2:7; Mat. 28:18; 1 Ioa. 3:8.

9-10. (a) Daidia be hahine natuna ena kahana iharuana, bona edena negai unai ia vara? (b) Hari dahaka do ita herevalaia?

⁹ To ma haida be hahine natuna ena kahana iharuana ai idia lao. Aposetolo Paulo ese Iuda bona Idau Bese horoa Keristani taudia ia hereva henia neganai, hahine natuna ena kahana iharuana ia hahedinaraia, ia gwau: “Bema umui be Keriso ena, umui be momokani Aberahamo ena natudia, umui be gwauhamata ahuna do umui abia.” (Gal. 3:28, 29) Iehova ese lauma helaga amo Keristani tauna ta ia horoa neganai, ia be hahine natuna ena kahana iharuana ai ia lao. Unai dainai hahine natuna be, Iesu Keriso bona ia ida do idia lohia 144,000 ia herevalaia. (Apok. 14:1) Unai taudia ibounai ese edia Tamana, Iehova Dirava, ena lalohadai bona kara idia tohotohoa.   

¹⁰ Genese 3:15 ese ia herevalaia taudia ita diba vadaeni, to hari Iehova ese unai peroveta herevana ia hagugurua dalana bona unai ese ita ia durua dalana do ita herevalaia.

EDENA DALA AI PEROVETA HEREVANA IA GUGURU?

11. Hahine natuna ena “aena geduna” idia haberoa ena anina be dahaka?

¹¹ Genese 3:15 ena peroveta herevana hegeregerena, gaigai ese hahine natuna ena “aena geduna” ia haberoa. Satani ese Iuda bona Roma taudia ia gaukaralaia Dirava ena Natuna idia hamasea neganai, unai ia guguru. (Luka 23:13, 20-24) Ta be aena dekenai bero ia abia neganai nega sisina do ia raka namonamo lasi, unai hegeregerena Iesu ia mase neganai ia be nega sisina lalonai gau ta ia karaia lasi.​—Mat. 16:21.

12. Iesu ese edena dala ai bona edena negai gaigai ena kwarana do ia moia patapata?

¹² Genese 3:15 ena peroveta herevana ia guguru totona, Iesu be mase gurina lalonai ia noho daudau lasi. Dahaka dainai? Badina peroveta herevana ia gwau, unai natuna ese gaigai ena kwarana do ia moia patapata. Unai ena anina be Iesu ena aena geduna, idia haberoa gauna be do ia namo lou. Bona unai ia vara! Iesu ia mase bona dina ihatoina ai ia toreisi lou murinai, guba dekenai mase diba lasi maurina ia abia. Dirava ena nega korikorina ai, Iesu ese Satani do ia haorea momokani. (Heb. 2:14) Keriso bona ia ida do idia lohia taudia ese tanobada ai Dirava ena inai taudia, gaigai ena natudia unai, do idia hadikaia ore.​—Apok. 17:14; 20:4, 10.d

EDENA DALA AI PEROVETA HEREVANA AMO NAMO ITA ABIA?

13. Edena dala ai unai peroveta herevana ena guguru karana amo namo ita davaria?

¹³ Bema oi be Dirava ena hesiai tauna ta, inai peroveta herevana ena guguru karana amo namo oi davaria diba. Iesu be taunimanima ta bamona tanobada dekenai ia mai. Ia ese tamana ena kara ia tohotohoa goevagoeva. (Ioa. 14:9) Unai dainai, Iesu amo Iehova Dirava ita dibaia bona lalokau henia. Danu Iesu ena hadibaia herevadia bona Keristani kongrigeisen ia hakaua dalana amo namo ita davaria. Bona ia ese ita ia hadibaia mauri dala namona ita badinaia totona, unai amo Iehova ena lalonamo ita abia. Iesu ena aena geduna idia haberoa eiava ia mase dainai namo ita davaria. Edena dala ai? Iesu ia toreisi lou neganai, ena mauri goevadaena ese “kara dika ibounai amo ita ia hagoevaia.”​—1 Ioa. 1:7.

14. Edena dala ai ita diba Iehova ese Eden umana ai ia gwauraia peroveta herevana be unai negai ia guguru lasi? Herevalaia.

¹⁴ Iehova ese Eden umana ai ia gwauraia peroveta herevana be nega daudau murinai ia guguru. Nega bada lalonai unai gaudia do idia vara, hegeregere hahine be peroveta herevana ese ia gwauraia natuna do ia havaraia, Diabolo be ena murinai idia raka taudia do ia haboua, bona unai orea rua do idia inai heheni. Unai peroveta herevana amo namo ita davaria, badina ita ia hadibaia Satani ese ia biagua tanobadana ese Iehova idia tomadiho henia taudia do ia inai henia. Iesu ese ena hahediba taudia dekenai unai ia herevalaia danu. (Mar. 13:13; Ioa. 17:14) Lagani 100 lalonai, unai peroveta herevana ena kahana ta ia guguru karana ita itaia. Edena dala ai?   

15. Dahaka dainai tanobada ese ita ia inai henia bada, to dahaka dainai Satani ita gari henia lasi?

¹⁵ Lagani 1914 ai Iesu be King ai ia lao neganai, Satani be guba amo ia negea diho. Ia be tanobada dekenai ia noho, bona kahirakahira do idia hadikaia ore. (Apok. 12:9, 12) To unai nega amo Satani be ia gaukara goada noho. Ia be Dirava ena taunimanima dekenai ia badu dikadika. (Apok. 12:13, 17) Unai dainai, Satani ena tanobada ese Dirava ena taunimanima ia inai henia bada. To, Satani bona ena murinai idia raka taudia dekenai ita gari lasi. Namona be iseda abidadama be aposetolo Paulo ena bamona, ia gwau: “Bema Dirava be iseda kahanai, daika ese ita do ia tuari henia?” (Roma 8:31) Gau badana be Iehova ita abidadama henia momokani, badina ita itaia Genese 3:15 ai ia noho peroveta herevana ena kahana momo be idia guguru vadaeni.   

16-18. Curtis, Ursula, bona Jessica be Genese 3:15 idia lalopararalaia dainai, edena dala ai idia ia durua?

¹⁶ Genese 3:15 ai Iehova ena gwauhamata ese ita ia durua ita davaria hekwakwanai idauidau ita haheaukalaia totona. Guam dekenai misinari gaukara ia karaia tadikaka, Curtis, ia gwau: “Egu mauri ai idia vara gaudia dainai nega haida ia auka Iehova lau badinaia totona. To Genese 3:15 ena peroveta herevana lau laloa dobu karana ese lau ia durua, egu guba Tamana lau abidadama henia noho totona.” Curtis be Iehova ese iseda hekwakwanai ibounai do ia haorea negana ia naria noho.

¹⁷ Bavaria dekenai ia noho taihu Ursula ia gwau Genese 3:15 ia lalopararalaia dainai ia abia dae Baibel be Dirava amo ia mai bukana. Danu, peroveta herevadia ma haida ese Genese 3:15 idia durua dalana ia itaia, bona unai ese ia hagoadaia bada. Ursula ia gwau: “Iehova be kara ta ia karaia haraga taunimanima edia mauri ia namo lou totona, unai lau dibaia neganai Iehova lau lalokau henia bada.”

¹⁸ Micronesia taihu ta, Jessica, ia gwau: “Nega ginigunana hereva momokani lau davaria neganai lau abia hemami lau laloatao! Genese 3:15 ena peroveta herevana ia guguru. Unai lau lalopararalaia neganai, lau diba ita mamia hisihisi idauidau be Iehova ena ura dainai idia vara lasi. Danu unai peroveta herevana ese egu abidadama ia hagoadaia, bona lau abia dae Iehova hesiai henia karana ese moale ia havaraia bona vaira nega ai mauri namona do lau abia.”

19. Dahaka dainai ita abia dae momokani peroveta herevana ena kahana ginigabena do ia guguru?

¹⁹ Ita herevalaia bamona, Genese 3:15 ena peroveta herevana be hari ia guguru noho. Hahine ena natuna bona gaigai ena natuna ita diba vadaeni. Hahine natuna ena kahana ginigunana, Iesu, be ena aena geduna ena bero amo ia namo lou bona hari guba dekenai siahu bada King ai ia lao. Iehova ese hahine natuna ena kahana iharuana ia abia hidi karana be kahirakahira do ia hagugurua, idia be guba ai Iesu ida do idia lohia taudia. Peroveta herevana ena kahana ginigunana ia guguru vadaeni dainai, ita abia dae momokani peroveta herevana ena kahana ginigabena, unai be gaigai ena kwarana do ia moia patapata karana do ia guguru danu. Satani do idia hadikaia ore neganai, Dirava ena hesiai taudia be do idia moale bada! To unai ia do vara lasi lalonai, ita hesiku lasi. Iseda Dirava be ia koikoi diba lasi. Ia ese hahine natuna amo, “tanobada ena bese ibounai” dekenai hahenamo idauidau do ia mailaia.​—Gen. 22:18.